“Nga sanguluka mu kubhanga ki ua mesena eie u Nzambi iami.”JISÁLAMU 40:8.

MIMBU: 51, 48

EIE u munzangala, o kuila ua mesena ku di batizala? Se kiene, iú uene o ujitu ua beta-o-kota u uala nau. Kala ki tua di longo kiá, o batizu kima kia dikota. Eie ulondekesa ku athu kuila, ua di bhakula kua Jihova. Kiki kilombolola kuila, eie ua mu kanena ku mu sidivila katé ku hádia ni hádia, ni kuila, o kima kia beta-o-kota ku muenhu uê, o kubhanga o vondadi ia Nzambi. Kuma kikanenu kia dikota kua Nzambi, eie ua tokala ngó ku u batizala, kioso ki u mona kuila, uala ni kixikanu kia kolo, ni mu vondadi iê, ni kioso ki u tendela kiambote se ihi ilombolola ku dibhakula kua Nzambi.

1, 2. (a) Jimbulula se mukonda diahi o batizu kima kia dikota. (b) Ande dia muthu ku mu batizala, ihi ia tokala kuijiia, ni mukonda diahi?

2 Maji, nange eie kuala luua polondo phala o batizu. Mba nange eie uala polondo, maji o jitata jê a ku bhingi phala kukingila  katé ki ua-nda kula dingi, ni kukala ni kuijiia kua soko. Ihi i ua tokala o kubhanga? Kana kubhuila. Mu veji dia kiki, katula mbote mu kithangana kiki, phala kubhanga ima i tena ku kukuatekesa kukala polondo phala o batizu. Eie u tena kusuua mbambe mu maukexilu atatu: (1) o kixikanu kiê, (2) o uendelu uê, ni (3) kisakidilu kiê.

O KIXIKANU KIÊ

3, 4. Ihi i tena ku di longa o minzangala mu phangu ia Timote?

3 Xinganeka kiebhi ki ueji tambuijila o ibhuidisu íii: Mukonda diahi, ngi xikina kuila, kuene Nzambi? Mukonda diahi ngi dielela kuila, o Bibidia ia tokala kua Nzambi? Mukonda diahi ngi belesela o itumu ia Nzambi, mu veji dia kukaiela o ukexilu ua athu k’abhezi a Nzambi? O ibhuidisu íii, i tena ku kukuatesa kukaiela o itendelesu ia poxolo Phaulu, kioso kiambe: “Mu tongolole ioso o vondadi ia Nzambi, iauabha, ia ujitu, iatenena, i mu uabhela kiambote.” (Loma 12:2) Mukonda diahi ua tokala kubhanga kiki?

Timote ua xikina o kidi kia Mikanda Ikola, mukonda muéne ua tokuesa o ima ia di longele, anga ua i mono kuila, ima ia kidi

4 O phangu ia Timote ia-nda kukuatekesa. Manh’ê ni kuku’ê, a mu longele o Mikanda Ikola, mukonda dia kiki, muéne uejidile kiambote o Mikanda Ikola. Maji, Phaulu ua tangela Timote: “Eie-phe, xikama mu ima ioso i ua di longa jinga, i ua mono ia kidi.” (2 Timote 3:14, 15) O kizuelu “ua mono ia kidi,” kilombolola kuxikina ni kidi kioso, kala kia kidi muéne. Mu kiki, Timote ua tokalele kudielela ni kidi kioso kuila, o milongi ia kidi ia kexile mu Mikanda Ikola. Kuma manh’ê ni kuku’ê a mu longele o kidi, muéne ka xikinine o Mikanda Ikola mukonda dia ene. Mu veji dia kiki, muéne ua tokuesa o ima ia di longele, anga ua i mono kuila, ima ia kidi.Tanga 1 Tesalonika 5:21.

5, 6. Mukonda diahi kima kiambote kukala ni ‘kilunji kia fuama’ tundé mu unzangala?

5 Abha eie? Nange uejiia o kidi kia Bibidia tundé ukulu. Se kiene, xinganeka se mukonda diahi ua xikina o kidi kiki. Kubhanga kiki, kua-nda suínisa o kixikanu kiê. Kua-nda kukuatekesa ué kusola kiambote o ima, né muene ni ijijidiku ia jikoleka jê, mba o ibanzelu ia athu ku mundu.

