“O bhuoso-phe bhu kala Nzumbi ia Ngana, bhu kala ufôlo.”​—2 KOLINDO 3:17.

MIMBU: 31, 32

1, 2. (a) Ihi iene mu zuela o athu ia lungu ni ufolo uetu ua kusola? (b) Ihi i longa o Bibidia ia lungu ni ufolo, ni ibhuidisu iebhi i tua-nda di longa?

KIOSO kia mesenene kusola kima ku muenhu uê, sai muhatu uambela o dikamba diê, uixi: “Kana ku ngi bhangesa kubanza dingi kiavulu, ngi tangele kia ngó o kima ki nga tokala o kubhanga. Se u ngi tangela, ki kua-nda ngi bhonza dingi kubatula o maka.” O muhatu ua mesenene kuila, a mu tangela o kima kia tokalele o kusola, mu veji dia kukatula mbote ku ujitu ua kusola, ua mu bhana o Mubhangi uê. Abha eie? O kuila uene mu sola o ima i ua tokala o kubhanga, inga u kinga kuila, akuenu a bhanga kiki bhu kididi kié? Kiebhi ki u mona o ujitu ua kusola o ima?

2 O athu ala ni ibanzelu ki i difu ia lungu ni ufolo ua kusola. Sai athu a zuela kuila, etu ki tuala ni ufolo ua kusola, mukonda Nzambi ua xindi kiá o ima ioso i tua tokala o kubhanga. A mukuá a zuela kuila, tu kala ngó ni ufolo ua kusola, se a tuehela kusola o ima ioso i tua mesena. Maji o Bibidia i longa kuila, a tu bhange ni uhete, ni ufolo ua kusola kiambote o ima ku  muenhu uetu. (Tanga Josuué 24:15.) Mu Bibidia tu sanga-mu o itambuijilu ia ibhuidisu iii: ‘O kuila ki tuala ni ufolo ua kusola o ima ioso i tua mesena? Kiebhi ki tu tena kukatula mbote ku ufolo ua kusola o ima ku muenhu uetu? Mu ukexilu uebhi o ima i tu sola ilondekesa o henda ietu kua Jihova? Kiebhi ki tu tena kulondekesa kuila, tu xila o ima i sola akuetu?

IHI I TU LONGA O PHANGU IA JIHOVA NI JEZÚ?

3. Kiebhi Jihova kia kalakala ni ufolo uê ua katunda?

3 Jihova uala ni ufolo ua kubhanga o ima ioso ia mesena. Mu kiki, etu tu tena ku di longa mu phangu iê ia kusola o ima. Mu kifika, Jihova ua solo o kifuxi kia Izalaiele phala kukala mundu uê, mba “povo ia mu fuama muene ngó.” (Matendelelu 7:6-8) Sai kima kia mu bhangesa kusola o kifuxi kiki kala mundu uê. Jihova ua mesenene kukumbidila o kikanenu kia bhangele kua kamba diê Mbalahamu. (Dimatekenu 22:15-18) Mu kukalakala ni ufolo uê, Jihova u ki bhanga ni henda, ni kuiuka kuoso. Tu tena kumona o idifua íii, mu ukexilu ua kexile mu bazela o akua Izalaiele kioso kia kexile ku mu bhukumukina. Kioso kia kexile mu diela o ituxi iâ, Jihova ua kexile ku a londekesa o henda. Muene uambe: “Eme nga-nda kuilula o kuxibhaka kuâ ni kudianguka kuâ, anga ng’a zola muene ni muxima uoso.” (Hozeia 14:4) Jihova ua tu bhana phangu iambote, mu ku katula mbote ku ufolo uê ua kusola phala kukuatekesa akuâ!

Ande dia kuiza mu ixi, Jezú ua solo kulondekesa o ufiiele uê kua Nzambi. Muene ka xikina ku di bunda kumoxi ni Satanaji phala kubhukumukina Nzambi

4, 5. (a) Nanhi a dianga ku mu bhana o ufolo kua Nzambi? Kiebhi kia kalakala ni ufolo uê? (b) Kibhuidisu kiebhi ki tua tokala ku di bhanga?

