Ku bokona mu madisá

Ku bokona mu madisá

Dijina Dya Nzambi Nanyi?

Dijina Dya Nzambi Nanyi?

Se wa mesena kwijiya muthu, o kibhwidisu kya dyanga ki u bhanga, kiki: “Dijina dyé nanyi?” Se wa bhangele o kibhwidisu kiki kwa Nzambi, kyebhi mwene kyeji tambwijila?

“Eme ngi Jihova, Didi dyene o dijina dyami.”Izaya 42:8.

O dijina didi nuka wa di ívwile? Nange kyene, mukonda alunguludi avulu a Bibidya kene mu tumbula lwavulu o dijina dya Nzambi. Ene a bhilula o dijina didi mu majina engi kala “NGANA.” Mu kidi, lelu o dijina dya Nzambi dimoneka 7.000 a jiveji mu Mikanda Ikôla. O dijina didi dya lungu ni Jiletala jiwana ja Hebalayiku YHWH mba JHVH, tundé ukulu o dijina didi ene mu di lungulula “Jihova” mu dimi dya Kimbundu.

O dijina dya Nzambi di moneka mu mikanda yoso ya Hebalayiku, dimoneka we mu ji Bibidya javulu

Mikanda ya Jisálamu a i sange ku Mar Morto, Hama ya dyanga K.K, MU HEBALAYIKU

Bibidya ya lungulula Tyndale 1530, MU DIMI DYA KINGILEJI

Bibidya ya Reina-Valera 1602, MU DIMI DYA XIPANYOLE

Bibidya Union Version 1919, MU DIMI DYA CHINEJI

MUKONDA DYAHI KIMA KYAMBOTE KWIJIYA O DIJINA DYA NZAMBI?

O dijina dyala ni valolo ya dikota kwa Nzambi. Sé-ku muthu wa bhana o dijina kwa Nzambi; mwéne mwene wa di luku o dijina didi. Jihova wambe: “Didi dyene o dijina dyami di xalela-ku, dyene dya ku ngi lembalala na-dyu kutunda mwiji kwiza mwiji.” (Makatukilu 3:15) Mu Bibidya o dijina dya Nzambi dimoneka dingi o majina mê a ujitu ndenge, kála Muteni-a-yoso, Tata, Ngana mba Nzambi. Dya beta we o kumoneka, o majina a athu amukwá ndenge, kála Mbalahamu, Mozé, Davidi mba Jezú. O lwa mukwá, Jihova mwéne wa mesena kwila o dijina dyê a dijiye. O Bibidya yamba: “Phala a k’ijiye kuma eye ngó wavu o dijina dyé dya Jihova, ku moneka luyadi; eye-mwène ngó Suke-ku mu ngongo yoso.”—Jisálamu 83:18.

O dijina dya Nzambi dyala ni valolo kwa Jezú. Mu musambu a wixana Musambu wa Tat’etu mba Musambu wa Ngana, Jezú wa longo o akayedy’ê kubhinga kwa Nzambi. Mwene wambe: “Dijina dyé a dixile.” (Matesu 6:9) Jezú we wa sambe kwa Nzambi, wixi: “Tata, fumanesa o dijina dyé!” (Nzwá 12:28) O kufumanesa o dijina dya Nzambi, kyene o kima kya betele kota ku mwenyu wa Jezú, mukonda dya kiki mwene wambe mu musambu: “Eme nga ejidisa o dijina dyé, hanji ngi d’ijidisa dingi.”—Nzwá 17:26.

O dijina dya Nzambi dyala ni valolo kwa yó a mwijiya. O mundu wa Nzambi m’ukulu, ejidile kwila o ulangelu wâ ni ubhulukilu, wa lungile ni dijina dimoxi-élele dya Nzambi. “Dijina dya Jihova mukwa ni mbonge ya matala ya di jikidila; muthu woso wa yuka, kwene kwa lengela anga a mu bhaka kididi kya kondama.” (Jisabhu 18:10) “Woso wa kà hingila dijina dya Jihova, wa kà bhuluka.” (Jowele 2:32) O Bibidya ilondekesa kwila, o dijina dya Nzambi dyeji tungula yó a mu sidivila. “Mukonda o kiki ifuxi yoso a mu kwendela, muthu mu dijina  dya nzambi yê, muthu mu dijina dya nzambi yê; etu-phe twa k’endela mu dijina dya Jihova Nzambi yetu, ku izuwa ni izuwa, ki yene ni dizubhilu.”—Mikeya 4:5; Ikalakalu 15:14.

O DIJINA DYA NZAMBI DILOMBOLOLA KIMA KYAHI?

O dijina dya Nzambi dyene ngó dilombolola se mwene nanyi. Athu avulu akwá kutokwesa o Bibidya, a xikina kwila o dijina Jihova, dilombolola “U bhangesa o ima kwiza-ku.” Jihova Nzambi wa jimbulula dingi o dilombolwelu dya dijina dyê kyoso kya kexile mu zwela ni Mozé. Mwene wambe: “Eme kala-dya-kala.” (Makatukilu 3:14) O dijina dya Nzambi ki di jimbulula ngó o kikalakalu kyê kala Mubhangi wa bhangesa o ima yoso kwiza-ku. O dijina dyê dilondekesa o uhete wê wa kukituka ni kubhangesa we o ibhangelu yê kukituka kima kyoso-kyoso phala kukumbidila o vondadi yê. O majina mê a ujitu alondekesa o kididi kyê, o ungana ni kutena kwê. Maji o dijina dyê, Jihova, dyene ngó dilondekesa yoso ya lungu ni mwene ni yoso ya tena kukituka.

O dijina dya Nzambi di tu londekesa kwila Nzambi wa mesena kwila tu mwijiya. O dilombolwelu dya dijina dya Nzambi, dya lungu we ni henda yê ku ibhangelu yê, ni kokwetu we. Lwa mukwa, mu kwijidisa o dijina dyê, Nzambi wa londekesa kwila wa mesene kwila etu tu mwijiya. Mwéne wa dyanga mu ku tu tangela o dijina dyê ande mwene dya etu kwijiya kwila tu tena ku mwibhwidisa o dijina dyê. Mu kidi, Nzambi ka mesena kwila tu mu mona kala nzambi yala dikanga, maji kala Muthu wa kidi ni kwila tu tena ku mu zukama.—Jisálamu 73:28.

O kutumbula o dijina dya Nzambi kulondekesa kwila etu twa mesena ku mu zukama. Talesa, eye nange u bhinga ku muthu u wa mesena kwila mu kala mu makamba kwila u kwixana mu dijina dyé. Kyebhi ki weji divwa se muthu yú u dituna kutumbula o dijina dyé? Nange weji mesena kwijiya se muthu yú wa mesena mwene kwila mu kala mu makamba mba kana. Kyene we kimoxi ni Nzambi. Jihova wene mu tangela o dijina dyê ku mundu woso, ni ku tu swinisa ku di tumbula. Kyoso ki tu di tumbula, twa mu londekesa kwa Jihova kwila twa mesena ku mu zukama. Katé mwene Nzambi u tala oso yó a ‘xinganeka Dijina dyê’!—Malakiya 3:16.

O kwijiya o dijina dya Nzambi kyene o kima kya dyanga phala ku mwijiya. Maji ki twa tokala ngó kusukila bhenyobho. Twa bhingi kwijiya o muthu wavu o dijina didi. Twa bhingi kwijiya se mwene wa difu kyebhi.

DIJINA DYA NZAMBI NANYI? Dijina dya Nzambi Jihova. O dijina didi dilondekesa kwila Nzambi Muthu u tena kukumbidila o vondadi yê