Ku bokona mu madisá

Ku bokona mu madisá

 MILONGI YA 13

Di Zolyenu Mudyenu ni Muxima Woso

Di Zolyenu Mudyenu ni Muxima Woso

“Di zodyenu-phe mudyenu ni muxima wa fulujuka.”—1 PHE. 1:22.

MWIMBU 109 Zolenu ni Muxima Woso

I TWA-NDA DILONGA *

M’usuku wa sukina wa bhiti ni jipoxolo jê, Jezú wa zwela kyavulu yalungu ni kudizola (Tala o kaxi 1-2)

1. Kitumu kyebhi kya bhana Jezú ku maxibulu mê? (Tala o foto ya kapa.)

M’USUKU wa sukina wa Jezú ande dya kufwa, mwene wa bhana kitumu ku maxibulu mê. Mwene wa ambela: “Kala kyoso eme ki nga mi zola, enu wenu di zodyenu mu dyenu.” Mu kiki-phe, mwene wabandekesa-ku: “Kyene kya m’ijidila ku athu oso, kuma mwala mu jixibulu jami, se mwa di zolo mu dyenu.”—Nzwá 13:34, 35.

2. Mukonda dyahi kima kyambote ku dilondekesa henda mudyetu?

2 Jezú wambe kwila, oso eji tena kumona kuma ene exile maxibulu mê se akayela o kitumu kya kuzola o athu kala kya zolele mwene. O kidi kiki, kyadimonekena kuhama yadyanga, ni lelu we kidimonekena. Kima kyambote kutolola o ibhidi i tu fidisa kudilondekesa henda mudyetu!

3. Ihi i twanda dilonga mu milongi yiyi?

3 Etu tu akwa ituxi ni akwetu we akwa ituxi. Mukonda dya kiki, ku tu bhonza kulondekesa henda ifulujuka mudyetu. Maji twa tokala kubhanga nguzu phala kukayela o phangu ya Kidistu. Mu milongi yiyi twanda dilonga kyebhi o henda i tena ku tu kwatekesa kukala akwa paze, kukamba katombo ni kukala akwa kuzalela. Kyoso ki uya ni kudilonga, dibhwidise: ‘Ihi i ngi tena kudilonga ku jiphange a suluka ni kudilondekesa henda mudyawu sumbala ni ibhidi?’

KALA U MUKWA PAZE

4. Kala kilondekesa Matesu 5:23, 24, mukonda dyahi twa tokala kubhanga paze ni phange wa tu bhange kima kya tu luwalesa?

4 Jezú wa tu longo o mbote ya kubhanga paze ni phange wa  tu bhange kima kya tu luwalesa. (Tanga Matesu 5:23, 24.) Mwene wa bhitulula o itendelesu ya kwila, se twa mesena kusangulukisa Nzambi, twa bhingi kukala ni ukamba wambote ni akwetu. Jihova usanguluka kyoso ki tu bhanga nguzu phala kubhanga paze ni jiphange jetu. Mwene kanda xikina o ubhezelu wetu, se tu bhaka phonzo ni kudituna kusota kubhanga paze.—1 Nzwá 4:20.

5. Ihi ya bhonzesa phange kubhanga paze?

5 Nange ki tena ku tu bhonza kubhanga paze. Mukonda dyahi? Tala ya bhiti ni Máluku. * Mwene kadivu kyambote kyoso phange wa mu xongwena ni kuzwela ima yayibha yalungu ni mwene ku akwa mu kilunga. Máluku wadivu kyebhi? “Eme njinda ya ngi kwata,” mwene ulembalala. Máluku, ku pholo wa xinganeka, nga bhingi kubhinga o muloloki mukonda dya ima i nga bhange ku phang’yami ni kubhanga paze. Maji o phange waditunu kubhanga paze ni Máluku. Ku dimatekenu, Máluku waxinganeka, ‘Mukonda dyahi nga tokala kusuluka kusota kubhanga paze se mwene ka mesena?’ Maji, o kafunga ka ilunga wa mu swinisa phala ka bhwile. Ihi ya bhange Máluku?