4 Mu vondadi iê, Jihova ua solo kubhanga o jianju ni athu. Jihova ua diangele kubhanga Jezú. Muene a mu bhangele mu kidifuanganu kia Nzambi, ua kexile ni ufolo ua kusola. (Kolose 1:15) Ihi ia bhange Jezú ni ufolo uê ua kusola o ima? Ande dia kuíza mu ixi, Jezú ua solo kulondekesa o ufiiele uê kua Nzambi. Muene ka xikina ku di bunda kumoxi ni Satanaji, phala kubhukumukina Nzambi. Kioso Jezú kieza mu ixi, muene ua ditunu o jitendasá ja Satanaji. (Matesu 4:10) Mu usuku ande dia kufua kuê, Jezú uambe kuila, ua mesenene kubhanga o vondadi ia Tat’ê. Muene uambe: “Tata, eie se ua ki andala, dikáu dia phaxi dienhidi, ngi katule-diu. Maji-phe ki ngindi kuamba o vondadi iami iene i bhita, ki kale ngó o vondadi ié.” (Luka 22:42) O kuila tu tena kukaiela o phangu ia Jezú, ni kukatula mbote ku ufolo uetu ua kusola, phala kuximana Jihova ni kubhanga o vondadi iê?

5 Tu tena kukaiela o phangu ia Jezú, mukonda a tu bhange ue mu kidifuanganu kia Nzambi. (Dimatekenu 1:26) Maji etu ki tuala ni ufolo ua katunda uala nau Jihova. O Mak’â Nzambi a tu tangela kuila, Jihova ka tu bhange ni ufolo ua kusola o ima ioso ku muenhu uetu, ni kuila, muene ua mesena tu  mu belesela. Mu kifika, ku muiji, o ahatu a tokala ku tumaka o maiala, o tuana a tokala kubelesela o jitata jâ. (Efezo 5:22; 6:1) Mu ukexilu uebhi o jimbambe ja tu xindila Nzambi ji tu kuatekesa kulanga kiambote o ufolo uetu ua kusola? O kitambuijilu kia kibhuidisu kiki, ki tena ku tu bhangesa kutambula o muenhu ua kalelaku ku hádia mba kana.

IHI IA BHANGE O ATHU NI UFOLO UA BHANA NZAMBI

6. Bhana phangu ilondekesa se mukonda diahi kima kiambote Nzambi ku tu xindila jimbambe ku ufolo uetu ua kusola.

6 Kuma ki tuala ni ufolo ua kusola o ima ioso, o kuila tu tena kuzuela kuila, tuala muene ni ufolo ua kidi? Tuala muene! Mukonda diahi? Mukonda o jimbambe ja tu xindila, ji tena ku tu langa. Mu kifika, nange tu sola kuendesa o dikalu phala kuia ku mbanza iéngi iala dikanga. Maji xinganeka se mu kikoka ki muala itumu i tendelesa o endexi a makalu. Mu veji dia kiki, kala muthu muene u sola kiebhi kiendesa mu kikoka. O kuila ueji divua muene kiambote mu kuendesa mu kikoka kiki? Kana! Tua bhingi ijila mba jimbambe, mukonda ji kuatekesa o athu oso kukatula mbote ku ufolo uâ ua kusola. Tua-nda di longa phangu ia athu mu Bibidia, ia-nda londekesa se kiebhi o jimbambe ja tu xindila Jihova, ji tu bhekela ngó mbote.

7. (a) Mu ukexilu uebhi Adá ka difuile ni iama? (b) Jimbulula kiebhi Adá kia katuile mbote ku ufolo uê.

7 Kioso Jihova kia bhange o diiala dia dianga, Adá, muene ua mu bhanene ue o ujitu ua bhanene ku jianju. Nzambi ua mu bhana ue o ufolo ua kusola. Maji Nzambi ka bhange o iama ni ufolo ua kusola. Kiebhi Adá kia katula mbote ku ufolo uê ua kusola? Adá ua sangulukile mu kubhana o majina ku iama. Nzambi anga u mateka ku “ji bheka ku muthu, [phala] ku mu tala se u ji luka kiebhi.” Mu ku mona o iama, Adá ua kexile kubhana o majina a fuamene phala o iama ioso. Jihova Nzambi ka lungulula o majina a solele Adá. Mu veji dia kiki, o Bibidia izuela: “Kioso-phe kia luku Adá ku jixitu ja muenhu, diene kiá o dijina diê dia xala na-diu.”​—Dimatekenu 2:19.

