“Kuatenu makamba a tunda mu itadi ia mangonha ma mundu iú.”​—LUKA 16:9.

MIMBU: 32, 154

1, 2. Kiebhi ki tuejiia kuila, ku mundu iú uaiibha o uadiama ki ua-nda kubhua?

O MUNDU ua lelu, uaiibha kiavulu. Mu kifika, kiene mu bhonza kiavulu phala o minzangala kusanga salu. Sai athu a ta o mienhu iâ mu iluezu, phala kuia mu jixi jéngi mu kusota o jimbongo. Katé muene mu jixi ja umvuama, muala ue jingadiama javulu. Ku mundu uoso, o jingenji a kituka dingi jimvuama, o jingadiama, uadiama uâ ua mu dibandekesa. Kala kilondekesa o ima ku mundu iú, o muthu umoxi ngó, ku athu a beta-kota kukala jimvuama, kitadi kiê kiala kota, o kia makuinhi avua ni divua dia athu a jingadiama, ndenge. Sumbala sai athu ala ni kitadi kiavulu, maji mazunda athu ala jingadiama. Jezú uejidile kuila, o ima iii ieji bhita. Mukonda dia kiki, muene uambe: “Jingadiama mua xalela-na-ju; kithangana kioso.” (Marku 14:7) Mukonda diahi o ima iii, iene mu bhita?

2 Jezú uejidile kuila, o Utuminu ua Nzambi, uene ngó u tena kulungulula o mundu iú uaiibha. O Bibidia i zuela kuila, kikale “o jingenji,” o ibuka ia jinguvulu, ni ia jingeleja, i bhanga mbandu ia mundu ua Satanaji. (Dijingunuinu 18:3) O mundu ua Nzambi ki u xikina ku di ta mu maka a jinguvulu, ni a  jingeleja ja makutu, maji u kalakala ni kitadi ki tunda ku mauenji a mundu iú ua Satanaji.

3. Ibhuidisu iebhi i tua-nda tambuijila?

3 Kuma tu Jikidistá, tua tokala ku di tonginina kiambote, phala kuijiia o ibanzelu ietu ia lungu ni mauenji a mundu iú. Phala kubhanga kiki, tua tokala ku dibhuidisa: ‘Kiebhi ki ngi tena kukalakala ni jimbote jami, phala kukuatekesa o sidivisu ia Nzambi? Kiebhi ki ngi tena kukamba kusuua ngó o jimbote ja mundu iú? Ihi ilondekesa kuila, o mundu ua Nzambi u mu dielela ni muxima uoso?’

O MUSOSO UA KIMBADI KIA MANGONHA

4, 5. (a) Ihi ia bhiti ni kimbadi mu musoso ua Jezú? (b) Ihi ia tangela Jezú ku maxibulu mê?

4 Tanga Luka 16:1-9. O musoso ua Jezú ua lungu ni kimbadi kia mangonha, u tu bhangesa kuxinganeka. O kimbadi a mu tatela kuila, uexile kimonha, mukonda dia kiki, o ngana iê ua mesenene ku mu kaia. * (Tala ku luiji.) Maji o kimbadi kia londekesa o “kudimuka,” mba unjimu. Ande dia ku mu kaia ku salu, muene ua bhange ukamba ni athu eji mu kuatekesa. Jezú ka tange o musoso iú, phala kusuinisa o maxibulu mê kubhanga ima ia mangonha n’a kale kiambote ku muenhu. O athu ku mundu ene mu bhanga o ima iii iaiibha. Mu kidi, Jezú ua tange o musoso iú, phala kulonga disá dia dikota ku maxibulu mê.

5 Kála o kimbadi kia kexile mu bhita mu ibhidi, Jezú uejidile kuila, o akaiedi iê eji bhita ue mu ibhidi iavulu ku mundu iú uaiibha. Mukonda dia kiki, muene ua a tangela uixi: “Kuatenu makamba a tunda mu itadi ia mangonha ma mundu iú.” Mukonda diahi? Mukonda, kioso o kitadi mba umvuama ua mundu iú ki ua-nda bhua, Jihova ni Jezú, a-nda tena ku tu “[tambulula] mu mabhata mâ ma nanga.” O kitendelesu kiki kia Jezú, ki tu longa ihi?

