Ku bokona mu madisá

Ku bokona mu madisá

Ihi ya Bhange Nzambi?

Ihi ya Bhange Nzambi?

Se wa mesena kwijiya kyambote muthu, wa tokala kwijiya o ima i bhanga mwene ni ibhidi yene mu tolola mwene. Kyene kimoxi we, se wa mesena kwijiya kyambote Nzambi, wa tokala kudilonga ya bhange mwene. Kyoso ki uya ni kubhanga kiki, wa-nda diwana mu kwijiya kwila, o ima ya bhange Nzambi m’ukulu, i tena ku tu kwatekesa lelu, ni ku hádya.

NZAMBI WA BHANGE IMA YOSO PHALA O MBOTE YETU

Jihova Nzambi, mwéne o Mubhangi wetu wa Dikota, ni kwila “tunde Nzambi kya bhanga oxi, o ima yê-mwène ya kambe kumoneka ku mesu, kutale o nguzu yê i nanga, wixi o unzambi wê, ki i jimbi, mukonda ya di monekena.” (Loma 1:20) “Jihova wa bhange oxi ni kutena kwê; mwene wa xikika o ngongo mu kwijiya kwê, o dyulu wa di zale ni kutongoloka kwê.” (Jelemiya 10:12) O madiwanu a ibhangelu, a londekesa kwila Nzambi wa tu zolo.

Xinganeka kyebhi Jihova kya bhange o mwenyu wetu mu ukexilu wa katunda, wa tu bhange “mu kidifwanganu kyê.” (Dimatekenu 1:27) Kiki kilombolola kwila mwene wa tu bhana o ujitu wa kulondekesa o idifwa yê. Mwene wa tu bhange ni kitongolwelu ki tena ku tu kwatekesa kutendela o ibanzelu ni itumu yê. Kyoso ki tuya ni kukumbidila o itumu yê ku mwenyu, tu sanguluka kyavulu ni kuzediwa ku mwenyu. O kima kya beta-o-kota, mwene wa tu bhana o ujitu wa kukala kamba dyê.

Kyoso ki tu xinganeka o ima ya bhange Nzambi mu ixi, tu mona o henda yê kokwetu. Poxolo Phawulu wambe kwila “mu thembu joso Nzambi ka kambele-phe ku d’idikiza kyoso Mwène kyene, mu mbote yê yene mu kubhanga. Kuma mwène mukwa kubhindumuna, wa bhana jinga mvula ku dyulu, ni idima kuvula bhu thembu ja tokala, phala mu kale ni kúdya, o muxima wenu wizale ni kusanguluka.” (Ikalakalu 14:17) Nzambi ka tu bhana ngó o ima i tu bhangesa kukala ku mwenyu, maji u bhana we ima ya mukwá. Mwene wa tu bhana ima ya nzungule, phala ni tu sanguluke ku mwenyu. Maji sayi dingi ima yavulu ya mesena ku tu bhana Nzambi.

Jihova wa bhange o ixi phala o athu kutunga-mu hádya ni hádya. O Bibidya yamba: “O ixi-phe, wa i  bhana an’a athu,” ni kwila mwene “ka i’xya kiphulungunzu kya hatu, kana; wa i bhanga phala athu kutunga-mu.” (Jisálamu 115:16; Izaya 45:18) A nanyi a-nda tunga-mu ni thembu kuxi? “Ixi-phe i xalela ku athu yá a yuka, ene a i lundula, mwene mwa tunga, o thembu yâ ki ibhu.”—Jisálamu 37:29.

Jihova wa bhange o diyala dya dyanga ni muhatu, Adá ni Eva, yu wa a te mu palayízu “phala ku di dima ni ku di tambula konda.” (Dimatekenu 2:8, 15) Nzambi wa a bhele ikalakalu iyadi yambote: “Vwalenu, mu sokoloke, mu izalese ixi yoso, mu i tolole.” (Dimatekenu 1:28) Kyenyiki Adá ni Eva exile ni kidyelelu kya kusanguluka ni mwenyu wa kalelaku mu ixi. Maji ene a bhukumukina Nzambi, mukonda dya kiki ene a texi o ujitu wa kukala bhu kaxi ka “athu yá a yuka” a-nda “lundula” o ixi. Kala ki twa-nda mona mu milongi yiyi, o ima ya bhange ene, ki ya lungulula o ibanzelu ya Jihova ya lungu ni athu ni ixi. Kya dyanga tu mone kima kya mukwá kya bhange Nzambi.

