“Ngalasa ié i tunde mu ku di tuma ni Jihova; muene u ku bhana ki ua solo mu muxima.”​—JISÁLAMU 37:4.

MIMBU: 11, 140

1. Ihi ia tokala kusola o minzangala? Ihi i tena kua kuatekesa phala ka thandanganhe kiavulu? (Tala o foto ia dianga.)

MINZANGALA, enu muejiia kuila, se muthu ua mesena kuenda njila, ua tokala kuxinganeka kiambote kuebhi kua mesena ku ditela. O muenhu uetu ua difu, ni kuenda njila. Kuma u munzangala hanji, kiki, kiene o kithangana kia tokala phala kuxinganeka o ima i ua-nda bhanga ku hádia. Mu kidi, sai bhabha, ki bhonza kusola o ima i tua-nda bhanga. Sai kilumba a mu ixana Heather, uambe: “O kuijiia kuila, eie ua tokala kusola kima ki ua-nda bhanga ku hádia, ku thandanganhesa.” Se kiene ue ki u divua, lembalala o izuelu ia Jihova. Muene uambe: “Kana kukala ni uoma, kuma eme ngala bhuamoxi n’eie; kana kubhuuama, mbata eme ngala ngi Nzambi ié; eme ngi ku suinisa, hé ngi ku kuatekesa.”​—Izaia 41:10.

2. Kiebhi ki uejiia kuila, Jihova ua mesena kuila, eie u sola kiambote o ima?

2 Jihova u ku suinisa kubanza ni unjimu mu ima i ua-nda sola kubhanga ku hádia. (Ndongixi 12:1; Matesu 6:20) Muene ua mesena kuila, u zediua ku muenhu. U tena kuijiia o kidi kiki, mu kumona, kuívua ni kudia o ima ia bhange muene. Jihova u tu langa ue mu maukexilu engi. Muene u tu bhana itendelesu i tu kuatekesa kuijiia o ukexilu ua beta-o-kota ku muenhu. Mukonda dia  kiki, kioso o athu kia dituna o itendelesu iê ia unjimu, muene u luuala kiavulu. Oso a kamba kukumbidila o itendelesu iê, muene u a tangela: “Enu mua solo-bhu kioso ki nga di zemba na-kiu eme . . . Talesa jiselevende jami ja k’ènda ni kutana, maji enu-phe sonhi ja kà mi kuata. Talesa, jiselevende jami ja kà kala mu kuimba mukonda o mixima iâ ia sanguluka.” (Izaia 65:12-14) Kioso ki tu sola o ima ni unjimu, tu sangulukisa o muxima ua Jihova.​—Jisabhu 27:11.

SOLA IMA IA-NDA KU BHEKELA O KUZEDIUA KU HÁDIA

3. Ihi ia mu kingila Jihova kokuetu?

3 Phala kuzediua ku muenhu, tua tokala kuijiia Jihova ni ku mu sidivila. Jihova ua bhange o athu mu ukexilu iú. (Jisálamu 128:1; Matesu 5:3) O iama, idia ngó, inua, ni ku di sokolola. Maji Jihova ua mesena kuila, o athu a xinganeka mu ima ia-nda bhanga ku hádia, phala a zediue ku muenhu. O mubhangi uetu muéne o “Nzambi ia henda,” “Nzambi Ukôla,” ua bhange o athu “mu kidifuanganu kiê.” (2 Kolindo 13:11; 1 Timote 1:11; Dimatekenu 1:27) Se tu kaiela o Nzambi ietu ia henda, tua-nda sanguluka ku muenhu. O Bibidia izuela: “O kubhana kota mu kuzediuisa, o kutambula ndenge.” (Ikalakalu 20:35) O kuila ua divuile kiá kiki? Kiene ki bhita ni athu oso. Mu kiki, Jihova ua mesena kuila, tu banza kiambote mu ima i tua-nda bhanga ku hádia, mukonda dia henda ietu kua muene ni ku athu.​—Tanga Matesu 22:36-39.

Eie ua-nda sanguluka se u londekesa o henda

4, 5. Ihi ia bhekesa kisangusangu ku muenhu ua Jezú?