6 Kima kiambote kukala ni ‘kilunji kia fuama’ tundé mu unzangala uê. Kiki, kia-nda ku pelepalala phala kuvutuila kiambote o ibhuidisu ia jikoleka jê. Ene nange a ku ibhuidisa: ‘Ihi i ku bhangesa kuxikina kuila, kuene muéne Nzambi? Se Nzambi mukuá henda, mukonda diahi muéne uehela o hadi? Kiebhi Nzambi u nangenena tundé xahulu?’ Se uejiia kiambote o itambuijilu ia ibhuidisu íii, kua-nda kala ni phata. Mu veji dia kiki, ua-nda di suínisa ku di longa dingi o Bibidia.

7-9. Jimbulula kiebhi o mbandu ni diambu, “O Que a Bíblia Realmente Ensina?,” i tu sanga mu kijimbuete kietu, i tena kusuínisa o kixikanu kiê?

7 Se u di longa kiambote o Bibidia ubheka  uê, eie u tena kutambuijila o ibhuidisu, kueha kukala ni jiphata, ni kukolesa o kixikanu kiê. (Ikalakalu 17:11) Tuala ni madivulu avulu phala kubhanga kiki. Saí athu a sange kikuatekesu mu ku di longa o kadivulu ni diambu A Origem da Vida—Cinco Perguntas Que Merecem Resposta, ni divulu ni diambu Existe um Criador Que Se Importa com Você? Minzangala iavulu a uabhela o mbandu ni diambu “O Que a Bíblia Realmente Ensina?” i tu sanga mu kijimbuete kietu jw.org. O mbandu íii, iala ku luiji lua diambu ENSINOS BÍBLICOS. O jimbandu jiji, a ji bhange phala kukuatekesa kukolesa o kixikanu kiê kia lungu ni Bibidia.

8 Nange saí ibhuidisu eie uejiia kiá o itambuijilu, mukonda dia ku di longa o Bibidia. Maji o kuila eie u xikina ni kidi kioso mu itambuijilu iê? O mbandu íii, ia-nda kukuatekesa kutokuesa ni muanhu uoso ibatulu iavulu ia Bibidia. Ia-nda suínisa ué o kixikanu kiê. Ua-nda kala polondo phala kubokela akuenu o milongi i u xikina. U tena kubokona mu mbandu ni diambu “O Que a Bíblia Realmente Ensina?” mu jw.org, u i katule phala ku u kuatekesa kusuínisa o kixikanu kiê mu ku di longa o Bibidia ubheka uê.

9 Eie ua tokala kuxikina ni kidi kioso o kidi kia Bibidia. Kiki kia-nda kupelepalala phala o batizu. Saí phange ia muhatu, uambe: “Ande dia ku ngi batizala, nga kexile mu di longa o Bibidia. Mu kubhita kithangana, nga mono kuila, iú uene o ubhezelu ua kidi. O Kuijiia kuku, ku ngi suínisa dingi izuua ioso.”

O UENDELU UÊ

10. Mukonda diahi o Kidistá a mu batizala, ua tokala kulondekesa o kixikanu kiê bhu kaxi ka uendelu uê?

10 O Bibidia iambe: “O kuxikan’oko, kua bhingi ki ku moneka ima iê ia kubhanga, kua di fuila.” (Tiiaku 2:17) Se uala ni kixikanu kia kolo, ua-nda kilondekesa bhu kaxi  ka uendelu uê. O Bibidia ixana o ima íii kala “kuuabha uendelu, mienhu ienu ia fuama mu i bhakula mu kuzela, ni uôma ua Nzambi.”Tanga 2 Phetele 3:11.

11. Jimbulula o kizuelu kukala ni ‘uendelu ua zele.’

11 O ‘uendelu ua zele’ ulombolola ihi? Se o uendelu uê uoso ua zele, eie u muthu ua zele. Mu kifika, xinganeka o ima ia bhiti n’eie mu jimbeji jisamanu ja bhiti. Kioso kia ku tendala phala kubhanga ima iaiibha, o kuila eie ua sungu o kilunji kiê phala kusola o kima kia uabha, mu íii iaiibha? (Jihebeleu 5:14) O kuila eie u di lembalala o kithangana ki ua ditunu kubhanga kima kia iibha, mukonda dia tendasá mba o kijijidiku kia jikoleka jê? O kuila eie u phangu iambote phala akuenu bhu xikola? O kuila eie u kolokota mu ufiiele kua Jihova, inga u bhanga o ima ia uabhela o jikoleka jê, phala ka ku sebhulule? (1 Phetele 4:3, 4) Mu kidi, etu enioso tu akua ituxi. Saí ithangana, katé muene ni ió ene mu sidivila Jihova mu mivu iavulu a kala ni hele, ni kuila, ka kolokota mu sidivisu ia kuboka. Maji o muthu ua di bhakula kua Nzambi u sanguluka mu kukala Mbangi ia Jihova. Mukonda dia kiki, muéne ulondekesa bhu kaxi ka uendelu uê ua zele.