NZAMBI WA TU BHANA O MAKA MÊ, O BIBIDYA

O Bibidya a ijiya we kala Mak’â Nzambi. Mukonda dyahi Jihova wa tu bhana o Bibidya? Kya dyanga, phala kudilonga ya lungu ni mwene. (Jisabhu 2:1-5) Kidi, o Bibidya ki i tambwijila o ibhwidisu yoso ya lungu ni Nzambi—sé-ku divulu di tena. (Ndongixi 3:11) Maji o ima yoso i tu sanga mu Bibidya, i tu kwatekesa kwijiya Nzambi. Tu tena kumona o idifwa yê, mu ukexilu wê wa kudibhana ni athu. Tu tena kwijiya we athu a wabhela mwene ni ya ibhila. (Jisálamu 15:1-5) Tu dilonga we o ibanzelu yê ya lungu ni ubhezelu, ukexilu wa mwenyu, ni jimbote. O Bibidya i tu londekesa o idifwa ya Jihova bhu kaxi ka izwelu ni mu ibhangelu ya Jezú Kidistu.—Nzwá 14:9.

Lwa mukwá, Jihova wa tu bhana o Maka mê, o Bibidya, phala ku tu kwatekesa kwijiya kyebhi ki tu tena kuzediwa ku mwenyu. Bhu kaxi ka Bibidya, Jihova u tu tangela kyebhi ki tu tena kukala ni mwiji wa zediwa, kyebhi ki tu tena kusanguluka ni ima i twala na-yu, ni kyebhi ki tu tena ku dibhana ni hele. Kala kyó jimbulule kupholo, mu Mulangidi yú, o Bibidya i tambwijila o ibhwidisu ya beta-o-kota, kála: Mukonda dyahi kwene hadi yavulu? Ihi i tu kingila ku hádya? Ijimbulula we se ihi ya bhange Nzambi phala kukumbidila o vondadi yê.

O Bibidya divulu dilondekesa kwila dya di tungula —dya tundu kwa Nzambi—mu mawukexilu avulu. O Bibidya a i soneka mu 1.600 ja mivu ndenge, Nzambi wa tumina 40 a athu kusoneka o Bibidya, izwela kyavulu ya lungu ni Nzambi, mukonda Mwéne wa tumu ku di soneka. (2 Timote 3:16) Sé-ku divulu dya difu ni Bibidya, dya nangenena tunde ukulu katé lelu, kala kilondekesa jimidi ja mikanda yokulu ya Bibidya. O Bibidya ya nangenena, sumbala ni ibhidi ya jinguma, tunde mu ku i lungulula, ni ku i bhixidisa ku athu ni ku i tanga. Lelu, dyene o divulu dya beta o ku di lungulula ni ku di bhixidisa dingi ku athu, o madivulu a mukwá ndenge. O kunangenena kwa Bibidya, kulondekesa kwila o “Mak’â Nzambi yetu-phe, ma xalela-ku, kuma ene a kalé kyá, katé ku hádya ni hádya.”—Izaya 40:8.

NZAMBI WA KUMBIDILA O KIKANENU KYÊ

O kya mukwa, Nzambi wa bhange kima kya katunda, phala kulondekesa kwila o vondadi yê kokwetu ya-nda di kumbidila mwene. Kala ki twa dilongo kyá, o vondadi ya Nzambi, ya kwila o athu a kala ni mwenyu wa kalelaku. Kyoso Adá kya solo kubhukumukina Nzambi, mwene wa kituka mukwa ituxi, mwene wa texi o ujitu wa kukala ni mwenyu wa kalelaku, ko ujitu wê ngó maji ni wa twana twê tweji kwiza ku pholo. “Kala kiki, mukwâ ni kya bokona o ituxi mu ngongo ku muthu umoxi, o kufwa kù kwijila mu ituxi; kyene we kya bhiti o kufwa ku thandu dya athu oso, kuma ene oso ituxi a i te.” (Loma 5:12) Mukonda dya kubhukumuka kwa Adá, kyedile kala o vondadi ya Nzambi ki yeji dikumbidila. Ihi ya bhange Nzambi?

