“Kima kia fuama, kia di uabhela kiambote, ki u sanga jiphange a takana mu muxima umoxi!”—JISÁLAMU 133:1.

MIMBU: 149, 30

MU KIZUUA kia 31 kia Katanu ka muvu ua 2018, mazunda a athu ku mundu uoso a-ndaia mu lembalasa ia kufua kua Kristu, i bhita veji imoxi ku muvu. Kioso kia-nda boba o dikumbi, o Jimbangi ja Jihova ni athu engi a-nda diongeka phala ku lembalala o sata ia Jezú. Mu mivu ioso, o Lembalasa ia kufua kua Jezú, iene mu ongeka athu avulu mu ngongo ioso.

1, 2. Kiônge kiebhi kia-nda bhita mu kizuua kia 31 kia mbeji ia Katanu ua 2018, ni mukonda diahi? (Tala o foto ia dianga.)

2 Mu kidi, Jihova ni Jezú a sanguluka mu ku mona mazunda a athu ku mundu uoso, kuia mu kiônge kia Lembalasa. O Bibidia i zuela ia lungu ni “mundu uavulu kana muthu u tena ku u tanga! Ua tundu mu ifuxi ioso, ni mu miji ioso, ni mu madiembu moso, ni mu madimi moso.” Ene a dikola, exi: “O kubhuluka kuetu ku tunda kua Nzambi ietu ua xikama bhu kiandu, ni kua Kambudi!” (Dijingunuinu 7:9, 10) Kisangusangu kia dikota, mivu ioso kumona athu avulu ku jingisa  Jihova ni Jezú, mukonda dia ima ia bhange!

3. Ibhuidisu iebhi i tua-nda tambuijila mu milongi íii?

3 Mu milongi iii, tua-nda sanga o itambuijilu ia ibhuidisu ia kaiela: (1) Kiebhi ki tu tena ku di sokejeka phala o kiônge kiki, ni mbote iebhi i tua-nda katula? (2) Mu ukexilu uebhi o Lembalasa ia kufua kua Jezú i tu bhangesa ku di zola dingi? (3) Ihi i tua tokala o kubhanga, phala tu di bhane kiambote ni jiphange? (4) O Lembalasa ia sukina-ku ia-nda bhita thembu kuxi?

KIEBHI KI TU TENA KU DI SOKEJEKA PHALA O KIÔNGE KIKI, NI MBOTE IEBHI I TUA-NDA KATULA?

4. Mukonda diahi tua tokala kuia mu Lembalasa?

Jihova ni Jezú ejiia kuila, ki kima kioso-kioso ki tu bhangesa kufonga mu kiônge kia Lembalasa

4 Mukonda diahi kima kiambote ku kala mu kiônge kia Lembalasa? Mukonda, ia lungu ni ubhezelu uetu kua Jihova. Tua tokala kuijiia ni kidi kioso kuila, Jihova ni mon’ê Jezú, a tala oso a bhanga nguzu phala kuia mu kiônge kiki kia beta-o-kota ku muvu. Tua mesena kuila, Jihova ni Jezú ejiia kuila, ki kima kioso-kioso ki tu bhangesa kufonga mu kiônge kia Lembalasa. Se o ibhangelu ietu ilondekesa kuila tua uabhela kiavulu o iônge ietu, Jihova ka-nda katula o dijina dietu mu “divulu” diê dia dilembalelu. O divulu dienhidi a dixana ue “divulu dia muenhu.” Mu divulu didi, muala o majina a athu oso ió, ku mesu ma Jihova a fuama ku tambula o muenhu ua kalelaku.—Malakiia 3:16; Dijingunuinu 20:15.