4 Jezú Kristu ua xi phangu iambote phala o minzangala. Kioso kiexile mon’a ndenge, muene ua uabhelele ue kutonoka. O Mak’â Nzambi, a zuela kuila, sai “thembu ia kuolela,” ni “thembu ia kutuka-tuka.” (Ndongixi 3:4) Maji Jezú ua kexile ue mu dilonga o Mikanda ikola, phala kukolesa o ukamba uê ni Nzambi. Kioso kiexile ni 12 ia mivu, o jimesene mu tembulu a di uanene ni ‘kuijiia kuê, ni kia kexile mu kumbulula adiakimi.’​—Luka 2:42, 46, 47.

5 Kioso kia kulu, Jezú ua sangulukile ku muenhu, mukonda ua sulukile mu kubhanga o ima ia mu tumine Nzambi. Mu kifika, Nzambi ua mesenene kuila, muene u tudila “o jingadiama, Njimbu Iambote,” ni “kubhana mesu o ifôfo.” (Luka 4:18) O divulu dia Jisálamu 40:8, di jimbulula kiambote kiebhi kia kexile mu divua Jezú. Diene diamba: “Nga sanguluka mu kubhanga ki ua mesena eie u Nzambi iami.” Jezú ua uabhelele kulonga o athu ia lungu ni Tat’ê. (Tanga Luka 10:21.) Sai kizuua kioso Jezú kia zubha kuzuela ni muhatu ia lungu ni ubhezelu ua kidi, ua tangela o maxibulu mê, uixi: “Kúdia kuami, o kubhanga vondadi ia ió ua ngi tumu, ni kuzubha o kikalakalu kiê kia ngi bhana o kubhanga.” (Nzuá 4:31-34) Jezú ua sangulukile ku muenhu, mukonda ua zolele Nzambi ni athu. Se tu bhanga ue kiki, tua-nda zediua ku muenhu.

6. Mukonda diahi kima kiambote kuzuela ni akuenu ia lungu ni ima i ua mesena kubhanga?

6 Sai jiphange javulu a mateka kukalakala kála aboki a thembu ioso, mu unzangala. Kubhanga kiki, kua a bhekela kisangusangu ku muenhu. O kuila, u tena kuzuela nau, ia lungu ni ima i ua mesena kubhanga ku muenhu  ué? “Bhua kambe o kaiula phala kumona o phangu ni ndongo, mabanzelu moso ma kituka kingoho; maji bhuala o nzungule ia jindongixi, ndunge joso ji tunda ni kubhanduluka.” (Jisabhu 15:22) O jiphange jiji, nange a-nda ku tangela kuila, o sidivisu ia thembu ioso, ia-nda ku longa ima ia-nda ku kuatekesa ku muenhu ué uoso. Kioso kiexile ku diulu, Jezú ua di longo ima iavulu ni Tat’ê. Mu kiki, kioso kia kexile mu bhanga o ukunji uê mu ixi, muene ua suluka mu kudilonga ima iavulu. Muene ua sangulukile mu ku bokela o njimbu iambote ku akuâ, iú ua kolokotele mu ufiiele uê mu ithangana ia jipolova. (Tanga Izaia 50:4; Jihebeleu 5:8; 12:2) Tu mone se mukonda diahi o sidivisu ia thembu ioso, i tena ku kusangulukisa ku muenhu.

