Kiebhi kia kexile mu bhanga o mikanda ni kiebhi kia kexile mu i jikula?

Divulu dia Estere, a di Soneka ku 18 dia Hama K.K. a di Bhange Ni Ibha Ia Iama

O divulu dia Luka di tu tangela kuila, Jezú ua jikula o divulu dia Izaia, ua di tange iu ua di jika. Ku disukilu dia divulu dia Nzuá, o poxolo Nzuá ua zuela ué ia lungu ni mikanda ni kuila ka tenene kusoneka mu mikanda, ioso ia bhangele Jezú kioso kia kexile mu ngongo.​—Luka 4:16-20; Nzuá 20:30; 21:25.

Kiebhi kia kexile mu bhanga o mikanda? Akexile mu banda o ibha ia iama mba o ibalabala ia mixi phala kubhanga o mikanda. O mikanda íii akexile mu i nhinga ku muxi, o mbandu mua kexile o isoneku ia kexile moxi. O isoneku a i sokejekele mu jimbandu-jimbandu mu mukanda. Se o mikanda ia vudile, o mikanda íii exile mu i nhinga ku mixi iiadi, ku dimatekenu ni kudisukilu, phala kukuatekesa o mutangi kujikula ni kujika o mikanda.

O divulu dia kutokuesa (The Anchor Bible Dictionary) diambe kuila “o athu a tenene kubhanga mikanda iala ni 10 dia ji metulu mu ku lebha phala kusoneka-mu o divulu dioso.” O jingijiie ene mu zuela kuila phala kusoneka o divulu dioso dia Luka, kueji bhinga mikanda iala ni 9.5 ia jimetulu mu kulebha. Saí ithangana o jimbandu ja mikanda akexile mu ji fuamesa ni tumatadi tua iuka akexile mu tu pindala.

A nanhi exile o ‘akunji a makota’a a tumbula mu Mikanda ia Ngeleku?

Ku dimatekenu dia ukunji ku Izalaiele, muthu umoxi ngó uexile ni kikalakalu kia mukunji ua dikota, muéne ua tokalele kubhanga o kikalakalu kiki katé ku ufuilu uê, kiene kiua kieji bhingana-ku mukuá. (Dialuilu 35:25) Alá muéne o muthu a diangele ku mu sola kala mukunji ua dikota. Ku pholo, o ukunji iú exile mu u bhana ué ku ana a phandekumbi a mukunji ua dikota. (Makatukilu 29:9) Athu avulu ku muiji ua Alá a kalakala kala akunji, maji a sidivila kala akunji a makota ka vudile.

Kioso akua Izalaiele kia kexile ku ubhika, o atuameni ka tokalele ku Izalaiele, akexile mu katula o athu akexile mu ukunji ni kusola athu engi kala kia mesenene. Nange o athu akexile mu a sola, a betele kota ió a tokalele ku muiji ua Alá. O kizuelu ‘akunji a makota’ kia tokala ku ilamba ia ukunji. Ku akunji a makota, kua kexile ué o atuameni a 24 kia athu a tokalele kutambula o ukunji; ni athu a tokalele ku miji ia akunji a makota ni akunji a makota a a katuile o ujitu ua ukunji kala Hana.—1 Malunda 24:1-19; Matesu 2:4; Marku 8:31; Ikalakalu 4:6.