8. Kiebhi Adá kia kambe kukatula mbote ku ufolo uê, ni ihi ia bhiti?

8 Jihova ua bhana kua Adá, o kikalakalu kia ku bhangesa o ixi kukala palaízu. Muene ua mu tangela: “Vualenu, mu sokoloke, mu izalese ixi ioso, mu i tolole; mu tumine ue jimbiji jendela mu menha, ni jinjila ji bhita bhulu, ni iama ioso ia muenhu iendela ku mavu.” (Dimatekenu 1:28) Maji Adá ua solo kudia o kibundu, mu kubhanga kiki, muene ua bhukumukina o kijila kia mu bhanene Jihova. Mukonda dia Adá ku kalakala kiaiibha ni ufolo ua mu bhanene Nzambi, tundé ukulu, o athu ene mu tala hadi iavulu. (Loma 5:12) Tua-nda lembalala, o ibhidi iejila mu kusola kua Adá. Kiki, kia-nda tu kuatekesa ku katula mbote ku ufolo uetu ua kusola, ni kuxikina o jimbambe ja tu xindila Jihova.

O akua Izalaiele a solo kukala mundu ua Nzambi, anga a xikina o jimbambe ja a xindile Nzambi

9. Ujitu uebhi ua bhanene Jihova ku akua Izalaiele? O mundu ua Izalaiele ua kanene ihi?

9 O athu oso mu ngongo, a lundula o kituxi  ni kalunga kua Adá ni Eva. Maji etu tuala hanji ni ufolo ua kusola. Tu tena kuijiia o kidi kiki, mu kumona kiebhi Nzambi kia di bhanene ni kifuxi kia Izalaiele. Jihova ua a bhanene o ujitu ua kukala mundu uê. (Makatukilu 19:3-6) O kifuxi kia solo kukala mundu ua Nzambi, anga a xikina o jimbambe ja a xindile Nzambi. Ene ambe: “Ioso ia tange Jihova, iene i tua-nda kubhanga.” (Makatukilu 19:8) Maji mu kubhita thembu, ene a solo kubhukumukina o kikanenu kia bhangele kua Jihova. Tu tena ku di longa disá dia dikota mu phangu íii. Tu sulukienu mu kubhana valolo ku ujitu uetu ua kusola, ni kukolokota mu ufiiele uetu kua Jihova, mu kubelesela o itumu iê.​—1 Kolindo 10:11.

10. Phangu jebhi ji tu sanga mu divulu dia Jihebeleu kibatulu 11, ji londekesa kuila, o athu akua ituxi a tena kusola kuximana Nzambi? (Tala o foto ia dianga.)

10 Mu divulu dia Jihebeleu kibatulu kia 11, tu sanga-mu o majina a 16 kia maiala ni ahatu a fiiele, a solele kuxila o jimbambe ja a xindile Jihova. Mukonda dia kiki, ene a tambuile mabesá avulu, ni kidielelu kia kuzediua ku hádia. Mu kifika, Noué ua kexile ni kixikanu kia dikota. Mukonda dia kiki, muene ua solo kubelesela o itendelesu ia Nzambi ia kutunga o alaka, phala kubhulula o muiji uê, ni miji ieji kuíza-ku. (Jihebeleu 11:7) Mbalahamu ni Sala, a belesela Nzambi ni muxima uâ uoso, mukonda dia kiki, endele ixi iéngi ia a kanene Nzambi. Sumbala ene a mono “kithangana kia kuvutukila” ku ixi ia Ulu, a solo kusuua o ikanenu ia Nzambi, ieji dikumbidila ku hádia. O Bibidia izuela kuila, ene akexile mu “sota ixi ia beta o kuuabha.” (Jihebeleu 11:8, 13, 15, 16) Mozé ua ditunu o jimbote joso ja Ijitu, iú ua solo-bho o “kutala hadi ni mundu ua Nzambi, kana o ku di uabhela muène mu jivondadi ja ituxi ji bhanga ngó kathangana.” (Jihebeleu 11:24-26) Tu kaiedienu o phangu ia maiala ni ahatu iá a fiiele, ni kubhana valolo ku ujitu uetu ua kusola, mu ku katula mbote ku ufolo uetu, phala kubhanga o vondadi ia Nzambi.

