Kala ki tua ki mono, ki bhonza kusanga ujitu u sangulukisa o muthu. Mbe, o ua tambula o ujitu muéne u mona se o ujitu uala ni valolo mba kana. O athu ka difuangana, mu kiki, ujitu umoxi u tena kukala ni valolo ku muthu iú maji phala mukuâ kana.

Mu kifika, o munzangala u tena kumona kuila o ujitu ua mutelembe, uéne o ujitu ua beta o kota. Maji o muadikime, nange u sanguluka kiavulu mu kutambula kima kia tokala ku muiji. Mu jixi javulu, kota kubhana kitadi ku munzangala mba ku muadikime, éne ejiia kioso kia-nda sumba ni kitadi kieniokio.

Né muene kia bhonzo kiavulu, athu avulu a suluka mu kusota ujitu uambote phala ku u bhana ku muthu ua kazola. Né muene ki bhonza kusanga ujitu uambote, sai ima i tua tokala kuijiia i tena ku tu kuatekesa kusanga o ujitu uambote. Tua-nda mona ima iuana i tena ku tu kuatekesa kubhana ujitu u sangulukisa o muthu.

O jivondadi ja muthu ua-nda tambula o ujitu. Sai diiala mu mbanza ia Belfast, Irlândia, uambe kuila o bixi ia tambuile kioso kia kexile ni 10 mba 11 dia muvu, iexile o ujitu ua betele kota phala muene. Mukonda diahi? Muene uambe: “Mukonda eme nga mesenene kiavulu kukala ni bixi.” O musoso iú ulondekesa kuila o vondadi ia muthu, iene ilondekesa se muene ua-nda uabhela kiavulu o ujitu mba kana. Mu kiki, sota kuijiia o muthu u ua mesena ku mu bhana o ujitu. Sota kuijiia o ukexilu ua muene, mukonda o ukexilu ua muthu u funhisa o ima ia uabhela muene. Mu kifika, mu ithangana iavulu o jikuku ji uabhela kiavulu kukala kumoxi ni jindandu jâ. Ene a sanguluka kiavulu kukala kumoxi ni ana ni alaul’â mu ithangana iavulu. O jikuku jeji sanguluka dingi kiavulu, se o muiji a xinganeka kuenda nau njila mu veji dia kua bhana kama koso-koso.

Phala ku tu kuatekesa kuijiia o jivondadi ja muthu, ó kua evua kiambote kioso kia kala mu zuela. O Bibidia iamba: “Muthu ni muthu-phe a lenguluke kuivua, maji a kokoloke kuzuela.” (Tiiaku 1:19) Kioso ki ua-ndaia ni kudizuelesa ni makamba mê mba jindandu, sota kua evua kiambote n’uijiie o ima ia uabhela ni ima ia zembe ene. Mu kubhanga kiki, ua-nda tena kua bhana ujitu uambote phala ene.

O ibhindamu ia muthu ua-nda tambula o ujitu. O muthu u tena kusakidila kiavulu o ujitu ua tambula né muene se uofele mba ki u te kalu  iavulu, se o ujitu uenhu u mu kuatekesa ku ibhidi. Maji kiebhi ki ua-nda tena kuijiia o ima ia bhindamena o muthu?

O kuibhula o muthu se ihi ia bhindamena, ku tu kuatekesa kuijiia kia mesena o muthu. Maji athu avulu a mona kuila o kuibhula o muthu, kusosolola o kusanguluka kuijila mu kubhana, mukonda ene a mesena kubhana ujitu uambote sé o muthu ku kijiia. Sumbala kuene athu avulu a uabhela kuzuela o ima ia uabhela ni ima ia zembe, maji ka xikina kuzuela o ima ia bhindamena.

Mu kiki, tonginina kiambote ni kuijiia ia mu bhita ni muthu. Muene muzangala, muadiakime, dikudi, dikaza, a mu senge, mutudi, ua mu kalakala, mba ka mu kalakala dingi? Katula kithangana phala kuxinganeka se maujitu ebhi a-nda kuatekesa o ibhindamu ia muthu iú.

Mu kiki phala kuijiia kiambote o ibhindamu ia muthu tua mesena ku mu bhana ujitu, sota kuzuela ni uoso ua bhiti ue mu ibhidi kala muene. Ene a-nda tena ku ku tangela ibhindamu, ia bhonzo ku ijiia sé ku ku tangela-iu. Ni kikuatekesu kiki, ua-nda tena kubhana ujitu ua tokala u kuatekesa o muthu mu ibhindamu iê.

