“Iii iene o njila, endelenu muenhumu.”IZAIA 30:21.

MIMBU: 32, 48

“IMANA, TONGININA, IVUA.” Kiene kia sonekene mu jinjila ja ji komboio, ku ixi ia América, ku 100 ia mivu ku dima. Mukonda diahi a sonekene-mu kiki? Mukonda ene a mesenene kudimuna o a endexi a makalu, ku iluezu ia ku a lanvula ku ji komboio. O kukaiela o itendelesu íii, kua kuatekesele athu avulu kubhuluka.

1, 2. (a) Itendelesu iebhi ia kaiela o athu ia a kuatekesa kubhuluka? (Tala o foto ia dianga.) (b) Itendelesu iebhi iala na-iu o mundu ua Nzambi, i tena ku a kuatekesa kubhulula o mienhu iâ?

2 Jihova u bhanga ima ionene, muéne ka tu dimuna ngó ku iluezu. Muéne uendesa o mundu uê, phala kutambula o muenhu ua kalelaku, ni kulenga o iluezu. Jihova ua difu ni mubhidi, uendesa o jimbudi jê ni ku a dimuna, phala kulenga o ji njila ja iibha.Tanga Izaia 30:20, 21.

TUNDÉ UKULU, JIHOVA UENE MU KUENDESA O MUNDU UÊ

3. Mu ukexilu uebhi o athu akexile mu njila ia kalunga?

3 Tundé ukulu, Jihova uene mu bhana itendelesu ia tokala ku  mundu uê. Mu kifika, mu jaludim ia Edene, Jihova ua bhanene itendelesu iambote ieji kuatekesa o athu oso kuzediua ku muenhu, katé ku hádia ni hádia. (Dimatekenu 2:15-17) Maji Adá ni Eva, ka xikina kubelesela o itendelesu ia Tata ia henda. Eva ua xikina o itendelesu ia nhoka, Adá uevu o muhatu’ê. Ihi-phe ia bhiti? Adá ni Eva afú, ene kala dingi ni kidielelu kia kukala ku muenhu. Mukonda dia kubhukumuka kuâ, o athu oso akexile mu njila ia kalunga.

4. (a) Mukonda diahi kua bhingile itendelesu ia ubhe, kioso kia bhiti o Dilúvio? (b) Kiebhi o ima ia ubhe, ia kuatekesa kuijiia o ibanzelu ia Nzambi?

4 Nzambi ua bhana itendelesu kua Noué, ia kuatekesa kubhulula o muenhu ua athu. Kioso kia bhiti o Dilúvio, Jihova ua kidika o athu kúnua ni kudia manhinga. Mukonda diahi? Mu kithangana kieniókio, Jihova ua tumine o athu kudia o xitu. Kuma o ima ia lungulukile, ene a bhingile itendelesu ia ubhe. Nzambi uambe: “O xitu-phe ki mu i die ni muenhu uê, o manhinga.” (Dimatekenu 9:1-4) Bhu kaxi ka kitumu kiki, tu tena kuijiia o ibanzelu ia Nzambi ia lungu ni muenhu, mukonda ia mu tokala muéne. Kuma muéne o Mubhangi uetu, u tu bhana o muenhu, muene uala ni kutena kua ku tu bhana o itendelesu i tua tokala kukaiela ku muenhu. Mu kifika, muéne uambe kuila, o athu ka tokala ku di jibha mudiâ. Ku mesu ma Nzambi, o muenhu ni manhinga ima ikola, mukonda dia kiki, muéne ua-nda buika oso a kambe kubhana valolo ku ima íii.Dimatekenu 9:5, 6.

5. Ihi i tua-nda di longa, ni mukonda diahi?

5 Kioso Noué kiafú, Nzambi ua suluka ni kuendesa o mundu uê. Mu milongi íii, tua-nda di longa se kiebhi muéne kia a endesa. O milongi íii, ia-nda tu suínisa kukaiela o itendelesu ia Jihova katé ku mundu uobhe.

ITENDELESU IA UBHE, PHALA O KIFUXI KIA UBHE

6. Mukonda diahi o mundu ua Nzambi ua bhingile kubelesela o itumu ia bhanene bhu kaxi ka Mozé, ni ukexilu uebhi ua tokalele kulondekesa?