5. Mu jisemana ande dia kubhita o Lembalasa, kiebhi ki tu tena ‘kukolokota ku di lola se tuala mu kuxikana?’

5 Mu jisemana ande dia Lembalasa, tu tena ku xisa dingi kithangana phala kusamba ni kuxinganeka kiambote, kiebhi kiala o ukamba uetu ni Jihova. (Tanga 2 Kolindo 13:5.) Poxolo Phaulu uambela o Jikidistá mu kilunga kia Kolindo: ‘Di lodienu ni mu mone se muala mu kuxikana.’ Kiebhi ki tu tena kubhanga kiki? Tu tena ku dibhuidisa: ‘Eme ngi xikina ni kidi kioso kuila, kiki kiene o kilunga kia solo Jihova phala kubhanga o vondadi iê? O kuila nga mu bhanga ioso i ngi tena phala kuboka o njimbu iambote? O ibhangelu iami i londekesa muene kuma, nga xikina kuila tuala mu izuua ia sukidila-ku, ni kuila o mundu iu uaiibha ua Diabhu ua-nda bhua? O kidielelu kiami kua Jihova ni kua Jezú kia kolo muene uila ki kia kexile kioso kia ngi batizala?’ (Matesu 24:14; 2 Timote 3:1; Jihebeleu 3:14) Kuxinganeka mu itambuijilu ietu ku ibhuidisu iii kua-nda tu kuatekesa ‘ku suluka ni ku dilola’ se tuala muene mu kixikanu.

6. (a) Ihi i tua tokala kubhanga, phala kutambula o muenhu ua kalelaku? (b) Ihi iene mu bhanga o kafunga phala kudisokejeka? Kiebhi ki u tena kukaiela o phangu iê?

6 Tu tena ku di pelepalala phala o Lembalasa mu kutanga ni kuxinganeka milongi i jimbulula o Lembalasa. (Tanga Nzuá 3:16; 17:3.) Phala ku tambula o muenhu ua  kalela-ku, tua bhingi kuijiia Jihova ni kuxikina Mon’ê Jezú. Ande dia Lembalasa, tu tena ku dilonga milongi i tu kuatekesa kuzukama dingi kua muene. Kiki kiene kia bhange phang’ietu uala kiá kafunga mu thembu iavulu. Mu mivu iavulu, muene ua bhake milongi ia Mulangidi i zuela ia lungu ni Lembalasa, ni henda ia tu londekesa Jihova ni Jezú. Mu ku bhita ithangana, muene ua kexile mu bandekesa-ku milongi ia ubhe. Muene ua kexile mu tanga ni kuxinganeka ue ni muxima uoso mu kitangelu kia Bibidia kia lungu ni Lembalasa. O kafunga kaka uambe kuila, mu kubhanga kiki mivu ioso, muene ua dilongo ima ia ubhe. Kia beta-o-kota, o kudilonga kuku kua bandekesa o henda iê kua Jihova ni kua Jezú. Se u dilonga ue mu ukexilu iú, henda ié kua Jihova ni kua Jezú ia-ndaia ni ku dibandekesa dingi. Mu kiki, ua-nda londekesa kisakidilu ku ioso ia bhange ene, ua-nda katula dingi mbote mu Lembalasa.

O LEMBALASA IA KUFUA KUA JEZÚ I TU BHANGESA KU DI ZOLA DINGI

7. (a) Ihi ia bhingi Jezú mu musambu kioso kia zubha kudiongeka ni jipoxolo jê? (b) Ihi ilondekesa kuila Jihova ua tambuijila o musambu ua Jezú?

7 Mu usuku ua dianga ua bhangele Jezú o Lembalasa ia Kufua kuê, muene ua bhangele musambu ua katunda. Mu musambu, muene ua zuela ia lungu ni ukamba uê ua katunda ni Tat’ê. Jezú ua sambe ue phala o maxibulu mê kukala ni ukamba mudiâ, kala kiala muene ni tat’ê. (Tanga Nzuá 17:20, 21.) Jihova ua tambuijila o musambu ua Mon’ê ua kazola. O kiônge kia Lembalasa, kilondekesa kuila o Jimbangi ja Jihova ala ni ukamba uambote mudiâ. Mu kizuua kia Lembalasa, mu jixi joso, mazunda a athu a ikonda ioso, a diongeka phala kulondekesa kuila a xikina kuma Jihova ua tumikisa Mon’ê. Sai jixi, ki bhonza kumona o ambundu ku diongeka ni mindele, se a ki bhanga, akuâ ka a mono kiambote. Maji ki kiene ki mona Jihova ni Jezú. Kioso ki tu diongeka mu Lembalasa, ene a sanguluka kiavulu.

