Ku bokona mu madisá

Ku bokona mu madisá

 IMA IETU IO BHAKELE

“Tua-nda Kala Dingi ni Kiônge Kia Dikota Kizuua Kuxi?”

“Tua-nda Kala Dingi ni Kiônge Kia Dikota Kizuua Kuxi?”

MU MBEJI ia Kamoxi ka muvu ua 1932, mu ixi ia México, mua kexile kazunda kamoxi ka athu ndenge. Kua bhitile ngó semana imoxi, tundé kia iudika o iselekete ia ikoka. Maji, kindala athu a sanguluka ni kima kiéngi. Akua mitelembe, a mu kingila muthu ua fuma kubhixila mu kididi kia ji komboio. Nanhi o muthu muenhú? O muthu iú o phange Joseph F. Rutherford, o mutuameni ua Sociedade Torre de Vigia ia Estados Unidos da América. O Jimbangi ja Jihova a mu kingila ue Phange Rutherford mu kididi kieniókio. Muene ua mu kuíza phala o kiônge kia dikota.

O divulu A Idade de Ouro diambe: “O kiônge kiki kia dikota kia bhiti muene kiambote. Kia-nda kuatekesa kiavulu o athu a tungu mu ixi ia México, kuijiia o kilunga kia Nzambi.” Maji, mu kiônge mua kexile ngó 150 a athu. Mukonda diahi akua México a bhingile o kiônge kiki?

Ande dia kiônge kiki, athu ofele a tungu mu ixi ia México ejidile o kidi kia lungu ni Jihova. Tundé ku muvu 1919, o jiphange akexile mu bhanga iônge ia makota, maji kioso kia bhiti o muvu iú, o ilunga ia kexile mu tola dingi. Kioso kia bhange o filiiale mu ixi ia México, ku muvu ua 1929, o jiphange a banzele kuila, o ilunga ieji dibandekesa. Maji, kuexile ibhidi phala ku i tolola. O jiphange ku Filiiale a tendelesa o aboki a thembu ioso, phala ka fungise o maka a lungu ni Nzambi ni mauenji. Sai muboki ua thembu ioso, ua luualele kiavulu, mukonda dia kiki, ua jikula o kibuka kiê kia kudilonga o Bibidia. Mu kithangana kieniókio, o mutuameni ua filiiale, ua te kituxi kia dikota, iu a mu kaie. O Jimbangi ja Jihova mu ixi ia México a bhindamene kisuinisu.

Kioso kia a kundu, Phange Rutherford ua suinisa kiavulu o jiphange ni madiskursu aiiadi. Muene ua bhange madiskursu atanu a bhiti mu mitelembe ia ifofo. Kiexile o veji ia dianga, kia jiphange kuboka o njimbu iambote bhu kaxi ka mutelembe, mu ixi ia México. Kioso kia zubha o kiônge, a tula muthu uéngi phala ku tuamena mu kikalakalu kia filiiale. O Jimbangi ja Jihova, akexile dingi ni nguzu iavulu phala kuboka o njimbu iambote. Ni kikuatekesu kia Jihova, a tenene kukolokota.

Kiônge kia dikota mu ixi ia México kia bhiti ku muvu ua 1941

Mu muvu ua 1933, o jiphange a bhange iônge iadi ia makota. Ia bhiti mu mbanza ia Veracruz ni ia México. O jiphange a kalakala kiavulu mu kuboka, anga a katula mbote javulu. Mu kifika, ku muvu ua 1931, kuexile ngó 82 a aboki. Maji, ku muvu ua 1941, kuexile 800 ja aboki, ndenge! Kuexile midi ia athu ndenge, mu ixi ia México phala o Kiônge kia Dikota, mu muvu ua 1941.

 “O IKOKA IEZALA NI JIMBANGI JA JIHOVA”

Ku muvu ua 1943, o Jimbangi ja Jihova exana o athu phala kuia mu kiônge kia dikota ni diambu: “Nação Livre.” O kiônge kiki, kieji bhita mu 12 kia jimbanza ja ixi ia México. * (Tala ku luiji.) Ene a kalakala ni ji kalatá ja makota. Ene a kexile mu leka o ji kalatá ku pheto, ni ku dikunda. O Jimbangi ja Jihova, a matekene kukalakala mu ukexilu iú ku muvu ua 1936.

