JIHOVA ua tumina poxolo Phaulu ku soneka ia lungu ni divua dia idifua i tu bhana Nzambi bhu kaxi ka nzumbi iê ikola. (Ngalásia 5:​22, 23) O idifua iii, i bhanga mbandu ku ukexilu ua ubhe ua tokala kukala nau o Jikidistá lelu. * (Tala ku luiji.) (Kolose 3:10) O muxi uima dingi o ibundu, kioso kia u tekela kiambote. Kiene kimoxi ue, o muthu ua-nda tena kukala ni idifua ioso iii se uehela o nzumbi ikola ku muendesa.​—⁠Jisálamu 1:​1-3.

O kidifua kia dianga kia tumbula Phaulu, o henda. Iebhi o valolo ia kidifua kiki? Poxolo Phaulu ua tambuijila, uixi: “Se . . . ngi kamba o henda, ki ngi kala ngi kima.” (1 Kolindo 13:⁠2) Maji o henda ihi? Ihi i tua tokala kubhanga phala kukala ni henda? Kiebhi ki tu tena ku i londekesa?

O HENDA IHI?

Mu madimi avulu, ki bhonza kujimbulula o kizuelu, henda. Maji o Bibidia i tu lomboluela kiambote o ima i bhanga o muthu u kala ni henda. Mu kifika, i zuela: “O henda i kolokota mu jihadi, i lenduka. . . i sangulukila o kidi.” O henda i “xididika mu ima ioso ni kuxikana, i dielela mu ima ioso, i bhalakata mu ima ioso.” Mu kiki, o mukua henda, u suua o ibhindamu ia akuâ, u londekesa o ufiiele ku makamba mê. Maji se muthu u kamba o henda, muene u kituka mukua difuba, mukua ukumbu, mukua kudizangeleka, muene ka xikina ue kuloloka akuâ. Ki tua mesena kulondekesa o idifua íii ia bolo, maji tua mesena kulondekesa o henda ia kidi. O Bibidia iamba dingi ia lungu ni henda: “Ki iene kusota ngo o kiê.”​—⁠1 Kolindo 13:​4-8.

JIHOVA NI JEZÚ A BHANA O PHANGU IA BETA-O-KOTA IA KULONDEKESA O HENDA

“Nzambi henda.” (1 Nzuá 4:⁠8) O ibhangelu iê ioso ilondekesa o kidi kiki. O ku tumikisa mon’ê mu ixi phala kutala hadi ni ku fuila o ituxi ietu, kiene o kilondekesu kia beta-o-kota kia henda ia Jihova. Poxolo Nzuá uambe: “Muene mua tu tukuluila Nzambi o henda iê ia tu kuatela, Nzambi kia katula Mon’ê umoxi-èlele, anga u mu tumikisa mungongo, phala etu ni tu mone muenhu kua muène. Muenhumu mua kala o henda, mu kuila: Etu ki etu tua zola Nzambi, maji muène-ku ua tu zola, iú ua tumikisa Mon’ê mu kukala kiluuluilu kia ku tu lolokesa o ituxi ietu.” (1 Nzuá 4:​9, 10) Kuma Nzambi henda, muene u loloka o ituxi ietu, u tu bhana ue muenhu ni kidielelu.

Jezú ua londekesa o henda, mu kubhana o muenhu uê kala sata phala kubhanga o vondadi ia Nzambi. O poxolo Phaulu uambe uixi: “Kuma-phe Jezú Kristu ua bhange kioso kia uabhela Nzambi, etu a tu zelesa ku ituxi mukonda dia kilumbu kia mukutu ua Jezú Kristu, kia bhana lumoxi ngó kuabhu.” (Jihebeleu 10:​9, 10) Sé-ku muthu mu ngongo u tena kulondekesa o henda kala kia bhange Jezú. Muene uambe uixi: “Kana-ku henda ia tundu iíi, se muthu u bhana muenhu uê bhu kididi kia makamba-mê.” (Nzuá 15:13)  O kuila athu akuâ ituxi a tena kukaiela o henda ia londekesa Jihova ni Jezu? A tena! Tua-nda dilonga kiebhi ki tu tena ku ki bhanga!

