Ku muvu ua 2012, o athu akua kusota o ima koxi a mavu, a sange ibelengenze mba ituetue ia kitutu kia utuma, kiala ni 3.000 ja mivu. O akua ku tokuesa, a sangulukile kiavulu. Mukonda diahi? Ka sangulukile mukonda dia ibelengenze kana, maji mukonda dia kisoneku kiexile ku kitutu.

Kioso o akua kusota o ima koxi a mavu, kia sokejeka o ibelengenze ioso, ene a tena kutanga o izuelu ia akuá Kanana io soneke ku kitutu. O kisoneku kiki kiamba: “Eshba’al Ben Beda.” O kizuelu kiki kilombolola kuila,“ Eze-Bahale mon’a Beda.” Kiki kiene o kithangana kia dianga, o athu akua kusota o ima koxi a mavu, kia sange o dijina didi dio soneke mu kima kio’ukulu.

O Bibidia i tumbula ue muthu uéngi a muixana Eze-Bahale. O muthu iú, uexile mona Sobha Saúlu. (1 Malunda 8:33; 9:39) O Mesene Yosef Garfinkel, muthu ua kuatekesa ku sanga o kitutu kiki, uambe: “Kima kiambote kuijiia kuila, o dijina Eze-Bahale a di sanga mu Bibidia, maji lelu, tu di sanga ue mu ima io bhake, io sange moxi a mavu mu izuua ia utuminu ua Sobha Davidi.” Kiki kilondekesa kuila, o kikalakalu kia akua kusota o ima koxi a mavu, ki kuatekesa o kidi kia izuelu ia Bibidia!

Mu Bibidia, o mon’a Saulu, Eze-Bahale, a muixana ue Ixi-bozete. (2 Samuuele 2:10) Mukonda diahi o dijina “bahale,” a di lungulula mu dijina dia “bozete?” O athu akua ku tokuesa, a jimbulula kuila, o musoneki ua Divulu dia Kaiadi dia Samuuele, nange ka tumbula o dijina dia Eze-Bahale, mukonda o dijina didi, dia kexile mu lembalala ku akua Izalaiele, o dijina dia nzambi ia makutu, Bahale, o nzambi ia jinzaji, ia kexile mu bheza akua Kanana. Maji mu Bibidia, mu divulu dia Dianga dia Malunda, tu tena ku sanga-mu hanji o dijina Eze-Bahale.