Foto ilondekesa o jiphange a te o jikalatá bhu pheto ni ku dikunda, mu kuboka mu ixi ia México ku muvu ua 1944

O kukalakala ni jikalatá, kua bhangesa o athu kumesena kuijiia o Jimbangi. Sai kadivulu kazuela ia lungu ni kiônge kia dikota: “Mu kizuua kia dianga, a suinisa o Jimbangi ja Jihova kuixana dingi athu. Mu kizuua kia kaiela, ki bhu kexile dingi kididi phala o athu.” O akuâ ngeleja ia Katolika ka divu kiambote mu kumona o kikalakalu kietu, mukonda dia kiki, a mateka kulongolola o Jimbangi ja Jihova. Sumbala ni ima iii, o jiphange a suluka ni kuixana o athu phala o kiônge kia dikota. O kadivulu kambe dingi: “O athu oso mu mbanza a sasumuka mu kumona o jiphange ni jikalatá bhu phetu ” O kadivulu ka londekesele foto ia jiphange jiiadi a kexile mu boka. O milongi ia zuelele: “O ikoka iezala ni Jimbangi.”

“JIKAXA JA MADIVULU JA KITUKA JIHAMA JAMBOTE”

Mu thembu ienioio, o jiphange a bhingile nguzu iavulu phala kuia mu iônge ia makota ia kexile mu bhita ku México. O jiphange akexile mu tunda ku maxokololo, phala kuia ku mbanza, ene akexile mu kuendela bhoxi. Sai jiphange a zuela, exi: “Mu mbanza ietu, ki muala makalu mba ji komboio, phala kuia mu iônge ia makota.” Mukonda dia kiki, o jiphange ja kexile kupholo, akexile mu kuendela mu ji jumendu, phala kuia katé mu kididi kia kukuatela o ji komboio ja kexile muia mu mbanza mua kexile mu bhita o iônge ia makota.

Jiphange javulu exile jingadiama, ene kexile ni kitadi phala kuia mu kiônge kia dikota. Kia kexile mu bhixila mu mbanza, o jiphange akexile mu a zalela ku mabhata mâ, ni ku a londekesa o henda. Jiphange ja mukuá, akexile mu zeka mu Ididi ia Ubhezelu. Sai kizuua, mukonda dia kukamba kididi, 90 a jiphange a bhiti o usuku ku filiiale, ene a zeka ku jikaxa ja madivulu. O divulu Anuário ia Jimbangi ja Jihova, dia zuela kuila, o jiphange a sakidila mu ku zeka ku jikaxa, “mukonda kia betele kota, mu veji dia kuzeka bhoxi.”

O jiphange jenhojo akexile polondo phala kuia mu kiônge kia dikota, ni kukala kumoxi ni jiphange jâ. Lelu, kuene 850.000 ndenge, a Jimbangi ja Jihova, mu ixi ia México, ene uá, a sakidila kiavulu o iônge ienioio. * (Tala ku luiji.) Ku muvu ua 1949 o jiphange a soneka mukanda. Ene ambe: “O jiphange ene mu dibhana ni ibhidi iavulu ku muenhu, maji ene ka bhuila a kolokota mu ufiiele uâ kua Jihova. Ene a suluka mu kuzuela ia lungu ni kiônge kia dikota, anga a dibhuidisa: “Tua-nda kala dingi ni kiônge kia dikota kizuua kuxi?” Tuejiia ni kidi kioso kuila, lelu o jiphange ene mu divua hanji kiki.”​​—⁠ Ima ietu io bhakele América Central.

^ kax. 9 O divulu Anuário ia 1944, ia zuelele kuila, o kiônge kieniókio kia bhangesa o athu mu ixi ia México kuijiia kiambote o Jimbangi ja Jihova.

^ kax. 14 Ku muvu ua 2016, kua moneka 2.262.646 a athu mu Lembalasa ia Kufua kua Jezú mu ixi ia México.