“O mukengeji wenu u mwikine bhu pholo ya athu, ni a ximane Tata yenu.”—MATESU 5:16.

MIMBU: 47, 9

1. Kima kyahi kya katunda ki tu bhangesa kusanguluka?

ETU twa sanguluka kyavulu,mu kwívwa kwila o jiselevende ja Nzambi a mu kwehela o mukenge wâ, kumwikina! Ku muvu wa tundumu o mundu wa Jihova wa longo o Bibidya ku dikwinyi dya tuzunda (10.000.000) twa athu ndenge. Mazunda a athu ayile mu kyônge kya Lembalasa, a dilongo ya lungu ni ujitu wa kukula wa bhana Jihova mukonda dya henda yê.—1 Nzwá 4:9.

2, 3. (a) Ima yahi ki yene mu tu fidisa ku “kumwika kala tu mukengeji?” (b) Ihi i twa-nda dilonga mu milongi yiyi?

2 Ku mundu woso o Jimbangi jya Jihova ene mu zwela madimi avulu kadifu. Maji kiki, ki kyene mu a fidisa kuximana Jihova kala mwiji umoxi. (Dijingunwinu 7:9) Dimi dyoso-dyoso di tu zwela mba kididi bhu twa tungu, tu tena ‘kumwika mu’axaxe ka mundu kala mukengeji.’—Filipe 2:15.

3 O ukunji wetu, o ukamba wetu wa Ukidistá, ni kubhanga o ima mu kubanza kwila o dizubhilu dya zukama, kujingisa Jihova. Kyebhi ki tu tena kwehela o mukengeji wetu kumwikina  mu mawkexilu atatu yâ? —Tanga Matesu 5: 14-16.

KWATEKESA AKWENU KUBHEZA JIHOVA

4, 5. (a) Katu-ku o sidivisu ya kuboka, kyebhi ki tu tena kwehela o mukengeji wetu kumwikina? (b) O kutalatala akwetu ni henda ku tena kubhekela mbote yahi? (Tala o foto ya dyanga.)

4 Kuboka ni kubhanga maxibulu wene o ukexilu wambote wa kwehela o mukengeji wetu kumwikina. (Matesu 28:19, 20) Ku muvu wa midi hama vwa ni makwinyi ayadi ni kitanu (1925), o milongi “Mukengeji bhu kaxi ka Kitombe,” yambe kwila, mu izuwa ya sukidila-ku, se-ku muthu weji londekesa ufiyele kwa Ngana se u kamba “kwehela o mukengeji wê kumwikina.” Mu kusuluka wambe: Mwene u bhanga kiki, mu kuboka o njimbu yambote ku athu mu ngongo, ni kukayela o mukengeji yú ku mwenyu wê.” (O Mulangidi wa 1 wa Kanake wa 1925, mu kingileji) Katu-ku o sidivisu ya kuboka, o ukexilu wetu u jingisa we Jihova. Athu avulu ene mu tu mona kyoso ki tuya mu kuboka. Kyoso ki twolela ni athu, anga tu a menekena ni kisangusangu kyoso, ki a kwatekesa kukala ni ibanzelu yambote ya lungu ni etu ni Nzambi i tu bheza.

O sidivisu yetu ya kuboka ni wendelu wetu, u ximanesa Jihova

5 Jezú wambela o maxibulu mê: “Ki mu bokona dibhata, mu di menekena.” (Matesu 10:12) Mu ididi mwa boko Jezú, kyexile kifwa kyá, kwixana athu ka ejiya mu mabhata mâ. Lelu, mu ididi yavulu athu kala dingi ni kifwa kiki. O athu a futuluka, a kala ni njinda, kyoso kya mona muthu ka mwijiya mu mabhitu mâ. Maji se tu londekesa ukamba ni ku a talatala ni henda, ene kanda futuluka dingi. Kyoso ki u boka bhu kaxi ka kadikalu ka madivulu, u mona kwila, se wolela anga u menekena o athu ni ngalasa, ene a-nda divwa kyambote phala kuzukama ni kukatula madivulu mu kadikalu. Nange ene a mesena kudikunda!

