O Bibidia i londekesa isuma iavulu iambote, i tena ku tu kuatekesa kutendela kiambote o diulu. Tua ku bhingi kuila, tendela kiambote o isuma íii. Sumbala ima ioso i moneka mu isuma íii, eie ku tokala ku i tendela kala kia i soneka, maji o isuma ki ia-nda ngó ku ku kuatekesa kuijiia kiebhi kiala o athu a tungu ku diulu, maji ua-nda tendela ué kiebhi ene kia tena ku ku kuatekesa.

JIHOVA MUÉNE SUKE-KU

“Sai-ku ni ió ua xikama bhu kiandu. Muène ua xikama bhu kiandu, ku mu tala mesu, uedi kala ditadi dia jàxipe ni dia salado mu kubenha. Anga ku kala hongolo ia kondoloka o kiandu, kidifua kiê mukuâ ni ditadi dia zemelada.”​—Dijingunuinu 4:2, 3.

“Mukuâ ni ki kala o hongolo ku diulu, ki i moneka ku matuta bhu kumbi dia mvula, kiene ué kia di-fuile o mukengeji uenhú ua kondoloka mu jimbandu; kienhiki kia di-fuile o ku bhenha kua unéne ua Jihova.”​—Izekiiele 1:27, 28.

O isuma íii, ia mono phoxolo Nzuá ni polofeta Izekiiele, ilondekesa o unéne ua Nzambi Suke-ku, Jihova. O unéne uê a u londekesa mu ukexilu u tu tena ku tendela ni lusolo​—o matadi avalolo, o hongolo, ni ku fuama kua kiandu. O isuma íii, ilondekesa kuila o kididi kiala Jihova, kia uabha, kia tululuka.

O izuelu íii ia lungu ni Nzambi ia difu ni ia mukua Jisalamu ua soneka: “Kuma Jihova munéne, ua tokala ku mu ximana kiavulu; muéne a mu kuatela uoma, jinzambi jengi kana. Mukonda o jinzambi ja ifuxi ioio, iteka ngó; Jihova phe muene ua bhanga o diulu. Ni ujitu ni ungana ua mu kala bhu pholo iê; ni nguzu ni kuuabha kuala mu kididi kiê kiangene.”​—Jisálamu 96:4-6.

Sumbala Jihova Suke-ku, muéne u tuixana phala ku mu zukama bhu kaxi ka musambu, ua tu bhana ué o kidielelu kia kuila ua-nda tuivua. (Jisálamu 65:2) Nzambi ua tu zolo kiavulu iu uene mu tu langa, o poxolo Nzuá sé phata ua soneka: “Nzambi henda.”​—1 Nzuá 4:8.

JEZÚ UALA KUMOXI NI NZAMBI

“[O dixibulu Kidistá Xitevá] uezala ni Nzumbi Ikôla, u tonginina mu diulu anga u mona o kubenha kua Nzambi. Ua mono ue ni Jezú uemana ku madilu ma Nzambi. Bhenhobho uixi: Talese-nu! Nga mono diulu dia jikuka, ni Mon’a Muthu uemana ku madilu ma Nzambi!”​—Ikalakalu 7:55, 56.

Ande dia Xitevá ku mona o kisumua kiki, Jezú a mu jibha kua ió a kexile mu zuela ni Xitevá o atuameni a Jijudé. O kisumua kia londekesa kuila Jezú  ua kexile ku muenhu, a mu fukunuine ni ku mu unda. Ia lungu ni maka iá, Phoxolo Phaulu ua soneka: ‘Jihova ua fukununa Kristu, iú ua mu zangeleka ku madilu mê ku mundu ua diulu. O kiki Kristu muene ualù tumina o mautuminu oso mu madimbinza, ni atumini oso, ni nguzu joso ni makutena oso, Muène a mu zangeleka ku thandu dia mautuminu oso ala ku mundu iú, ni ku mundu uà k’eza-ku.’​—Efezo 1:20, 21

O Mikanda Ikôla ki ilondekesa ngó o kutena kua Jezú, maji i tu tangela ué kuila Jezú u suua o athu kála Jihova. Kioso kiexile mu ixi, Jezú ua sakele o jihaxi ni kufukununa o athu afú. Bhu kaxi ka sata iê, muéne ua londekesa henda ia dikota kua Nzambi ni ku athu oso. (Efezo 2:4, 5) Jezú uemana bhu kadilu ka Nzambi, muéne ua-nda bheka mabesá avulu ku athu oso a mu belesela mu ngongo.

