MIVU iavulu ku dima, nga kexile mu mbanza ia Brookings, Dakota, mu ixi ia Estados Unidos. Ngi lembalala kuila, sai kizuua mu kamene, kua kexile mu bhanga mbambi iavulu. Nga monene kuila, kueji mateka ku noka neve. Nga kexile ni kibuka kia athu mu kanzo kofele, maji mua zaile kiavulu, tua kexile mu teketa ni mbambi. Etu enioso tuemanene, bhu mbandu ietu kuexile ditangi diezalele ni menha a talala! Nga-nda mi tangela o musoso uami, ni mu tendele se mukonda diahi tua kexile bhu kididi kieniókio.

O MUIJI UAMI

Sekulu’ami Alfred ni ta’etu

A ngi vuala mu kizuua kia 7 kia mbeji ia Katanu, ka muvu ua 1936. O jitata jami a vuala kiuana kia tuana, eme ngi kasule. Tua tungile ku thonga ietu, mu mbanza ia Dakota. Tua kexile mu bhana valolo ku kikalakalu kietu kia kudima, maji sai kima kia mukuá kia betele-kota ku muenhu uetu. O jitata jami exile Jimbangi ja Jihova. Ene a a batizala ku muvu ua 1934. Ene a di bhakuile kua Jihova, mukonda dia kiki, o kima kia betele-o-kota ku muenhu uâ, o kubhanga o vondadi ia Jihova. Tat’etu Clarence, ni sekulu’ami Alfred, ene akexile ku pholo dia kilunga kiexile mu sanzala ia Conde, mu mbanza ia Dakota.

Semana joso, muiji uetu ua kexile muia mu iônge, ni kuboka nzo ni inzo, phala kulonga o athu ia lungu ni ikanenu ia Nzambi. O phangu iambote ia jitata jami, ni ulongelu uâ, ua tu kuatekesa kuzola Jihova. Eme ni Phang’iami Dorothy, tua mateka kuboka kioso ki tuexile ni samanu ia mivu. Ku muvu ua 1943, nga mateka kubhanga mbandu ia Xikola ia Utuminu. O xikola íii, ia matekene ku muvu uenió.

Kala muboki ua thembu ioso ku muvu ua 1952

Tua kexile mu bhana valolo iavulu ku iônge ia makota, ni iônge ia ilunga. Ngi lembalala o kiônge kia dikota kia bhitile ku muvu ua 1949, mu sanzala  ia Sioux Falls, mu mbanza ia Dakota. Phange Grant Suiter, ua bhange o diskursu ni diambu: “É mais Tarde do Que Pensais!” Muene ua zuela kuila, o Jikidistá joso a tokala ku di bhakula, phala kuboka o njimbu iambote ia Utuminu ua Nzambi. Mu kubhita kithangana, nga di bhakula kua Jihova. A ngi batizala mu kiônge kia ilunga kia kaiela, mu kizuua kia 12 kia mbeji ia Kamoxi ka muvu ua 1949, mu mbanza ia Brookings. Kiene kia ngi bhangesa kukala mu kanzo ka zaile kiavulu, ki nga tange ku dimatekenu. Tuexile tu kiuana kia athu, tuemanene phala ku tu batizala mu ditangi dienhódio.

Mu kusuluka, nga mateka o sidivisu ia thembu ioso. Nga mateka kubhanga o sidivisu íii mu kizuua kia dianga kia mbeji ia Katatu, ka muvu ua 1952. Mu kithangana kieniókio, nga kexile ni 15 kia mivu. O Bibidia izuela: “Uoso uenda ni jinjimu, u biluka njimu.” Ku muiji uetu, kuexile jinjimu javulu ja ngi kuatekesa mu sidivisu iami ia thembu ioso. (Jisabhu 13:20) Ithangana ioso, nga kexile mu boka kumoxi ni sekulu’ami Julius, sumbala uexile kiá ni 60 a mivu. Sumbala muene uexile muadiakimi, maji tua uabhele kiavulu kuboka kumoxi. Muene ua ngi longo ima iavulu. Mu kubhita thembu, phang’iami Dorothy ua mateka ue kukalakala kala muboki ua thembu ioso.