KUBHANGA MAXIBULU KIENE O KIKALAKALU KIA BETA-O-KOTA

7. Mukonda diahi minzangala iavulu a uabhela o kikalakalu kia kubhanga maxibulu?

7 Jezú ua tu tendelesa ‘kubhanga maxibulu’ ni kulonga o athu. (Matesu 28:19, 20) Se eie ua mu banza kubhanga o kikalakalu kiki kala ufunu ué, kima kiambote, mukonda ua-nda ku zediuisa, kiki kia-nda ximana Nzambi. Kála ufunu uoso-uoso, eie ua tokala kukala ni uhete mu kikalakalu kiki. Sai phange a muixana Timote, ua kituka muboki ua thembu ioso kioso kia kexile ni 19 ia mivu. Muene uambe: “Nga uabhela o sidivisu ia thembu ioso, mukonda uene o ukexilu u ngi londekesa o henda iami kua Jihova. Ku dimatekenu, ki ngi kexile ni maxibulu a Bibidia, mu suluka ngai mu sidivila mu kididi kiéngi. Ande dia kutenesa mbeji, nga kexile ni maxibulu avulu. Sai dixibulu ua mateka kuia mu iônge. Kioso ki nga zubha o Xikola ia Bibidia ia mbeji jiiadi phala o Makudi, a ngi tumikisa mu diembu diéngi, mu ngala ni kiuana kia maxibulu. Nga zolo kiavulu kulonga o athu, mukonda ngene mu mona kuila, Nzambi uene mu lungulula o mienhu iâ, bhu kaxi ka nzumbi ikôla.” * (Tala ku luiji.)​—1 Tesalonika 2:19.

8. Ihi iene mu bhange o minzangala, phala kubokela athu avulu?

8 Sai minzangala a dilongo dimi diéngi phala kubokela athu avulu. Mu kifika, Jacob, mukua Estados Unidos, ua soneka: “Kioso ki nga kexile ni sambuadi dia mivu, sai jikoleka jami exile akua Vietname. Nga mesenene kuzuela nau ia lungu ni Jihova, mu kiki, nga bhange ioso phala kudilonga o dimi diâ. Ngexile mu dilonga o dimi dienhidi, mu ku di sokesa ni dimi dia Kingileji mu milongi ia Mulangidi. Nga kexile ue ni makamba akua kilunga kia dimi dia Vietname. O ki nga tenesa 18 dia mivu, nga kituka muboki ua thembu ioso. Mu kubhita thembu, ngai mu Xikola ia Bibidia phala o Makudi. Kiki kia ngi kuatekesa mu kikalakalu kiami kia ubhe. Lelu eme ngó ngi kafunga mu kibuka kia dimi dia Vietname. Akua Vietname ene mu diuana, mu kuijiia kuila, nga di longo o dimi diâ. Ene mu ngi bokuesa mu jinzo jâ, phala kua longa o Bibidia. Sai iá, a a batizala kiá.”​—Sokesa ni Ikalakalu 2:7, 8.

9. O kikalakalu kia kubhanga maxibulu ki tu kuatekesa kubhanga ihi?

9 O kikalakalu kia kubhanga maxibulu, ki tu longa maukexilu ambote a kukalakala, kudizuelesa kiambote ni athu, ku di dielela, ni kuzuela ni athu sé ku a xinga. (Jisabhu 21:5; 2 Timote 2:24) Maji o kikalakalu kiki, ki tu sangulukisa mukonda ki tu longa kiebhi ki tu tena kulondekesa ku athu o ima i tu xikina. O  muthu u dilonga ue kiebhi kia tena kukalakala kumoxi ni Jihova.​—1 Kolindo 3:9.

10. Né muene se ua mu bhita ni ibhidi mu mbambe ié, kiebhi ki u tena kusanguluka mu kikalakalu kia kubhanga maxibulu?

10 Eie u tena kusanguluka mu kikalakalu kia kubhanga maxibulu, né muene se mu mbambe ié ki muala athu avulu a mesena kudilonga o Bibidia. Phala kubhanga maxibulu, athu oso mu kilunga a kalakala kumoxi. Sumbala o dixibulu u dilonga ni muboki umoxi katé kia mu batizala, maji etu enioso tu sanguluka, mukonda tua bhange mbandu mu sidivisu íii. Mu kifika, Brandon, ua kalakala kala muboki ua thembu ioso, mu divua dia mivu, mu kididi mua kexile athu ofele a xikinine kudilonga o Bibidia, uambe: “Nga uabhela kiavulu kuboka o njimbu iambote, mukonda kiene kia mesena Jihova. Nga bokona mu sidivisu ia thembu ioso kioso ki nga zubha o xikola. Nga uabhela kusuinisa o minzangala mu kilunga, ni kumona kuila, ene a mu kula mu nzumbi. Kioso ki nga tundu mu Xikola ia Bibidia phala o Makudi, a ngi bhana kikalakalu kiéngi. Mu kidi, ki ngi kuatekesa luua muthu kukala Mbangi ia Jihova, maji akuetu ala ni maxibulu a a batizala. Ngi sanguluka kiavulu mukonda, nga solo kubhanga ioso mu kikalakalu kia kubhanga maxibulu.”​—Ndongixi 11:6.