12. O kukala ni “uôma ua Nzambi” kua lungu ni ihi? Kiebhi ki ua tokala kumona o ima íii?

12 O kukala ni “uôma ua Nzambi” kua lungu ni ihi? Kua lungu ni ikalakalu i u bhanga mu kilunga, kála o kuia mu iônge ni kuboka. Kua lungu ué ni ima i u bhanga ubheka, kála o kusamba kua Jihova ni ku di longa o Bibidia. O muthu ua bhakula o muenhu uê kua Jihova ka banze kuila, o ima íii ia bhonzo. Muéne u divua kala Sobha Davidi. Muéne uambe: “Nga sanguluka mu kubhanga ki ua mesena eie u Nzambi iami; xi, mbata, o ngonge ié ia ngi kala moxi dia muxima.”Jisálamu 40:8.

Ihi i uene mu tumbula mu misambu iê, ni ihi ilondekesa ia lungu ni henda iê kua Jihova?

13, 14. Milongi iebhi i tena ku ku kuatekesa kubhanga o ima ia tokala kulondekesa o muthu uala ni “uôma ua Nzambi,” ni mbote iahi ijila mu milongi íii?

13 Mu divulu Os Jovens Perguntam—Respostas Práticas, Volume 2 mu jimbandu 308 ni 309, tu sanga-mu kaxa phala kukuatekesa kusuua mbambe. Mu kaxa íii, nange eie u tena kutambuijila o ibhuidisu kala íii: “Ihi i uene mu tumbula mu misambu iê, ni ihi ilondekesa ia lungu ni henda iê kua Jihova?” “Milongi iebhi ia Bibidia i uene mu di longa ubheka uê?” “O kuila eie uene mu boka mu vondadi iê?” Mu kaxa íii, tu sanga-mu ué kididi phala kusoneka o jimbambe ji ua mu suua ja lungu ni kusamba, ku dilonga o Bibidia ubheka uê, ni kuboka.

14 Minzangala iavulu a mesenene ku a batizala, a uabhela o kaxa íii. Saí munzangala ua muhatu a mu ixana Tilda, uambe: “Nga soneka mu kaxa íii, o jimbambe ji nga mesenene kusuua. Bhofele bhofele nga kexile mu kumbidila o ima i nga sonekene. Mu kubhita muvu umoxi, nga kexile polondo phala ku ngi batizala.” Kiene ué kia bhange phange Patrick. Muéne uambe: “Ngejidile kiá o  jimbambe ji nga mesenene kusuua, maji o kusoneka o jimbambe jiji mu mukanda, kua ngi suínisine kubhanga ioso phala ku ji kumbidila.”

O kuila ua-nda kolokota mu ufiiele uê kua Jihova, né muéne se o jitata jê ka mu mu sidivila dingi? (Tala o kaxi 15)

15. Jimbulula se mukonda diahi o muthu a tokala ku mu batizala mu vondadi iê.

15 Saí kibhuidisu ki tu sanga mu kaxa íii, kiambe: “O kuila eie ua-nda kolokota mu ufiiele uê kua Jihova, né muéne se o jitata jê mba makamba mê ka mu mu sidivila dingi?” Kioso ki u di bhakula kua Jihova, anga a ku batizala, eie u kituka kamba diê. Mu kiki, eie ku solo kubhanga o ima phala o jitata jê mba muthu uoso uoso, maji phala kuximana ngó Jihova. O kukala ni uendelu ua zele ni uôma ua Nzambi, kulondekesa kuila, eie ua xikana o kidi, ni kuila, eie ua mesena kubelesela ni muxima uoso o itumu ia Nzambi. Mu kubhita kithangana, eie ua-nda kala polondo phala ku kubatizala.

O KISAKIDILU KIÊ

16, 17. (a) Ihi ia tokala kubhangesa o muthu kukituka Kidistá? (b) Kifika kiebhi ki tena ku tu kuatekesa kujimbulula o kisakidilu kietu ku ujitu ua kukula?

