Ku bokona mu madisá

Ku bokona mu madisá

 DIAMBU DIA KAPA | IHI I LONGA O BIBIDIA IA LUNGU NI MUENHU NI KUFUA?

Ihi i Longa o Bibidia ia Lungu ni Muenhu ni Kufua

Ihi i Longa o Bibidia ia Lungu ni Muenhu ni Kufua

Kioso ki tu tanga o musoso ua lungu ni ibhangelu, o musoso u tu sanga mu Bibidia mu divulu dia Dimatekenu, tua-nda mona kuila Nzambi ua tangela o diiala dia dianga, Adá, uixi: “Ku mixi ioso mu díbhia u die-ku kioso ki ua mesena; maji ku muxi-phe ua kuijiia kiauabha ni kiaiibha kana kudia-ku; mukonda o kizuua ki ua kà dia-ku, ijiia na-kiu kuma ua kà fua muene.” (Dimatekenu 2:16,17) O izuelu iii ilondekesa kiambote kuila, se Adá ua beleselele o kitumu kia Nzambi, muene keji fua kana, ueji kalelaku ku muenhu mu jaludim ia Edene.

Maji mu veji dia kusola kubelesela phala kukala ku muenhu, Adá ua solo kubhukumukina o kitumu kia Nzambi. Muhatu uê Eva ua mu bhana o kibundu ka tokalele ku ki dia, muene ua ki tambula anga u ki dia. (Dimatekenu 3:1-6) Mukonda dia Adá kudia ku kibundu, katé kiki tua mu tala hanji hadi. Bhu kaxi ka maka enhá, poxolo Phaulu ua lombolola kiki: “Mukuâ ni kia bokona o ituxi mu ngongo ku muthu umoxi, o kufua kù kuejila mu ituxi; kiene ue kia bhiti o kufua ku thandu dia athu oso, kuma ene oso ituxi a i te.” (Loma 5:12) O “muthu umoxi” iu, Adá. Maji kituxi kiahi? Mukonda diahi o kituxi kiki ki bhekesa o kufua?

O kia bhange Adá—kubhukumukina o kitumu kia Nzambi mu vondadi iê-muene—kiexile kituxi. (1 Nzuá 3:4) Nzambi ua tangela Adá kuila o futu ia kituxi, o kufua. Se Adá ni muiji uê uoso, a belesele o kitumu kia Nzambi, ene keji ta kituxi, nuka ue eji fua. Nzambi ka bhange o athu phala  kufua kana, ua a bhange phala kukala ku muenhu katé ku hádia ni hádia.

Kidi, o kufua kua bhiti “ku thandu dia athu oso,” kala kia tange o Bibidia. Maji o kuila sai kima moxi dietu ki kala ku muenhu kioso ki tu fua? Athu avulu eji tambuijila kuila saikima kiki o nzumbi—o nzumbi ki i fu. Maji kiki kieji lombolola kuila Nzambi ua dingila Adá. Kiki ki bhita kiebhi? Mukonda se tuala ni kima kiia kididi kiengi kioso ki tu fua, o kufua-phe ki kueji kala o futu ia kituxi kala kia tange Nzambi. O Bibidia iamba: ‘Nzambi ka tena ku kala ni makutu.’ (Jihebeleu 6:18) Mu kidi, Satanaji muéne ua tange o makutu kua Eva, kuila: “Ki mua-nda kufua.”Dimatekenu 3:4.

Mu kiki nange tu dibhuidisa, se o ulongelu ua kuila o nzumbi ki i fu, ulongelu ua makutu, ihi-phe i bhita ni muthu kioso kia fua?

O I LONGA O BIBIDIA KI I BHONZO KU I TENDELA

Ia lungu ni ibhangelu, o divulu dia Dimatekenu diambe kiki: “Jihova Nzambi anga úmba muthu ni mavu ma bhoxi, anga u mu bhusila mu mazulu o mûha ua muenhu; o muthu anga u di bhanga muthu ua muenhu.” O kizuelu “muthu ua muenhu” kia tundu mu kizuelu kia Hebalaiku nefesh, kilombolola “kima ki bhuima”Dimatekenu 2:7.

Mu kiki, o Bibidia ilondekesa kiambote kuila, Nzambi ua bhana kua Adá o “mûha ua muenhu” bhenhobho Adá ua kituka muthu ua muenhu. O Bibidia ki i zuela kuila Nzambi ua bhana kua Adá kima a k’ixana nzumbi ki i fu, kana. Mukonda dia kiki, né se u tokuesa mu Jibibidia javulu, kua-nda sanga-mu kuila o “nzumbi ki i fu.”