‘LONDEKESE-NU JINGA O HENDA’

Phaulu ua tu suinisa: “Endenu-phe ni kufikisa Nzambi, kala mu an’ê a muxima. Mienhu ienu i kale jinge mu henda kala henda ia Kristu ia tu kuatela, iu ua tenéne ku di bhakula bhu kididi kietu.” (Efezo 5:​1, 2) Ihi ilombolola o izuelu ‘londekese-nu jinga o henda?’ Ilombolola kuila, tua tokala kulondekesa o henda mu ithangana ioso. Ki ku zuela ngó kuila, tua zolo akuetu. Maji tu londekesa o henda ietu mu ima i tu bhanga. Poxolo Nzuá ua soneka: “Enu, tata, tuana tuami! O henda ietu i tu di zola na-iu, ki i kale ia maka ngó mu kuzuela mba izuelu ia hatu i tunga ngó bhu dimi. Maji ia fuama i kala henda ia kidi, i dilondekeza jinga mu ima ioso i tu bhanga.” (1 Nzuá 3:18) Mu kifika, tu boka o “Njimbu . . . Iambote ia Utuminu” mukonda tua zolo Jihova ni athu. (Matesu 24:14; Luka 10:27) Etu tu ‘londekesa o henda,’ kioso ki tu kala ni muanhu, tu bhanga o mbote ni kuloloka akuetu. Tuene mu kaiela o kitendelesu kia Bibidia, kiambe: “Kala muthu a loloke mukuá kala kioso Nzambi kia mi loloka enu, kiene ue ki mu bhanga jinga.”​—⁠Kolose 3:⁠13.

Maji o kubazela mba kubhana itendelesu ku akuetu, ki kulombolola kukamba o henda. Mu kifika, sai jitata a bhanga ioso i bhinga o mona, mukonda ka mesena ku a luualesa. Maji o tata ua zolo o mona, u mu bazela kioso kia tondala. Kiene kimoxi ue, Nzambi henda, maji “Ngana uoso ua mu zola u mu [bazela].” (Jihebeleu 12:⁠6) Mu kiki, kioso kia tu bazela, a mu tu londekesa henda. (Jisabhu 3:​11, 12) Lembalala kuila, etu enioso tu akua ituxi, mukonda dia kiki sai ithangana ki tu londekesa henda. Tua tokala kubhanga nguzu, phala kulondekesa o henda ku akuetu. Kiebhi ki tu tena kubhanga kiki? Tua-nda mona ima itatu ia-nda tu kuatekesa.

IHI I TUA TOKALA KUBHANGA PHALA KUKALA NI HENDA?

Kia dianga, bhinga kua Nzambi o nzumbi iê ikola i kuatekesa kulondekesa o henda. Jezú uambe kuila, Jihova u bhana ‘o nzumbi Ikôla kua ió oso a mu bhinga.’ (Luka 11:13) Mukonda dia kiki, tu tena kuijiia kuila, se tu samba mu kubhinga o nzumbi ikola, ni kuehela o nzumbi iii, ku tuendesa, tua-nda kala akua henda. (Ngalásia 5:16) Mu kifika, se u kafunga, u tena kubhinga o nzumbi ikola ia Nzambi, phala kukuatekesa kioso ki u bhana itendelesu ku jiphange, bhu kaxi ka Bibidia. Se u tata, u tena kubhinga o nzumbi ikola ia Nzambi, n’a ku kuatekese kubazela o tuana tuê ni henda, mu veji dia kubhanga kiki ni njinda.

Kia kaiadi, xinganeka kiebhi Jezú kia londekesa henda, né muene kia mu talatala kiaiibha. (1 Phetele 2:​21, 23) Se muthu u ku xinga, mba u ku talatala kiaiibha, dibhuidise: ‘Ihi ieji bhanga Jezú?’ Sai phange ia muhatu a mu ixana Leigh ua mono kuila, o kubhanga o kibhuidisu kiki, kua mu kuatekesa kuxinganeka kiambote a-nde dia kubhanga kima kioso-kioso. Muene uambe: “Sai kizuua, koleka iami ia sidivisu ua tumikisa njimbu iaiibha ku jikoleka joso ia lungu n’eme ni kikalakalu kiami. Nga divuile kiaiibha. Maji nga dibhuidisa: ‘Kiebhi ki ngi tena kukaiela o phangu ia Jezú?’ Kioso ki nga xinganeka mu ima ieji bhanga Jezú, ki nga te dingi o muxima mu maka enhó. Mu kubhita thembu, nga mono kuila, o koleka iami ua kexile ni uhaxi ua bhonzo, ua kexile ku mu thandanganhesa kiavulu. Mukonda dia kiki, nga mono kuila, nange muene ka xinganekene kiambote ande dia kusoneka o mukanda. Kuxinganeka mu phangu ia henda ia Jezú, né muene kia ngi xonguena, kua ngi kuatekesa kulondekesa henda ku koleka iami.” Se tu kaiela o phangu ia Jezú, tua-nda londekesa henda ku akuetu mu ithangana ioso.

