“O mu ku di tuma kuetu ni muène Kristu, o mukutu uoso u di banda kiambote.”​—EFEZO 4:16.

MIMBU: 53, 16

JIHOVA uene ni ukamba uambote ni Jezú, tundé kia mu bhange. Jihova ua bhange Jezú, ande dia kubhanga o ima ioso. Mu kusuluka, Jezú ‘ua kexile nê kumoxi, kala dixibulu diê.’ (Jisabhu 8:30) O jiselevende ja Jihova m’ukulu, a di kuatekesa ué phala kukumbidila o kikalakalu kia a bhanene. Mu kifika, Noué ni muiji uê a kalakala kumoxi phala kutunga o álaka. Mu kubhita kithangana, o akua Izalaiele a kalakala ué kumoxi phala kutunga o balaka, ni ku i sokomona phala kuia na-iu mu ididi ia mukuá. Mu tembulu, ene akexile mu kuimba ni kuxika jingoma, phala kuximana Jihova ni mimbu iambote. O mundu ua Jihova ua bhange o ima ioso íii, mukonda akexile mu kalakala kumoxi.​—Dimatekenu 6:14-16, 22; Dialuilu 4:4-32; 1 Malunda 25:1-8.

2. (a) Kiebhi kia kexile mu kalakala o Jikidistá ku hama ia dianga? (b) Ibhuidisu iebhi i tua-nda tambuijila?

 2 O Jikidistá ku hama ia dianga, akexile mu kalakala ué kumoxi. Poxolo Phaulu ua jimbulula kuila, sumbala kala muthu ua kexile ni ufunu uê, o ikalakalu ué ki i di fuile, maji né kiki, ene akexile mu kalakala kumoxi. Ene oso akexile mu kaiela o itendelesu ia Ngana iâ, Jezú Kristu. Phaulu ua a sokesa ni mukutu uala ni idiandu iavulu, i kalakala kumoxi. (Tanga 1 Kolindo 12:4-6, 12.) Maji ihi i tuamba ia lungu n’etu? Kiebhi ki tu tena kukalakala kumoxi mu sidivisu ia kuboka, mu kilunga, ni ku muiji?

KUATEKESA MU SIDIVISU IA KUBOKA

3. Kisuma kiahi kia mono poxolo Nzuá?

3 Ku hama ia dianga, poxolo Nzuá ua mono kisuma kia sambuadi dia ji-anju, ja kexile mu xika jikoloneta. Kioso o anju ia katanu kia xiki o koloneta iê, Nzuá ua mono ‘thèthembua ia kexile ku diulu, íii ia lauka bhoxi.’ O “thèthembua” ia kuata o sabhi, anga i jikula o dikungu dia zongo, mua vundile kiavulu. Mu dikungu mua fuafua dixi, mu dixi anga mu tunda mahoho. Mu veji dia kuzanga o iangu ni mixi, o mahoho a kuama o athu oso ‘a kambele o kidimbu kia Nzambi bhu dibhômo.’ (Dijingunuinu 9:1-4) Nzuá uejidile kuila, o mahoho a tena kuzanga ima iavulu, mukonda kiene kia bhitile mu ixi ia Ijitu mu izuua ia Mozé. (Makatukilu 10:12-15) O mahoho a mono Nzuá, alombolola o Jikidistá a a undu ene mu boka o njimbu ia lungu ni jingeleja ja makutu. Mazunda ni mazunda a a athu a kingila kutambula o muenhu ua kalela-ku mu ixi, a dibundu kumoxi ni Jikidistá a a undu. Ene a bhanga kumoxi o sidivisu ia kuboka. O kikalakalu kiki, kia kuatekesa athu avulu kuxisa o jingeleja ja makutu, ni kubhuluka bhu maku a Satanaji.

Tua mu boka o njimbu ku mundu oso, mukonda tu kalakala kumoxi mu kilunga

4. Kikalakalu kiahi kiala na-kiu o mundu ua Nzambi, ni kiebhi kia tena kubhanga kiambote o kikalakalu kiki?

4 Tuala ni kikalakalu kia kuboka o ‘njimbu iambote’ ku athu oso ku mundu, ande dia kuíza o dizubhilu. Kiki kikalakalu kia dikota! (Matesu 24:14; 28:19, 20) Tua tokala kuixana o athu oso ala ni “dinhota,” phala kúnua o “menha ma muenhu.” Kiki kilombolola kuila, tua tokala ku longa o kidi kia Bibidia ku athu oso a mesena kuijiia o kidi kiki. (Dijingunuinu 22:17) Maji tu tena ngó kubhanga o kikalakalu kiki, se tu ‘dibunda kumoxi,’ ni ku di kuatekesa mu kilunga.​—Efezo 4:16.

