Ku bokona mu madisá

Ku bokona mu madisá

O kuila Jakobo ueza mu kala kukululu ua Mexiia mukonda dia kusumba o ujitu ua phande-kumbi kua Izaú?

Atangi a Madivulu Metu Ebhula

Atangi a Madivulu Metu Ebhula

O kuila mu Izalaiele io’ukulu, o muthu ua bhingile kukala mon’a phande-kumbi phala Mexiia kuiza ku muiji uê?

M’ukulu kiene ki tua kexile mu banza, kala ki zuela Jihebeleu 12:16. Iamba kuila, ‘Izaú ka bhanene valolo ku ima ikola,’ muene “ua sumbisile o ukota ue mu dilonga dimoxi dia kudia,” kua ndeng’iê Jakobo. Kienhiki, tua kexile mu xinganeka kuila, kioso Jakobo kia tambula ‘o ujitu ua ku kala mona phande-kumbi’, ua tambuile ue o ujitu ua kukala kukulu ua Mexiia.—Matesu 1:2, 16; Luka 3:23, 34.

Maji mu kutonginina dingi kiambote o misoso iamukuá ia Bibidia, tua mono kuila, phala diiala kukala kukulu ua Mexiia, ki kua bhingile kukala mona phande-kumbi. Tu tale-phe o misoso iii:

O mona a phande-kumbi a Jakobo, Lubene, ua mu vuala ni muhat’ê Liia. O mona phande-kumbi a Jakobo ni Lakele uexile Zuze. Kioso Lubene kia tele phánda, ua texi o ujitu uê ua phande-kumbi, Zuze muene ua tambuluile o ujitu iú. (Dimatekenu 29:31-35; 30:22-25; 35:22-26; 49:22-26; 1 Malunda 5:1, 2) Né kiki, Mexiia k’ejila bhu lombo dia Lubene mba Zuze. Muene uejila bhu lombo dia Juda, o mona ua kauana ua Jakobo ni Liia.—Dimatekenu 49:10.

Mu divulu dia Luka 3:32 muala majina a kukululu amukuá a Mexiia. Athu iá, nange exile ana a phande-kumbi. Mu kifika, Bouaji uexile tat’â Obede, Obede-phe uexile tat’â Jese.—Lute 4:17, 20-22; 1 Malunda 2:10-12.

O mon’â Jese a mu ixanene Davidi kexile mon’a ua phande kumbi. Muene uexile o kasule, bhu kaxi ka nake dia tuana. Maji, o Mexiia ua tundu bhu lombo dia Davidi. (1 Samuuele 16:10, 11; 17:12; Matesu 1:5, 6) Kiene ue kimoxi, sumbala Solomá kexile ue o mon’â phande kumbi ua Davidi, né kiki  muene ua kituka o kukululu ua kaiela-ku ua Mexiia.—2 Samuuele 3:2-5.

Kiki, ki kilombolola kuila, o an’a phande kumbi kexile ni valolo. O phande-kumbi, uexile mu tambula ikalakalu iavulu, o ana a mukuá ndenge. Ithangana iavulu, ene a tokalele kukala ku pholo dia muiji, ni kutambula mbandu jiiadi ku undundu.—Dimatekenu 43:33; Matendelelu 21:17; Josuué 17:1.

Maji o ujitu ua kukala mon’a phande-kumbi, a tenene ku u bhana muthu uéngi. Kioso Mbalahamu kia tumikisa Ijimaiele, Izake muene ua tambula o ujitu ua kukala mon’a phande-kumbi. (Dimatekenu 21:14-21; 22:2) Kala ki tua mono ku dimatekenu, Zuze ua tambuile ue kua Lubene o ujitu ua kukala o mona phande-kumbi.

Maji ihi ia mesenene kulonga poxolo Phaulu mu divulu dia Jihebeleu 12:16? O divulu didi, dizuela: “Di langienu ue phala ki bhu kale muthu u kala ndumbu, mba kifusa kala Ezaú ua sumbisile o ukota ue mu dilonga dimoxi dia kudia.”

Mu velusu jiji, Phaulu kexile mu zuela ia lungu ni jikuku ja Mexiia. Muene uexile mu bhana itendelesu ku Jikidistá. Ua a tangela: “Endenu mu jinjila ja kuiuka . . . phala mudienu ki mu kale muthu u tokoka o kiadi kia Nzambi.” Mu kidi, kiki kieji tena kubhita se a di tele mu ma-undumbu. (Jihebeleu 12:12-16) Se a bhangele kiki, eji kala kála Izaú ió ua ‘kambele kubhana valolo ku ima ikola’ ua mesenene ngó kusuua o jihanji jê ja xitu.

Kala kiexile o ima m’ukulu, nange sai ithangana Izaú uexile ni ujitu ua kuoha jisata bhu pholo ia Jihova. (Dimatekenu 8:20, 21; 12:7, 8; Jobe 1:4, 5) Maji Izaú ua suu ngó o jihânji jê, mukonda dia kiki, ua sumbisa o ujitu uê ua kukala mona phande-kumbi mu dilonga dimoxi dia kudia. Jihova ua kanene kiá kuila, o mbutu ia Mbalahamu ieji bhita mu ibhidi iavulu. Mu kiki, nange Izaú ka mesenene kubhita mu ibhidi iii. (Dimatekenu 15:13) Muene ua londekesa ue kuila, ka bhanene valolo ku ima ikola, kioso kia kazala ni ahatu aiadi abhezi a jinzambi ja makutu. Kiki kia bhekele dilamba ku jitata jê. (Dimatekenu 26:34, 35) Muene ka difuile ni Jakobo, mukonda Jakobo ua kazala ni muhatu uexile mu bheza o Nzambi ia kidi.—Dimatekenu 28:6, 7; 29:10-12, 18.

O milongi iii, i tu longa ihi ia lungu ni a kukululu a Mexiia? Sai iá exile ana phande-kumbi, a ka mukuá kana. O Jijudé akexile mu tendela kiambote ni kuxikina o kidi kiki. Kiebhi ki tuejiia? Mukonda ene ejidile kuila, Kristu uejile ku muiji ua Davidi, o mona kasule ua Jese.—Matesu 22:42, 43.