Katatu, londekesa o henda mu kusuua o ibhindamu ia akuenu. Iii iene o henda ia tokala kulondekesa o akaiedi a kidi a Kristu. (Nzuá 13:​34, 35) Kioso kiexile mu ixi Jezú ua londekesa o henda iii, iú ua tu xila phangu iambote phala etu ku i kaiela. Mu ukexilu uebhi muene ua tu xila phangu? Mu kuxikina ua xisa o diulu, iú “ua di tolesa” phala o mbote ietu, “katé mu kufua.” (Filipe 2:​5-8) Kioso ki tu londekesa o henda kala Jezú, tua-nda kala ni ibanzelu ia difu ni ibanzelu iê.  Mukonda dia kiki, tua-nda sota kuta ku pholo o ibhindamu ia akuetu.

MBOTE IJILA MU KULONDEKESA O HENDA

Kioso ki tu londekesa o henda , tu katula mbote iavulu. Tu mone mbote jiiadi:

Mbote iebhi i tu katula mu kulondekesa o henda?

  • O KUDIZOLA NI JIPHANGE JETU KU MUNDU UOSO: Mukonda dia henda ietu, tuejiia kuila, kabasa kididi bhu tuia, o jiphange jetu a-nda tu tambulula kiambote. Kima kiambote o kuijiia kuila, eie a ku zolo kuala “o jiphange . . . ja xikana, jala mu ngongo.” (1 Phetele 5:⁠9) Tu tena ngó kusanga o henda íii, bhu kaxi ka mundu ua Nzambi.

  • KUTULULUKA: O ku di “londekesa jinga o henda” mudietu, ku tu kuatekesa kubheza Jihova “mu dijikita diê dia paze.” (Efezo 4:​2, 3) Tuene mu mona o kutululuka kuku, mu iônge ia makota ni mu iônge ia ilunga. O kuila, ki u xikina kuila, o kutululuka kuku tu ku sanga ngó mu kaxi ka jiselevende ja Nzambi? (Jisálamu 119:165; Izaia 54:13) Se tu kala ni paze ni akuetu, tu londekesa kuila, tua di zolo muene mu kidi. Kiki, ki sangulukisa kiavulu Tat’etu mu diulu.​—⁠Jisálamu 133:​1-3; Matesu 5:⁠9.

“O HENDA-PHE I TUNGISA”

Phaulu uambe: “O henda-phe i tungisa.” (1 Kolindo 8:⁠1) Ihi ilombolola o izuelu íii? O divulu dia 1 Kolindo kibatulu 13, sai athu a di xana “Sálamu ia Henda.” Mu divulu didi, Phaulu ua jimbulula kiebhi o henda i tungisa. O muthu mukua henda u sota o mbote ia akuâ. Muene u mesena kulanga o ibhindamu ia akuâ. (1 Kolindo 10:24; 13:⁠5) Kuma o henda i kolokota mu jihadi, i lenduka, ki iene izala, mba ukumbu, i kuatekesa kutungisa miji ni kubhangesa o jiphange kudibhana kiambote mu kilunga.​—⁠Kolose 3:⁠14.

Kuene maukexilu avulu u tu tena kulondekesa o henda ku akuetu. Maji, o henda ietu kua Nzambi, iene o henda ia beta-o-kota. Mukonda diahi? Mukonda, o henda ietu kua Nzambi i tu bhangesa kukala kiambote! Athu a maukexilu oso, ikonda, madimi oso a mu sidivila kumoxi Jihova, mu ku mu bheza “ni muxima umoxi.” (Sofoniia 3:⁠9) Mu kiki, tu kolokotienu mu kulondekesa o kidifua kiki, ki tu bhana o nzumbi ikola ia Nzambi.

^ kax. 2 Iii iene o milongi ia dianga ia divua dia idifua ia-nda lombolola o Mulangidi.