O ibhidi i moneka mu maukexilu avulu. Mukonda dia kiki, ki tu tena kudilanga mu ibhidi ioso i moneka, maji tua-nda dilonga phangu jiuana ja athu a a tumbula kiá mu milongi íii. Tala kiebhi o athu a dibhanene ni ibhidi ki i difu, kia a kondo o malamba kua Nzambi.

IHI I UA TOKALA KUBHANGA SE A KU KAIE KU SALU?

“Nga dilongo kuxikina kikalakalu kioso kioso, nga kexile ué mu dilanga ni ima i nga tokalele kusumba.”—Jonathan

Seth uambe: “Eme ni muhatu’ami tundé kia tu kaie ku salu kua bhiti kiá thembu. * Mu mivu iiadi tua kexile mu dikila o muiji ni ima ia kexile mu tu bhana ni ka uenji ku tua kexile mu bhanga. Mukonda dia kiki, muhatu’ami Priscilla, ua luualele kiavulu. Mukonda dia kiki nga divu kiaiibha, sé valolo.”

“Kiebhi ki tua dibhana ni maka enhá? Ithangana ioso, Priscilla ua kexile mu xinganeka mu izuelu ia Jezú i tu sanga mu divulu dia Matesu 6:34. Muéne uambe kuila, ki tu tokala kuthandanganha ni kizuua kia mungu, kala kizuua kiala ni ibhindamu iê. O misambu ia kexile mu bhanga, ia mu bhana nguzu ia kukolokota. Mu diami, o divulu dia Jisálamu 55:22, dia ngi kuatekesa. Kála o mukuâ jisálamu, ngehela o ibhidi iami bhu maku a Jihova, muéne ua ngi kuatekesa. Sumbala lelu ngala kiá ni salu iéngi, maji tua sosolola o ukexilu ua muenhu uetu mu ku kaiela o kitendelesu kia Jezú ki tu sanga mu divulu dia Matesu 6:20-22. O kima kia beta kota ki tua bhange o kuzukama dingi kua Nzambi, o ukamba uetu mu ukaza ua kolo dingi.”

Jonathan uambe: “Kioso uenji u tua kexile mu bhanga ua boba, nga kexile ni uôma, se ngeji dikila kiebhi o muiji. Mukonda dia kithangana kiaiibha kia kukamba kitadi ni kudia mu ixi, o nguzu iami ia kukalakala mu 20 a mivu, ia diboto. Nga mateka kuzoka ni muhatu’ami mukonda dia kitadi. Ki tua kexile mu tena kusumba kima ni kalatá ka crédito, mukonda tua kexile ni uôma ua kuila, o matenda keji xikina.”

“O mak’â Nzambi ni nzumbi iê ikôla ia tu kuatekesa kusola kiambote. Nga dilongo kuxikina kikalakalu kioso kioso, nga kexile ué mu dilanga ni ima i nga tokalele kusumba. Kuma tu Jimbangi ja Jihova a tu kuatekesa ué ku jiphange. Ene a tu bhangesa kudivua kiambote a tu kuatekesa mu ithangana ia bhonzo.”

 IHI I UA TOKALA KUBHANGA SE A KUSENGE?

Raquel uambe: “Kioso mudiuami kia ngi senge, muxima uami ua toloka, nga kexile ni njinda. Muxima uami ua kexile ni ndolo iavulu. Maji nga zukama dingi kua Nzambi, muéne ua ngi kondo o dilamba diami. Kioso ki nga mateka kusamba dingi ithangana ioso, o kutululuka kuijila kua Nzambi kua lange o muxima uami. Nga divu kala muéne ua sake o muxima uami ua tolokele.”

“Mukonda dia Mak’â mê o Bibidia, nga katula o njinda ni unguma u nga kexile nau ku muxima. Nga kumbidila o izuelu ia poxolo Phaulu mu divulu dia Loma 12:21, diambe: “Kana kuehela phulu ku mi tolola, inda enu-ku mu tolola o phulu ni mbote.”

“Saí ‘thembu ia kujimbidisa.’ . . . Lelu nga mesena kiá kubhanga ima iéngi ku muenhu.”—Raquel

“Saí dikamba ua ngi kuatekesa kumona kuila, nga tokalele kusuluka ni muenhu uami. Muéne ua ngi londekesa o divulu dia Ndongixi 3:6, ni henda ioso ua ngi ambela uixi: Saí ‘thembu ia kujimbidisa.’ O izuelu íii ia ngi xixima kiavulu, maji ia ngi tokala. Lelu nga mesena kiá kubhanga ima iéngi ku muenhu.”

Elizabeth mukuâ Estados Unidos uambe: “Kioso ki u disenga ni kazola kê, u bhindamena kikuatekesu. Ngala ni dikamba dia kazola ua ngi kuatekesa ithangana ioso. Muéne ua kexile bhu mbandu iami, ua ngi kuatekesa, nga divu kala a ngi zolele, sumbala a ngi sengele. Sé phata, Jihova ua mu tumu phala kusaka o muxima uami.”

IHI I UA TOKALA KUBHANGA SE UA KATE MBA UA KUKA?