11. (a) O ujitu ua kusola, u tu bhana kithangana kia kubhanga ihi? (b) Ihi i ku bhangesa kukatula mbote ku ujitu ué ua kusola ni ufolo?

11 Nange tu mona kuila, kima kiambote se bhu kala muthu u sola bhu kididi kietu. Maji se tu bhanga kiki, ki tua-nda tena kumona o mabesá ejila mu ufolo ua kusola. Mukonda diahi? O Bibidia ijimbulula o maka enhá mu divulu dia Matendelelu 30:19, 20. (Tanga.) O velusu ia 19, i zuela kuila, Nzambi ua tumina akua Izalaiele kusola kima. O velusu ia 20 izuela kuila, Nzambi ua bhanene kithangana, phala ene kulondekesa o henda iâ kua muene. Etu tu tena ue kusola kusidivila Jihova. Etu tuala ue ni kithangana kia kukatula mbote ku ujitu uetu ua kusola ni ufolo, phala kuximana Jihova, ni ku mu londekesa o henda ietu!

KANA KUKALAKALA KIAIIBHA NI UFOLO UA KUBHANA NZAMBI

12. Ihi ki tu tokala o kubhanga ni ufolo ua tu bhana Nzambi?

12 Xinganeka kuila, eie ua bhana ujitu ua katunda kua kamba dié dia kazola. Kiebhi ki ueji divua se muene u texa o ujitu u ua mu bhana? Mba se muene u kuata o ujitu uenhó, phala ku bhangesa akuâ ku divua kiaiibha? Eie ueji kala ni ndolo ku muxima. Jihova ua tu bhana o ujitu ua kukala ni ufolo ua kusola. Mu kiki, kioso muene kia mona o athu kusola kiaiibha, ni kubhangesa akuâ ku divuua kiaiibha, muene u kala ni kuxixima ku muxima.  O Bibidia i zuela kuila, mu “izuua isukidila-ku,” o athu eji “kamba kusakidila.” (2 Timote 3:1, 2) Mu kiki, kiebhi ki tu tena kulondekesa kuila, tu bhana valolo ku ujitu ua ufolo ua tu bhana Jihova? Ni kiebhi ki tu tena kukalakala kiambote ni ujitu iú ua tu bhana Nzambi?

13. Ihi i tua tokala o kubhanga, phala ki tu kalakale kiaiibha ni ujitu uetu ua kusola?

13 Etu enioso tuala ni ufolo ua kusola o makamba metu, o izuatu, ni itonokenu. Kuma tuala ni ufolo iú, nange tu tena kumateka kusola ima ia zembe Nzambi, mba kukaiela o ima i bhanga o athu ku mundu. (Tanga 1 Phetele 2:16.) Mu veji dia kukalakala ni ufolo uetu phala kubhanga o ima iaiibha, tua tokala ku katula mbote ku ufolo uetu phala kubhanga ima ia “kuximanesa Nzambi.”​—1 Kolindo 10:31; Ngalásia 5:13.

14. Mukonda diahi tua bhingi kudielela kua Jihova, phala kukatula mbote ku ufolo uetu ua kusola?

14 Jihova uambe: “Eme Jihova Nzambi ié, u ku longa kioso kia uabha, hé u ku endesa mu njila i ua fuama kuenda mu ku di-tela.” (Izaia 48:17) Tua tokala ku dielela kua Jihova, ni kuxikina o jimbambe ja tu xindila, phala kusola o ima iambote. Tua tokala kuxikina ni muxima uoso kuila, “o njila ienda o muthu ki iene bhu lukuaku lua muthu-muène, mba muthu kienda, muene u tongesa o makanda mê-muène.” (Jelemiia 10:23) Adá ni akua Izalaiele, ka xikina o jimbambe ja a xindile Jihova. Mu veji dia kiki, ene a dielele ku mixima iâ. O phangu iâ iaiibha, i tu longa disá dia dikota. Mu veji dia ku dielela mudietu, tua tokala ku “dielela kua Jihova ni muxima [uetu] uoso.”​—Jisabhu 3:5.

