Ku bokona mu madisá

Ku bokona mu madisá

“Enu mwa beta-o-kota.”—MATESU 10:31

O Kwila Nzambi wa mu ku Tala?

O Kwila Nzambi wa mu ku Tala?

IHI I TU LONGA O IBHANGELU?

O ola ya dyanga kyoso mona kya mu vwala, o mama wa tokala kwondeleka ni kulondekesa henda kwa mon’ê. Mukonda dyahi? Mukonda o kubhanga kiki, kukwatekesa o kukula, o mona wanda kula ni sawidi ya soko. *

Ihi i bhangesa o mama kulanga ni henda yoso o kabwetele kê ka vwala kindala? O mulongexi Jeannette Crenshaw wa jimbulula mu Jurnale ya Milongi ya lungu ni uvwalwilu (The Journal of Perinatal Education) kwila, sayi ji hormona a jixana ocitocina, jene ji “bhangesa o mama kuzola mon’ê kyoso kya mu vwala, kyoso kya mu kwata bhu maku, kyoso kya mwamwisa, ni kyoso kya mu tala.” O hormona ya mukwa i moneka mu kithangana kiki, “i kwatekesa o mama kumesena kwondeleka o mona, ni ku dibhana nê kyambote, yene i bhangesa we o mama kuzukama dingi kwa mon’ê.” Mukonda dyahi kiki kima kya valolo?

Jihova Nzambi, mwene wa bhangesa kwila, o mama i zola kyavulu o kan’a ka vwala. * O Sobha Davidi wa ximana Nzambi mu ku mu “katula mu divumu” ni ku mu langa. Mwene wa sambe: “Eye-mwène wa ngi tambula konda tunde mu mala; eye u Nzambi yami tunde mu vumu dya mam’etu.”—Jisálamu 22:9, 10.

XINGANEKA: Se Nzambi wa bhangele ima ya bhonzo phala kukwatekesa o jimama kuzola o tubwetele twâ ni kudikila o ibhindamu yâ, ki twa tokala kudyelela kwila Nzambi u langa we muthu ni muthu kala “tu an’a Nzambi”?—Ikalakalu 17:29.

IHI I TU LONGA O BIBIDYA YA LUNGU NI KILANGIDILU KI TU BHANA NZAMBI?

Jezú Kidistu, wa beta-o-kota mu kwijiya o Mubhangi, muthu woso-woso ndenge, wambe: “Tu dyèdye tuyadi, kala ku tu sumbisa mu mulambongo? Ni kamoxi-ku-phe ngó ki ka lawuka bhoxi sé Tat’enu ku ki a-ndala. Kwambe dingi enu-phe katé ni jindemba ku mítwe yenu a ji’aleka. wila kiki, ki mu kale ni wôma. Tudyèdie né twa ndumba, enu mwa beta ukota.”—Matesu 10:29-31.

Ki twene mu tonginina o tunjila twoso-twoso tu twene mu mona, né kyoso ‘kamoxi-ku-phe ngó ki ka lawúka bhoxi.’ Maji o Tata yetu ya dyulu u tala o tunjila twoso mu kamoxi-kamoxi! O kanjila—né mwene tunjila twavulu—ki twa soko ni muthu umoxi. O disá bhabha dyenyidi: Eye ki wa tokala ‘kukala ni wôma’ mu ku banza kwila Nzambi kene mu ku tala. Mu kidi, mwene wa mesena o mbote yé, wa ku zolo kyavulu!

Nzambi wa mesena kyavulu o mbote yetu, u tu zenza ni henda yoso

 O Bibidya i tu kanena

  • ‘Mesu a Jihova, ala mu ididi yoso, ni kukengelela athu ayibha ni athu ambote.’JISABHU 15:3.

  • Mesu a Jihova a lungu kwa yá a yuka, o mátwi mê mala kwividila kyoso kya dikola.JISÁLAMU 34:15.

  • “Ngi sanguluka, ngi kala ni kutana mu kulenduka kwê; kuma eye wa ngi xinganeka mu kubhindama kwami; eye wa ng’ijidila mu jiphaxi mu nga bhiti.”JISÁLAMU 31:7.

“NGA DIVWILE KWILA JIHOVA KA NGI ZOLELE”

Ki tu sangulukisa kyavulu kwijiya kwila, Nzambi u tu suwa, wa mesena o mbote yetu, ni henda yoso. Kiki ki tena kubhita, kala kya lombolola Hannah, mukwa * Inglaterra:

“Mu ithangana yavulu nga divwile kwila, Jihova ka ngi zolele ni kwila, mwene kexile mu tambwijila o misambu yami. Nga banzele kwila, nange mukonda kwa ki kambele kixikanu. Nga divwile kwila, mwene wa kexile mu ngi talesa hadi mukonda eme ki ngexile ni valolo. Nga divu kwila, Nzambi ka ngi lange.”

Maji-phe, Hannah ka suluka ni phata ya kwila Jihova u mu tala, wa zolo o athu. Ihi ya lungulula o ixinganeku yê? “Mwene wa lunguluka bhofele-bhofele,” kala kya jimbulula mwene. “Ngi lembalala diskulusu di ngevu mu kyônge mu mivu kudima, dya zwela ya lungu ni sata ya kukula ya bhana Jezú, dya ngi tula ku muxima, dya ngi tululukisa mu kwijiya kwila, mbé Jihova wa ngi zolo kyavulu. Kyoso misambu yami kya i tambwijila, nga didi, mukonda nga mono kwila Jihova wa ngi zolo, sumbala ngi mukwa ituxi. Kumbandu yengi, bhu kaxi ka kudilonga we o Bibidya ni kuya mu yôngenga dilongo dingi yalungu ni Jihova, ifwa yê ni kyebhi kya tu mona. Kindala Ngi mona o kikwatekesu kya Jihova ni henda ya kwatela athu oso, ni kwila, mwene wala polondo phala ku tu langa, muthu ni muthu.”

O izwelu ya Hannah i tu ximbakatesa. Maji kyebhi ki u tena kwijiya ni kidi kyoso kwila, Jihova u ku tendela, ni kwila u lembalala kyebhi ki u dívwa? O milongi ya kayela-ku, ya-nda tambwijila o kibhwidisu kiki.

^ kax. 3 Sayi ji mama ja dibhana ni kikote kyoso kya bhanduluka, ki tena kwa bhonza ku di kwatenena ni an’â. Né kiki, ene ka tokala kubanza kwila éne ala ni kikuma. Kala kyambe o Instituto Nacional de Saúde Mental, dos EUA, o kikote kíjila mu ku vwala, “nange kijíla mukonda dya uhaxi mba kuxinganeka kyavulu . . . ki kíjila mukonda dya kima kya yibha kya bhange o mama, kana.” Phala kwijiya dingi ya lungu ni maka yá, tala o milongi, “Entenda melhor a depressão pós-parto” Mu Despertai! 8 dya mbeji ya Kanake, wa 2003, mu phutu!

^ kax. 5 Jihova o dijina dya Nzambi kala kyo tange mu Bibidya.—Jisálamu 83:18.

^ kax. 15 O majina o lungulule.