O JIANJU JISIDIVILA NZAMBI

“Eme [polofeta Daniiele] nga kexe-phe mu kukengelela katé kia bheka iandu, a i tula, anga Mukulu-ua-Ndamba [Jihova] uxikama. . . . Jimidi ja jimidi ja kuata ku mu xibhidila, jifuku ni jifuku jemana bhu pholo iê.”​—Daniiele 7:9, 10.

Mu kisuma kiki kia diulu, Daniiele ka mono ngó anju imoxi maji ua mono mazunda ni mazunda a jianju. Kiexile kisuma kiambote! O jianju athu mu nzumbi, jinjimu jala ni kutena kuavulu. O ibuka iâ, a ixana jiselafi ni jixelube. O Bibidia i tumbula o kizuelu jianju 250 a jiveji ndenge.

O jianju k’athu a tungile mu ixi. Nzambi ua bhange o jia-nju ande dia ku bhanga o athu. Kioso Nzambi kia bhange o ngongo, o jianju kuene kiá ku ja kexile, ja sangulukile kiavulu.​—Jobe 38:4-7.

O jianju ja fiiele ji sidivila Nzambi, mu kubhanga o kikalakalu kia beta-o-kota kiene mu bhanga mu ixi—o kikalakalu kia kuboka o njimbu iambote ia Utuminu ua Nzambi. (Matesu 24:14) Nzuá ua mono o kikuatekesu kia bhana o jianju mu kikalakalu kiki, muéne ua soneka: “Anga ngi mona anju iamukua ia mu bhita bhulu, ia di lèka, o bhu ala kubhitila, uasu o mbambe ni diulu. Uambata o jingolokela ji xalelà-ku ja Njimbu Iambote, phala ku ji kolela athu oso a tungu mu ngongo, ku ifuxi ioso, ni madimi, ni madiembu.”  (Dijingunuinu 14:6) Sumbala o jianju ki jene mu zuela dingi ni athu kála kia kexile mu bhanga m’ukulu, maji jene jendesa o aboki kua ió ala ni muxima uambote.

SATANAJI U NGANALA ATHU AVULU

“Kienhókio, mu diulu anga mu kala ita. Mingedi [Jezú Kristu] ni ji-anju jê a lua ita ni mudikixi, o mudikixi anga u lua ue kumoxi ni ji-anju jê. Enhá-phe a tokoka-ku! Ni muène ni ji-anju jê, mu diulu ka mono-mo dingi kididi. Kimudikixi kia dikota anga a mu takuila ku kanga! A mu kaia, na Kinhoka kiokulu, a mu ila Diabhu, a mu ila Satana, mukua kunganala o mundu uoso. A mu lundumuina mu ngongo, ni ji-anju jê a ji lundumuina-nê kumoxi.”​—Dijingunuinu 12:7-9.

Kuexile kithangana, ku diulu ki kuexile kutululuka. Ku dimatekenu dia ngongo, saí anju ua mesenene kiavulu o ubhezelu, mukonda dia kiki ua lungulukila Jihova iu ua kituka Satanaji mba “Nguma.” Jianju ja mukuá ja mu kaiela, ja lungulukila uá Jihova ji ja dibhange madimonho. Ni kuiibha kuoso jene ja lungulukila Jihova, jene jendesa o athu mu njila iéngi kana mu njila iambote ia Jihova.

