O KILUEZU: Jingana javulu ni atuameni a jingeleja a zembele kiavulu o Bibidia. Mu ithangana iavulu mukonda dia ungana uâ, akexile mu fidisa athu phala ka kale ni Bibidia, né ku i kopiiala mba ku i lungulula. Tala misoso iiadi:

  • Muvu ua 167 A.K.K. Sobha Antíoco Epífânio, ua tokalele ku utuminu ua Selêucida, ua jijidika o Jijudé kukala mu jingeleja ja Jingeleku. Muéne ua tumina kubuika o Mikanda Ikôla ioso ia Hebalaiku. O mukua musoso ngana Heinrich Graetz ua soneka kuila o makuenze a sobha “mikanda ioso ia Kitumu ia sangele akexile mu i tandula ni ku ioha. Akexile uá mu jibha uoso a mu sangele ua mu tanga o Bibidia phala kudivua kiambote.”

  • Idade Média: Saí atuameni a jingeleja ja Katolika, akexile mu zukutisa jifiiele mu ngeleja akexile mu boka o kidi kia Bibidia mu veji dia kuboka ngó o ilongesu ia ngeleja. A tokalele ngó kukala ni divulu dia Jisálamu mu dimi dia Latinu, uoso a mu kuatele ni madivulu a mukuá a Bibidia, muthu ió akexile mu mu mona kala muthu ua bhukumuka. Saí kiônge kia ngeleja kia bhanene kitumu ku akunji’ê kia “kusota izuua ioso ni kusuína kuoso ni ufiiele oso a bhukumukine . . . kusota nzo ni inzo, ni mu maxilu, oso ió akexile ni madivulu a Bibidia. . . . Jinzo joso mua sangele muthu ni madivulu akexile mu jibuika.”

Se jinguma ja tenene kubuika o Bibidia, o njimbu ia Bibidia ki ieji bhixila katé mu izuua ietu.

Bibidia ia William Tyndale ia lungulula mu dimi dia Kingileji ia nangenena sumbala ni ibhidi, túbhia, ni ufuilu ua Tyndale ku muvu ua 1536

O BIBIDIA IA NANGENENA KIEBHI? Sobha Antíoco ua soto mu Izalaiele ioso, maji o Jijudé a tungile madiembu avulu mu jixi ja mukuá. Mu kiki, o jingijiie a tokuesa ia a mono kuila ku hama ia dianga K.K. 60 a jipursentu a Jijudé ka tungile moxi ia Izalaiele. Mu malombe mâ, o Jijudé akexile ni Mikanda Ikola, o Mikanda ieji tanga o miji ieji kuíza ku pholo katé muene ni Jikidistá.Ikalakalu 15:21.

Mu kithangana kia Idade Média, o azodi a Bibidia a a zukutisa kiavulu, maji a suluka ni kulungulula ni kukopiiala o Mikanda Ikôla. Katé muene ande dia kubhanga o makina ia kukopiiala ku hama ia 15, saí jimbandu ja Bibidia ja kexile kiá mu 33 a madimi. Kioso kia moneka o jimakina, a lungulula ni kukopiiala ndumba ia Jibibidia m’ukulu ndenge.

O MBOTE: Sumbala o jisobha ni atuameni a jingeleja ka mesenene o Bibidia, lelu se-ku divulu dia muangana kiavulu ni ku di lungulula o Bibidia ndenge. O Bibidia i funhisa o itumu ia jixi javulu ni uzuelelu uâ, i lungulula ué o mienhu ia athu avulu.