“IBHWIDISU I MONEKA ITHANGANA YAVULU: NZAMBI WEXILE KWEBHI?”​Papa Bento XVI, kyoso kyexile mu kunda kibende ku Auschwitz, Polania.

KYOSO KI KUBHITA DIVUWA, NANGE EYE U DIBHWIDISA, ‘NZAMBI WEXILE KWEBHI?’ O KWILA KWA BHITI KIBHIDI KU MWENYU WÉ, KYA KUBHANGESA KUDIBHWIDISA SE NZAMBI WENE MU KULANGA MWENE?

Nange eye u dívwa kala kya dívu Sheila, wa tungu ku Estados Unidos. A mu sase ku mwiji, wa wabhele kyavulu kuya mu ngeleja wixi: “Tundé undenge eme ngexile mu sota Nzambi munkonda mwéne o mubhangi wetu. Maji ki ngexile mu divwa kwila nga zukamene kwa mwene. Eme ngejidile kwila mwene wexile mu ngi tala, maji wexile mu ngi talela dikanga. Ki nga divwile kwila Nzambi wa ngi zembe kana, maji ki nga xikinine we kwila mwene wa mu ngi langa.” Mukonda dyahi Sheila wexile ni jiphata? Mwene u jimbulula: “O mwiji wami wa bhiti mu ibhidi yavulu, kyedile wila Nzambi ka tu kwatekesa ne ngó mu veji imoxi.”

Kala Sheila, eye nange ki wala ni phata kwila sayi Muteni-ya-yoso. Mu kiki nange eye u tena kudibhwidisa se mwene wene mu kulanga. O diyala dya yuka Jobe, wexile ni kixikanu mu kutena ni unjimu wa Mubhangi wexile we ni jiphata kala jiji. (Jobe 2:3; 9:4) Kyoso Jobe kya dibhana ni mavuwa avulu, sé kidyelelu kya kudisanza, mwene webhwidisa Nzambi: “Ngana phala’hi u sweka o pholo yé, anga u ngi kita ngi nguma yé?”—Jobe 13:24.

Ihi yamba o Bibidya? O kwila Nzambi mwene wala ni kikuma kyoso ki kubhita mavuwa? O kwila sayi kima kilondekesa kwila Nzambi u langa o athu mba u langa muthu ni muthu? Kala muthu mu dyetu, o kwila u tena kwijiya se mwene u tu tala mba u tu tendela mba u tu kwatekesa kudibhana ni ibhidi yetu?

Mu milongi ya kayela, twa-nda dilonga ihi i tu longa o ibhangelu ya lungu ni kyebhi Nzambi kya tu langa. (Loma 1:20) Mu kusuluka twa-nda mona ihi i jimbulula o Bibidya ya lungu ni kyebhi Nzambi kya langa o athu. Kyoso ki uya jinga ni ‘kwijiya’, o ibhangelu ni Mak’â mê, wa-nda dyelela dingi kwila, ‘mwene u kulanga.’—1 Nzwá 2:3; 1 Phetele 5:7.