Se o Bibidia ki i longa kuila o athu ala ni nzumbi ki i fu, mukonda diahi-phe jingeleja javulu a longa kiengi? Phala kutambuijila o kibhuidisu kiki tua tokala kuvutuka katé mu Ijitu iokulu.

 O ULONGELU UA MAKUTU U DI MUANGA

Herodotus, mukua Ngeléxia, ngijiie ia misoso ku hama ia katanu A.K.K., uambe kuila akua Ijitu éne “o athu a dianga mu ngongo kuxikina kuila o muthu uala ni nzumbi ki i fu.” Akua Babilonha a xikinine ue mu milongi íii. Mu kithangana kioso Alexandre ia Dikota kia tambula o jixi ja Oriente Médio ku muvu ua 332 A.K.K., o jingijiie akua Ngeléxia, ja muange o ulongelu uenhó, mu kubhita thembu ulongelu uenhó ua bhixila mu ididi ioso ia tokalele mu Utuminu ua Ngeléxia.

Kua-nda sanga Bibidia izuela kuila “o nzumbi ki i fu”

Mu hama ia dianga K.K., ngeleja jiiadi ja Jijudé, Jiessênios ni Jifalizeu, ja kexile mu longa kuila o mukutu uene ngó u fua, o nzumbi kana. Sai divulu (The Jewish Encyclopedia) diambe: “O Jijudé ja xikinine mu ulongelu ua kuila o nzumbi ki i fu mukonda dia Jingeleku, o Jingeleku mukonda dia ulongelu ua Platão.” Kiene kimoxi ue, o mukua Juda, Josefo, ngijiie ia misoso mu hama ia dianga, uambe kuila o ulongelu iú ki u tundu mu Mikanda Ikôla kana, maji “ulongelu ua ana a Ngeléxia.” Phala muene o ulongelu iú kifua ua tundu mu misabhu ia makutu.

Kioso o ibanzelu ia Jingeleku ki ia kexile mu di muanga kiavulu, o Jikidistá a mateka ua kuxikina mu ulongelu uenhó ua makutu. O mukua musoso ngana Jona Lendering, uambe kuila “o ulongelu ua Platão ua kuila o nzumbi ia kexile mu kididi kiambote maji kindala iai mu kididi kiaiibha, a u bundu ni ulongelu ua Jikidistá.” Mu kiki, o ulongelu ua makutu ua kuila o nzumbi ki i fu ua bokona mu ngeleja ia “Jikidistá.” Ulongelu iú ua kituka ulongelu ua dikota phala o jingeleja.

 O KIDI KI MI BHULULA’

Mu hama ia dianga, o poxolo Phaulu ua tendelesa o Jikidistá uixi: ‘O Nzumbi ia Nzambi ia ki ambe ni kujimbuluka kuoso kuma, mu jithembu ja sukidila, sai athu a ká jimbila o kuxikana. A kà kaiela jinzumbi ji sendula, ni maulongelu ma madimonho.’ (1 Timote 4:1) O izuelu iii iexile muene ia kidi! O ulongelu ua kuila o nzumbi ki i fu, ‘ulongelu ua madimonho.’ Ulongelu iú ki uala mu Bibidia kana, ua tundu mu jingeleja ja makutu j’okulu.

Phala o kusanguluka kuetu, Jezú uambe: “O kidi mua-nda ku k’ijiia, o kidi anga ki mi bhana ufôlo.” (Nzuá 8:32) Mukonda dia kuijiia o kidi kia Bibidia, a tu bhulula ku maulongelu, ni ibhangelu i xingisa Nzambi iene mu longa o jingeleja javulu ku mundu. O kidi kia Mak’â Nzambi, ki tu bhulula ue ku makutu a lungu ni kufua.—Tala o kaxa ““ Kuebhi Kuala o Athu Afu?

O Mubhangi uetu ka bhange o athu phala kukala ngó mu ixi 70 mba 80 a mivu, anga a fua phala kuia mu tunga mu kididi kiengi katé ku hádia ni hádia. Ku dimatekenu Nzambi ua mesenene kuila o athu a tunga muene mu ixi mumu ni ku mu belesela. Mu kubhanga kiki Nzambi ua londekesa o henda iê ku athu oso, sé-ku kima kia-nda mu fidisa kubhanga kiki. (Malakiia 3:6) Kiki kia bhangesa o mukua jisálamu kuzuela uixi: “Ixi-phe i xalela ku athu iá aiuka, ene a i lundula, muene mua tunga, o thembu iâ ki ibhu.”Jisálamu 37:29.