Ku bokona mu madisá

Ku bokona mu madisá

 UNJIMU UOKULU PHALA O ATHU MU IZUUA IA LELU

Kana Kukala ni Hele

Kana Kukala ni Hele

KITUMU KIA BIBIDIA: “Kana kuvula hele ia muenhu uenu.”​—Matesu 6:25.

Kilombolola ihi? Jezú ua bhana o mulongi iú kioso kia kexile mu bhanga o Diskursu ku Mulundu. Saí divulu, diambe kuila mu Ngeleku o kizuelu “kukala ni hele,” kia lungu ni “kiebhi kia divua o muthu kioso ki muiza o uadiama, nzala mba ibhidi ia mukuá.” Saí bhabha, o muthu uala ni hele u thandanganha kiavulu ni ima ia-nda bhita ku hádia. Ki kima kia iibha kuthandanganha ni ibhindamu ietu ni ia akuetu. (Filipe 2:20) Maji kioso Jezú kiambe: “kana kukala ni hele,” muéne ua kexile mu tendelesa o akaiedi’ê kuila, ka tokalele kuthandanganha kiavulu ni kizuua kia mungu.​—Matesu 6:31, 34.

O kuila ki tena ku tu kuatekesa lelu? Kima kiambote kukaiela o mulongi ua Jezú. Mukonda diahi? Mukonda saí madivulu amba kuila, kioso o muthu kia thandanganha kiavulu ni ima ia muenhu, o uongo uê ki u kalakala kiambote, “u tena ku mu bhekela mauhaxi kála ua kisongo, ni uhaxi ua thulu, o muxima uê ki u kalakala kiambote.”

Jezú ua lombolola se mukonda diahi ki tu tokala kuthandanganha kiavulu: O kuthandanganha ki ku tu bhange kiambote. Jezú uebhuidisa: “Mukua’hi mudienu kia kuata hele, u tena kuta-ku dikanda ku kitala kiê?” (Matesu 6:27) O kubanza kiavulu ku mak’etu, ki ku bandekesa ku muenhu uetu. O kia mukuá, o ima ki i bhiti kála ki tua ki fikile. Saí diiala, uambe kiki: “O kuthandanganha kiavulu ni ima ia-nda bhita ku hádia, kuzanga ngó o kithangana kietu, mukonda o ima ku hádia saí bhabha ki i bhiti kála ki tua mu banza.”

Ihi i tua tokala o kubhanga phala ki tu kale ni hele iavulu? Kia dianga, tua tokala kudielela kua Nzambi. Se Nzambi u disa o jinjila ni kuuabhesa o ithulu, o kuila muéne ka-nda dikila o jiselevende jê, ja mu mu bheza ni muxima ua tenena? (Matesu 6:25, 26, 28-30) Kia kaiadi, kana kuthandanganha ni kizuua kia mungu. Jezú uambe: “Ni kizuua kia mungu, kana ku ki kuatela hele. Mukonda o kizuua kia mungu kia di kalela ni hele íê. O hadi ia lelu ia soko ni kizuua kiê.”​—Matesu 6:34.

Se tu kaiela o mulongi uambote ua Jezú, tua-nda tena kukala ni sauidi iambote. Kia beta-o-kota, o Bibidia i tu tangela kuila, tua-nda kala ni “kutululuka kua Nzambi.”​—Filipe 4:6, 7.