TWA tungu mu ngôngo i thandanganyesa o muxima, kyenyiki kyene mu bhonza kusanga o kutululuka. Né mwene twa sange kutululuka mu kithangana kyofele, ki ku nangyé. Ihi yamba o Bibidya i tena ku tu kwatekesa kusanga o kutululuka? Kyebhi ki tu tena kukwatekesa akwetu kusanga o kutuluka?

IHI I TWA BHINGI KUBHANGA?

Phala kusanga o kutululuka kwa kidi, twa bhingi kudivwa sé woma mba hele ya kima. Twa bhingi kukala ni makamba ambote, o kya beta kota o ukamba ni Nzambi. Kyebhi ki tu tena kuzukama kwa Nzambi?

O itumu ni ijila ya Jihova phala o mbote yetu, i tu kwatekesa mu ithangana yoso. Kyoso ki tu i belesela, tu londekesa kwila twa dyelela kwa Jihova, ni kwila twa mesena kukala ni ukamba wambote, wa tululuka ni mwene. (Jelemiya 17:7, 8; Tiyaku 2:22, 23) Mu kubhanga kiki, Jihova u tu zukama we, u tu bhana kutululuka kwa muxima. O divulu dya Izaya 32:17 dyamba: “O ibundu ya kuyuka ya kà kala kutululuka; o ukalakelu wa kuyuka o kunyoha ni ku kondama mu thembu joso.” Tu tena kusanga o kutululuka kwa kidi kyoso ki tu belesela Jihova sé kuxinganeka luyadi.—Izaya 48:18, 19.

O hele i katula o kutululuka kwetu

Jihova u tu bhana we ujitu wa katunda u tu kwatesa kubandekesa o kutululuka, kwa kalelaku. O ujitu yú o nzumbi yê ikola.—Ikalakalu 9:31.

O NZUMBI YA NZAMBI I TU KWATEKESA KUBANDEKESA O KUTULULUKA

O poxolo Phawlu wambe kwila o kutululuka kubhanga mbandu ku ‘kibundu kima o nzumbi.’ (Ngalásya 5:22, 23) Kuma o nzumbi ya Nzambi yene i bhana o kutululuka, se twa mesena kutuluka, twa bhingi kwehela o nzumbi ikola ku twendesa. Kyebhi ki tu tena kwehela o nzumbi ikola ku twendesa?

Kya dyanga, twa bhingi kutanga o maka o Nzambi izuwa yoso. (Jisálamu 1:2, 3) Kyoso ki tu xinganeka kyambote mu ima i tu tanga, o nzumbi  ikola ya-nda tu kwatekesa kutendela o ixinganeku ya Jihova ya lungu ni maka avulu. Mu kifika, tu dilonga kyebhi mwene kya kolokota mu kutululuka, ni mukonda dyahi mwene u bhana valolo yavulu mu kidifwa kiki. Kyoso ki tu kumbidila o ima i tu dilonga mu Bibidya, tu kala dingi ni kutululuka ku mwenyu.—Jisabhu 3:1, 2.

Kayadi, Twa tokala kubhinga o nzumbi ikola ya Nzambi mu musambu. (Luka 11:13) Jihova wa kanena kwa yó a sota o kikwatekesu kyê: “O kutululuka kwa Nzambi kwa somboka o kitongolwelu kyoso kya muthu, kwa-nda ku mi bateka mixima ni ilunji, mu ukamba ni Kidistu Jezú.” (Filipe 4:6, 7) Kyoso ki tu zukama ni kudyelela mu nzumbi ya Jihova, mwene u tu bhana o kutululuka kwa kidi, kwa muxima.—Loma 15:13.

O Bibidya ya kwatekesa athu avulu kulungulula o ukexilu wa myenyu yâ. Lelu ala ni kutululuka kwa muxima ni Jihova ni akwa. Kyebhi ene kya lungulula o myenyu yâ?

KYEBHI O ATHU KYENE MU SANGA O KUTULULUKA KWA KIDI?

Say jiphange akexile isweya, akwa njinda yavulu ande dya kwijiya o kidi. Maji a bhange yoso phala kubhilula o ukexilu wâ, lelu a kituka akwa henda, akwa mwanyu, a bhanga yoso phala kutululuka ni akwá. * (Tala ku lwiji.) (Jisabhu 29:22) Tala kyebhi phange ya diyala a mwixana Davidi ni ya muhatu a mwixana Rachel kya lungulula o ukexilu wâ.

Tu tena kusanga o paze kyoso ki tu kumbidila o itumu ya Bibidya ni kyoso ki tu bhinga o nzumbi ikola ya Nzambi bhu kaxi ka musambu

Andé dya kudilonga o kidi, Davidi wexile ni ukexilu wa kulongolola akwá, wa kexile mu zwela ni jindandu jê ni undanda. Maji wa mono kwila wa bhingile kulungulula o ukexilu wê. Kyebhi mwene kya sange o kutululuka? Davidi wambe: “Nga mateka kukumbidila o itumu ya Bibidya ku mwenyu wami, mukonda dya kiki ngene mu xila kyá o jindandu jami.”

Rachel wa lundula o ukexilu wayibha wa athu a  mu sase. Mwene wambe, “Katé lelu, Ngene mu bhânga hanji ni njinda i Nga lundula ku athu a ngi sase.” Ihi ya kwatekesa Rachel kusanga o kutululuka? Mwene wambe: “O kusamba ni kudyelela kwa Jihova.”