6. Ihi ya kwatekesa o dikaza dya adyakime kusuluka ni kuboka?

6 Say dikaza dya jiphange a kuka kyá, ku ixi ya Inglaterra, ka tena dingi kuboka nzo ni inzo kala kya kexile mu bhanga, mukonda o sawidi yâ ki yala dingi kyambote. Kyenyiki a tula meza ya madivulu mu mbalanda yâ. Inzo yâ ya zukama mu mbandu ya xikola. Ene a ta o madivulu ku meza mu ukexilu u kwatekesa o jitata aya mu takana o twana ku a mona kyambote. Say jitata a katula madivulu kala Os Jovens Perguntam—Respostas Práticas, Volume 1 ni 2. Say phange ya muhatu muboki wa thembu yoso wa di bundu ni dikaza didi. O jitata jojo a mono kwila mwene wa kexile ni ukexilu wambote, ni kwila o dikaza dya mesenene mwene ku a kukwatekesa. Katé say tata wa mateka mwene kudilonga o Bibidya.

7. Kyebhi ki tu tena kukwatekesa o athu a lengela mu ixi yengi?

7 Athu avulu lelu, a bhingi kutunda mu ixi yâ, a lengela mu jixi jengi. Ihi i u tena kubhanga phala kukwatekesa o athu a tungu mu jixi jengi kwijiya Jihova? Kya dyanga, u tena kudilonga ku a menekena mu dimi dyâ. Ki  kyene ngó, u tena we kudilonga izwelu yofele phala ku a kwatekesa kukala ni vondadi ya kudilonga bhu kaxa ka aplikativu, JW Language. Mu kusuluka u tena kulondekesa jividyu ni madivulu ala mu jw.org, mu dimi dyâ.—Matendelelu 10:19.

8, 9. (a) O kyônge kyetu kya kaxi ka semana ki tu kwatekesa kyebhi? (b) Kyebhi o jitata kya tena kukwatekesa o twana twâ kutambwijila kyambote mu yônge?

8 Jihova wa tu bhana yoso i twa bhindamena phala ku di tunda kyambote mu ukunji. Mu kifika, yoso i tu dilonga mu kyônge, Ukexilu wa Ukidistá ni Ukunji Wetu, i tu kwatekesa kukunda o athu ni ku a longa o Bibidya sé héle.

9 Kyoso ki kumoneka athu a ubhe mu yônge yetu, ene a diwana ni itambwijilu i bhana o tumbonga. Eye u tena kulonga o twana twê, kutambwijila mu izwelu yâ. Say athu a mateka kuwabhela o kidi, kyoso kya mono ana ndenge kujimbulula o kixikanu kyâ ni kidi kyoso, mu izwelu ki i bhonzo ku i tendela.—1 Kolindo 14:25.

KOLESENU O UKAMBA WENU

10. Kyebhi o ubhezelu ku mwiji u tena kukwatekesa o miji kutakana mu muxima umoxi?

10 Kyoso ki tu bhanga yoso phala kukwatekesa o mwiji wetu kukala ni ukamba, ni kutululuka, kubhana kijingu kwa Jihova. Mu kifika se u tata mba u mama, bhanga yoso phala kukala ni Ubhezelu ku Mwiji. Miji yavulu ene mu mona o milongi ya JW Broadcasting kumoxi, mu kusuluka, a di kunda kyebhi kya tena kukumbidila o milongi  ya dilongo. Kana kujimba kwila, kulonga o kabwetele ki kyene kumoxi ni kulonga munzangala, mukonda o ibhindamu yâ ki i difu. Bhanga yoso i u tena phala kukwatekesa oso kukatula mbote mu ubhezelu ku mwiji.—Jisálamu 148:12, 13.

Kima kyambote kusota kithangana phala kukala ni adyakime (Tala o kaxi 11)

11-13. Kyebhi ki tu tena kukwatekesa o kilunga kyetu kukala dingi ni muxima umoxi?