O TUFUNGA TUA ILUNGA TUA NGI KUATEKESA

Kioso ki ngexile ngi munzangala, o jitata jami akexile mu tambula o tufunga tua ilunga ni ahatu’â ku bhata dietu. Mu kifika, Jesse ni Lynn Cantwell, a ngi kuatekesa kiavulu. Ene akexile mu ngi suua, ni ku ngi suinisa kiavulu. Kioso kia kexile mu kunda o ilunga ia zukamene ni dibhata dietu, akexile ku ng’ixana phala kuia nau mu sidivisu ia kuboka. Nga uabhele kiavulu kukala ni ene! Eme nga mesenene kubhanga dingi mu sidivisu ia Jihova kala kiexile mu bhanga ene, ni kubhanga o sidivisu ia thembu ioso.

Bud Miller muene o kafunga ketu ka ilunga, ka kaiela. Kioso muene ni muhatu uê Joan, exile mu kunda o kilunga kietu, nga kexile ni 18 dia mivu. Mu kiki, nga tokalele kuia ku di londekesa ku jinguvulu, n’a mone se nga tokalele kuia mu ita. Kioso ki ngai mu disoneka, ene a mesenene ku ngi bhana kikalakalu kieji ngi bhangesa kubhukumukina o kitumu kia Jezú, kia lungu ni kukamba ku di ta mu maka a jinguvulu. Maji nga mesenene  kuboka o njimbu iambote ia Utuminu. (Nzuá 15:19) Mu kiki, nga a bhingi phala ku ngi bhana o ufolo ua kuboka o njimbu iambote.

Nga sanguluka kiavulu, kioso phange Miller, ua ngi tangela kuila, ua mesenene ku ngi xinjikila mu kiônge kieniókio. Muene kexile ni uôma ua athu. Uejiidile kiambote o Mikanda Ikôla. Mukonda dia kiki, o kuia kumoxi ni muene, kua ngi suinisa dingi! Mu kiki, ku muvu ua 1954, a ngi bhana o ufolo ua kukalakala kala mukunji. Nga kexile dingi ni ufolo phala kubhanga dingi mu sidivisu ia Jihova.

Kioso ki nga bhixila ku Betele, ni dikalu dia thonga

Ki ku bhitile kithangana kiavulu, a ng’ixana phala kukalakala ku betele, ku Fazenda da Torre de Vigia, mu mbanza ia Staten Island, Nova York. Nga kalakala kuenhoko nange mivu itatu. Mu kithangana ki nga bhiti bhu kididi kiki, nga dilongo ima iambote. Mukonda nga kalakala ni jiphange javulu exile jinjimu.

O SIDIVISU IA BETELE

Ni phange Franz ku WBBR

Mu thonga ia mbanza ia Staten Island, mua kexile ue o mutelembe ua WBBR. O Jimbangi ja Jihova ja kalakala ni mutelembe iú, tundé ku muvu ua 1924, katé ku muvu ua 1957. Kua kexile ngó 15 mba 20 a jiphange a a bhanene o ujitu ua ku kalakala mu thonga. Avulu tuexile tu minzangala, tua kambele uhete. Maji phange Eldon Woodworth, phange a mu undu, uexile o muadiakimi ua kexile mu kalakala n’etu. Muene ua kexile kala tat’etu, ua tu longo ima iavulu. Sai ithangana, ki tuexile mu kala ni maka mudietu, phange Woodworth ua kexile mu zuela: “Mu kidi, Ngana uene mu bhanga madiuanu, ni ió a a bhana o ujitu ua kubhanga o kikalakalu kiê.”