KUSOLA KIAMBOTE KU BHEKELA MABESÁ

11. Kikalakalu kiebhi kiene mu bhanga minzangala iavulu?

11 Muala ikalakalu iavulu mu kilunga kia Jihova. Mu kifika, minzangala iavulu ene mu kuatekesa o kikalakalu kia kutunga. Kua bhingi kutunga hama ni jihama ja Ididi ia Ubhezelu. O ididi íii, iene mu ximanesa Jihova, mu kiki, kukuatekesa ku i tunga, kubhekela kisangusangu. Eie u tena ue kukala ni kisangusangu kia kukalakala kumoxi ni jiphange. U tena ue kudilonga ima iavulu, kála kiebhi ki u tena kukalakala ni kudilanga kiambote, ni kiebhi ki u tena kubelesela o athu a ku kala ku pholo.

Oso a bokona mu sidivisu ia thembu ioso, a tambula mabesá avulu (Tala o kaxi 11-13)

12. Kiebhi o sidivisu ia thembu ioso i tena kubhekela maujitu avulu?

12 Sai phange a mu ixana Kevin, uambe: “Tundé mu undenge uami, nga mesenene kusidivila Jihova mu sidivisu ia thembu ioso. Kioso ki nga tenesa 19 dia mivu, nga mateka kusidivila kala muboki ua thembu ioso. Phala kudikila o ibhindamu iami, nga kexile mu kalakala kaxaxi ka kizuua, ni phange uexile mutungi a jinzo. Nga dilongo kuiudika matala a jinzo, ji njanela, ni mabhitu. Mu kubhita thembu, ngexile mu kalakala ni kibuka kia kukuatekesa mu ididi muene mu bhita mavuua a kitembu, mu kutunga Ididi ia Ubhezelu ni jinzo ja jiphange jetu. Kioso ki ngevu o kibhindamu kia kexile mu ixi ia África do Sul, nga soneka mukanda, anga a ngi xana phala kuia-ku. Semana joso ngene mu kalakala mu ibuka ia kutunga Ididi ia Ubhezelu. O kibuka kiami kia kutunga kiala kala muiji uami. Tua tungu kumoxi, tu dilonga o Bibidia, ni kukalakala kumoxi. Nga uabhela ue kuboka ni jiphange ja mukuá, semana joso. O ima i nga  solo mu undenge, ia ngi bhekela kisangusangu ku muenhu.”

“O ima i nga solo mu undenge, ia ngi bhekela kisangusangu ku muenhu”

13. Mukonda diahi minzangala iavulu a sanguluka mu kusidivila ku Betele?

13 Sai athu exile aboki a thembu ioso, lelu a mu sidivila ku Betele. O kukalakala ku Betele kubhekela ue kisangusangu ku muenhu, mukonda o ikalakalu ioso, u i bhanga phala Jihova. O muiji ua Betele u kuatekesa kubhanga Jibibidia, ni madivulu a kuatekesa o athu kuijiia o kidi. Sai phange mukua Betele, a mu ixana Dustin, uambe: “Kioso ki nga kexile ni divua dia mivu, nga solele kiá kubokona mu sidivisu ia thembu ioso. Mu kiki, kioso ki nga zubha o xikola, nga mateka o sidivisu iii. Kioso kia bhiti muvu ni kaxaxi, ngai ku Betele, muene mu nga dilongele kukalakala ni makina ia kubhanga jikopia, ni kukalakala ni ji komputadolo. Ku Betele, ngi sanguluka kiavulu mukonda, tuene mu diangela kuívua kiebhi kiene mu dibandekesa o ikalakalu ietu ku mundu uoso. Nga uabhela kukalakala bhabha mukonda, o ima i ngi bhanga i kuatekesa athu kuzukama kua Jihova.”

IMA IEBHI I UA-NDA SOLA PHALA KUBHANGA KU HÁDIA?

