O kibatulu kietu kia Bibidia kia muvu ua 2018: “Oso a kinga kua Ngana-phe, a tambula nguzu iobhe.”​—IZAIA 40:31.

MIMBU: 152, 51

O MUENHU ku mundu iú ua bhonzo kiavulu. Mu kifika, jiphange jetu javulu, a mu tala hadi, mukonda dia mauhaxi. A mukuá, sumbala adiakime kiá, a bhingi hanji kulanga jitata jâ, a kuka. Sai iá, a thandanganha se kiebhi kia-nda tena kudikila o miji iâ. Tuejiia ue kuila, avulu a mu dibhana ni ibhidi ia bhitile kiá m’ukulu. Kiki ki a bhangesa kubhuila, kungastala kithangana ni kitadi kiavulu. Maji né kiki, Jihova ua-nda tu kuatekesa. Tuejiia kuila, ku hádia o ima ia-nda kala kiambote, mukonda kiene kia tu kanena Jihova. Sé phata, Jihova u sanguluka kiavulu mu kumona kuila, tuala ni kixikanu kiki kia dikota!

2. Kiebhi o izuelu iala mu divulu dia Izaia 40:29 i tu kuatekesa? Kiluezu kiebhi kiene mu ta athu avulu?

2 O kuila sai ithangana u divua kuila, o maka u ua mu bhita nau, a bhonzo kiavulu ku a batula? Se u divua kiki, k’eie ngó. Sai jiselevende ja Nzambi m’ukulu, a divuile ue kiki. (1 Jisobha 19:4; Jobe 7:7) Ihi ia a kuatekesa kukolokota? Ene a dielele  kuila, Jihova ueji kua bhana nguzu. O Bibidia iamba kuila, Nzambi “ubhana huiii kua ió uazôndo.” (Izaia 40:29) Maji, mu izuua ia lelu, sai jiselevende ja Nzambi, a banza kuila, phala kubatula kiambote o maka mâ, a bhinga kuxisa o kilunga kia Jihova. Mu veji dia kubanza kuila, o kusidivila Jihova dibesá dia dikota, ene a banza kuila kima kia bhonzo. Mu kiki, kene mu tanga dingi o Bibidia, kuia mu iônge, ni kuboka. Kiki kiene o kima kia mesena Satanaji.

3. (a) Ihi i tua tokala kubhanga phala Satanaji ka tu zozese? (b) Ihi i tua-nda dilonga mu milongi íii?

3 Diabhu ka mesena kuila, tu kala ni nguzu mu sidivisu ia Jihova. Muene uejiia kuila, o kixikanu kietu ki di bandekesa kioso ki tu bhanga dingi mu sidivisu ia Jihova. Mu kiki, kioso ki u bhuila, kana ku di sondolola kua Jihova. Zukama kua muene. Mu kiki o Bibidia i tu tangela: “Muène-muene u mi tenesa, u mi kuatesa.” (1 Phetele 5:10; Tiiaku 4:8) Mu milongi íii, tua-nda dilonga kiebhi o divulu dia Izaia 40:26-31, dilondekesa o kutena kua Jihova kua ku tu suinisa. Mu kusuluka, tua-nda mona ima iiadi i tena ku tu zozesa mu sidivisu ietu kua Jihova. Tua-nda dilonga ue kiebhi o kukaiela itumu ia Bibidia ku tena ku tu kuatekesa kukolokota.

OSO A KINGA KUA JIHOVA, A KALA NI NGUZU

4. Disá diebhi di tu longa o divulu dia Izaia 40:26?

Jihova u tena ku kubhana o nguzu i ua bhindamena phala ku kolokota mu maka oso-oso a moneka ku muenhu ué

4 Tanga Izaia 40:26. Sé-ku muthu uejiia se kuene jithéthembua ji kuxi. O ji ngijiie amba kuila, mu kibuka kia jithéthembua kia tu kondoloka a kixana Via-lactea muala 400 ja mazunda ndenge a jithéthembua. Né kiki, Jihova uejiia o majina ma jithéthembua joso. Iii, i tu longa ihi ia lungu ni Jihova? Se muene uejiia o majina a jithéthembua ja kambe o muenhu, xinganeka o valolo ia bhana kokué! Eie ua mu mu sidivila ki mukonda a ku jijidika kana, maji mukonda ua mu zolo. (Jisálamu 19:1, 3, 14) Tata ietu ia kazola uejiia ioso ia lungu n’eie. O Bibidia iamba: “Katé ni jindemba ku mítue ienu a ji’aleka.” (Matesu 10:30) Jihova ua mesena tuijiia kuila, muene “uejiia o izuua ia athu a iuka.” (Jisálamu 37:18) Sé phata, Jihova u mona o maka oso u tu bhita na-u, muene u tena ku kubhana o nguzu i ua bhindamena phala ku kolokota mu maka oso-oso a moneka ku muenhu ué.