Harry Peterson ua suinine mu sidivisu ia kuboka

Phange Frederick W. Franz ua kexile ue n’etu, muene ua tu kuatekesa kiavulu. Muene uexile njimu, uejiidile ue kiambote o Mikanda Ikola. Ua kexile mu tu suua. Phange Harry Peterson, muéne ua kexile mu ku tu lambela o kudia. Tua uabhele dingi ku muixana mu dijina diê dia sukina, mu veji dia ku mu ixana mu dijina dié muene, Papargyropoulos. Muene a mu undile ue, ua zolele kiavulu o sidivisu ia kuboka. Phange Peterson, ua kexile mu bhanga kiambote o kikalakalu kiê ku Betele, maji kexile mu jimba o ukunji uê. Muene ua kexile mu bhana jihama ja madivulu mu mbeji joso. Uejiidile kiambote o Mikanda Ikola, ua kexile ue mu tambuijila o ibhuidisu ietu.

 NGA DILONGO NI JIPHANGE JA AHATU

Mu thonga, tua kexile mu sokejeka o ibundu ni mafe a kudia, mu ji lata. Nange 42.600 a ji litulu ja ibundu ni mafe a kudia ku muvu, ji tua kexile mu tumikisa ku muiji ua Betele. Nga kalakala ni phange Etta Huth, njimu ia dikota ia muhatu. Muéne ua kexile mu bhana o milongi, phala ku sokejeka o ibundu. Jiphange ja ahatu ja tungile bhua zukama, akexile mu kalakala kumoxi n’etu; Etta muéne ua kexile mu kuendesa o kikalakalu kiâ. Sumbala Etta uejiidile kiambote o kikalakalu kia kusokejeka o ibundu, muene ua kexile mu xila kiavulu o jiphange ja kexile ku pholo dia ikalakalu mu thonga. Muene ua bhana phangu iambote phala etu enioso.

Kumoxi ni Angela, ni Etta Huth

Kua kexile phange ia muhatu, uejile mu ku tu kuatekesa ku ikalakalu mu thonga, dijina diê Angela Romano. Phange Etta ua mu kuatekesele kuijiia o kidi kia Bibidia. Eme ni Angie tua kazala ku mbeji ia Kasamanu ka muvu ua 1958. Kiadi kietu, tuene mu bhita ithangana ia kisangusangu mu sidivisu ia Jihova ku 58 a mivu. Ku mivu ioso iii, o ufiiele ua Angie kua Jihova, uene mu kolesa dingi o ukaza uetu. Muene njimu ia muhatu. Nga mu dielela ni muxima uoso, né muene mu ithangana ia ibhidi.

SIDIVISU IA AKUNJI A JIXI JENGI, NI KUKUNDA O ILUNGA

Kioso o jiphange kia sumbisa o mutelembe WBBR mu mbanza ia Staten Island ku muvu ua 1957, ngai mu sidivila ka kithangana ku Betele mu mbanza ia Brooklyn. Ki kua bhiti thembu, nga kazala ni Angie, mu kiki, nga xisa o Betele. Mu mivu itatu, tua sidivila kala aboki a thembu ioso mu mbanza ia Staten Island. Nga kalakala ka kithangana ni jingana ja ubhe ja mutelembe ua kexile kia mu kuixana WPOW.

Tua solo kusosolola o ima ku muenhu uetu, mukonda eme ni Angie, tua mesenene kukala ni kithangana kia soko phala kukalakala kuoso-kuoso kueji bhinga. Mu kiki, ku muvu ua 1961 tua xikina o ujitu ua ku kalakala kala aboki a katunda, mu mbanza ia Falls City, Nebraska. Maji ki tua bhixila, a tuixana phala kuia ku Xikola ia tufunga mu mbanza ia South Lansing, Nova York. Tua uabhela kiavulu o milongi i tua tambula. Tua banzele kuila, ki tueji zubha o xikola tueji vutuka ku mbanza ia Nebraska. Mu kiki, tua diuana kiavulu kioso ki tua tambula kikalakalu kiéngi. A tu tumikisa kala akunji a jixi jengi mu ixi ia Camboja! O ixi ienioió, ixi iambote. Tua mono, tuevu ni kulola ima iavulu iambote. Tua mesenene muene kubokela o athu, ia lungu ni njimbu iambote ia Utuminu.