6. Kiebhi ki tuejiia kuila, o kukalakala phala ku nganhala kitadi, ki kuexile o vondadi ia Jihova?

6 Sumbala Jezú ka jimbulula se mukonda diahi ua zuela “itadi ia mangonha,” o Bibidia ilondekesa kuila, Nzambi ka mesenene kuila, o athu a kalakala phala ku nganhala kitadi. Mu kifika, Jihova ua bhanene kua Adá ni Eva o ima ioso ia bhindamene mu jaludim ia Edene. (Dimatekenu 2:15, 16) Mu kubhita thembu, kioso o Jikidistá a a undu kia a bhana nzumbi ikola kua Jihova, “kana-bhu muthu ua tena kuila ku jimbongo jê u jijila-ku kimbamba kuma kiê-muène, maji ene oso a kala ni ima ioso mu kisangela, anga enda ni ku di uanena na-iu ene oso mudiâ.” (Ikalakalu 4:32) O polofeta Izaia uambe kuila, ku hádia o athu a-nda katula mbote ku ima ioso mu ixi, sé kufuta kitadi. (Izaia 25:6-9; 65:21, 22) Maji ande dia kubhita o ima iii, o akaiedi a Jezú a-nda bhinga kulondekesa o unjimu. Ene a bhingi kukatula mbote mu kitadi kia mundu iú, phala kukala ku muenhu, ni kusidivila Nzambi.

KALAKALA NI UNJIMU NI JIMBOTE JÉ

7. Kitendelesu kiebhi kia bhana Jezú mu divulu dia Luka 16:10-13?

7 Tanga Luka 16:10-13. O musoso ua  Jezú ua londekesa kuila, o kimbadi kia bhange ukamba ni athu avulu, phala ku mu kuatekesa. Maji Jezú ua mesenene kuila, o maxibulu mê a bhanga ukamba ni ió ala ku diulu, Jihova ni Jezú. Muene ua mesenene ku tu kuatekesa kutendela kuila, o ukexilu ua kukalakala ni jimbongo jetu, ua tokala kulondekesa se tu xikina Nzambi mba kana. Kiebhi ki tu tena kubhanga kiki?

8, 9. Bhana phangu ilondekesa kiebhi o jiphange ja mu londekesa kixikanu, mu kukalakala ni kitadi kiâ.

8 Tu tena kulondekesa o kixikanu kietu kua Nzambi, mu kusangela kitadi, phala kukuatekesa o kikalakalu kia kuboka, kia kanene Jezú. (Matesu 24:14) Sai mon’a ndenge a muhatu mu ixi ia Índia, ua kexile mu phopheka kitadi mu kaxa iê. Mukonda dia kiki, muene kexile dingi kusumba ima ia kutonoka. Kioso o kaxa kiezala ni kitadi, muene ua sangela o kitadi phala kukuatekesa o sidivisu ia kuboka. Sai phange mu ixi ia Índia, uala ni díbhia dia makoko. Muene ua bhana makoko ku jiphange a lungulula o madivulu mu dimi dia Malaiala. Kuma o jiphange a bhingile kusumba makoko, muene ua xinganeka kuila, o kusangela makoko, kua beta-o-kota, kubhana kitadi, ndenge. Kubhanga kiki kulondekesa “kudimuka.” O jiphange ku ixi ia Ngeléxia, ene mu sangela máji, jikeju, ni makúdia a mukuá phala o jiphange ku Betele.

9 Sai phang’ietu ua tungu mu ixi ia Sri Lanka, ua bhana o inzo iê phala, kubhanga-mu o iônge ia semana, ni ia makota. Muene ua bhana ue o inzo iê ku jiphange ala mu sidivisu ia thembu ioso. Mu kidi, phang’ietu u bhanga nguzu iavulu, maji muene uene mu kuatekesa kiavulu o jiphange a kambe kitadi. Mu jixi muene mu fidisa o ubhezelu uetu, o jiphange ene mu xikina kubhanga o iônge mu jinzo jâ. Kubhanga kiki, kuene mu kuatekesa o aboki a thembu ioso ni jiphange ja mukuá, kukamba ku ngastala kitadi phala kufuta o kididi kia iônge.

