KIZUUA kiebhi, ki ua betele o kota o kusanguluka? O kuila o kizuua ki ua kazala? O kuila o kizuua ki ua vuala o mon’ê ua dianga? Mba o kizuua kia ku batizala? Nange ku muenhu uê uoso, eie ua sangulukile dingi mu kizuua kia ku batizala. Mu kizuua kieniókio, o jiphange jê a sangulukile kiavulu, mu kumona kuila, eie ua zolo Nzambi ni muxima uê uoso, ni muenhu uê uoso, ni kilunji kiê kioso, ni nguzu iê ioso!—Marku 12:30.

Nange tundé mu kithangana kia ku batizala, eie uene mu sanguluka kiavulu mu kubhanga o sidivisu ia Jihova. Maji saí aboki ka sanguluka dingi mu sidivisu ia Nzambi, kála kiexile ku dimatekenu. Mukonda diahi ene ka sanguluka dingi? Ihi i tu bhangesa kukolokota kusidivila Jihova ni kisangusangu kioso?

MUKONDA DIAHI SAÍ ATHU KA SANGULUKA DINGI MU SIDIVISU IA NZAMBI?

O njimbu ia Utuminu, i tu bhangesa kusanguluka kiavulu. Mukonda diahi? Mukonda Jihova u tu kanena kuila, kua kambe ngó bhofele, o Utuminu ua Nzambi ua-nda buika o mundu iú ua iibha, ni kubheka o mundu uobhe. O divulu dia Sofoniia 1:14, dizuela: “Kuma kizuua kionéne kia Jihova kia zukama; ku kizuelu kiê, kia-nda kuiza muene lusolo, ki ki kokoloka.” Maji se tu banza kuma, o kizuua kiki, kia mu laleka kiavulu, o kisangusangu kietu kia-nda zoza. Kiki, kieji tu bhangesa kubhuila mu sidivisu ietu kua Nzambi.Jisabhu 13:12.

O kukala kumoxi ni jiphange jetu ja maiala ni ja ahatu, ku tu suínisa kukolokota kusidivila Jihova ni kisangusangu. O uendelu uambote u londekesa o mundu ua Jihova, nange uene ua tu bhangesa kuxikina o ubhezelu ua kidi, ni kumateka kusidivila Nzambi ni kisangusangu kioso. (1 Phetele 2:12) Maji ihi ieji bhita, se phange a mu bazela mukonda dia ku kamba kubelesela o itumu ia Nzambi? Mukonda dia ima íii, nange saí jiphange mu kilunga a tena kuluuala, ni kukamba kusanguluka mu sidivisu ia Nzambi.

O hanji ia kumesena kukala ni jimbote javulu, i tena ué ku tu katula o kisangusangu kietu. Kiki ki bhita kiebhi? O mundu ua Satanaji u sota ku tu fuinhisa phala kusumba ima iavulu, katé muene ni ima ki tu i bhindamena. Mukonda dia kiki, tua tokala kulembalala o izuelu ia Jezú, kioso kiambe: “Kana muthu u tena kubhikila ngana jiiadi. Mukonda bhu kala ni iú u mu zemba, o iú u mu zola; mba iú a di tuma, o iú a di bhonza. Enu ue ki mu tena kubhikila Nzambi ni Mamunu (kilundu kia jimbongo).” (Matesu 6:24) Etu ki tu tena kubhanga o ima iiadi: Kusidivila Jihova ni kisangusangu, ni kusota kukala ni jimbote joso ji tu mona ku mundu iú.

