Ku bokona mu madisá

Ku bokona mu madisá

Ku muvu ua 1881, o mutuameni ua masoladi ngana Gordon, uambe kuila o jaludim ia Edene ia kexile mu mbanza ia Praslin, Seychelles

Palaízu mu Ixi—o Kuila Nzoji Ngó Inga Kidi Muene?

Palaízu mu Ixi—o Kuila Nzoji Ngó Inga Kidi Muene?

Palaízu! O matenda ene mu londekesa ididi ia fuama phala o athu kuia mu nhoha-mu, ididi íii ené a i xana “palaízu.” Mu ididi íii o athu a tena kunhoha kiambote ni kujimba o malamba mâ. Maji kala ki tuejiia kiá, kioso athu iá kia vutuka ku mabhata mâ, mienhu iâ i kala kála kia kexile ande dia kuia ku ididi ienióio.

Mu kidi, athu oso a mesena kukala mu kididi kia fuama mba mu palaízu. Maji amoxi a dibhuidisa: ‘O kuila “o palaízu” kidi muene? Maji se makutu, mukonda diahi tua mesena kiavulu kukala-mu? O kuila ku hádia o ixi ia-nda kituka muene palaízu?’

O MUSOSO UA LUNGU NI PALAÍZU

Mu mivu iavulu, athu ene mu xinganeka kiavulu o palaízu. Sai iá a mateka kubanza mu maka enhá mukonda ene a tange mu Bibidia ia lungu ni ‘jaludim ia Edene’. Maji mukonda diahi o kididi kieniókio kia iukile kiavulu? O Bibidia iamba: “Jihova Nzambi anga u sabhukisa mu mavu mbutu ioso ia mixi ia uabha ku mesu, ia uabha ue ku i dia.” O jaludim ia Edene ia iukile kiavulu phala muthu kutunga-mu. O kia betele-kota mu kuiuka mu jaludim ienióio o kuijiia kuila ‘mu kaxi kê mua kexile ue ni muxi ua muenhu.’Dimatekenu 2:8, 9.

O divulu dia Dimatekenu di tanga ue ia lungu ni ngiji jiuana ja kexile mu tunda mu jaludim ia Edene. Jingiji jiiadi, a ji jiia hanji katé mu lelu—o ngiji ia Tigre ni ngiji ia Ufalate. (Dimatekenu 2:10-14) O ngiji jiiadi jiji ji bhitila mu ixi ia Iraque ia tokalele mu kibatu kia Pelesa, jiia bhua lungila o golfo ia Pelesa.

Katé kiki, akua Pelesa a xikina ku musoso ua lungu ni palaízu mu ixi. Ku Muzeu ua Jifikula mu mbanza ia Filadelfia, mu ixi ia Estados Unidos, kuala mulele ua mivu ia hama 16, u londekesa jaludim ni mixi, ithulu ni ilumbu. O kizuelu “ilumbu ni jaludim” mu dimi dia Pelesa kilombolola ue “palaízu.” O fikula iala ku mulele ilombolola kiambote o musoso ua Bibidia ua lungu ni jaludim ia Edene.

Mu kidi, o musoso ua lungu ni palaízu ene mu u tanga mu madimi ni mu jixi javulu. Kioso athu kia kexile mu di muanga mu kuia mu ididi iengi, kala muthu ua kexile mu kuambata o musoso uê ua lungu ni jaludim ia Edene. Ku pholo dia kuenda, o musoso iú ua difungu ni ilongesu ni misabhu ia makutu ia athu. Katé kiki, o athu ene mu kuixana o ididi iaiuka iala ni mixi iavulu, kala palaízu.

MU KUSOTA O KIDIDI BHUA KEXILE O PALAÍZU

Akua kusota o jixi, a zuela kuila, a sange o kididi bhua kexile o palaízu. Mu kifika o Britâniku Charles Gordon, mutuameni ua masoladi, uai ku kikôlo kia Seychelles ku muvu ua 1881. Muene ua diuanene kiavulu ni kuiuka kua hônga ia Mai, mu lelu kididi kiki kia tokala ku mundu uoso, muene ua zuela kuila o jaludim ia Edene ia kexile bhenhobho. Ku mivu ia hama 15 o mukua kuendela mu kalunga Cristóvão Colombo mukua Italia uendele njila katé ku kikôlo kia Hispaniola, lelu ki bhanga mbandu ku jixi ja República Dominicana ni Haiti. Muene ua banzele kuila ua sangele ue o kididi bhua kexile o jaludim ia Edene.