O jiselevende ja Nzambi ji kalakala ni jimbote jâ, phala kukuatekesa akuâ

10. Mbote jebhi ji tu katula kioso ki tu kala ni ukexilu ua kubhana?

10 O phangu jiji, jilondekesa kuila, o mundu ua Nzambi ua mu londekesa o ufiiele ua ‘kidi mu ima iófele.’ (Luka 16:10) Ene a kalakala ni jimbote jâ, phala kukuatekesa akuâ. Kiebhi ki divua o jiphange mu kubhanga o ima íii? Ene a sanguluka kiavulu mu kuijiia kuila, mukonda dia kulondekesa o ukexilu ua kubhana, a mu bhaka o umvuama ua “kidi” ku diulu. (Luka 16:11) Sai phange ia muhatu, uene mu sangela kitadi, phala kukuatekesa o sidivisu ia kuboka, uambe kuila, uene mu mona mbote iavulu ku muenhu uê. Muene uambe: “Nga mono kuila, kioso ki ngi sangela ima, ngi kala dingi ni vondadi ia kubhana. Ngi loloka dingi akuetu, o muanhu uami u di bandekesa, ngi sota  kukala ni paze ni akuetu, ni kuxikina itendelesu.” Athu avulu a mono kuila, o kukala ni ukexilu ua kubhana, kua a bhekela mabesá ku muenhu.​—Jisálamu 112:5; Jisabhu 22:9.

11. (a) Mu ukexilu uebhi o kusangela kima kulondekesa “kudimuka?” (b) Ihi ia mu bhanga o mundu ua Nzambi lelu? (Tala o foto ia dianga.)

11 Kioso ki tu kalakala ni jimbote jetu, phala kukuatekesa akuetu mu sidivisu ia kuboka, tu londekesa unjimu. Mu kiki, né muene se ki tu tena kusidivila kala aboki a thembu ioso, mba kuia mu kididi mua bhindamena kikuatekesu, tu tena kukuatekesa akuetu mu maukexilu engi. (Jisabhu 19:17) Mu kifika, o ima i tu sangela i kuatekesa kubhanga dingi madivulu, ni kuboka o njimbu iambote mu ididi muala athu a mesena kuijiia o kidi, maji jingadiama. Mu ixi ia Congo, Madagascar, ni ia Ruanda, o Jibibidia ja te kalu iavulu. Sai bhabha, phala kusumba Bibidia imoxi, o muthu ua tokala kufuta o kitadi kioso kia kalakala ku mbeji ia muvimba, mba semana. Ku mivu iavulu o jiphange a bhingile kusola, se eji sumba o kudia phala o muiji, mba Bibidia. Maji bhu kaxi ka kitadi kisangela o jiphange ku mundu uoso, ni ió ala ni “kia nzungule,” o kilunga kia Jihova kia mu lungulula, ni kubhana ji Bibidia ku athu oso, sé ku a bhinga kitadi. (Tanga 2 Kolindo 8:13-15.) Mukonda dia kiki, ki kale o athu ene mu sangela o kitadi, ni ió ene mu tambula o Jibibidia, a tena kukala makamba a Jihova.

KALA NI UKEXILU UAMBOTE UA LUNGU NI MAUENJI A MUNDU IÚ

12. Kiebhi Mbalahamu kia londekesa kuila, muene ua dielele kua Nzambi?

12 Kioso ki tu sota o umvuama ua “kidi,” mu veji dia kubanza kiavulu mu jimbongo ja mundu iú, tu tena ue kukala tu makamba a Jihova. Kiki kiene kia bhangele o diiala dia fiiele, Mbalahamu. Muene ua belesela Jihova, iu ua xisa o umvuama uoso mu mbanza ia Uli, phala ku tunga mu ji balaka, mukonda muene ua mesenene kukala kamba dia Jihova. (Jihebeleu 11:8-10) Muene ua betele kudielela kua Nzambi, o jimbote jê, ndenge. (Dimatekenu 14:22, 23) Jezú ua tendelesa akuâ kulondekesa o kixikanu kia difu ni kia Mbalahamu. Sai kizuua, muene uambe ku munzangala uexile mvuama: “Eie se ua mesena kutenena, ndé, kà sumbise ioso i uala na-iu, o jimbongo jê u ji uanene jingadiama, phala u kale ni jimbongo mu Diulu, nda uize kiua u ngi kaiele eme.” (Matesu 19:21) O munzangala muenhó kexile ni kixikanu kia difu ni kia Mbalahamu. Maji kuexile athu amukuá a dielele Nzambi.