5, 6. Kiebhi ki tu dibunda kumoxi, kioso ki tu boka o njimbu iambote?

5 Phala kutula o njimbu ku athu avulu, tua bhingi ku di sokejeka kiambote, phala kubhanga o kikalakalu kia kuboka. O itendelesu i tu tambula mu kilunga kietu, i tu kuatekesa kubhanga o kikalakalu kiki. Kioso ki bhua o kiônge kia sidivisu, tu tunda phala kuia mu boka o njimbu iambote ia  Utuminu. Tu bhana ué ku athu o madivulu metu a Bibidia. Mu kidi, tua bhana kiá mazunda ni mazunda a madivulu iá ku mundu uoso. Saí bhabha, a tu bhinga phala kutunda mu ibuka ia makota, phala ku bhana madivulu. Kioso ki u bhanga o kikalakalu kiki, ua mu dibunda kumoxi ni mazunda a jiphange jamukuá, a mu boka ué o njimbu íii ku mundu uoso! Ua mu kalakala ué kumoxi ni ji-anju, ja mu kuatekesa o mundu ua Nzambi kuboka o njimbu iambote.​—Dijingunuinu 14:6.

6 Kisangusangu kia dikota kutanga mu divulu Anuário, o mabesá u tuene mu tambula ku mundu uoso, mukonda dia kubhanga o kikalakalu kia kuboka! Xinganeka ué kiebhi ki tu kalakala kumoxi ni jiphange jetu ku mundu uoso, mu kuixana o athu phala kuia mu iônge ietu ia makota. O milongi i tuívua mu iônge íii, iene imoxi. O madiskursu, ni ji drama, ni ifika, i tu suínisa kubhanga ioso phala kusidivila Jihova. Tu dibunda ué kumoxi ni jiphange jetu ku mundu, kioso ki tuia mu fesa ia Lembalasa ku mivu ioso. (1 Kolindo 11:23-26) Etu enioso tu diongeka kimoxi mu kizuua kia 14 kia mbeji ia Nizá, kioso ki boba o dikumbi. Tuene mu bhanga kiki, phala kulondekesa o kisakidilu kietu kua Jihova, ni kubelesela o kitumu kia Jezú. Ande dia Lembalasa, tu bhita jisemana mu kukalakala kumoxi phala kuixana athu avulu, n’a di bunde kumoxi n’etu mu fesa íii ia dikota.

7. Ihi i tu tena kubhanga, kioso ki tu kalakala kumoxi?

7 O dihoho dimoxi, ki di tena kuzanga ima iavulu. Kiki ki bhita ué n’etu. Muthu umoxi, ka tena kubokela o athu oso ku mundu. Mukonda dia kukalakala kumoxi, tu tena kutula o njimbu ia lungu ni Jihova ku mazunda a athu, ni kukuatekesa amoxi mudiâ kuximana Jihova.

KUATEKESA MU KILUNGA

8, 9. (a) Kifika kiahi kia bhana Phaulu, kia londekesa o valolo ia Jikidistá kudizola? (b) Kiebhi ki tu tena kukuatekesa mu kilunga?

8 Phaulu ua jimbuluila akua Efezo, kiebhi kia sokejeka o kilunga. Mu ku suluka, ua a tangela kuila, o athu oso mu kilunga a bhingi ‘kukula mu ima ioso.’ (Tanga Efezo 4:15, 16.) Phaulu ua bhana phangu ia lungu ni mukutu, phala kujimbulula kuila, o Jikidistá joso a tena kubhanga kima phala kukuatekesa o jiphange mu kilunga kudizola mudiâ, ni kukaiela o phangu ia Jezú, o Mutuameni ua kilunga. Phaulu ua zuela kuila, o mukutu uoso ua disokejeka mu idiandu, “i kumbidila mu ididi iê.” Mu kiki, ki kale se tu minzangala mba adiakimi, se tuala ni sauidi iambote mba kana, ihi i tua tokala kubhanga?

Kiebhi ki u tena kukuatekesa o jiphange mu kilunga kudizola mudiâ?

9 Jezú ua solo o tufunga, phala kuendesa o kikalakalu mu kilunga. Mu kiki, muéne ua mesena kuila tu a xila, mu kubelesela o itendelesu ia tu bhana. (Jihebeleu 13:7, 17) Saí bhabha, ki bhonza kubelesela o itendelesu íii. Maji tu tena kubhinga o kikuatekesu kia Jihova. Bhu kaxi ka nzumbi  iê ikola, muéne u tena ku tu kuatekesa kubelesela o itendelesu ia tu bhana. Xinganeka ué o kikuatekesu ki tua-nda bhana mu kilunga, se tu lenduka ni kubelesela o itendelesu ia tufunga. O kilunga kietu kia-nda di bunda kumoxi. Mukonda dia kiki, o henda ietu mudietu ia-nda dibandekesa dingi.