8. Njimbu iebhi ia bhana Jihova kua polofeta Izekiiele?

8 Kuma tu mundu ua Jihova, ki tu sasumuka mu kukala ni ukamba uambote mudietu. Bhu kaxi ka Izekiiele, Jihova ua kanena o ukamba uambote ua mundu uê. Muene ua tumu Izekiiele phala ku kuata mbangala jiiadi, imoxi ia ‘Judá’ ia mukua ia “Zuze.” Muene ua tokalele ku ji bunjika, ni i kale imoxi. (Tanga Izekiiele 37:15-17.) O mbandu “Atangi a Madivulu Metu Ebhula” mu Mulangidi ua Kavua ua 2016, ia jimbulula: “Bhu kaxi ka polofeta Izekiiele, Jihova ua kanena kuila, o mundu uê ueji vutuka mu Ixi ia a Kanene, ni kuila, eji dibunda dingi kumoxi kala kifuxi kimoxi. O kikanenu kiki kia zuela ué kuila, o athu eji sidivila Nzambi mu izuua isukidila-ku, eji dibunda ue kala kifuxi kimoxi.”

9. Kiebhi ki tuene mu mona o kikumbidilu kia kikanenu kia Izekiiele, mu kithangana kia Lembalasa ia kufua kua Jezú?

9 Tundé ku muvu ua 1919, Jihova ua mateka ku bhongolola ni kusokejeka o Jikidistá a a undu. Ene exile kala o mbangala ‘ia Judá.’ Mu ku bhita thembu o athu akexile ni kidielelu kia kutambula o muenhu ua kalelaku mu ixi, a mateka ue ku di bunda kumoxi ni Jikidistá a a undu. O athu iá akexile mu lombolola o mbangala ‘ia Zuze.’  Jihova ua kanena ku bunjika o ji mbangala jiiadi, n’a kale “mbangala imoxi ngó” bhu maku mê. (Izekiiele 37:19) Jihova ua bhangesa o Jikidistá a a undu ni “jimbudi jamukuá” kukala “kilunga kimoxi.” (Nzuá 10:16; Zakadiia 8:23) Lelu, o ibuka iiadi iii, ala kumoxi mu kusidivila Jihova. Ene ala ni Sobha imoxi ngó, Jezú Kristu. Mu kikanenu kia Izekiiele Nzambi ua mu ixana “mubhik’ami Davidi.” (Izekiiele 37:24, 25) Kioso ki tu diongeka mu ku lembalala o ufuilu ua Jezú, tu tena kumona o ukamba uambote ua ibuka iiadi iii ia tumbula Izekiiele. Maji ihi i tu tena o kubhanga phala kusuinisa o henda bhu kaxi ka mundu ua Nzambi?

IHI I TUA TOKALA O KUBHANGA PHALA TU DI BHANE KIAMBOTE NI JIPHANGE?

10. Ihi i tua tokala kubhanga phala tu di bhane kiambote ni jiphange?

10 Ihi i tua tokala kubhanga phala kukuatekesa o mundu ua Nzambi ku dibhana kiambote? Mu kubhanga ioso phala kukala tu athu a lenduka. Kioso kiexile mu ixi, Jezú ua tendelesa o maxibulu mê kukala athu a lenduka. (Matesu 23:12) Mu ngongo mu tuala, o athu a banza kuila, ene a beta-o-kota akuâ, ndenge. Maji se tu lenduka, tua-nda belesela ni kuxila o jiphange a langa o kilunga kia Nzambi. Se tu bhanga kiki, athu oso mu kilunga a-nda dibhana kiambote. Kia beta-o-kota, se tu lenduka, tua-nda  sangulukisa Nzambi, mukonda muene “u bhânga ni akua izala, u bhana-phe ujitu oso a batâma.”—1 Phetele 5:5.