Satanaji ni madimonho mê, ifusa, athu aiibha. Ene a zembe kiavulu o athu, a bheka hadi iavulu mu ngongo. Mu kifika, Satanaji ua jibhile o ibhaku ni jiselevende ja Jobe, diiala dia fiiele. Ua jibhile ué o dikuinhi dia an’â Jobe mu kubheka ‘kitembu kia dikota’ kia divundu ku inzo kua kexile ene. Mu kusuka-ku, Satanaji ua kuama Jobe “ni ijimbu ia ibha tunde bhu kànda dia kinama katé bhu thala ia mútue.”​—Jobe 1:7-19; 2:7.

Maji kua kambe ngó, Satanaji a-nda mu buika. Tundé kia mu takula mu ngongo, muéne “uejiia kuila o thembu iê ia butu.” (Dijingunuinu 12:12) Satanaji ka-nda kala-ku dingi, íii njimbu iambote!

ATHU A TUNDA MU IXI

‘[Jezú] ua sumbu athu ku miji ioso, ni ku madimi moso, ni ku madiembu moso, ni mu ifuxi ioso phala Nzambi. Eie ua bhake ku usobha ni unganga ua Nzambi ietu, ene hinu à kala mù tumina mu ngongo.’​—Dijingunuinu 5:9, 10.

Kála kia fukunuine Jezú mu ixi phala kuia ku diulu, athu a mukuá ué a-ndaia. Jezú uambela o jiphoxolo jê ja fiiele: “Eme ngala kuia ku mi iudikila-ku kididi. Se ngai, . . . hádia ngiza, ngi mi tambulula ko kuami; o kuoso ku ngala eme, enu uenu kuene ku muà kala.”​—Nzuá 14:2, 3

 O athu a-ndaia ku diulu, a-ndaia phala kubhanga-ku kima. Kumoxi ni Jezú a-nda bhanga mbandu ku Utuminu, ua-nda tumina o athu oso mu ngongo ni ku a bhana mabesá. Iú uene o Utuminu ua tumina Jezú o maxibulu mê o kusamba mu kuila: “Tata ietu uene mu diulu, dijina dié a dixile. Utuminu ué uize. Vondadi ié a i bhange bhoxi, kala kiala ku i bhanga ku diulu.”​—Matesu 6:9, 10.

IHI IA-NDA BHANGA IÓ A-NDAIA KU DIULU?

‘[poxolo Nzuá] anga uívua dízui dia suina dia mu tunda bhu kiandu, dixi: Talesa, kindala o balaka ia Nzambi iala mu’axaxi ka athu! Nzambi muène uenda jinga-nâ, u kala Nzambi iâ. Muène u a kondona o masoxi moso ku mesu mâ! Ki ku kala dingi kùfua, nè ngó mukôndo, mba kudila, mba kukata. Mukonda ima ia diangèle-ku, ia bhiti.’​—Dijingunuinu 21:3, 4.

O kisuma kiki, ki tu tangela o kithangana kioso o Utuminu ua Nzambi bhu maku a Jezú ni ió a tundu mu ixi, kia-nda zubha o unguvulu ua Satanaji ni kubhangesa o ixi kukala palaízu. Ki kua-nda kala dingi o ima iene mu bheka ndolo ni malamba ku athu. Katé ni kúfua, ki kua-nda kala-ku dingi.

Ihi ia-nda bhita ni jimidi ni jimidi ja athu áfu kiá, ka-nda ku a fukununa phala kuia ku diulu? Ene a-nda kua fukununa phala kukala ni muenhu ua kalela-ku mu Palaízu mu ixi.​—Luka 23:43.

O isuma íii i tu dielelesa kuila Jihova Nzambi ni Mon’ê Jezú Kristu ni jianju ja fiiele ni ió a a sumbu mu ngongo, ene oso a tu zolo kiavulu ia a mesena o mbote ietu. Phala kuijiia dingi ihi ia-nda bhanga ene, sota o Jimbangi ja Jihova mba jikula o kijimbuete kietu, www.jw.org/kmb ni kukatula o divulu Mu Kidi Ihi i Longa o Bibidia?