6 Mu izuua ia Mozé, Jihova ua bhanene ku mundu uê, itendelesu ia lungu ni uendelu uâ, ni ubhezelu uâ. Mukonda diahi? Mukonda o ima ia lungulukile dingi. Ku hama jiiadi ja mivu ndenge, o akua Izalaiele exile abhika mu ixi ia Ijitu. O athu mu ixi ienioió, exile mu bheza o madifundu, iteka, ni kubhanga ima ia mukuá ia zembe Nzambi. Kioso o mundu ua Nzambi kia tundu mu ixi ia Ijitu, ene a bhingile itendelesu ia ubhe. Ene eji kaiela ngó o Kitumu kia Jihova. Saí madivulu, a zuela kuila, o kizuelu “kitumu” mu dimi dia Hebalaiku, kilombolola ué “itendelesu, mba milongi.” O Kitumu kia kexile mu langa o akua Izalaiele mu ima ia lungu ni undumbu, ni ubhezelu ua makutu, ua kexile mu bhanga o ifuxi ia a kondolokele. Kioso kia kexile mu belesela o itumu ia Nzambi, ene akexile mu tambula o mabesá mê. Maji kia ditunine kuívua o itendelesu, akexile mu dibhana ni mavuua avulu.Tanga Matendelelu 28:1, 2, 15.

7. (a) Jimbulula se mukonda diahi Jihova ua bhanene itumu ku mundu uê? (b) Mu ukexilu uebhi o kitumu kiexile “kiledi,” phala akua Izalaiele?

7 Saí kima kia mukuá, kia bhangesa ku a bhana itumu ia ubhe. O Kitumu, kiexile phala kupelepalala o akua Izalaiele phala ku dibhana ni izulukutu ia dikota ia lungile ni vondadi ia Jihova, o uijilu ua Mexiia, mba Jezú Kristu. O Kitumu kia kuatekesele o akua Izalaiele ku di lembalala kuila, ene  exile akua ituxi. Kia a kuatekesa ué kutendela kuila, ene a bhingile ku a kula, a bhindamene sata ia iuka phala kuzubha o ituxi iâ ioso. (Ngalásia 3:19; Jihebeleu 10:1-10) O Kitumu kia lange o mbutu ia Mexiia, ni kukuatekesa o athu kuijiia o Mexiia a mu kanene. Mu kidi, o Kitumu kiexile kala muendexi mba “kiledi,” kia a endesa katé kua Kristu.Ngalásia 3:23, 24.

8. Mukonda diahi tua tokala kukaiela o itendelesu i tu sanga mu Kitumu kia Mozé?

8 Kuma tu Jikidistá, etu tu tena ué kukatula mbote mu itendelesu ia bhana Jihova bhu kaxi ka Kitumu. Kiebhi ki tu tena kukatula mbote? Tu tena kuimana, ni kutonginina o ijila bhua tundu o Kitumu. Sumbala o itumu íii ki i tu tokala dingi, maji tu tena kudielela hanji mu milongi ijila mu kitumu, phala ku tu endesa kioso ki tuia ni kubheza Jihova izuua ioso. Muéne ua tumina kusoneka o itumu íii mu Bibidia, phala tu katule mbote, ni kubelesela o milongi, ni kulondekesa o kisakidilu kietu kua Jezú, mukonda muéne ua tu longo ima ia katunda, o Kitumu ndenge. Ivua kiambote ia zuela Jezú kioso kiambe: “Enu muevu kuma a ki zuela, exi: Kana kuta phànda. Eme-phe ngi mi ambela kuma: Uoso ngó u tonginina muhatu ni ku mu kuatela luimbi, uate-nê kiá phànda ku muxima uê.” Mu kiki, ki tu tokala kulenga ngó o undumbu, maji tua tokala ué kulenga o ibanzelu ia iibha, ni jihanji ja kubhanga o undumbu.Matesu 5:27, 28.

9. Ima iebhi ia lungulukile ia bhangesa Nzambi kubhana itendelesu ia ubhe?

9 Kioso Jezú kiéza mu ixi kala Mexiia, Jihova ua bhanene dingi itendelesu ia ubhe, ni kujimbulula ima ia mukuá ia lungu ni vondadi iê. Mukonda diahi? Ku muvu ua 33, Jihova ua ditunu o kifuxi kia Izalaiele, iú ua solo o kilunga kia Jikidistá phala kukala mundu uê. Mukonda dia kiki, o ima ia lungu ni mundu ua Nzambi, ia lungulukile dingi.

ITENDELESU PHALA O IZALAIELE IA NZAMBI

10. Mukonda diahi o kilunga kia Jikidistá a tambula itendelesu ia ubhe, ni mu ukexilu uebhi o itendelesu ki i difuile ni ia akua Izalaiele?