SIDIVILA JIHOVA NI KISANGUSANGU

O athu a zolo Jihova, ka mono kuila, o ku mu sidivila kimbamba kia bhonzo. (1 Nzuá 5:3) Jezú uambe: ‘Zenu kokuami enu oso mua bhuila, enu mua tate ni imbamba ia mi nemena, eme nda ngi mi nhohese. Di tuikienu jungu iami, mu di longe ko kuami; mbata eme nga belesela, nga batama muxima, nda mu mone kutululuka kua mienhu ienu. Mbata o ima iami ioso i ngi m’inda na-iu, ki i bhonzo; o kimbamba kiami ki  ngi mi tuika, kia bhebhuluka.’ (Matesu 11:28-30) Kisangusangu kia dikota kukala, Kidistá ia kidi. Tuala ni ima iavulu i tu bhangesa kusanguluka mu sidivisu ietu kua Jihova. Tua-nda di longa ima itatu, i tu bhangesa kusanguluka mu sidivisu ia Nzambi.Habakuke 3:18.

Tuene mu sidivila o Nzambi ua tu Bhana o Muenhu, mukuá kusanguluka. (Ikalakalu 17:28; 1 Timote 1:11) Etu tuejiia kuila, Nzambi muéne ua tu bhana o muenhu. Mu kiki, tua tokala kusuluka ni ku mu sidivila ni kisangusangu kioso, né muéne se a tu batizala kiá ukulu.

Héctor ua sanguluka mu sidivisu ia Nzambi, mukonda uene mu xinganeka mu ikanenu ia Nzambi ia lungu ni Utuminu uê, ni kuboka o njimbu iambote

Xinganeka o phangu ia Héctor, muéne ua sidivile kala kafunga ka ilunga mu 40 a mivu. “Katé ni mu ukukilu,” muéne ua kolokota mu kusidivila Jihova ni kisangusangu kioso. (Jisálamu 92:12-14) Kuma o muhatu’ê ua katele, Héctor ka tenene kukalakala dingi kiavulu mu sidivisu ia Nzambi, maji né kiki, muéne ka bhuila. Muéne uambe: “Sumbala o uhaxi ua muhatu uami, u ngi bhangesa kuluuala kiavulu, ni kuila, ki bhonza kiavulu ku mu langa, maji ki ngene mu bhuila mu sidivisu ia Nzambi. Mu kuijiia kuila, Jihova muene ua ngi bhana o muenhu, ni kuila, muéne ua bhange o athu phala kuzediua, ku ngi bhangesa ku mu zola kiavulu ni ku mu sidivila ni muxima uoso. Ngene mu bhanga ioso phala kukolokota mu kuboka o njimbu iambote, ni kuxinganeka mu ikanenu ia Nzambi ia lungu ni Utuminu uê. O kubhanga kiki, ku ngi kuatekesa kukolokota.”

Jihova ua tu bhana o ujitu ua kukula, u tu bhangesa kusanguluka ku muenhu. Mu kidi, “Nzambi ua zola o mundu, katé kia suku mu kubhana Mon’ê umoxi-èlele, phala uoso u mu xikana muène, káfue, maji a kale ni muenhu ki uábhua.” (Nzuá 3:16) Mu kidi, se tu londekesa kixikanu ku ujitu ua henda ua tu bhana Nzambi, o ujitu ua kukula, o ituxi ietu a-nda ku i loloka, tu tena kukala ni kidielelu kia kutambula o muenhu ua kalelaku. O ima íii, i tu bhangesa kulondekesa o kisakidilu kietu! Kuma tua mesena kulondekesa o kisakidilu kietu ku ujitu ua kukula, tua-nda sidivila Jihova ni kisangusangu kioso.

Jesús ua sosolola o ukexilu uê ua muenhu, muéne ua sidivila Jihova ni kisangusangu mu mivu iavulu

O phange a mu ixana Jesús, ua tungile mu ixi ia México, uambe: “Mu salu mu nga kexile mu kalakala, ngexile kala ngi mubhika. Nga kexile mu kalakala ithangana iavulu, sumbala ka ngi jijidikile kubhanga kiki. Nga kexile mu kalakala kiki, phala kukala ni kitadi kiavulu. Mu kubhita thembu, nga di longo ia lungu ni Jihova, kiebhi muéne kia bhange phala kubhana o Mon’ê ua kazola. Nga kexile ni hanji iavulu ia ku mu sidivila. Mukonda dia kiki, nga di bhakula kua Jihova. Mu kiki, nga xisa o salu mu nga kalakalele mu 28 dia mivu, eme nga bokona mu sidivisu ia thembu ioso. Mu kubhanga kiki, Jesús ua mateka kusidivila Nzambi ni kisangusangu.