11 Né mwene se u munzangala u tena kukwatekesa oso mu kilunga kudivwa kwila ala ni valolo. U tena kubhanga kiki, mu kubhanga ukamba ni adyakime. Wa ebhwidisa se ihi yene mu a kwatekesa kukolokota mu kusidivila Jihova mu mivu yavulu. Ene a tena ku kulonga madisá avulu ambote. Kiki kya-nda swinisa ki kale ene, ki kale eye! Etu enyoso, adyakime ni minzangala tu tena kukwatekesa oso eza mu Kididi kya Ubhezelu kudivwa kwila a a tambwijila kyambote. Eye u tena kwa menekena, kwolela na-u, kwa kwatekesa kusanga kididi kya kuxikama, ni kwa londekesa ku jiphange ja mukwa. Wa a bhangesa kudivwa kala ala kubhata dyâ.

12 Se a ku solo phala kwendesa o yônge ya sidivisu ya kuboka, u tena kukwatekesa o adyakime kusuluka ni kumwika. Wa a bhana jimbambe ja soko phala kuboka. U sola minzangala phala kukalakala ni adyakime. O adyakime, ni yó a kate, say ithangana a luwala, mukonda ka tena dingi kuboka kala mu ukulu. Ene a divwa kyambote se a mona kwila eye wa a zolo, anga u tendela o ibhidi yene mu dibhana na-yu. Né mwene adyakime kyá mba ala kya thembu yavulu mu kilunga kya Jihova, o henda i u a londekesa i tena ku a kwatekesa kusuluka mu kuboka ni kuswina.—Ijila 19:32.

O kwila u tena kubhanga kima phala kwijiya kyambote o jiphange mu kilunga kyê?

13 Akwa Izalayele, a sangulukile mu kubheza Jihova kumoxi. O mukwa Jisálamu wa soneka: “Kima kya fwama, kya di wabhela kyambote, ki u sanga jiphange a takana mu muxima umoxi!” (Tanga Jisálamu 133:1, 2.) Mwene wa sokesa o ukexilu wa kukala bhwamoxi ni maji a bhangesa o pholo ya muthu kubhenya ni kunuha kyambote. Kyene kimoxi we, tu kolokotesa o jiphange jetu mu ku a londekesa henda ni kwa bhangela ima yambote. Kiki ki bhangesa o jiphange mu kilunga kukala dingi kumoxi. O kwila u tena kubhanga kima phala kwijiya kyambote o jiphange mu kilunga kyé?—2 Kolindo 6:11-13.

14. Kyebhi ki u tena kwehela o mukengeji ku mwikina mu dyembu di wa tungu?

14 O mukengeji wê u tena kubhenya kabasa kididi. O henda yê i tena kukwatekesa o jivizinyu jê kumesena kudilonga ya lungu ni Jihova. Dibhwidise: ‘Ihi i banza o jivizinyu jami ya lungu n’eme? O kwila o inzo yami ya zele? O kwila i kwatekesa kufwamesa o dyembu? O kwila ngi vizinyu yambote?’ Ebhwidisa o Jimbangi ja mukwa se kyebhi o phangu yâ ya henda ya kwatekesa o jindandu, jivizinyu, jikoleka ja salu mba ja xikola.—Efezo 5:9.

KALENU KU MESU A ZELE

15. Mukonda dyahi ki twa tokala kulanduka?

15 Se twa mesena kwehela o mukengeji wetu kumwika, twa bhingi kukala ku mesu a  zele mbe-bhu o kithangana ki twala. Mu veji javulu, Jezú wambela o maxibulu mê: ‘Dilangyenu-phe.’ (Matesu 24:42; 25:13; 26:41) Se tu banza kwila, “hadi ya dikota” yalé hanji dikanga, twa-nda landuka. Ki twa-nda katula mbote mu kithangana kya kulonga akwetu ya lungu ni Jihova. (Matesu 24:21) Mu veji dya kumwika o mukengeji wetu wa-nda fwetela, ku disukilu u tena kujima.

16, 17. Ihi i u tena kubhanga phala ki u jimbe kwila twala mu izuwa ya sukidila-ku?

