O kuila tu tena kudielela kuila o ikanenu ia Nzambi ia-nda di kumbidila muene? Jezú ua xikinine kuila kidi, o ulongelu uê ua kuatekesele athu kukala ni kixikanu. Xinganeka o izuelu ia Jezú mu diskursu dia bhangele ku mulundu, iala mu divulu dia Matesu 5:18: “Mbata ngi mi tangela o kidi, katé bhua ka jimukina o diulu ni ixi, kana ngó kujimuka kapondo mba kama koso-koso kòfele ku Kitumu, katé bhua ka tenena o ima ioso.”

O kaletala kofele-fele ka dimi dia Hebalaiku a kexana י (yod), kene ue o kaletala ka dianga ka Tetragrama, mba ka dijina dia Nzambi Jihova. * O jifalizeu ni asoneki a mukua, ka bhanene ngó valolo mu izuelu mba mu jiletala ja Kitumu kia Nzambi, maji a bhanene ue valolo ku “tuijimbuete tua jiletala”.

Jezú ua kexile mu zuela kuila o diulu ni ixi i tena kujimuka, maji kama koso-koso ka Mak’â Nzambi ka di kumbidila ni kidi kioso. Maji o Mikanda Ikôla i tu tangela kuila, o diulu ni ixi ia-nda nangenena katé ku hádia ni hádia. (Jisálamu 78:69) Mu kienhiki Jezú ua kexile mu zuela kuila, kama koso-koso ka Mak’â Nzambi keji di kumbidila ni kidi kioso.

Maji o kuila Nzambi u tala ue o tuitumu tuofele tuala mu Bibidia? Xiê, u tu tala. Xinganeka ngó: Akua Izalaiele a tambuile o kitumu phala ka bukule kifuba kia kambudi, keji bhana mu Phasu. (Makatukilu 12:46) Nange tu banza kuila, kaka kexile ngó kakitumu kófele. Maji o kuila akua Izalaiele ejidile se mukonda diahi ka tokalele ku bukula né ngó kifuba kimoxi ku kambudi? Nange kana. Maji Jihova Nzambi uejidile se kiki kia kexile mu lombolola ihi. O ukexilu iú ua kexile mu lombolola kieji bhita ni Mexiia, kuila keji mu bukula kifuba, kioso kieji mu phaphela ku taka.Jisálamu 34:20; Nzuá 19:31-33, 36.

O izuelu ia Jezú i tu longa ihi? Lelu etu ue tu tena kukala ni kidielelu, kuila o ikanenu ioso ia Jihova ia-nda di kumbidila, se-ku kama ka-nda xala sé ku di kumbidila. Tu tena kudilonga ima iavulu ku kaletala kofele-fele ka Hebalaiku!

^ kax. 3 O letala iofele-fele ia dimi dia Ngeleku a ixana iota, ia difuangana ngó ni letala ia dimi dia Hebalaiku י (yod). Kuma o Kitumu kia Mozé a ki sonekene mu dimi dia Hebalaiku, nange Jezú ua kexile mu zuela ia lungu ni letala mu dimi dia Hebalaiku.