Mu divulu Kubhanga o Mapa ia Palaízu * muala jifikula ja 190 a jimapa j’okulu. Jimapa jiji ji londekesa Adá ni Eva mu jaludim ia Edene. Muala ue kopia ia mapa ia mivu ia hama 13, ia Beato de Liébana. Mu kaxi ka mapa íii, ku mbandu ia thunda, muala fikula ia palaízu. Ku palaízu ku tunda ngiji jiuana, a j’ixana “Tigre,” “Ufalate,” “Pixone,” ni “Ngibone.” Kala ngiji ienda njila iê. Kiki kia kexile mu lombolola o kudimuanga kua Jikidistá ku mundu uoso. Mu kidi, etu ki tuejiia se o palaízu ia kexile kuebhi, maji ima ioso i tua zuela bhabha ilondekesa kuila tundé ukulu athu a uabhela kiavulu o kibanzelu kia kukala mu palaízu.

John Milton, musoneki mukua Inglaterra ku mivu ia hama 17 ua soneka ia lungu ni Palaízu ia Texika, ua kaiela o musoso u tu sanga mu divulu dia Dimatekenu ua lungu ni kituxi kia Adá, ni kioso kia mu kaie mu jaludim ia Edene. Ku musoso iú, John Milton ua lombolola o polomesa ia bhange Nzambi ia kuila athu  oso a-nda kala mu ixi katé ku hádia ni hádia. Muene uambe: “O ixi ioso ia-nda kituka palaízu.” Mu kubhita thembu, o ngana John Milton ua soneka dingi musoso uambele: O Palaízu io Sange.

A LUNGULULA O IBANZELU IÂ IA LUNGU NI PALAÍZU

Sé phata tundé ukulu athu a uabhela kiavulu o kibanzelu kia kukala mu palaízu. Mukonda diahi-phe, lelu athu kene mu zuela dingi kiavulu ia lungu ni palaízu? O divulu Kubhanga o Mapa ia Palaízu diambe: “Mukonda o jingijiie akua kulonga o Bibidia . . . ka mesenene dingi kuta maka alungu ni kididi bhua kexile o palaízu.”

Athu avulu ene múia mu jingeleja, a dilongo kuila athu oso a-nda tunga ku diulu kana mu palaízu mu ixi. Maji o Bibidia mu divulu dia Jisálamu 37:29, diambe: “Ixi-phe i xalela ku athu iá aiuka, ene a i lundula, muene mua tunga, o thembu iâ ki ibhu.” Maji o mundu lelu ki palaízu kana! Mu kiki-phe, o kuila ku hádia o polomesa íii ia-nda dikumbidila? *

O PALAÍZU MU IXI KI NZOJI NGÓ KANA, KIDI MUENE

O Ngana Jihova ua bhange o Palaízu mba o jaludim ia Edene, muéne ua kanena kuila o ixi ia-nda kituka dingi palaízu. Kiki kia-nda bhita kiebhi? Jezú ua tambuijila o kibhuidisu kiki kioso kia tu longo o kusamba, muene uixi: “Utuminu ué uize. Vondadi ié a i bhange bhoxi, kala kiala ku i bhanga ku diulu.” (Matesu 6:10) O Utuminu iú bhu maku a Sobha Jezú Kristu, unguvulu ua-nda tumina o ixi ioso. O unguvulu uenhú ua-nda katula o jinguvulu joso jene ku mundu lelu. (Daniiele 2:44) Bhu kaxi ka Utuminu iú, Nzambi ua-nda ‘kumbidila’ o polomesa ia bhange ia ku kitula dingi o ixi palaízu.

Nzambi ua tumina ue polofeta Izaia kusoneka kiebhi kia-nda kala o muenhu ua athu mu Palaízu, ima ioso iaiibha iene ku mundu lelu, ku hádia ki ia-nda kala-ku dingi. (Izaia 11:6-9; 35:5-7; 65:21-23) Tua mu kusuinisa kukatula tu ithangana phala kutanga mu Bibidia ié o jivelusu jala ku dima. Kubhanga kiki kua-nda ku kuatekesa kukala ni kidielelu kia kuila o jipolomesa joso ja Nzambi ja-nda dikumbidila. Oso ió ene mu belesela Nzambi a-nda kala mu palaízu ni kukala ni ukamba uambote ni muene—Adá ua kexile ni ima iiadi íii maji ua i texi.Dijingunuinu 21:3.

Mukonda diahi tu tena kudielela kuila o polomesa ia ixi kukala Palaízu, kidi muene? Mukonda o Bibidia iamba: “Diulu, diulu dia ngene dia Jihova, maji o ixi-phe, ua i bhana an’a athu.” Lembalala kuila Nzambi muéne ua bhange o polomesa íii, “Nzambi ka moneka makutu.” (Jisálamu 115:16; Tito 1:2) Kidielelu kia dikota ki tu bhana o Bibidia—kukala mu Palaízu katé ku hádia ni hádia!

^ kax. 11 Diambu didi mu Kingileji diambe kiki: Mapping Paradise.

^ kax. 15 O Alcorão, mu velusu ia 105 ia surata 21, Al-Anbiya’ [O Jipolofeta], iamba kiki: “Mu kaxi ka jiselevende Jami, oso aiuka a-nda lundula o ixi.”