Kumoxi ni Angela ku muvu ua 1975, ande dia kuzuela mu mutelembe ua izuzumbia

Maji kioso kia mateka o ita mu ixi ia Camboja, tuai ku ixi ia Vietnã. Mu kubhita mivu iiadi, nga kuata uhaxi ua dikota, mukonda dia kiki, tua vutuka ku ixi ia Estados Unidos. Nga bhingile tu ithangana phala ku disanza. Kioso ki nga disanze, tua mateka dingi o sidivisu ia thembu ioso.

Mu mbeji ia Katanu ka muvu ua 1965, tua mateka ku kunda o ilunga. Mu 33 a mivu, tua uabhela ku kunda o ilunga, ni ku kuatekesa mu iônge ia makota. Nga uabhelele kiavulu o kikalakalu kiki, mukonda o ithangana ia iônge ia makota, ithangana ia kusanguluka. Tua bhiti mivu mu kukunda o ilunga mu mbanza ioso ia Nova York, ni ku sokejeka iônge ia makota mu Estádio Ianque.

 TUA VUTUKA KU BETELE, NGA MATEKA KULONGA DINGI MU JIXIKOLA JA UTUMINU

Mu kubhita thembu, eme ni Angie tua tambula ikalakalu iavulu ia ubhe. Ku muvu ua 1995, a ngi bhingi phala kulonga o Xikola Phala o Jiphange Makudi. Mu kubhita mivu itatu, a tuixana phala kuia ku Betele. Mu kubhita 40 a mivu, nga sanguluka mu kuvutuka ku Betele, mukonda kuene ku nga matekene o sidivisu ia thembu ioso. Nga bhange mivu iavulu mu ku kalakala mu Kibuka Kia Sidivisu, ni kulonga mu jixikola javulu. Ku muvu ua 2007, o Kibuka Kia Utuminu kia sokejeka o Kibuka Kia Jixikola, phala kulanga o ima ioso ia lungu ni jixikola joso ja kexile mu longa ku Betele. Mu kiki, a ngi solo phala kulanga o kikalakalu kiki.

Mu mivu iii, a lungulula kiavulu o jixikola ku Betele. Ku muvu ua 2008, tua mateka ni Xikola phala o Tufunga. Mu mivu iiadi ia bhiti, a longo 12.000 ja tufunga ndenge, mu jixikola ja Patterson ni Brooklyn. Lelu, ene mu bhanga ue o xikola iii mu jixi ja ka mukuá. Ku muvu ua 2010, tua mateka ni Xikola Phala o Jiphange ja Makudi. A sokejeka dingi o Xikola Phala o Makaza Jikidistá.

Mu mbeji ia Katutu ka muvu ua 2014, o jixikola jiiadi jiji, a ji bundu. Mu kiki, a mateka ku i xana Xikola ia Aboki a Utuminu. O adilongi a tena kukala makaza, jiphange ja maiala ni ja ahatu ala hanji makudi. Ku mundu uoso, athu avulu a sanguluka, kioso kiévu kuila, eji tena kudilonga o xikola iii mu ixi iâ. Kisangusangu kia dikota kumona kuila, athu avulu a-ndala ku di longa o jixikola jiji. Ngi sakidila kiavulu, mu ku di sanga ni athu avulu a sosolola o ukexilu ua mienhu iâ, phala ku di longa mu jixikola jiji.

Kioso ki ngi banza o muenhu uami, tundé kia ngi batizala mu inzo ienioió ia zaile kiavulu, ngi sakidila Jihova mu kuijiia athu avulu a unjimu. Ene a ngi kuatekesa ku muijiia, ni ku mu sidivila kiambote. Sai jiphange exile kiá adiakimi, a mukuá exile jindenge jami. Avulu exile athu a ijila iéngi. Maji bhu kaxi ka ibhangelu iâ, nga mono kuila, ene a zolele kiavulu Jihova. Ngi sakidila kiavulu o makamba a unjimu mu kilunga kia Jihova, a tena ku ngi longa ima iavulu.

Nga uabhela kiavulu kuijiia adilongi a jixi javulu