13. (a) Kitendelesu kiebhi kia bhana Phaulu kua Timote? (b) Kiebhi ki tu tena kukumbidila o kitendelesu kia Phaulu, mu izuua ietu?

13 Timote uexile munzangala ua kixikanu. Sai kizuua Phaulu uambe kuila, Timote uexile “dikuenze diambote dia Kristu Jezú.” Mu kusuka-ku Phaulu ua mu tendelesa: “Kana muthu uaii mu usoladi u landukila dingi [mauenji] a bhata, phala a tene kuuabhela kumandande ió uoso ua mu sendalesa o usoladi.” (2 Timote 2:3, 4) Ku akaiedi  a Jezú a lelu, kuala mazunda a athu ala mu sidivisu ia thembu ioso, ene mu kumbidila o kitendelesu kiki kia Phaulu. Ene ka xikina o ibanzelu ia mundu iú, ia kukala jimvuama. Ene a di lembalala o izuelu iii: “Mukua ku sobha muene selevende ia ió mukua kusobhesa.” (Jisabhu 22:7) Satanaji ua mesena kuila, tu zanga o nguzu ni kithangana kietu mu kukalakala kiavulu phala o mundu iú. Sai athu ene mu sobhesa kitadi kiavulu phala kusumba inzo, dikalu, kubokona mu xikola mba phala kukazala. Se ki tu di lange tu tena kuta makongo avulu. Tu londekesa unjimu kioso ki tu sosolola o ukexilu ua muenhu uetu, kudituna kukala ni makongo, ni mu kungastala kiambote o kitadi. Se tu bhanga kiki, ki tua-nda kala tu abhika a kitadi, maji tua-nda sidivila Nzambi ni muxima ua zele.​—1 Timote 6:10.

14. Ihi i tua tokala kubhanga? Bhana phangu.

14 Phala kusosolola o ukexilu ua muenhu uetu, tua tokala kuta o Utuminu ua Nzambi ku pholo. Sai diiala ni muhatu’ê, a kexile ni ditenda dionene. Maji, ene a mesenene kuvutuka mu sidivisu ia thembu ioso. Mu kiki, ene a sumbisa o ditenda, o baluku, ni imbamba ia mukuá. Anga, a di bhakula phala kukuatekesa mu kutunga o mbonge ietu mu sanzala ia Warwick, ku Nova York. O kikalakalu kiki, a ki uabhelele kiavulu, mukonda a tenene kukalakala kumoxi ni mon’â, ni holome’â ku Betele. Sai jisemana, a kalakala ue kumoxi ni jindandu ja holome’â. Sai phange ia muhatu mu mbanza ia Colorado, ku Estados Unidos, ua kexile mu kalakala ngó kaxaxi ka kizuua, ku bangu. Kuma o jipatalá jê, a uabhelele kiavulu o kikalakalu kiê, a mu tangela phala kukalakala kizuua kia muvimba. Se ueji xikina, eji mu bandekesa o kitadi kiê kia mbeji. Maji, kuma o kikalakalu kieji landukisa o ukunji uê, muene ua ditunu. O phangu jiji, ji londekesa o nguzu iene mu bhanga o jiselevende ja Jihova. Se tu ta o Utuminu ua Nzambi ku pholo, tua-nda londekesa kuila, tu bhana valolo ku ukamba uetu, ni Jihova ni ku umvuama ua kidi, o jimbongo ja mundu iú, ndenge.

O JIMBONGO KI JA-NDA KALA DINGI NI VALOLO

15. Mbote jebhi ji tu katula mu kuatekesa akuetu kuijiia Jihova?

15 O kukala mvuama, ki kulombolola mabesá a Nzambi. Jihova u besoala, ió uala ni “umvuama ua ikalakalu iafuama.” (Tanga 1 Timote 6:17-19.) Mu kifika, sai phange ia muhatu uéza mu kuijiia kuila, mu ixi ia Albânia, mua bhindamene aboki. * (Tala ku luiji.) Mu kiki, ua tundu mu ixi ia Itália ku muvu 1993. Muene kexile ni salu, maji ua dielele kuila, Jihova ueji mu bhana o ima ieji bhindamena. Muene ua di longo o dimi dia Albanês, iu ua kuatekesa 60 a athu ndenge, ku dibhakula kua Jihova. Nange ki tu tena kukuatekesa athu avulu mu mbambe ietu. Maji, kima kioso-kioso ki tu bhanga phala kukuatekesa akuetu kuijiia Jihova, ni kukituka makamba mê, umvuama ua dikota u tua mu bhaka ku diulu.​—Matesu 6:20.