10 Bhu kaxi ka Mozé, Jihova ua bhana o Kitumu ku akua Izalaiele, phala ku a longa o ukexilu ua muenhu ua tokalele kukala nau, ni kiebhi kia tokalele o ku mu bheza. Tundé ku hama ia dianga, o mundu ua Nzambi ua kituka kifuxi kia athu akua jixi joso, ni maukexilu oso. Ene a exana Izalaiele ia Nzambi. Ene a tokalele mu kilunga kia Jikidistá, akexile ni kikutu kia ubhe. Jihova ua a bhana itendelesu ia ubhe ia lungu ni kiebhi kia tokalele kuambata o muenhu, ni ku mu bheza. Mu kidi, “Nzambi kene ni kathombo ka athu. Maji ku akua jixi joso, uoso u mu xila muène, hé u bhanga ioso iaiuka, Muène u mu tambulula.” (Ikalakalu 10:34, 35) Ene akexile mu kaiela o “Kitumu kia Kristu.” O Kitumu kiki, kia lungile ni ijila io sonekene ku mixima iâ, mu veji dia ku i soneka ku ditadi. O kitumu kiki, kieji kuendesa o Jikidistá ni ku a bhangesa kukatula mbote, kabasa kididi bhua kala.Ngalásia 6:2.

11. Itendelesu iebhi ia bhana o “Kitumu kia Kristu,” phala o Jikidistá?

11 O Izalaiele ia Nzambi, i katula mbote iavulu mu itendelesu i bhana Jihova bhu kaxi ka Jezú. Ande dia kubhanga o kikutu kia ubhe, Jezú ua bhana itendelesu iiadi ia dikota. O kitendelesu kia dianga, kia lungile ni sidivisu ia kuboka. O kia mukuá, kia lungile ni ukexilu ua Jikidistá, ni kiebhi kia tokalele ku di talatala mudiâ. O itendelesu íii, a i  bhana phala o Jikidistá joso. Mu kiki, etu enioso tua tokala ku i belesela, kikale se tuala ni kidielelu kia kuia ku diulu, mba kukala mu ixi.

12. Kitendelesu kiebhi kia ubhe kia bhanene, kia lungu ni sidivisu ia kuboka?

12 M’ukulu, o athu a ifuxi iéngi a mesenene kusidivila Jihova, a tokalele kuia mu ixi ia Izalaiele. (1 Jisobha 8:41-43) Maji Jezú ua bhana o kitendelesu ki tu sanga mu divulu dia Matesu 28:19, 20. (Tanga.) Jezú ua tumina o maxibulu mê ‘kuia’ ku akua jixi joso. Ku Pendekoxi ia muvu ua 33, Jihova ua londekesa kuila, muéne ua mesena kuila, o njimbu iambote a i tula ku akua jixi joso. Mu kizuua kieniókio, o 120 a athu mu kilunga kia ubhe, a a undu ni nzumbi ikola. Ene a mateka kuboka mu madimi avulu ku Jijudé ni kua ió kexile ji Judé. (Ikalakalu 2:4-11) Mu kusuluka, a sanzumuna dingi o ukunji uâ, ni bokela ué o akua Samádia. Mu kiki, ku muvu ua 36, a kuata ué kubokela katé muene o Athu ka a sáiele. Kiki kia londekesele kuila, o Jikidistá a tokalalele kuboka o njimbu ku mundu uoso!

13, 14. (a) O “kijila kiôbhe” kia lungu ni ihi? (b) O phangu ia Jezú i tu longa ihi?

13 Jezú ua bhana ué “kijila kiôbhe,” kia lungu ni ukexilu ua ku dibhana ni jiphange jetu. (Tanga Nzuá 13:34, 35.) Tua tokala ku a londekesa o henda, maji tua tokala ué kukala polondo phala kubhana o muenhu uetu bhu kididi kiâ. Mu Kitumu kia Mozé, ki mu kexile o kitendelesu kiki.Matesu 22:39; 1 Nzuá 3:16.

14 Jezú muene o phangu ia dikota ia muthu ua londekesa o henda íii ia kidi. Muéne ua zolele kiavulu o maxibulu mê, katé kia xikina kufuá bhu kididi kiâ. Muéne ua mesena kuila, o maxibulu mê, a bhanga ué kienhiki. Mu kiki, tua tokala kukala polondo phala kutala hadi, katé muene ni kufuá bhu kididi kia jiphange jetu.1 Tesalonika 2:8.

ITENDELESEU PHALA ETU LELU, NI KU HÁDIA

15, 16. Ima iahi i tuene mu dibhana na-iu lelu, ni kiebhi Nzambi kia tuendesa?