 XILA O UFOLO UA AKUENU

15. Ihi i tu tena ku di longa mu milongi i tu sanga mu divulu dia Ngalásia 6:5?

15 Tua tokala ue kuxila o ufolo ua akuetu, ua kusola o ima ku muenhu uâ. Mukonda diahi? Kuma etu oso tuala ni ufolo ua kusola, sai bhabha, o Jikidistá ka-nda sola o ima mu ukexilu umoxi. Kiki ki tena kubhita, mu kusola ima ia lungu ni uendelu uetu, ni ubhezelu. Lembalala o kijila ki tu sanga mu divulu dia Ngalásia 6:5. (Tanga.) Se tu sota ku lembalala kuila, kala Kidistá ua-nda bhakula jikonda ku ima ia sola ku muenhu uê, tua-nda xila o ufolo ua akuetu.

Tu tena kusola kima, maji ki tu tokala ku jijidika akuetu kubhanga o kima ki tua solo (Tala o kaxi 15)

16, 17. (a) Maka ahi a monekene mu kilunga kia Kolindo? (b) Kiebhi Phaulu kia kuatekesele o Jikidistá ku Kolindo, ni ihi i tu tena o ku di longa?

16 Tu di longe phangu mu Bibidia, i tu londekesa se mukonda diahi tua bhingi ku xila o ufolo ua jiphange jetu. O Jikidistá akua Kolindo, akexile mu di kuata mukonda dia kudia o xitu io bhakuile ku ji nzambi ja makutu, ia kexile mu sumbisa mu itanda. Sai Jikidistá, akexile mu sumba o xitu ienióio, mukonda ejiidile kuila, o iteka ki ia kexile ni valolo. Maji o athu akexile mu bheza o iteka m’ukulu, a monene kuma, o kudia o xitu ienióio, kua difuile ni kubheza o iteka. (1 Kolindo 8:4, 7) Ia exile maka a dikota, mukonda eji uana o kilunga. Kiebhi Phaulu kia kuatekesele o Jikidistá kubatula o maka iá a dikota?

17 Kia dianga, Phaulu ua lembalesa o ibuka iiadi kuila, o kudia ki kueji kua kuatekesa kusuinisa o ukamba uâ ni Nzambi. (1 Kolindo 8:8) Mu kusuluka, Phaulu ua a dimuna, phala ka bhangese akuâ ku divua kiaiibha, mukonda dia “ufôlo” uâ ua kusola. (1 Kolindo 8:9) Mu kubhita thembu, muene ua tangela o athu akexile mu divua kiaiibha, phala ka fundise o athu akexile mu sola kudia o xitu. (1 Kolindo 10:25, 29, 30) Mu kiki, mu maka a lungu ni ubhezelu, o Kidistá muene ua tokala o kusola o kima kia-nda bhanga. Ki tu tokala kuxila ue o ufolo ua jiphange jetu mu ima iofele?​—1 Kolindo 10:32, 33.

18. Kiebhi ki u tena kulondekesa kuila, eie u bhana valolo ku ufolo ua kubhana Nzambi?

18 Jihova ua tu bhana ujitu ua kusola ni ufolo. O ujitu iú, u tu bhana o ufolo ua kidi. (2 Kolindo 3:17) Tu bhana valolo ku ujitu iú, mukonda u tu kuatekesa kusola kiambote o ima ku muenhu uetu, ni kulondekesa o henda ietu kua Jihova. Mu kiki, tu kolokotienu mu kusola o ima i mu ximanesa, ni kuxila o ufolo ua akuetu, ua ku kalakala ni ujitu iú ua dikota.