5. Ihi i tena ku tu kuatekesa kudielela kuila, Jihova uala ni kutena kua soko phala ku tu suinisa?

5 Tanga Izaia 40:28. Jihova muene othó ia kutena. Xinganeka ngó o kutena kua bhana muene ku muanha. O ngijiie David Bodanis ua soneka uixi: ‘Tu ithangana tuoso, o muanha u muanga dingi nguzu mba kutena, o kubaza kua mazunda a ji bomba ja katunda ndenge.’ Sai dingi milongi ia mukuá ia londekesa kuila, o kutena ku tunda mu muanha mu ka kithangana kamoxi, ku tena ku dikila o athu oso mu ngongo mu 200.000 a mivu! Sé phata, Jihova,  ua bhana o kutena ku muanha, u tena ku tu bhana o nguzu phala kudibhana ni mak’etu.

6. Kiebhi o njungu ia Jezú ki i neme? O kuijiia o maka enhá ku tu kuatekesa kiebhi?

6 Tanga Izaia 40:29. Ku sidivila Jihova ku tu bhana dingi kisangu-sangu. Jezu uambela maxibulu mê uixi: “Di tuikienu jungu iami.” Mu suluka muene ua bandekesa: “Nda mu mone kutululuka . . . Mbata o ima iami ioso i ngi m’inda na-iu, ki i bhonzo; o kimbamba kiami ki ngi mi tuika, kia bhebhuluka.” (Matesu 11:28-30) Kidi muene! Sai bhabha tu divua kuila, tua bhuila kiavulu mu ola ia kuia mu kiônge mba mu sidivisu ia kuboka. Maji kiebhi ki tu divua kioso ki tu vutuka ku bhata? Tu divua kuila, nguzu iéza dingi phala ku dibhana ni maka ku muenhu uetu. Kidi muene, o jungu ia Jezú ia bhebhuluka.

7. Bhana phangu ilondekesa kuila, o izuelu iala mu divulu dia Matesu 11:28-30, ia kidi muene.

7 Sai phang’ietu ia muhatu, uala ni uhaxi u mu bhangesa kubhuila kiavulu. Muene uene mu kala ue ni kikote kia muxima ni ndolo ia mutué. Kiene ku mu bhonza kuia mu iônge. Né kiki, sai kizuua, muene ua bhange nguzu phala kuia mu kiônge. Muene ua soneka uixi: “O diskursu dia zuela ia lungu ni kikote kia muxima. O mulongexi ua lombolola o maka mu ukexilu uambote, katé a ngi bhangesa ku dila. A ngi lembalesa kuila o kiônge, kiene o kima ki nga bhindamene.” Muene ua sanguluka mu kubhanga nguzu phala kuia mu kiônge!

8, 9. Ihi ilombolola o izuelu ia poxolo Phaulu, kioso kiambe: “Kithangana ki nga mu bhuila, kiene kia mu ng’iza o nguzu?”

8 Tanga Izaia 40:30. Tu tena ku kala ni kuijiia kuavulu, maji ki tu tena kubhanga ima iavulu mu kutena kuetu ngó. Ki tu tokala ku jimba o kima kiki. Poxolo Phaulu ua tenene kubhanga ima iavulu, maji ka tenene kubhanga ioso ia mesenene. Kioso kia zuela kua Jihova kiebhi kiexile mu divua, Jihova ua muambela uixi: “Kuma nguzu iami i beta kota mu kutena mu ku bhuila kué.” Phaulu ua tendela ia mesenene ku mu tangela Jihova. Muene ua zuela uixi: “Kuma kithangana ki nga mu bhuila, kiene kia mu ng’iza o nguzu.” (2 Kolindo 12:7-10) Ihi ia mesenene kuzuela muene?