6. (a) Ihi ya bhange Máluku phala kusota o kutululuka? (b) Kyebhi Máluku kya kumbidila Kolose 3:13, 14?

6 Máluku waxinganeka yalungu ni ukexilu wê, yu wamono kwila sayi kithangana mwene wexile kuxinganeka kuma mwene wa beta kota akwa ndenge. Mwene waxikina kuma, wabhingile kulungulula o ukexilu wê. (Kol. 3:8, 9, 12) Ni kulenduka kwoso, wayi dingi kwa phange kubhinga o muloloke mukonda dya ukexilu wê. Máluku katé wa sonekena mukanda kwa phange yu wa mwambela kwila wa dyela yu wamesena kubhanga paze. Máluku katé mwene wa bhana kawujitu kwa phange yu wa xinganeka kwila o phange weji ku u wabhela. Maji, o phange ka mu loloka, wa futulukile hanji ni mwene. Né kiki, Máluku wa suluka ni  kukumbidila o kitumu kya Jezú, kya kuzola ni kuloloka o jiphange jetu. (Tanga Kolose 3:13, 14.) Né mwene se akwetu ka mu mona o nguzu i tu bhanga phala kusota o kutululuka, o henda ya kidi ilondekesa o Jikidistá, yanda tu kwatekesa kuloloka ni kusambela jinga akwetu.—Mat. 18:21, 22; Nga. 6:9.

Se sayi muthu waluwala n’etu twa tokala kubhanga yoso i tu tena phala kubhanga paze ni mwene (Tala o kaxi 7-8) *

7. (a) Jezú wa tu swinisa kubhanga ihi? (b) Ibhidi yahi ya dibhana nayu phange ya muhatu?

7 Jezú wa tu swinisa kutalatala akwetu kala ki twa mesena kwila akwetu a tu talatala. Mwene wambe we kwila, ki twa tokala kuzola ngó o athu a tu zolo. (Luka 6:31-33) Ihi i wanda bhanga se muthu u kubhita sé ku ku menekena? Sumbala kiki ki kyene mu bhita kyavulu mu kilunga, phange Lara wa dibhanene ni ibhidi yiyi. Mwene wa jimbulula: “Sayi phange ya muhatu wa ngi bhiti sé ku ngi menekena. Ki ngejidile se mukonda dyahi. Kiki kya ngi luwalesa kyavulu. Ki ngexile mu sanguluka dingi mu yônge.” Ku dimatekenu, Lara wexile mu xinganeka kiki: ‘Eme ki ngala ni kikuma. Jiphange javulu mu kilunga a banza we kwila, o phange yú wala ni kifwa kyabolo.’

8. (a) Ihi ya bhange phange Lara phala kusota o paze? (b) Ihi i tu dilonga ku musoso yú?

8 Lara wa bhange kima phala kusota o kutululuka. Mwene wa sambe kwa Jihova, wayi mu zwela ni phang’ye. Ene a batula o maka, a di ndwakula, anga abhanga o paze. Maka oso a bhitilye. Phange Lara wambe: “Maji mu kubhita kithangana, o phange mwenyu wexile hanji mu ngi bhita sé ku ngi menekena. Kiki kya ngi luwalesa kyavulu.” Ku dimatekenu, Lara wa divu kwila, se o phange ka lungulwile o ukexilu we, mwene keji tena kukala ni kusanguluka. Kudisukilu, phange Lara wa tonginina kwila, wa tokalele kusuluka ni ku talatala phang’ye ni henda, wa tokalele we kumbidila o izwelu yiyi ya Bibidya: “Mwenda ni ku di loloka.” (Efe. 4:32–5:2) Phange Lara wa lembalala kwila, o henda ya Jikidistá ja kidi “ki yene kufika ima yayibha. O henda ki i zondo mu phaxi, maji i xididika mu ima yoso ni kuxikana, i dyelela mu ima yoso, i bhalakata mu ima  yoso.” (1 Kol. 13:5, 7) Phange Lara ka tandanganyele dingi mukonda dya maka ya. Mu kubhita kithangana, o phange ya muhatu wa mateka kutalatala kyambote phange Lara. Se u sota o kutululuka ni jiphange anga u a zola, utena kudyelela kwila, “o Nzambi ya henda ni paze [wanda] kala ni enu.”—2 Kol. 13:11.