14. Ihi i u tena kubhanga lelu, phala ku bokona mu sidivisu ia thembu ioso?

14 Kiebhi ki u tena ku di pelepalala phala kubokona mu sidivisu ia thembu ioso? Phala ku sidivila Jihova mu ukexilu uambote, eie ua tokala kukala ni idifua iambote. Ua tokala ku di longa o Mak’â Nzambi izuua ioso,  kuxinganeka i ua mu di longa, ni kutambuijila mu iônge, phala kulondekesa o kixikanu kié. Kioso ki uia ni kudilonga mu xikola, sota ku di zuelesa kiambote ni akuenu, mu kua tangela o njimbu iambote ia Nzambi. Sota kubhanga ibhuidisu, ni kuívua kiambote o itambuijilu iâ. U tena ue kudibhakula mu kubhanga ima mu kilunga, kala kukomba, ni kuiudika kima kioso-kioso mu Kididi kia Ubhezelu. Jihova u sanguluka mu kubhana ikalakalu ku athu a lenduka a di bhakula mu sidivisu ié. (Tanga Jisálamu 110:3; Ikalakalu 6:1-3) Poxolo Phaulu ua solo Timote, phala kukala mukunji mu jixi jengi, mukonda “muene a mu tumbula kiambote kuala o jiphange joso.”​—Ikalakalu 16:1-5.

Kioso ki uia ni kudilonga mu xikola, sota ku di zuelesa kiambote ni akuenu, mu kua tangela o njimbu iambote ia Nzambi

15. Ihi i ua tokala kubhanga, phala kusanga salu ia-nda ku kuatekesa kukala sidivisu ia thembu?

15 Jiphange javulu ala mu sidivisu ia thembu ioso a bhingi kukalakala, phala kudikila o ibhindamu iâ. (Ikalakalu 18:2, 3) Nange eie u xinganeka ku di longa ufunu u tena ku kukuatekesa kusanga salu ia kukalakala kaxaxi ka kizuua. Zuela ni kafunga ka ilunga, mba aboki a thembu ioso, ia lungu ni jimbambe jé n’a ku bhane jindunge. Mukonda o Bibidia iamba: “Ikalakalu ié ioso bhakula-iu kua Jihova, muene u ku xikikila ima ioso i u kana kubhanga.”​—Jisabhu 16:3; 20:18.

16. Kiebhi o sidivisu ia thembu ioso i tena ku kuatekesa kukula mu nzumbi?

16 Dielela kuila Jihova ua-ndala kuila, eie u sanguluka ku hádia. (Tanga 1 Timote 6:18, 19.) O sidivisu ia thembu ioso ia-nda ku kuatekesa kukala Kidistá ua kulu mu nzumbi, kioso ki uia ni kukalakala ni akuenu mu sidivisu íii. Athu avulu ambe kuila o ku bokona mu sidivisu ia thembu ioso kioso kiexile hanji minzangala, ia a kuatekesa mu ukaza uâ. Sai bhabha, o jiphange a bokona mu sidivisu ia thembu ioso ande dia kukazala, ene mu suluka ni sidivisu íii, né muene kioso kia kazala.​—Loma 16:3, 4.

17, 18. O ima i u sola ilondekesa ihi ia lungu n’etu?

17 O divulu dia Jisálamu 20:4, di zuela ia lungu ni Jihova: “Muene a ku bhese kia ku kala ku muxima; kima ki ua kane kubhanga, muene a ki kumbidile.” O izuelu iii, i longa kuila o ima i tu sola phala kubhanga, ilondekesa o ima iala ku muxima uetu. Xinganeka ia mu bhanga Jihova mu izuua ietu, ni ihi i u tena o kubhanga mu sidivisu iê. Mu kiki, bhanga ima i mu sangulukisa.

18 Se u dibhakula mu sidivisu ia Jihova, ua-nda kala ni kisangusangu ku muenhu. O ‘ngalasa ié ia-nda kuijila mu ku di tuma ni Jihova; muene ua-nda ku bhana ki ua solo mu muxima.’​—Jisálamu 37:4.

^ kax. 7 Lelu, o xikola íii a ixana, Xikola ia Akunji a Utuminu.