9 Phaulu ua tendela kuila, muene kexile ni kutena kua kubhanga ioso. Muene ua bhingile kikuatekesu kia muthu ua beta-o-kota mu kutena. O nzumbi ikola ia Nzambi ia tenene ku mu bhana kutena kioso kia kambele nguzu. Iene i tena kubhanga dingi. O nzumbi ikola ia Nzambi ieji bhana ue kutena kua Phaulu, phala ku kumbidila ikalakalu, mu nguzu iê muene keji tena ku i kumbidila. Ki tena ue kubhita n’etu. Kioso Jihova kia tu bhana o nzumbi iê ikola, tu kala ni kutena kuavulu!

10. Kiebhi Jihova kia kolokotesa Davidi mu ibhidi?

10 O mukuá Jisálamu Davidi, ua mono ue kiebhi nzumbi ikola ia mu kolesa. Muene uembi: “Kuma mu nguzu ié, Ngana, ngi kaia ilômbo ia jinguma, mu kutena kua Nzambi iami ngi tuka imbaka.” (Jisálamu 18:29) Sai bhabha o maka u tu bhita nau, a difu ni mulundu uonene u bhonza ku u banda, mukonda dia kiki, ki tu tena ku a batula mu nguzu ietu. Tu tena ngó ku ki bhanga ni kikuatekesu kia Jihova.

11. Kiebhi o nzumbi ikôla i tena ku tu kuatekesa kukolokota mu ibhidi?

11 Tanga Izaia 40:31. O jiholokoko ki jene mu tuka ngó mu nguzu iá. O munza ua tema, u bhangesa o holokoko kuimana ku diulu, sé ku beta o mabhabha. O kubhanga kiki, kukuatekesa o jiholokoko, ku tuka ola  javulu sé kubhuila. Mu kiki-phe, kioso ki u dibhana ni maka ku muenhu, sota kuxinganeka ku jiholokoko. Bhinga kua Jihova phala ku kubhana o kutena bhu kaxi ka ‘mukuatekexi, mba nzumbi Ikôla.’(Nzuá 14:26) Tu tena kubhinga o nzumbi ikola ia Jihova mu kithangana mba ola ioso-ioso, ku kizuua. Tua tokala ue kubhinga o kikuatekesu kia Jihova, kioso ki tu kala ni maka ni jiphange jetu mu kilunga. Maji mukonda diahi tu kala ni maka ni jiphange jetu?

12, 13. (a) Mukonda diahi sai bhabha kumoneka maka bhu kaxi ka jiphange? (b) O muenhu ua Zuze u tu longa ihi ia lungu ni Jihova?

12 Tuene mu kala ni maka mudietu, mukonda etu enioso tu akua ituxi. Sai bhabha tu zuela mba tu bhanga ima i luualesa akuetu, mba nange phang’ietu u zuela mba u bhanga kima, ki tu luualesa. Kiki ki tena kubhonza kiavulu. Maji o ima iii, i tu bhana kithangana kia kulondekesa o ufiiele uetu kua Jihova. Kiki ki bhita kiebhi? Mu kusota kukalakala kumoxi ni jiphange jetu ni kutululuka kuoso. Jihova ua a zolo né muene ni ukexilu uâ ua ituxi. Mukonda dia kiki, tua tokala ue ku a zola.

Jihova kehela Zuze, ka-nda kuehela ue (Tala o kaxi 13)

13 Jihova ka fidisa o jiselevende jê kubhita mu ibhidi. Tu tena kumona o kidi kiki, mu kudilonga ia bhitile ni Zuze. Kioso Zuze kiexile munzangala, o jiphange jê a mu kuatele difuba. Ene a mu sumbisa kala mubhika, anga a mu ambata mu ixi ia Ijitu. (Dimatekenu 37:28) Jihova ua mono ihi ia kexile mu bhita ni Zuze, muene ua divu ue kiaiibha mu kumona o selevende iê kubhita mu jiphaxi. Maji né kiki, Jihova ka fidisa o ima ioio kubhita. Mu kubhita thembu, Zuze a mu tatela kuila, ua zekele ni muhatu ua Potifale. Mukonda dia kiki, a mu tele mu kaleia, maji né kiki Jihova uehela Zuze kubhita mu ibhidi iii. O kuila Jihova ua bhanene dikunda kua Zuze? Kana. O Mikanda Ikola i tu tangela ia lungu ni Zuze: ‘Jihova uexile-nê; o ima ioso ia bhange, Jihova u i zediuisa, ie-nde kiambote.’—Dimatekenu 39:21-23.