16 Twa bhingi kukala dingi ku mesu a zele kindala, m’ukulu ndenge. O kuyibha ku mundu kwa mu di bandekesa dingi. Maji twejiya kwila, o dizubhilu dya-nda bhixila mwene mu kithangana kya xindi Nzambi. (Matesu 24:42-44) O kithangana kya tolo, twa bhingi kukala ni paxola mba mwanyu ni kuxinganeka o ima kupholo. Tanga o Bibidya izuwa yoso, kana kujimba kusamba kwa Jihova. (1 Phetele 4:7) Dilonge ni phangu ya jiphange a mu sidivila kyá Jihova mu mivu yavulu. Mu kifika, u tena kutanga misoso ya kidi, milongi kala, “Setenta Anos Agarrando a Aba da Veste de um Judeu;” Mu Mulangidi wa 15 wa kasamanu wa 2012, mbandu 18-21, mu phutu.”

 17 Dikwatenene mu kusidivila Jihova. Bhanga ima yambote ku athu, bhita kithangana ni jiphange jê. Mu kubhanga kiki, wa-nda sanguluka, wa-nda mona kwila o kithangana kya mu bhita ni lusolo. (Efezo 5:16) O jiselevende ja Jihova ja bhange ima yavulu mu hama ya mivu ya bhiti. Lelu, twa mu kalakala dingi m’ukulu ndenge. O kikalakalu kya Jihova, lelu kya mu kula dingi. O mukengeji wetu wa mu mwika kyambote!

Kyoso kya tu kunda ku tufunga, tu tena kukatula mbote ku unjimu wa Nzambi (Tanga o kaxi 18, 19)

18, 19. Kyebhi o tufunga kya tu kwatekesa kusidivila Jihova ni kuswina? Bhana phangu.

18 Sumbala mwene wejiya kwila tu akwa ituxi, Jihova u tu bhana ujitu wa ku mu sidivila. Phala ku tu kwatekesa, mwene wa tu “wanena mawjitu” a athu, o tufunga mu kilunga. (Tanga Efezo 4:8, 11, 12.) Kyenyiki, kyoso kya ku kunda ku tufunga, bhanga yoso phala kukatula mbote mu unjimu ni itendelesu yâ.

19 Mu kifika o say dikaza ku ixi ya Inglaterra, a kexile mu di bhana ni ibhidi mu ukaza wâ, kyenyiki a bhingi kikwatekesu ku tufunga tuyadi. O muhatu wa kexile mu divwa kwila, o dyala ka kexile mu kwatekesa o mwiji kusidivila Jihova. O diyala wa kexile mu divwa kwila ka kexile ni uhete wa kulonga, wa xikina we kwila ka bhangele kima phala kukala ni ubhezelu ku mwiji. O tufunga a kwatekesa o dikaza kuxinganeka mu phangu ya Jezú. Ene a kwatekesa o dyala kukayela o phangu ya Jezú ya kulanga o maxibulu mê. Ene a swinisa o muhatu kulondekesa paxola kwa mwadi wê. Ene a bhana we jindunge ja lungu ni kyebhi o dikaza kyeji bhanga o ubhezelu ku mwiji ni twana twâ tuyadi. (Efezo 5:21-29) O dyala wa bhange yoso phala kukala mutwameni wambote wa mwiji. O tufunga twa mu kwatekesa phala ka bhwile, twa mu kwatekesa we kudyelela kwa Jihova ni ku nzumbi yê ikôla. O henda ya londekesa o tufunga tutu, ya kwatekesa o mwiji yó!

20. Ihi ya-nda bhita kyoso ki wehela o mukengeji we kumwikina?

20 “Wa zediwa o muthu yó woso wa kwata woma wa Jihova, mukwa kwenda jinga mu ’njila Jê.” (Jisálamu 128:1) Eye u sanguluka dingi se o mukengeji we wa mu kumwikina. Mu kiki-phe, longa akwenu ya lungu ni Nzambi, bhanga yoso i u tena phala kukwatekesa o mwiji ni kilunga kukala ku mesu a zele ithangana yoso. Akwenu a-nda mona o phangu yê yambote, hé a-nda ximanesa we Tata yetu Jihova.—Matesu 5:16.