10. Kiebhi o akuatekexi a tufunga kia kuatekesa o kilunga ku dibunda kumoxi? (Tala o foto ia dianga.)

10 O akuatekexi a tufunga, a kuatekesa ué o kilunga ku dibunda kumoxi. Ene a kalakala kiavulu phala kukuatekesa o tufunga. Mu kiki, tu sakidila kiavulu o kikalakalu kia bhanga. Mu kifika, o akuatekexi a tufunga, a sokejeka o madivulu, phala etu kuia mu boka. Ene a sangesa ué o athu ene mu tu kunda mu iônge. Ene a kalakala ué kiavulu, phala kuzelesa ni kusokejeka o ima i zangiua mu Kididi Kia Ubhezelu. Kioso ki tu belesela o jiphange jiji, tu dibunda kumoxi. Mu kiki, tu tena kusidivila Jihova mu ukexilu ua iuka.​—Sokesa ni Ikalakalu 6:3-6.

11. Ihi i tena kubhanga o minzangala, phala kukuatekesa o kilunga ku dibunda kumoxi?

11 Saí tufunga, ene mu kalakala kiá mu kilunga mu mivu iavulu. Maji nange ka tena dingi kukalakala kiavulu mukonda a kuka kiá. O minzangala a tena kukuatekesa. Se a a longa kiambote, ene a tena kubhanga dingi ikalakalu ia mukuá mu kilunga. Se o akuatekexi a tufunga a kalakala kiavulu, ku hádia ene a tena kusidivila kala tufunga. (1 Timote 3:1, 10) Saí tufunga tua minzangala, a tambula dingi ikalakalu ia mukuá. Lelu, ene a mu sidivila kala tufunga tua ilunga, iá a mu kuatekesa o jiphange mu ilunga iavulu. Tu sakidila kiavulu, kioso ki tu mona o minzangala ku di bhakula, phala ku sidivila o jiphange.​—Tanga Jisálamu 110:3; Ndongixi 12:1.

KUATEKESA O MUIJI

12, 13. Ihi i tena kukuatekesa o muiji ku dibhana kiambote?

12 Kiebhi ki tu tena kukuatekesa o athu ku muiji uetu kukalakala kumoxi? O ubhezelu uetu ku muiji mu semana joso, u tena kukuatekesa. Se o jitata ni tuana a sota kithangana phala ku di longa kumoxi ia lungu ni Jihova, o henda iâ mudiâ ia-nda dibandekesa dingi. Mu kithangana kieniókio, ene a tena kubhanga ifika ia lungu ni ima ia-nda zuela mu sidivisu ia kuboka, phala ku a kuatekesa kukala polondo. Kioso kia-nda kuívua o ima ia xinganeka mudiâ, ia lungu ni kidi kia Bibidia, ni kumona kuila, o muiji uoso ua zolo Jihova, ni kuila, a mesena kubhanga o vondadi iê, ene a-nda di zukama dingi.

Se o dikaza di zola Jihova ni ku mu sidivila kumoxi, ene a-nda kala ni ukamba uambote, ni kuzediua mu ukaza uâ

13 Kiebhi o makaza kia tena kukalakala kumoxi? (Matesu 19:6) Se kiiadi kiá a zola Jihova, ni ku mu sidivila kumoxi, ene a-nda kala ni ukamba uambote, ni  kuzediua mu ukaza uâ. Ene a tokala ué ku dizola mudiâ, kála kia bhangele Mbalahamu ni Sala, Izake ni Bebeka, ni Elikana ni Hana. (Dimatekenu 26:7; 1 Samuuele 1:4, 7; 1 Phetele 3:4) Se o diiala ni muhatu a bhanga kiki, ene a-nda kala ni ukamba uambote mudiâ, ni kuzukama dingi kua Jihova.​—Tanga Ndongixi 4:12.