KANA KUKALA NI KATOMBO

9. Kala kilondekesa Ikalakalu 10:34, 35, mukonda dyahi ki twa tokala kukala ni katombo?

9 Jihova ki mukwa katombo mba katungu. (Tanga Ikalakalu 10:34, 35.) Se tu kamba katombo twanda londekesa kwila, tu an’â a Nzambi. Etu tu bhanga yoso phala kutumaka o kijila kya kuzola o azukami etu, tu bhanga we yoso phala o mwiji wetu mu nzumbi u kale ni kutululuka.—Loma 12:9, 10; Tiya. 2:8, 9.

10-11. Kyebhi phange ya muhatu kya tolola o ixinganeku yê yayibha?

10 Kibhonza kukamba kulondekesa o katombo. Tala ya bhitile ni phange Lute. Kyoso kyexile mu kitala kya kikumbi, sayi muthu wa tokalele ixi yengi, wa bhangele kima kyayibha kinéne ku mwiji wê. Phange Lute wambe ni kidi kyoso: “Eme nga zembele o ima yoso yalungu ni ixi yóyo. Ngexile mu xinganeka kwila, o athu oso a tokala mu ixi yóyo, akwa phulu we, katé mwene o jiphange jetu.” Kyebhi Lute kya tolola o ixinganeku yiyi yayibha?

11 Lute wa xikina kwila, wa bhingile kubhanga nguzu phala kukatula o ixinganeku yiyi mu kilunji kyê. Mwene wa tange misoso yalungu ni ixi yóyo mu Anuário. Mwene wambe: “Nga bhange yoso phala kutala o athu mu ixi yóyo mu ukexilu wambote. Nga mateka kumona kwila, mbé o jiphange mu ixi yiyi azolo kyavulu Jihova. Kiki kya ngi kwatekesa kutendela kwila, ene we a tokala ku kilunga kyetu ku mundu woso.” Mu kubhita kithangana, Lute wa tonginina kwila, wa bhingile kulondekesa dingi henda. Mwene wa jimbulula: “Ithangana yoso i ngexile mu disanga ni jiphange ja ixi yóyo, ngexile mu bhanga yoso phala ku a menekena ni kisangusangu kyoso. Ngexile mu zwela nawu phala kwa ejiya dingi kyambote.” Ihi ya bhiti? Lute wambe: “Bhofele-bhofele, o ixinganeku yayibha ya bhiti.”

Se tu zola ni muxima wa fulujuka ‘o jiphange jetu joso,’ twanda bhanga yoso phala ki tu kale ni katombo (Tala o kaxi 12-13) *

12. Maka-hi a dibhana nawu phange ya muhatu?

12 Sayi athu a londekesa katombo sé ku kijiya. Mu kifika, phange Sala, wexile mu xinganeka kwila, kexile mukwa katombo mukonda kala ni kifwa kya kufundisa o athu bhu kaxi ka kikonda kyâ, kitadi mba kikalakalu kyâ mu kilunga. Maji mwene wa xikina ni kidi kyoso: “Nga tonginina kwila, ngexile ni katombo.” Mu ukexilu webhi? O mwiji wa Sala adilongo kyavulu. Kyenyiki, mwene wexile mu dilunga ngó ni athu adilongo mu xikola ya katunda. Sayi kizuwa mwene wambe kiki kwa kamba dyê: “Eme ngi dilunga ngó ni jiphange ja dilongo kyavulu. O yó a kambe kudilonga kyavulu, ki ngene mu dilunga nawu.” Sé phata, Sala wa bhingile kulungulula o ukexilu wê wa kuxinganeka. Kyebhi?