O kithangana. O Bibidia iamba: “O kizuelu kiene mu touala bhu thembu iê!” (Jisabhu 15:23) O izuelu íii ilondekesa kuila o kithangana ki tu zuela, kiala ni valolo ia dikota. Kiene ue ki bhita ni ibhangelu ietu. O izuelu i tu zuela mu kithangana kia tokala, i tena kusangulukisa uoso ua mu tuivua, kiene kimoxi ue, o ujitu u tu bhana mu kithangana kia tokala, u tena ue kusangulukisa kiavulu ió tua mu mu bhana o ujitu.

Kamba dietu ua-nda kazala. Munzangala kua kambe ngó ua-nda zubha kiá o xikola. Dikaza kua kambe ngó bhofele a-nda kala ni mona. Athu a uabhela kubhana maujitu mu ithangana kala íii. Sai athu a mona kuila kima kiambote kusoneka o ithangana íii ia katunda ia-nda kuiza ku muvu uiza-mu. Mu kubhanga kiki, ene a tena kuxinganeka kiambote o ujitu ua tokala kubhana mu ithangana íii. *

Mu kidi, eie ku bhingi kukingila o ithangana ia katunda phala kubhana ujitu ku muthu. O kusanguluka kuijila mu kubhana, tu tena ku kuívua mu kithangana kioso-kioso. Maji tua tokala kudilanga. Mu kifika, se diiala u bhana ujitu ku muhatu mu kithangana kioso-kioso, o muhatu u tena kufika kuila a mu bhana o ujitu mukonda o diiala ua mu zolo, iu ua mesena ku muijiia kiambote. Se o diiala u bhana o ujitu ni ixinganeku iaiibha, o ujitu iú u tena kubhekesa maka. Kiki kilondekesa o valolo ia kuijiia se mukonda diahi eie ua mesena kubhana ujitu ku muthu.

Mukonda diahi ua mesena kubhana ujitu. Kala ki tua tange kiá kudima, kima kiambote kuxinganeka se o muthu ua-nda tambula o ujitu, ua-nda banza kia iibha ia lungu ni ió ua mu bhana o ujitu. Mu kiki, o muthu ua mesena kubhana ujitu, kima kiambote se u dianga hanji kuditonginina se mukonda diahi muene ua mesena kubhana o ujitu uenhú. Sumbala athu avulu a mesena kuxinganeka kuila a mu bhana ujitu phala kujingisa o muthu, maji sai ue athu avulu a bhana ngó ujitu mukonda a divua kala a mua jijidika kubhanga kiki. A kamukuá a bhana ujitu mukonda a kingila kua xila mba kua bhana ua kama koso-koso.

Ihi i ua tokala o kubhanga phala kuijiia se ua mu bhana ni muxima ua zele mba kana? O Bibidia iamba: “Ioso i mu bhanga, mu i bhanga ni henda.” (1 Kolindo 16:14) Eie se ua mu bhana ujitu mukonda ua zolo o athu, xala mu kuijiia kuila o athu a-nda sanguluka kiavulu mu kutambula o ujitu, eie ue ua-nda sanguluka kiavulu mu kuijiia kuila u mukua kubhana. Kioso ki u bhana ni muxima uoso,  eie u sangulukisa ue o muxima ua Tata ietu ia diulu. O poxolo Phaulu ua ximana kiavulu o Jikidistá m’ukulu mu mbanza ia Kolindo mukonda a kuatekesele ni kusanguluka kuoso o jiphange jâ mu Judeia, a bhindamene kiavulu. Phaulu ua a tangela: “Nzambi ua zola mukua kubhana ni ngalasa ioso.”—2 Kolindo 9:7.

O kukaiela o ima i tua dilongo bhabha, ku tena ku tu kuatekesa kubhana maujitu a sangulukisa akuetu. O ima íii​—ni ia mukua dingi​—iene ia bhangesa kuila Nzambi u bhana ku athu o ujitu ua beta dingi kota. Mu kiki, suluka mu kutanga o mbandu ia kaiela phala u mone se uebhi o ujitu ua beta dingi kota ua tu bhana Nzambi.

^ kax. 13 Athu avulu ene mu bhana ue maujitu mu kizuua kia fesa ia uvualelu ni mu jifesa ja mukua ja mundu. Maji mu jifesa jiji ene mu bhanga-mu ima iamba o Bibidia kuila ka tokala ku i bhanga. Tanga mu kadivulu kaka o maka “Atangi a Madivulu Metu Ebhula​—O Kuila o fesa ia Natale ia tokala ku Jikidistá?