O ima ya bhange Jihova, ya belesela o idifwa yê. Mwene wa bhingi jikonda kwa Adá ni Eva mukonda dya ibhangelu yâ, ya ibha. Maji, ni henda yoso wa bhana o kidyelelu ku mbutu ya Adá ni Eva. Mu unjimu wê, Jihova wa londekesa kyebhi kyeji  dibhana ni maka enyá, mu kubhita thembu wa zwela kyebhi kyeji ku a batula. (Dimatekenu 3:15) O ubhulukilu wa athu ku ituxi ni kufwa, weji bhita bhu kaxi ka Mon’a Nzambi, Jezú Kidistu. Ihi ya bhingi?

Phala kubhulula o athu ku kituxi kya Adá, Jihova wa tumikisa Jezú mu ixi phala kulonga o athu o ukexilu wa mwenyu ni “kubhana o mwenyu wê mu kukula mundu.” * (Matesu 20:28; Nzwá 14:6) Jezú wa tena kufuta o sata ya kukula, mukonda wexile muthu wa yuka kala kyexile Adá ande dya kuta kituxi. Maji mu veji dya kubhukumuka kala kya bhangele Adá, Jezú wa belesela katé ku ufwilu wê. Kuma Jezú ka mu xindile o kufwa, mu kiki Jihova wa mu fukununa phala kuvutuka ku dyulu. Kyenyiki Jezú weji tena kubhanga o ima ya kambele kubhanga Adá—kubhana ku athu a belesela, o kidyelelu kya mwenyu wa kalelaku. “Mu kuxibhaka kwa muthu umoxi, mundu a di bhangele akwa ituxi, kyene kimoxi we, mu kutumaka kwa muthu umoxi, mundu a di bhanga akwa kulunga, mbata ene oso a a xikina kwa Nzambi.” (Loma 5:19) Bhu kaxi ka sata ya kukula ya Jezú, Nzambi wa-nda kumbidila o kikanenu kyê kya bhange ku athu, kya kukala ni mwenyu wa kalelaku mu ixi.

Tu tena kudilonga ima yavulu ya lungu ni Jihova, mu kuxinganeka mu ukexilu wê wa kudibhana ni maka a moneka mukonda dya kubhukumuka kwa Adá. Tu mona kwila sé-ku kima ki tena kufidisa Jihova kubhanga o kima kya mateka mwene; o kizwelu kyê “ki bhita,” kála kyoso kya kanena. (Izaya 55:11) Tu sanguluka we mu kumona o henda ya Jihova kokwetu. “Mwene mwa tu tukulwila Nzambi o henda yê ya tu kwatela, Nzambi kya katula Mon’ê umoxi-èlele, anga u mu tumikisa mu ngongo, phala etu ni tu mone mwenyu kwa mwène. Mwenyumu mwa kala o henda, mu kwila: Etu ki etu twa zola Nzambi, maji mwène-ku wa tu zola, yú wa tumikisa Mon’ê mu kukala kilwulwilu kya ku tu lolokesa o ituxi yetu.”—1 Nzwá 4:9, 10.

O “Nzambi wedile ni Mon’ê mwène ka mu fikixila, maji wa mu bhakwile mukonda dya etu-ene-oso!,” mukonda dya kiki, twala ni kidyelelu kya kwila, Nzambi wa-nda tu bhana “o ima yoso” ya kanena mwene. (Loma 8:32) Ihi ya kanena Nzambi kokwetu? Tanga o milongi ya kayela.

IHI YA BHANGE NZAMBI? Jihova wa bhange o athu phala kukala ni mwenyu wa kalelaku mu ixi. Mwene wa tu bhana o Bibidya phala kudilonga ya lungu ni mwene. Jihova wa tu bhana o sata bhu kaxi ka Jezú Kidistu, phala kulondekesa kwila o vondadi yê, ya-nda di kumbidila

^ kax. 16 Phala kwijiya dingi ya lungu ni sata ya kukula, tanga o kibatulu kya 5 kya divulu Ihi i Tu Longa o Bibidia? A di bhange ku Jimbangi ja Jihova, u tena we ku ka sanga mu kijimbwete kya www.jw.org.