O ubhezelu ku muiji, u tena kukuatekesa o munzangala ni adiakimi ku di zukama dingi (Tala kaxi 12, 15)

14. Se dikaza diê ka mu bheza Jihova, ihi i ua tokala o kubhanga phala kusuínisa o ukaza uê?

14 O Bibidia izuela ni kidi kioso kuila, ki tu tokala kukazala ni muthu ka mu sidivila Jihova. (2 Kolindo 6:14) Maji saí jiphange a kazala ni athu ka mu bheza Jihova. Saí iá, a kazala ande dia ku di longa o kidi kia Bibidia. O makaza mâ, ka xikina kukala Mbangi ia Jihova. A mukuá nange a kazala ni Jimbangi ja Jihova, maji mu kubhita thembu, o makaza mâ a xisa o kilunga. O Jikidistá jala ni makaza ka mu bheza Jihova, a tokala kubhanga ioso phala kusuínisa o ukaza uâ, mu kubelesela o itendelesu ia Bibidia. Saí bhabha, nange ki bhonza kukaiela o itendelesu íii. Mu kifika, Madiia ua kexile mu sidivila Jihova kumoxi ni muadi uê Davidi. Mu kubhita kithangana, Davidi ka mesenene dingi kuia mu iônge. Maji Madiia ua kexile hanji mu di suínisa, phala kukala muhatu uambote, ni kulondekesa o ídifua ia tokala o Jikidistá. Muéne ua longo ué o kidi kia lungu ni Jihova ku samanu dia an’ê, anga u kolokota ué mu kuia mu iônge ia kilunga ni mu iônge ia makota. Mu kubhita mivu, o tuana tua kulu, iá a tundu bhu bhata. Sumbala kia bhonzele dingi, Madiia ua suluka mu kusidivila Jihova. Mu kubhita thembu, Davidi ua mateka kutanga o madivulu akexile mu mu bhekela Madiia. Mu kubhita kithangana, muéne ua mateka dingi kuia mu iônge. Ithangana ioso, o mulaul’ê ua kexile ku mu bhakela kididi. Kioso Davidi kia kexile mu fonga mu iônge, o kabuetele ka kexile mu mu tangela: “Lelu ki ngi ku mono mu kiônge.” Mu kubhita 25 kia mivu, Davidi ua vutuka mu kilunga. Muéne ni muhatu’ê a sanguluka kiavulu,  mukonda a mu sidivila dingi Jihova kumoxi.

15. Kiebhi o makaza o’ukulu a tena kukuatekesa o makaza a ubhe?

15 Lelu, Satanaji uene mu zukutisa o miji. Mukonda dia kiki, o dikaza di sidivila Jihova, dia tokala kukalakala kumoxi. Né muene se mua kazala kiá ukulu, xinganekienu mu ima i mu tena kuzuela mba kubhanga, phala kusuínisa o ukaza uenu. Se mua kazala kiá ukulu, mua tokala kubhana phangu ku makaza a minzangala. Nange mu tena kuixana dikaza dia ubhe, phala kubhanga o ubhezelu ku muiji kumoxi ni enu. Ene a-nda mona kuila, né muene se o dikaza diala kiá kumoxi mivu iavulu, ene a tokala ku dizola ni kukala makamba a kidi.​—Tito 2:3-7.

“TU BANDIENU KU MULUNDU UA JIHOVA”

16, 17. Ihi ia-nda tambula o Jiselevende ja Nzambi a dibundu kumoxi mu ku mu sidivila?

16 Kioso kia kexile múia mu bhanga o jifesa jâ mu Jeluzaleme, o akua Izalaiele akexile mu kalakala kumoxi. Ene akexile mu sokejeka o ima ioso ia bhingile, phala kuenda o njila. Mu kusuluka, akexile mu di kuatekesa, ni kuia kumoxi. Ene oso akexile mu ximana ni kubheza kumoxi Jihova mu tembulu. (Luka 2:41-44) Lelu, kioso ki tuia ni ku disokejeka phala kutunga ku mundu uobhe, tua tokala kudizola, ni kubhanga ioso phala kukalakala kumoxi. O kuila u tena ku xinganeka mu maukexilu u u tena kubhanga dingi o ima íii?

17 O athu ku mundu iú, a zoka ni kubhânga mukonda dia ima iavulu. Maji tu sakidila kiavulu Jihova, mukonda dia ku tu bhana o kutululuka, ni ku tu kuatekesa kuijiia o kidi kia Bibidia! O mundu uê ua mu mu bheza mu ukexilu u mu sangulukisa. Mu izuua íii isukidila-ku, o mundu ua Jihova ua beta-o-kota ku di bunda kumoxi. Kála kia kanena polofeta Izaia, ni Mikeia, etu tua mu banda kumoxi o “mulundu ua Jihova”. (Izaia 2:2-4; tanga Mikeia 4:2-4.) Kioso o mundu ua Jihova mu ixi, ua-nda ‘di bunda kumoxi,’ ni kukalakala kumoxi phala kusidivila Jihova, tua-nda sanguluka kiavulu!