13. Ihi i tu tena kudilonga mu kumona kwila, phange Sala wa lungulula o ukexilu wê wa kuxinganeka?

13 Sayi kafunga ka ilunga wa kwatekesa Sala kulungulula o ixinganeku yê. Sala wambe: “Mwene wa ngi ximana mukonda dya kikalakalu kyami kya fiyele, itambwijilu yambote, ni kwijiya kwami kwa Mikanda Ikôla. Mu kusuluka, mwene wa jimbulula kwila, kyoso ki tuya ni kubandekesa o kwijiya kwetu, twa bhingi we kubhanga yoso phala kukala ni idifwa ya Jikidistá, kala o kulenduka, kuditolesa ni kulendukila akwetu.” Sala wa kumbidila o jindunge ja mu bhana o kafunga ka ilunga. Mwene wambe: “Nga tonginina kwila, o kima  kya beta-kota, o kubhanga o mbote ni kuzola akwetu.” Kyenyiki, mwene wa mateka kutala o jiphange mu ukexilu wengi. Mwene wa jimbulula: “Nga bhange yoso phala kumona o idifwa yambote ya bhangesa Jihova kwa zola.” Abha etu? Ki twa mesena kudivwa kwila, etu twa beta-kota, akwetu ndenge, mukonda twa dilongo kyavulu! Se tu zola ni muxima wa fulujuka ‘o jiphange jetu joso,’ twanda bhanga yoso phala ki tu kale ni katombo.—1 Phe. 2:17.

KALA U MUKWA KUZALELA

14. Kala kilondekesa Jihebelewu 13:16, kyebhi Jihova kya divwa kyoso ki tu zalela akwetu?

14 Jihova usanguluka kyoso ki tu londekesa o ukexilu wa kuzalela. (Tanga Jihebelewu 13:16.) Mwene utala o ukexilu wa kuzalela kala mbandu wa ubhezelu wetu, benge-benge kyoso ki tu kwatekesa yó abhindama. (Tiya. 1:27; 2:14-17) Kyenyiki-phe, o Bibidya i tu swinisa: “Mu zalela jinga asonyi.” (Loma 12:13) Kyoso ki tu zalela akwetu, twa mu alondekesa kwila mu kidi twa asuwu, twa azolo, twa mesena kukala makamba mâ. Jihova usanguluka se tu bhana ka kudya, mba kama phala kunuwa, ni kyoso ki tu bhita nawu kithangana. (1 Phe. 4:8-10) Maji sayi kima ki tena ku tu bhonzesa kukala akwa kuzalela.

“M’ukulu ki ngi wabhelele kuzalela akwetu, maji lelu nga lunguluka ngi tambula kisangusangu kyavulu ku mwenyu wami” (Tala o kaxi 16) *

15-16. (a) Mukonda dyahi sayi yâ adivwa kwila katena kuzalela akwa? (b) Ihi ya kwatekesa Edite kukala polondo phala kuzalela akwa?

15 Sayi ima yavulu i tena ku tu fidisa kulondekesa o ukexilu wa kuzalela. Tala o phangu ya mutudi amwixana Edite. Ande dya kukituka Mbangi ya Jihova mwene ka wabhelele kukala kumoxi ni athu. Edite wadivwile kwila akwa exile dingi ni uhete wa kuzalela ajitu, mwene ndenge.