16 Saí kizuua, diiala uejidile kiambote o Kitumu kia Mozé uebhula kua Jezú: “Kiebhi o kijila kia dikota mu Kitumu? Jezú ua mu vutuila, uixi: Zola Ngana, Nzambi iê, ni  muxima ué uoso, ni muenhu ué uoso, ni kilunji kié kioso.” (Matesu 22:35-37) Jezú ua jimbulula kuila, o henda ietu kua Jihova, iene i bhangesa o muthu ku mu batizala ni kukala Kidistá. O ukexilu uambote ua mukua u suínisa o henda iê kua Jihova, o kuxinganeka kiambote mu kukula, o ujitu ua dikota ua bhana Nzambi phala o athu. (Tanga 2 Kolindo 5:14, 15; 1 Nzuá 4:9, 19.) Se u bhanga kiki, ua-nda mesena kulondekesa o kisakidilu kiê ku ujitu iú ua dikota.

17 Tu tena kujimbulula o kisakidilu kietu ku ujitu ua kukula mu ukexilu iú: Xinganeka kuila, eie ua mu boba mu menha, anga kuíza muthu u kubhulula. O kuila ueji ia mu inzo iê, ni kujimba o ima ia bhange o muthu iú? Kana! Eie ua tokalele kusakidila o muthu, mukonda dia kubhulula o muenhu uê! Kiene kimoxi ué, tua tokala kusakidila Jihova ni Jezú, mukonda dia ujitu ua kukula. Tuala ku muenhu, mukonda dia Ene! Ene a tu bhulula ku kituxi ni kalunga. Kuma ene a tu zolo, tuala ni kidielelu kia kukala ni muenhu ua kalelaku mu Palaízu mu ixi!

18, 19. (a) Mukonda diahi eie ku tokala kukala ni uôma ua ku di bhakula kua Jihova? (b) Kiebhi o kusidivila Jihova, kusangulukisa dingi o muenhu uê?

18 O kuila, eie uene mu londekesa o kisakidilu kiê mu ima ioso ia bhange Jihova phala o mbote iê? Se kiene, o ku di bhakula ni batizu iene o ima i ua tokala o kubhanga. Kioso ki u di bhakula kua Nzambi, eie u mu kanena ku mu sidivila katé ku hádia ni hádia. O kuila, eie ua tokala kukala ni uôma ua kikanenu kiki? Kana! Jihova ua mesena o mbote iê, muéne ua-nda bhulula ió ene mu bhanga o vondadi iê. (Jihebeleu 11:6) Kuma eie ua bhakula o muenhu uê kua Nzambi, anga a ku batizala, ua-nda sanguluka mu kukala ni muenhu ua uabha! Saí phange a mu batizala ande dia unzangala, maji lelu uala kiá ni 24 a mivu, uambe: “Nange ngeji tendela kiambote o ima, se ng’exile muadiakimi, maji o ku di bhakula kuami kua Jihova kua ngi fikidila ku ima ia mundu.”

Satanaji mukua luímbi, ka mesena o mbote iê

19 Jihova ua mesena o mbote iê. Maji Satanaji mukua luímbi, ka mesena o mbote iê. Se u bhanga o vondadi iê, muéne ka tena ku kubhana ima iambote. Muéne ka tena ku kubhana kima kala na-kiu. Muéne kala ni njimbu iambote, ni kuila, kala ni kidielelu. Kuma a-nda mu buika ku hádia, muéne ka tena ku kubhana kidielelu!Dijingunuinu 20:10.

20. Ihi ia tokala kubhanga o munzangala ua mesena o ku dibhakula ni ku mu batizala? (Tala o kaxa “PHALA KU KUATEKESA KUSUUA MBAMBE.”)

20 O kikanenu kia beta-o-kota ku muenhu uê, o kubhakula o muenhu kua Jihova. O kuila uala polondo phala kubhanga kiki? Se kiene, kana kukala ni uôma. Maji se u divua kuma, kuala luua polondo, kaiela o itendelesu ia milongi íii phala kusuluka ni kukolesa o ukamba uê ni Nzambi. Phaulu ua tendelesa o jiphange akua Filipe phala kusuluka ni kusuínisa o ukamba uâ ni Nzambi. (Filipe 3:16) Se u bhanga ioso phala kukaiela o kitendelesu kiki, ua-nda mesena kubhakula o muenhu uê kua Jihova, ni ku ku batizala.