Ku bokona mu madisá

Ku bokona mu madisá

 O BIBIDIA I LUNGULULA O UKEXILU UA ATHU

Ngi Bhane Ngó Muvu Umoxi Ua Kuzediua ni Kutululuka

Ngi Bhane Ngó Muvu Umoxi Ua Kuzediua ni Kutululuka
  • MUVU UA MU VUALA: 1971

  • MUKUA: FRANÇA

  • MUSOSO: UA DITELE MU USUÉIA, MU IMA IA UFUSA NI KU MAKANHA

MUSOSO UAMI:

O muiji uami ua tungile ku diembu dia Tellancourt ku ixi ia França. Tat’etu uexile mukua França, mam’etu mukua Italia. Ki nga tenesa dinake dia mivu, tuai mu tunga ku mbanza ia Loma ku ixi ia Italia. Ku tuai, o muenhu ua bhonzele kiavulu. O jitata jami exile mu dikuata kiavulu mukonda dia kitadi.

Kioso ki nga tenesa 15 kia mivu, mam’etu ua ngi suinisa ku tunda kubhata ni kubhanga makamba a ubhe. Ki nga mateka ku tunda, nga kexile mu laleka kiavulu phala kuvutuka kubhata. Ki kunange nga di te mu kizomba kia iibha. Saí kizuua kua ngi monekena diiala ni ngalasa ioso. Ua ngi bhana makanha, eme nga xikina mukonda nga mesenene kumoneka kala ngi muadikime. Nga bokona ku mundu ua makanha ni ku bhanga ima ia ufusa. Mu veji javulu a ngi te jiphanda. Phala eme, o muenhu ki u kexile dingi ni valolo; Nga mesenene kufua. Nga kexile mu divua ubheka. Ki nga bhange 16 kia mivu, nga mesenene ku dijibha, nga nu ngalafa ia muvimba ia ualende, eme nga di takula mu ngiji. Nga kumbamene mu izuua itatu.

Nga mateka ku bhana valolo ku muenhu, maji nga kexile ué mu bhanga ima ia iibha. Ng’exile mu kuehela o athu ku ngi ta jiphánda, ng’exile mu a bhana ji droga ni kunhana o ima iambote ia kexile na-iu m’onzo. Nga di te ni jibandi ja sunga, a ngi bhana kikalakalu kia kusumbisa jidroga ku ixi ia Italia. Nga kexile ni maka avulu ni a xiku dia ngoji. Muenhu uami ki u kexile kiambote, nga kexile kála ngi dilaji. Maji ng’ejidile kuila saí ni kima ki ngi bhangesa ku kala ku muenhu. Nga sambe kua Nzambi, nga mu bhingi phala ku ngi bhana ngó muvu umoxi ua kuzediua ni kutululuka.

O BIBIDIA IA LUNGULULA O UKEXILU UA MUENHU UAMI:

Kioso ki nga tenesa 24 kia mivu ngai mu tunga ku ixi ia Inglaterra. Muenhu uami ua kexile mu iluezu mukonda dia ku di ta ni jibandi ja jidroga. Ande dia ku katuka, ngai mu kunda mam’etu, nga diuana mu kumona diiala a muixana Annunziato Lugarà, uexile mu zuela ni mam’etu ia lungu ni Bibidia. *  Kuma ng’ejidile kuila, muéne uexile bandi ia sunga, nga kexile ni uôma, nga mu ibhuidisa se mukonda diahi ua kexile mu zuela ni mam’etu. Muéne ua ngi tangela kuila, ua lunguluile o ukexilu ua muenhu uê phala ku kala Mbangi ia Jihova, ua ngi bhingi phala kuzuela ni Jimbangi ja Jihova kioso ki ngeji bhixila ku Inglaterra. Eme nga xikina. Maji kioso ki nga bhixila, nga vutuka ku ufunu uami.

Saí kizuua nga sange Mbangi ia Jihova ua kexile mu bhana Mulangidi ni Despertai! mu lubhangu ku mbanza ia Londres. Mu ku lembalala o kikanenu ki nga bhangele kua Annunziato, nga mu bhingi phala ku ngi longa o Bibidia.

O ima i nga kexile mu dilonga mu Bibidia ia kexile mu ngi sangulukisa kiavulu. Mu kifika nga diuanene ni milongi iala mu divulu dia 1 Nzuá 1:9, di zuela ia lungu ni Nzambi: “Se tu fisala o ituxi ietu kua Nzmbi, muène fiiele, u kumbidila o kizuelu kiê hé u tu bhanga kioso kia fuama: U tu loloka o ituxi ietu, hé u tu [zelesa.]” O velusu íii ia ngi kuatekesa kiavulu, mukonda nga xidile kiavulu mukonda dia ukexilu uami. Nga mateka kuia mu ngeleja ia Jimbangi ja Jihova. Ene a ngi tambuijila kiambote. Kioso ki nga mono o henda ni ukamba mudiâ, nga mesenene kubhanga mbandu mu ngeleja iâ mukonda kiene ué ki nga mesenene kudivua.

Sumbala ki kia ngi bhonzele kueha o ji droga ni ufusa, kua ngi bhonzele ku lungulula o ibanzelu iami ni ifua iami. Nga divu kuila, nga tokalele kutalatala o athu ni henda ni kua a xila. Mu kidi nga mu bhânga hanji ni ifua ia iibha. Maji ni kikuatekesu kia Jihova nga mu tena ku lungulula o ifua íii. Nga dilongo o Bibidia mu mbeji jisamanu, a ngi batizala ku muvu ua 1997.

MABESÁ U NGA TAMBULA:

Kioso kia ngi batizala, nga kazala ni Barbara uexile ué Mbangi ia Jihova. Kioso kamba diami dia kazola kia mono kuila, nga lunguluile o ukexilu uami, ua mateka ué ku dilonga o Bibidia. Mu kubhita thembu muéne ni phang’ê ia muhatu, a kituka Jimbangi ja Jihova. Kuku’ami uexile kiá ni 80 a mivu, ua mateka ué kudilonga, a mu batizala ande dia kufua.

Lelu ngi kafunga mu kilunga, eme ni kazola kami, tu aboki a thembu ioso, tuene mu longa o Bibidia ku athu a tungu ku Londres a zuela Italiano. Saí ithgangana ngi luuala mukonda dia ukexilu uami uokulu, maji Barbara uene mu ngi kuatekesa kiavulu. Ngala ni muiji ua zediua, ngala ué ni Tata ia kazola i nga kexile mu sota. Eme nga bhingi ngó kua Nzambi muvu umoxi ua kuzediua, maji muéne ua mu ngi bhana ima iavulu!

Ngala ni muiji ua zediua, ngala ué ni Tata ia kazola i nga kexile mu sota

^ kax. 10 Tanga o milongi “O Bibidia i Lungulula o Ukexilu ua Athu​—Nga kexile mu kuambata o uta uami mu ididi ioso,” kala kia tange, Annunziato Lugarà, mu O Mulangidi ua 1 ua Kavua ua 2014, mu jimbandu 8-9.