14. Mbote iebhi i tu katula kioso ki tueha o njinda?

14 O phangu ia mukuá, ia Davidi, muene a mu talatala kiaiibha. Maji né kiki, o dikamba didi dia Nzambi kexile ni phonzo ku muxima. Muene ua soneka: “Eie-phe, ku njinda tunda-ku, u ehe o kutema; kuma o kuthathamana  ku ku bhangesa ngó kiaiibha.” (Jisálamu 37:8) O kima kia beta-o-kota ki tu bhangesa ‘ku tunda’ mba kulenga o njinda, o vondadi ietu ia kukaiela o phangu ia Jihova. Muene ‘ka tu bhange kala kia fuama mu ikuma ietu,’ maji u tu loloka. (Jisálamu 103:10) Sai dingi mbote i tu katula mu kulenga o kutema mba njinda. Mu kifika, o njinda i tu bhekela tesá, i tu fidisa ue ku hemena kiambote. Kioso ki tu kala ni njinda, ki tu tena kuxinganeka kiambote. Tu tena kuzuela mba kubhanga kima ki luualesa akuetu, maji mu kusuluka tu tena kudivua kiiabha mukonda dia kima ki tua zuela. Mukonda dia kiki-phe, kima kiambote kutululuka mba kubatâma. O Bibidia i zuela: “Muxima ua batama, ubhekela kudisanza mu mukutu.” (Jisabhu 14:30) Maji ihi i tua tokala o kubhanga kioso akuetu kia tu luualesa, ni kiebhi ki tu tena kubhanga o paze ni jiphange jetu? Tu tena ku kaiela o itendelesu i tu sanga mu Bibidia.

KIOSO JIPHANGE JETU KIA TU LUUALESA

15, 16. Ihi i tua tokala kubhanga kioso phang’ietu kia tu luualesa?

15 Tanga Efezo 4:26. Ki tu diuana kioso ki tu mona kuila, o athu mu ngongo, ene mu xonguena o abhezi a Jihova. Maji, kioso kia tu luualesa kuala phang’ietu mu kilunga mba ndandu ietu, tu divua dingi kiaiibha. Abha se ki tua mu tena kujimba o maka a bhiti? O kuila tua-nda kala ni njinda ia jiphange jetu, katé muene kioso kia-nda bhita mivu iavulu? O kuila tua-nda batula o maka ni kikuatekesu kia Bibidia? Se tu laleka kiavulu phala kuzuela ni phange ua tu luualesa, kia-nda tu bhonza dingi kubhanga o paze.

16 Abha se phange ua ku luualesa, ki ua mu tena kujimba o kima kia ku bhangele? Ihi i ua bhingi kubhanga phala mu kale ni kutululuka? Kia dianga, samba kua Jihova. Bhinga kua Nzambi, n’a ku kuatekese kuzuela kiambote ni phang’ié. Kuma eie u kamba dia Jihova, lembalala kuila, o phang’ié, dikamba dia Jihova ue. (Jisálamu 25:14) Nzambi ua mu zolo ue. Jihova u talatala o makamba mê ni henda ioso, muene ua mesena kuila, tu bhanga ue kiki. (Jisabhu 15:23; Matesu 7:12; Kolose 4:6) Kia kaiiadi, xinganeka kiambote mu ima i ua-nda zuela ni phang’ié. Kana kubanza kuila, phang’ié ua mesenene ku kuluualesa. Nange muene ua zuela ima iaiibha mukonda, muene mukua ituxi. Mba nange eie ku tendela kiambote o maka. Xikina ni muxima uoso kuila, nange eie uala ue ni kikuma. Eie u tena kumateka kuzuela ni muthu mu ku mu tangela: “Manhi se maza, eme nga thandanganhele, maji kioso ki ua zuela n’eme, nga divu . . . ” Kioso ki ua-nda zuela ni phang’ié, nange ki mua-nda kala hanji ni kutululuka. Maji né kiki, suluka mu kubhanga ioso phala mu kale ni paze. Tumbula o dijina dia phang’ié mu musambu. Bhinga kua Jihova phala ku mu besoala, ni ku ku kuatekesa kuxinganeka o idifua iambote ia phang’ié. Se u bhanga kiki, Nzambi ua-nda sanguluka kiavulu, mukonda ua mu bhanga nguzu phala kukala ni paze ni phang’ié, ió dikamba dia Jihova.