15 Jezú ua solo o ‘kimbadi kia fiiele,’ phala ku uanena o ‘kúdia mu ola joso ja tokala’ ku akaiedi iê. (Matesu 24:45-47) O kudia kuku, kua lungu ni itendelesu ia dikota i bhana Nzambi phala o mundu uê, kioso o ima i lunguluka. Mukonda diahi o ima i tena ku lunguluka?

16 Etu tuala kiá mu “izuua isukidila-ku,” kua kambe ngó bhofele, o hadi ia dikota, nuka ia kexile-ku, ia-nda mateka. (2 Timote 3:1; Marku 13:19) Kuma Satanaji ni madimonho a a kaie ku diulu, ene a bhangesa o athu mu ixi kutala hadi iavulu. (Dijingunuinu 12:9, 12) Etu tua mu belesela o kitendelesu kia Jezú, kia kubokela o athu akua jixi joso. Lelu, tua mu boka dingi ku athu a madimi avulu, m’ukulu ndenge!

17, 18. Kiebhi ki tua tokala kumona o itendelesu ia tu bhana?

17 O kilunga kia Nzambi ki tu bhana jifalamenda javulu, ji tu kuatekesa mu sidivisu ia kuboka. O kuila uene mu kalakala ni jifalamenda jiji? Mu iônge ietu, ene mu tu bhana itendelesu iavulu, i tu kuatekesa kukalakala ni jifalamenda jiji mu ukexilu ua tokala. O kuila u mona kuma, Nzambi muéne ua mu tu bhana o itendelesu íii?

18 Se tua mesena kutambula o mabesá a Nzambi, tua tokala o kuivuidila kiambote o itendelesu ioso i tu bhana muéne bhu kaxi  ka kilunga kiê. Se tu belesela o itendelesu lelu, ki kia-nda tu bhonza kubelesela mu kithangana kia ‘hadi ia dikota,’ kioso Nzambi kia-nda buika o mundu iú ua iibha ua Satanaji. (Matesu 24:21) Kioso kia-nda bhita o ima íii, tua-nda bhinga itendelesu ia ubhe, ia-nda tu kuatekesa kukala ku muenhu ku mundu uobhe, sé Satanaji.

Ku mundu uobhe, tua-nda tambula mikanda ni itendelesu ia ubhe, ia-nda tu kuatekesa kukala ku muenhu mu Palaízu (Tala o kaxi 19, 20)

19, 20. Madivulu ebhi a-nda jikuka, ni ihi ia-nda bhita?

19 Mu izuua ia Mozé, o mundu ua Izalaiele ua bhingile itendelesu ia ubhe, mukonda dia kiki, Nzambi ua bhana o Kitumu. Mu kubhita thembu, o kilunga kia Jikidistá kia tokalele kukaiela o “kitumu kia Kristu!” Kiene kimoxi ué, o Bibidia i tu tangela kuila, ku mundu uobhe, tua-nda tambula mikanda ni itendelesu ia ubhe. (Tanga Dijingunuinu 20:12.) Nange o mikanda íii, ia-nda jimbulula o vondadi ia Jihova ia lungu ni kithangana kieniókio. Mu ku di longa o mikanda íii, o athu oso, katé muene ni ió a-nda kufukunuka, a-nda kuijiia se iebhi o vondadi ia Nzambi phala ene. O mikanda íii, ia-nda tu kuatekesa kuijiia kiambote o ibanzelu ia Jihova. Tua-nda tendela kiambote o Bibidia. Mukonda dia kiki, mu Palaízu, tua-nda dizola ni ku dixila. (Izaia 26:9) Mu Utuminu ua Sobha ietu Jezú Kristu, tua-nda di longa ima iavulu ia katunda, ni kulonga ué akuetu!

20 Se tu kaiela ni kubelesela “o ima ioso iosonèke mu madivulu,” ni kukolokota mu ufiiele uetu kua Jihova mu polova ia sukina, muéne ua-nda soneka o majina metu mu “divulu dia muenhu,” katé ku hádia ni hádia. Tua-nda kala ni muenhu ua kalelaku! Mu kiki, tua tokala KUIMANA mu kutanga o milongi ia Bibidia, ku TONGININA phala kutendela o dilomboluelu dia milongi, ni KUÍVUA kiambote phala kubelesela o itendelesu ia Nzambi. Se tu bhanga o ima íii, nange tua-nda bhuluka mu kithangana kia hadi ia dikota, ni kusanguluka mu ku di longa ia lungu ni Jihova, o Nzambi ia henda ni unjimu, katé ku hádia ni hádia.Ndongixi 3:11; Loma 11:33.