Tuala ni ukexilu ua muenhu ua zele, u tu bhangesa kusanguluka. O kuila u tena ku di lembalala, kiebhi kiexile o muenhu uê ande dia kumateka kusidivila Jihova? Poxolo Phaulu ua lembalesa o Jikidistá akua Loma kuila, m’ukulu ene exile “abhika a  ituxi,” maji a ‘bhiluka abhika a kuiuka.’ Mukonda ene akexile ni uendelu uambote, a tenene kukingila kutambula o muenhu ua kalelaku. (Loma 6:17-22) Kuma tuene mu kaiela ué o ijila ia Jihova, ki tuene ni kuluuala kuala na-ku akua kubhanga o ufusa, ni usuéia. Kiki ki tu bhekela kisangusangu kia dikota!

“Ku muenhu uami uoso, lelu nga beta-o-kota o kusanguluka, mukonda dia kusidivila Jihova.”—Jaime

Tu mone o phangu ia Jaime, muéne ka xikinine kuila kuene Nzambi, ua xikinine kuila, o ima ia moneka ngó. Muéne uexile ué mu bhanga o ji joko ja kubhânga. Jaime ua mateka kuia mu iônge, muéne ua diuanene kiavulu mu kumona o henda ia kexile mu londekesa o athu. Phala kuxisa o ukexilu uê ua iibha, Jaime ua sambele kua Jihova, mu ku mu bhinga phala ku mu kuatekesa kukala ni kixikanu kua Muéne. Jaime uambe: “Bhofele bhofele, nga mono kuila, Nzambi uexile Tata ia henda, nga mono ué kuila, muéne mukuá kuloloka. O kubelesela o itendelesu ia iuka ia Jihova, kuene mu ngi kuatekesa kiavulu. Se ki ngi lunguluile o ukexilu uami, nange lelu ki ngeji kala dingi ku muenhu, kála o jikoleka jami akexile ué mu bhanga o ji joko ja kubhânga. Ku muenhu uami uoso, lelu nga beta-o-kota o kusanguluka, mukonda dia kusidivila Jihova.”

KANA KUBHUILA!

Ihi i tua tokala o kubhanga kioso ki tu kingila o dizubhilu dia mundu iú ua iibha? Lembalala kuila, etu tua mu bhanga o vondadi ia Nzambi, ni kuila, tua mu kingila o muenhu ua kalelaku. ‘Ki tu kale ni usudi mu kubhanga mbote. Kuma hinu ki tu bhixila bhu thembu ia tokala, tua kà bhongolola, se tua kambe kubhuila.’ (Ngalásia 6:8, 9) Ni kikuatekesu kia Jihova, tu kolokotienu, tu bhangie-nu ioso phala kukala ni ídifua iambote ia-nda tu kuatekesa kubhuluka mu kithangana kia “hadi ia dikota,” ni kusuluka mu kusidivila Jihova ni kisangusangu kioso.Dijingunuinu 7:9, 13, 14; Tiiaku 1:2-4.

Tuejiia kuila, Jihova ua-nda besoala o kukolokota kuetu, ni nguzu ioso i tu bhanga, mukonda muéne uejiia kiambote o kikalakalu ki tuene mu bhanga ni henda i tuene mu londekesa mu dijina diê. Se tu kolokota mu kusidivila Jihova ni kisangusangu, tua-nda divua kala Davidi, muéne uambe: “Jihova izuua ioso nga mu bhaka bhu pholo iami; o mukonda dia muene ku ng’imanena bhua zukama, ki bhuala u tena ku ngi lundumuna. Kala kiki, muxima uami ua tana, dimi diami dia sanguluka, katé ni xitu iami hinu i kala bhua kondama.”Jisálamu 16:8, 9.