IHI I TU LONGA O IBHANGELU

Xinganeka ngó o ukamba u kala bhu kaxi ka ana jingóngo. Ene ala ni ukamba wambote mudyá. Sayi jingongo ejiya mwene kyebhi kya tena kuzwela kima ku muthu u tendela kyambote o maka a mesena, se ku a jimbulwila kyavulu,” kiki kyene kyambe Segal, o diretora ya Centro de Estudos sobre Gemios. Sayi muhatu wa jimbulula o ukamba we ni phang’ê ya jingongo ni izwelu yiyi: “Etu twejiya ima yoso ya lungu n’etu.”

Ihi ya lungu ni kibanzelu kiki? Akwa kutokwesa amba kwila, phala o jingongo kudifwa kyavulu ki kale o pholo wixi o idifwa, nange kya lungu ni kididi ni jitata.

XINGANEKA: O mubhangi wa ima yoso yiyi, ya unjimu, wa twijiya kyambote muthu woso-woso ndenge. Phala kukolesa o kibanzelu kiki, o mukwa jisálamu Davidi wambe: “Eye-mwène wa ngi bhanga mixima moxi; eye wa ngi tunga jixitu mu vumu dya mam’etu. Ifuba yami eye kwa kambela ku i mona, kyoso ki wa ngi bhanga ufunu mu kaswekèdya . . . Mesu mé ma ngi mono mukutu wami, kyoso ngó kiluwa u di umba; o indyandu yami wa i soneka mu divulu dyé.” (Jisálamu. 139:13, 15, 16) Nzambi mwene ngó wejiya kyambote o ukexilu wetu moxi, o ibhindamu yetu ni kyebhi kya tena ku tu kwatekesa. Nzambi, o muthu wa twijiya kyambote u tu dyelelesa kwila, wejiya kyambote o ibhindamu yetu yoso.

IHI I TU LONGA O BIBIDYA YA LUNGU NI UNJIMU WA NZAMBI

Davidi wa sambe: “U Jihova, eye wa ngi solokota, wa ng’jiya. Wa ng’ijiya ni kuxikama kwami ni kubalumuka, o ilunji yami, ni mu kanga muná ya kujimbulukila kyá. Né ngó kizwelu kya ngi kala bhu dimi, eye-phe, u Jihova, ka ku dingila kima.” (Jisálamu 139:1, 2, 4) Ku mbandu ya mukwa, Jihova wejiya kyambote katé mwene o ndolo i twívwa moxi, “o mabanzelu moso ma ixinganeku wa m’ejiya.”(1 Malunda 28:9; 1 Samuwele 16:6, 7) O jivelesu jiji, jilondekesa ihi ya lungu ni Nzambi?

Sumbala o izwelu i tu tumbula mu misambu yetu ki ijimbulula kyambote o ibanzelu yetu ni kyebhi ki tu dívwa moxi, o Mubhangi wetu ka tale ngó o kima ki tu bhanga, mwene wejiya we se mukonda dyahi twa mu bhanga o kima kiki. Mwene, wejiya we o mbote i twa mesena kubhanga, né mwene se ibhidi yetu i tu fudisa kubhanga yoso i twa mesena. Sé phata, Nzambi wa te o henda ku mixima yetu, mu kididi kya dyanga; sumbala ni hele yetu, mwene wala—polondo phala kutala ni kwijiya o ixinganeku yetu ya henda, ni ihi i tu bhangesa kubhanga kiki.—1 Nzwá 4:7-10.

Kana-ku kima kibhita ku mesu a Nzambi sé ku kimona. Mwene, u mona o hadi yetu, né mwene se akwetu nange ka i mono, mwene u tendela kyambote

 O Bibidya i tu kanena

  • ‘Mesu a [Jihova] a lungu kwa yá ayuka, kya dikola, u ta-ku matwi ku misambu yâ.’—1 PHETELE 3:12.

  • Nzambi wa kanena: “Ngi ku longesa, ngi ku idikisa njila yoso i wa fwama kwila; ngi ku bhana kayula, kuma nga ku te mwene dyesu.”—JISÁLAMU 32:8.

NZAMBI MUKWA KU KWATELA HENDA

O kwila Nzambi u tena mwene kwijiya o kudikola kwetu ni kyebhi ki tu dívwa anga u tu kwatekesa ku dibhana ni ibhidi yetu? Xinganeka ya bhiti ni Ana, mukwa Nigeria. “Nga kexile mu dibhwidisa se nga tokalele mwene kukala ku mwenyu mukonda dya ibhidi i nga kexile mu dibhana na-yu.” Mwene wambe. “Eme ngexile mutudi, ngexile mu langa mon’ami wa kexile mu kata uhaxi a wixana (hidrocefalia) mu phutu; mwene wexile mu inzo ya kusaka. Mu kithangana kyenyiki a ngi zambula, akwa kusaka a mono kwila nga ngexile ni dimbu dya dikota ku dyele; uhaxi a wixana (cancer de mana) mu phutu. Phala kusaka o uhaxi yú, kwa bhingile jindunge a jixana (qumioterapia ni radioterapia). Maka oso yá a bhonzele kyavulu phala eme; kukala mu inzo ya kusaka mu kithangana kimoxi ni mon’ami wa katele.”

Ihi ya bhange Ana? “Nga xinganeka mu jivelusu ja Bibidya kala, Filipe 4:6, 7, ilondekesa kwila ‘o kutululuka kwa Nzambi kwa somboka o kitongolwelu kyoso kya muthu, kwa-nda ku mi bateka mixima ni ilunji.’ Kyoso ki ngexile mu xinganeka mu jivelusu jiji, nga kexile mu dívwa kala nga zukamene dingi kwa Jihova; mu kwijiya kwila, mwene wa beta kota ku ng’ijiya eme ndenge. A ngi swinisa we kyavulu ku jiphange jami ja kazola mu nzumbi, mu kilunga.

Sumbala nga mu bhânga hanji ni uhaxi wami, maji ngila ngixi lelu twala-ku kyá kasembele, kikale eme, kikale mon’ami. Mukonda Jihova wala ku mbandu yetu, twa dilongo kukala ni ixinganeku yambote kyoso ki tu dibhana ni itateku yiyi. O divulu dya Tiyaku 5:11, di tu kanena: “Etu twa a mono kuzediwa, mukonda dya kukolokota kwâ. O kukolokota kwa Jobe mwa kwívwa, mwejiya we o disukilu dyê kyoso Nzambi kya mu zediwisa. Mbata [Jihova] wa vula o kukwatela henda ni kulendukila.” Jihova wejidile kyambote o ibhidi ya Jobe; tu tena kudyelela kwila, mwene wejiya we o ibhidi yoso i tu dibhana na-yu.