O ima i tu bhanga phala Jihova, ni Utuminu uê, ia-nda tu zediuisa kiavulu

16. (a) Ihi ia-nda bhita ku jimbongo joso jene ku mundu iú? (b) Ni kikuatekesu kia milongi iii, iebhi o ibanzelu ietu ia lungu ni jimbongo?

16 Jezú uambe kuila, o jimbongo ja mundu iú, ja-nda bhua. Muene kexile ni phata  kuila, o jimbongo ja mundu iú jeji bhua. (Luka 16:9) Mu izuua iii isukidila-ku, sai jibangu javulu a mu ji jika mukonda ki jala ni kitadi, jixi javulu jala ni maka a lungu ni kitadi. Kua kambe ngó bhofele, o ima ia-nda iibha dingi. Ki kale o jinguvulu, o isangela ia jingeleja, ni ia mauenji, iene ioso ia-nda bhua, mukonda i bhanga mbandu ia mundu ua Satanaji. O jipolofeta Izekiiele ni Sofoniia, a kanena kuila, o ulu ni phalata ki ia-nda kala ni valolo. (Izekiiele 7:19; Sofoniia 1:18) Kiebhi ki tua-nda divua, se tu kala ku muenhu katé kia-nda buikisa o mundu iú, maji ni kuijiia kuila, ki tua bhange ioso, phala kukalakala kiambote ni jimbote jetu? Tua-nda divua kala o diiala dia kalakala kiavulu phala kukala mvuama, maji uiza mu kuijiia kuila, o kitadi kioso kia makutu. (Jisabhu 18:11) O jimbongo ja mundu iú, ki ja-nda kala dingi ni valolo. Mu kiki, kalakala kiambote ni jimbongo jé, phala ku kuatekesa o sidivisu ia Nzambi, ni u kale ni ukamba uambote ni Jihova ni Jezú. O ima i tu bhanga phala Jihova, ni Utuminu uê, ia-nda tu zediuisa kiavulu.

17, 18. Ihi ia mu kinga o jiselevende ja Nzambi?

17 Kioso kia-nda kuiza o Utuminu ua Nzambi, sé-ku muthu ua-nda tunga dingi mu inzo ia ngene, mba ku sobhesa kitadi. Ki tua-nda sumba dingi kúdia, ki tua-nda bhindamena dingi kufuta asaki. O makamba a Jihova a-nda dia ioso ia-nda sabhukila mu ixi. Mu veji dia kubhanga uenji, ni ulu, phalata ni imbamba ia mukuá ia valolo, o ima ien’iii ia-nda kala ngó ima ia ku di fuamesa. O mabaia, matadi ni imbamba ia mukuá ia-nda kala ima ia kutunga jinzo jambote. Ki tua-nda bhinga kufuta kitadi ku makamba metu phala ku tu kuatekesa, mukonda ene a-nda tu kuatekesa mu vondadi iâ. Tua-nda sanguluka ni idima ioso.

18 O ima ien’iii, i bhanga mbandu ku mabesá a-nda tambula ió ala ni ukamba ni Jihova ni Jezú. O abhezi a Jihova mu ixi, a-nda dikola ni kuzediua, kioso kia-nda kuívua o izuelu ia Jezú: “Zenu a mi zediuisa kuala Tata iami! Zenu mu lundule o Ungana, a mi iudikila na-u kuala Tata iami tunde ku dimatekenu dia’xi.”​—Matesu 25:34.

^ kax. 4 Jezú ka zuela se o kitatelu kiexile kia kidi, mba kia makutu. Mu kidi, o divulu dia Luka 16:1, di londekesa kuila, sai athu akexile mu zuela kuila, o kimbadi ua zangele o kitadi kia ngana iê. Mu veji dia kubanza ngó mu ima ia bhangesa ku mu kaia, Jezú ua tonginina o ima ia bhange o kimbadi kioso kia mu kaie.

^ kax. 15 O musoso ua phange Lucia Moussanett, uala mu Despertai! 22 de Junho de 2003, páginas 18-22.