11. Kiebhi o kuxinganeka ku mbolo ni ku vinhu, ku tu kuatekesa ku di bhana kiambote?

11 Kima kiebhi kia mukuá, ki tu tena kubhanga phala ku tu kuatekesa kudibhana kiambote? Tu tena kuxinganeka mu kilomboluelu kia mbolo ni vinhu i bhita mu kizuua kia Lembalasa. Tua bhingi kuxinganeka mu ima íii, ande dia Lembalasa, benge-benge mu kizuua kieniókio. (1 Kolindo 11:23-25) O mbolo ia kambe felemendu, ilombolola o mukutu ua iuka ua Jezú, ua u bhana kala sata. O vinhu, ilombolola o manhinga mê. Maji ki tu tokala kutendela ngó o maka enhá. Tua bhingi kulembalala kuila, o sata ia kukula ia Jezú, ilondekesa ima iiadi ia beta-o-kota. Kia dianga, mu vondadi iê Jihova ua tu bhana Mon’ê. Kaiiadi, ni muxima uoso, Jezú ua bhana o muenhu uê kokuetu. Se tu xinganeka mu henda ia tu londekesa, tua-nda kua zola dingi. O henda ietu kua Jihova ia-nda tu kuatekesa ku di bhana kiambote.

Kioso ki tu loloka akuetu, tu kuatekesa o jiphange ku di bhana kiambote (Tala o kaxi 12, 13)

12. Mu musoso ua sobha ni mubhika, kiebhi Jezú kia londekesa kuila, Jihova ua mesena kuila, tu loloka o jiphange jetu?

12 Ihi dingi i tua tokala kubhanga phala tu dibhane kiambote? Tu tena kuloloka akuetu ni muxima uoso. Kioso ki tu bhanga kiki, tu londekesa o kisakidilu kietu kua Jihova mu ku tu loloka o ituxi ietu, bhu kaxi ka sata ia Jezú. Phala kulondekesa se mukonda diahi, kima kiambote kuloloka muthu, Jezú ua tange musoso ua lungu ni sobha ni mubhika. Tua ku dióndo, tanga o divulu dia Matesu 18:23-34, anga u dibhuidisa: ‘O kuila nga mesena muene kukumbidila o disá dia longo Jezú? O kuila ngi sota kutendela o jiphange jami ni kua londekesa muanhu? O kuila ngala muene polondo phala kuloloka o muthu ua ngi xingi?’ Mu kidi, sai bhabha athu a ta kituxi kia dikota. Mu ithangana iii, kibhonza kiavulu kuloloka. Maji o musoso ua Jezú u tu longa se ihi ia mesena Jihova kokuetu. (Tanga Matesu 18:35.) Jezú ua londekesa kuila, Jihova ka-nda tu loloka se ki tu loloka o jiphange jetu kioso kia diela ni muxima uoso. Tua bhingi kuxinganeka kiavulu ku maka iá. Phala tu dibhane kiambote mu kilunga ni tu takane mu muxima umoxi, tua bhingi kuloloka akuetu kála kia tu longo Jezú.

13. Kiebhi ki tu kuatekesa o jiphange jetu ku di bhana kiambote, kioso ki tu kala ni kutululuka ni akuetu?

13 Kioso ki tu loloka akuetu, tu langa o ku tululuka ni jiphange jetu. Poxolo Phaulu uambe uixi tua tokala ku bhanga nguzu phala ku kala kiambote ni ku tululuka ni akuetu. (Efezo 4:3) Mu kithangana kia Lembalasa, benge-benge mu usuku ua kiônge kia Lembalasa, xinganeka kiebhi ki uene mu talatala akuenu. Dibhuidise: ‘O kuila a ngi jiia kuma, ngi muthu u tululuka né muene kia ngi luualesa? O kuila o jiphange a tena kumona kuila ngi bhanga ioso phala kutululuka ni kudibhana kiambote ni akuetu?’ Tua tokala kuxinganeka mu ibhuidisu iii sé ku fula.