16 Kyoso kya kituka Mbangi ya Jihova walungulula o ukexilu wa kuxinganeka. Wasoto kukala mukwa kuzalela. Mwene ulembalala: “Kyoso ki twexile mu tunga o Kididi kyetu kya Ubhezelu, sayi kafunga wa ngi tangela yalungu ni dikaza dyeji kwiza ku tu kwatekesa mu kikalakala kiki, yu wa ngi bhingi phala ku azalela mu semana jiyadi. Eme nga lembalala,  kyebhi Jihova kya besowala o mutudi wa mbanza ya Seleta.” (1 Jis. 17:12-16) Edite wa xikina kuzalela o dikaza. O kwila mwene a mu bhesowala? Mwene ujimbulula: “Semana jiyadi ja kituka mbengi jiyadi. Mu kaxi ka kithangana kiki twa bhange ukamba wambote.” Edite ene mu mu besowala we ni makamba mu kilunga. Kindala mwene muboki wa thembu yoso, usanguluka ni yó aya kubhata dyê kyoso kya kalakala kumoxi mu ukunji. Mwene wambe: “O kubhana ku ngi bhangesa kudivwa kyambote! Mu kidi eme ngi tambulula mabesá avulu.”—Jihe. 13:1, 2.

17. Ihi ya tonginina Luka ni muhat’wê?

17 Nange twene mu zalela kyá akwetu. Maji o kwila tu tena kubandekesa ku dingi? Mu kifika, Luka ni muhat’wê akwa kuzalela. Ene exile ni kifwa kya kwixana o jitata, jindandu, makamba, kafunga ka ilunga ni muhat’wê kubata dyawu. Maji, Luka wambe: “Twa tonginina kwila etu twexile mu kwixana ngó yó atu zukamene.” Kyebhi Luka ni muhat’wê kya bandekesa dingi o ukexilu wa kuzalela?

18. Kyebhi Luka ni muhat’wê kya bandekesa o ukexilu wâ wa kuzalela?

18 Luka ni muhat’wê a lungulula o ixinganeku bhu kaxi ka izwelu ya Jezú: “Abha se mu zola ngó a mi zolo enu, mu kala ni kisakidilu kyahi?” (Mat. 5:45-47) Ene atonginina kwila abhingile kukayela o phangu ya Jihova o mukwa kuzalela athu oso. Kyenyiki-phe ene asolo kwixana o jiphange kexile kwa exana kudimatekenu. Luka wambe: “Kindala etwenyoso tu sanguluka kyoso ki tu kala kumoxi. Etwenyoso tu swina dingi anga tu kolesa o ukamba wetu ni Jihova.”

19. (a) Kyebhi ki tu londekesa kwila, tu maxibulu a Jezú? (b) Ihi i twa mesena kubhanga?

19 Twa dilongo kyebhi o kudizola ni muxima wafulujuka kutena ku tu kwatekesa kusota o ku tululuka, kukamba kulondekesa katombo ni kuzalela akwetu. Twa tokala kutolola o ixinganeku yayibha ni kuzola o jiphange jetu ni muxima wa fulujuka. Se tu bhanga kiki, twanda sanguluka, twanda londekesa ni kidi kyoso kwila tu maxibulu a Jezú.—Nzwá 13:17, 35.

MWIMBU 88 Ngi Longe Jinjila Jé

^ kax. 5 Jezú wambe kwila o henda yene o kidimbu kya Jikidistá ja kidi. O henda yetu ku jiphange i tu bhangesa kukala athu akwa paze, kukamba katombo ni akwa kuzalela. Nange kiki ki tena kubhonza. Mu milongi yiyi twanda dilonga kyebhi ki tu tena kusuluka mu kudizola mudyetu ni muxima wa fulujuka.

^ kax. 5 Sayi majina o lungulule.

^ kax. 57 KILOMBOLWELU KYA FOTO: O phange ya muhatu usota kubhanga paze mu veji yadyanga maji ka muxikina. Né kiki mwene ka bhwila. Kuma mwene wa suluka ni kulondekesa henda, kudisukilu abhange paze.

^ kax. 59 KILOMBOLWELU KYA FOTO: Phange wa kuka wa mu divwa kwila o jiphange mu kilunga ka mu mu suwa.

^ kax. 61 KILOMBOLWELU KYA FOTO: Phange ku dimatekenu wexile ni hele ya kuzalela akwâ, walungulula o ixinganeku yê, kiki kya mu bhekela kisangusangu.