David ni Rachel phangu jiyadi ja athu ala ni kutululuka lelu, mukonda a kumbidila o itumu ya Bibidya, a dyelela we mu kutena kwa nzumbi ikola. Sumbala twala ku mundu wezala ni usweya, tu tena kukala ni kutululuka kwa muxima. Ni kutululuka kuku, ki kwa-nda bhonza kudibhana kyambote ni jindandu jetu, ni jiphange jetu mu kilunga. Maji Jihova u tu tendelesa ‘kukala ku paze ni athu oso.’ (Loma 12:18) O kwila tu tena kubhanga kiki? Mukonda dyahi twa tokala kukala ku paze ni akwetu?

BHANGA YOSO PHALA KUKALA NI KUTULULUKA NI AKWENU

Mu ukunji wetu tu boka o njimbu ya kutululuka ya Utuminu wa Nzambi. (Izaya 9:6, 7; Matesu 24:14) Athu avulu a wabhela o njimbu yiyi, a i xikina. Mukonda dya kiki, ene kà kala dingi ni woma mba njinda mukonda dya ima ya yibha i bhita mu ngôngo. Lelu, ene ala ni kidyelelu kya kidi kya lungu ni hádya, kiki kya a bhangesa “kusota o paze.”—Jisálamu 34:14.

Né kiki, athu avulu ka xikina o njimbu yetu, benge-benge ku dimatekenu. (Nzwá 3:19) Sumbala say ithangana athu a dituna, Jihova u tu bhana o nzumbi yê ikola. Kiki ki tu kwatekesa kukolokota mu kulondekesa kuxila ni kutululuka kyoso ki tu boka. Mu kubhanga kiki, twa mu kayela o kitendelesu kya Jezú kyoso kyambe: “Ki mu bokona dibhata, mu di menekena, mwexi: o paze i tunge mu bhat’umu. O dibhata se di kala dya athu a ujitu, o paze yenu iza ku thandu dyê; se di kala dya athu a kambe ujitu, paze yenu i mi vutukila.” (Matesu 10:11-13) Kyoso ki tu kayela o kitendelesu kiki, tu tena kukala ku paze né mwene ni ima izwela o athu. Tu lembalala kwila nange tu tena kukala ni kithangana kya kukwatekesa o athu enyó ku hádya.

Tu sota we o kutululuka kyoso ki tu zwela ni kuxila kwoso ni tubhitangu twa jinguvulu, né mwene se a fidisa o kikalakalu kyetu. Mu kifika, say ixi ku Áfrika, o jinguvulu a tu fidisa kutunga Ididi ya Ubhezelu. O jiphange jetu ejiya kwila a tokala kubhanga yoso phala kubatula o maka mu ukexilu wa tululuka. Ene a tumikisa phange wa kalakala kyá kala mukunji wa ixi yengi mu ixi yenyóyo, phala kuzwela ni Mukunji mba (Embaixador) wa kexile mu kalakala ku Londres, ku ixi ya inglaterra ni ku mu tangela o kikalakalu kya kutululuka kyene mu bhanga o Jimbangi ja Jihova.

O phange wambe: “Ki nga bhixila mu kididi kya kutambwijila o ajitu, nga mono kwila o muthu wa kexile mu kalakala-mu, wa tokalele ku mwiji u zwela o dimi di nga dilongo, mukonda dya uzwatelu wê. Nga mu menekena mu dimi dyê dya uvwalukilu. Mwene wa diwana yú wa ngibhwidisa: ‘Ihi ya kubheka?’ Ni kuxila kwoso nga mu tangela kwila, nga mesenene kuzwela ni Mukunji mba (Embaixador). Mwene wa mwixana, weza, wa ngi menekena mu dimi dyâ. Mu kusuluka, Nga mu tangela o ikalakalu yoso ya kutululuka yene mu bhanga o Jimbangi. Mwene wa ng’ivu ni mwanu woso.”

Kyoso o Mukunji kyevu yoso ya mu tangela phang’etu, mwene wa tendela kyambote o kikalakalu kyetu, mu kusuluka ka kexile dingi ni kathombo kala ande dya kuzwela-nê. Mu kubhita thembu o nguvulu yenyoyo ya bhilula o ima, ehela o Jimbangi ja Jihova kutunga o Ididi ya Ubhezelu. O jiphange ja sangulukile kyavulu! Mu kidi, kyoso ki tu xila akwetu, twa mu sota paze.

KEMBA NI KUTULULUKA KWA KALELAKU

O mundu wa Jihova lelu, wa sanguluka ni palayízu mu nzumbi, mwene mu bheza mu ukexilu wa tululuka. Kala muthu mu dyetu, u tena kukwatekesa kubandekesa o kutululuka kuku, mu kubandekesa o paze ku myenyu yetu. Se kyene ki twa mu bhanga, tu tena kuxikana kwila, Jihova wa sanguluka n’etu. Ku mundu wa ubhe, mwene wa-nda tu bhana o paze ya kalela-ku.—2 Phetele 3:13, 14.

^ kax. 13 Say milongi ya-nda zwela ya lungu ni kubhanga mbote, mu mbandu yiyi ya lungu ni kibundu kya nzumbi ikola, ya Nzambi.