Kioso ki nga kexile mu zubha o kusamba kua Nzambi, o nzumbi iê ia kexile mu ngi bhana nguzu.”—Luís

Luis a mu tumbula kiá mu dimatekenu dia Mulangidi iú, uala ni uhaxi ua bhonzo ua lungu ni muxima. Mu ithangana iiadi muéne hinu uáfu. Lelu muéne u kala 16 dia jiola mu jimakina phala kubhuima o munza. Muéne uambe: “Nga kexile mu samba kua Jihova ithangana ioso. Kioso ki nga kexile mu zubha o kusamba kua Nzambi, o nzumbi iê ia kexile mu ngi bhana nguzu. Kusamba ku ngi bhana nguzu, ia kukolokota, mukonda ngala ni kixikanu kua muéne ni kuila, muéne ua mu ngi langa.”

Petra uala mu kitala kia 80 a mivu uambe: “Eme nga mesena kubhanga ima iavulu, maji ki ngi tena dingi. Kubhonza kiavulu kumona o nguzu iami mu mukutu kuzoza. Muenhu ua ngi kumu ni kutambula milongo izuua ioso. Ithangana iavulu ngi divua kála Jezú ua bhingile kua Tat’ê, phala ku mu katula o kibhidi kia kexile mu dibhana nakiu se kia bhanene. Jihova  ua bhana nguzu kua Jezú, muéne u ngi suínisa ué. O musambu uene o milongo iami. Kioso ki ngi zuela ni Nzambi, ngi dívua kiambote.”Matesu 26:39.

Julian uala ni uhaxi ua bhonzo, ua mu bhangesa ku kala huhialenge, mu 30 a mivu kiene ué kiene mu dívua. Muéne uambe: “Nga tundu ku kialu kia ungana, lelu nga xikama bhu kialu kia malola. Maji lelu o muenhu uami uala dingi ni valolo, mukonda ngene mu bhanga o mbote kua akuetu. Kubhanga o mbote kusosolola o hadi, Jihova ka jimbi o kikanenu kiê kia ku tu kuatekesa mu ithangana ia bhonzo. Kala kia zuelele poxolo Phaulu ngi zuela ni kidi kioso: “Ima ioso nga soko na-iu mua Kristu ió mukua ku ngi bhana o kutena.””Filipe 4:13.

IHI I TUA TOKALA KUBHANGA KIOSO KI TU FUNDA NDANDU?

Antonio uambe: “Kioso tat’etu kiafu mu kiluezu, mu dimatekenu kia ngi bhonzo ku ki xikina. Nga banzele kuila, tat’etu ka tokalele kúfua, mukonda muéne ka kexile ni kikuma. Maji kana-ku kima ki nga tokalele kubhanga. Muéne ua kumbamene mu izuua itanu kiene kia kiáfu. Bhu pholo ia mam’etu nga kexile, mu bhanga nguzu phala ki ngi dilé, maji mu ubheka nga kexile mu dibhuidisa. ‘Mukonda diahi? Mukonda diahi?’

“Mu izuua ienióio ia bhonzo nga kexile mu bhinga kua Jihova phala ku ngi kuatekesa kulanga o muxima uami ni kutululuka. Bhofele bhofele nga tululuka. Ngejiia kuila, o Bibidia iamba kuila, “o ibatu ni jithembu” ja tokala ku athu oso. Kuma Nzambi ka tena kutanga makutu, nga dielela ni kidi kioso kuila, nga-nda mona dingi tat’etu kioso kia-nda fukunuka.”Ndongixi 9:11; Nzuá 11:25; Tito 1:2.

“Sumbala o kiluezu kia kiphululu kia jibha mon’etu, maji tuene mu lembalala o ithangana iambote i tua bhiti kumoxi.”—Robert

Robert a mu tumbula kia mu milongi ia dianga kiene ué kia banza. Muéne uambe: “Eme ni kazola kami, tua mono o paze i zuela o Bibidia mu divulu dia Filipe 4:6, 7. Tua bhingi o paze íii kua Jihova bhu kaxi ka misambu. O kutululuka kua muxima, kua tu bhana nguzu ia kuzuela ia lungu ni kidielelu kietu kia lungu ni difukunukinu. Sumbala o kiluezu kia kiphululu kia jibha mon’etu, maji tuene mu lembalala o ithangana iambote i tua bhiti kumoxi. Tuene mu lembalala o ithangana íii ni kisangusangu.

“Kioso o jiphange jetu Jimbangi ja Jihova kia tu tangela kuila, a tu muene kioso ki tua kexile mu zokela o kixikanu kietu mu mutelembe ua izuzumbia, tua ambela kuila, tua tenene ngó kubhanga kiokio ni kikuatekesu kia misambu iavulu ia bhangele o jiphange jetu mu nzumbi. Mu kidi ngejiia kuila Jihova ua kexile mu tu kuatekesa bhu kaxi ka jinjimbu ja kexile mu tu tumikisa o jiphange phala ku tu konda o malamba.”

Kala ki tua mono mu ifika kudima, Nzambi u tena kubatula o maka ni ibhidi ia bhonzo ia athu. Abha o ibhidi iê? Maka oso oso u ua mu dibhana nau, saí muthu u tena ku ku kuatekesa, mu ithangana ia bhonzo. * Bhinga kikuatekesu kua Jihova. Muéne “Nzambi ió athu oso kuene mú tambula o dikuatekesu!”2 Kolindo 1:3.