14. Kiebhi ki tu tena kukolokota mu ku di londekesa o henda?

14 Kiebhi o kima kia kauana kia-nda tu kuatekesa kudibhana kiambote? O kulondekesa o henda kala ki bhanga Jihova. (1 Nzuá 4:8) Etu ki tu tokala kuzuela: “Eme ngi tena kuzola phange jami, maji kuala iá, ku di tendela kiá ngó.” Se tu xinganeka kiki,  ki tua mu kaiela o kitendelesu kia Phaulu kioso kiambe: “Mu londekesa jinga o henda ienu mu ku di kuatekesa kala muthu ni mukuâ.” (Efezo 4:2) Phaulu kambe ngó “mu ku di kuatekesa kala muthu ni mukuâ,” maji uambe “mu londekesa jinga henda.” Ki ki difu kana. Mu kilunga kietu, muala athu a idifua iavulu. Maji Jihova muene ua bheka oso mu kilunga. (Nzuá 6:44) Sé phata, muene ua mono ima iambote ku mixima iâ. Se Nzambi ua zolo o jiphange jetu, o kuila ki tua bhingi ue kua zola? Tua tokala kubhanga nguzu, phala kua zola kala kia mesena Jihova.—1 Nzuá 4:20, 21.

O LEMBALASA IA SUKINA-KU IA-NDA BHITA THEMBU KUXI?

15. O Lembalasa ia sukina-ku ia-nda bhita thembu kuxi?

15 Sai kizuua kua-nda bhita o Lembalasa ia sukina-ku. Kiebhi ki tuejiia o maka enhá? Poxolo Phaulu ua tangela o Jikidistá a a undu kuila kioso ene kia lembalala o kufua kua Jezú, a mu “bhana o jingolokela ja kufua kua Ngana, katé hinu ki a kèza muène.” (1 Kolindo 11:26) Mu kikanenu kiê kia lungu ni dizubhilu dia mundu, Jezú ua zuela ue ia lungu ni ‘kuíza’ kuê. Kioso kia zuela ia lungu ni hadi ia dikota, ieji kuiza, muene uambe: “Kiene kiua kia kà tukuluka o kijimbuete kia Mon’a Muthu ku diulu. Maji ioso mu ngongo anga i kala mu dila, kia kà mona Mon’a Muthu iú uiza ku matuta ma diulu, ni nguzu ni fuma iavulu. Muène ua kà tuma o ji-anju jê ni dízui dia koloneta, anga ji bhongolola athu’ê ósole ku itembu iuana, tunde kua tundu o diulu katé ku dia suku.” (Matesu 24:29-31) Jezú ua-nda “bhongolola athu’ê ósole,” kioso kia-nda kuambata o Jikidistá joso a a undu a-nda kala hanji mu ixi. Kiki kia-nda bhita kioso kia-nda bhua o hadi ia dikota, maji ande dia kumateka o ita ia Alumajedone. Mu ita íii, Jezú, kumoxi ni 144.000, a-nda luua ita ni jisobha ja ngongo, anga o jisobha a-nda ji tolola. (Dijingunuinu 17:12-14) O Lembalasa ia sukina-ku ia-nda bhita ande dia Jezú kuiza phala kuambata ku diulu, o Jikidistá a a undu a-nda kala hanji mu ixi.

16. Mukonda diahi ua mesena kuia mu Lembalasa ia Kufua kua Jezú ku muvu iú?

16 Bhanga ioso phala kuia mu Lembalasa mu kizuua kia 31 kia mbeji ia Katanu ua 2018. Bhinga kua Jihova phala ku kukuatekesa kubhanga o mbandu ié phala tu dibhana kiambote kala tu mundu uê. (Tanga Jisálamu 133:1.) Sai thembu tua-nda ia mu Lembalasa mu veji ia sukina. Katé ki bhixila o thembu íii, tua tokala kubhanga ioso phala kuia mu Lembalasa ni kulondekesa kuila, tu sanguluka mu ku dibunda kumoxi ni jiphange jetu.