KIOSO KI TU DIVUA KIAIIBHA MUKONDA DIA ITUXI I TUA TELE M’UKULU

17. Kiebhi Jihova kia tu kuatekesa kukala dingi ni ukamba ni muene kioso ki tu ta kituxi? Mukonda diahi tua bhingi kuxikina o kikuatekesu kiki?

17 Saí iá a mona kuila, ka fuama kusidivila Jihova mukonda m’ukulu a tele kituxi. O ku  di tatela ku tena ku tu katula o kutululuka, ni nguzu. Sobha Davidi ua dibhanene ni maka iá. Muene uambe: “O ki ngedile ngi dixibha, ni ifuba imoxi ikala ni kutuza, ngi kala mu kumba izuua ioso. Kuma lukuaku lué lua ngi nemena muanha ni usuku.” Kisangusangu kia dikota kuijiia kuila, Davidi ua lungulula o ima, iú ua soto kubhanga o kima kia sangulukisa Jihova. Muene uambe dingi: “O ki ngedi ngi fisala kutondala kuami kua Jihova, eie kindala ua ngi loloka o kituxi ni mulonga.” (Jisálamu 32:3-5) Se eie ua te kituxi kia dikota, ejiia kuila Jihova uala polondo phala ku kuloloka. Muene ua mesena ku kukuatekesa kukala dingi ni ukamba uambote ni muene. Maji eie ua tokala kuxikina o kikuatekesu ki bhana Jihova, bhu kaxi ka tufunga. (Jisabhu 24:16; Tiiaku 5:13-15) Mu kiki-phe, bhanga lusolo! Bhanga kiki, ni u tambule o muenhu ua kalela-ku. Nange eie ua mono kuila, Jihova ua kuloloka o kituxi kié, maji sai bhabha mu kubhita thembu u mateka dingi kukala ni kikote ku muxima. Ihi i ua tokala kubhanga?

18. Kiebhi o phangu ia Phaulu i kuatekesa o athu a banza kuila, kala ni ujitu ua kubheza Jihova?

18 Sai ithangana poxolo Phaulu ua luualele kiavulu mukonda dia ituxi ia tele m’ukulu. Muene uambe: ‘Kuma ku Jipoxolo joso eme ngala-ku ngi ndenge, ki ngi fuama ku ng’ixana ngi Poxolo, mukonda eme nga zukutisile o kilunga kia Nzambi.’ Né kiki, muene uambe dingi: “Maji dioso o ditala-phe di ngeza, nga di bhixila mu kiadi kia Nzambi, o kiadi kiê kia ng’idikiza ki kiaii ngó.” (1 Kolindo 15:9, 10) Jihova uejidile kuila, Phaulu uexile mukua ituxi. Maji o kiadi mba henda ia Nzambi, ia londekesa kuila, Jihova ua mu solo, sumbala uexile mukua ituxi. Se ua diela o kituxi kié, ua tangela kua Jihova ni ku tufunga ioso ia bhiti, sé phata Jihova ua ku loloka. Dielela ni muxima uoso kuila, Jihova ua ku loloka, anga xikina o muloloki uê!—Izaia 55:6, 7.

19. Kiebhi o kibatulu kia muvu ua 2018? Mukonda diahi tua ki bhingi?

19 Kioso ki tua-nda ia ni kuzukama ku dizubhilu dia mundu iú, tua-nda dibhana dingi ni maka a mukuá. Maji tua bhingi kulembalala kuila, Jihova, ió “ubhana huii kua ió uazôndo, o ua kambe nguzu u mu bhana kusuína kuia ni ku di bandeza,” u tena ku ku bhana ioso i ua bhindamena n’u suluke ku mu sidivila ni muxima uoso. (Izaia 40:29; Jisálamu 55:22; 68:19) Ku muvu iú ua 2018, kioso ki tua-nda ia mu iônge ietu, tua-nda mona o kibatulu kietu kia muvu ni diambu: ‘Oso a Kinga Kua Jihova-phe, a Tambula Nguzu.’Izaia 40:31.