Ku bokona mu madisá

Ku bokona mu madisá

 ATANGI A MADIVULU METU EBHULA . . .

O Kuila o Fesa ia Natale ia Tokala ku Jikidistá?

O Kuila o Fesa ia Natale ia Tokala ku Jikidistá?

Jimidi ni jimidi ja athu ku mundu a xikina kuila o Natale, kifua fesa phala kulembalala o O Kuila o Fesa ia Natale ia Tokala ku Jikidistá ua Jezú Kristu. Maji ua dibhuidisile kiá se o Jikidistá ja dianga, o makamba a Jezú, akexile ua mu bhanga o fesa ia Natale? Eie uejiia ihi i longa o Bibidia ia lungu ni kubhanga fesa ia uvualelu? O kusanga o itambuijilu ia ibhuidisu íii, kua-nda tu kuatekesa kuijiia se o fesa ia Natale ia tokala ku Jikidistá mba kana.

Kia dianga, se-ku mbandu mu Bibidia ilondekesa kuila a bhangele fesa phala kulembalala o uvualelu ua Jezú mba ua mubhezi ua mukua ua fiiele ua Nzambi. O Mikanda Ikola i zuela ngó athu kiiadi a bhange fesa phala kulembalala o uvualelu uâ. Kiiadi kiâ, kexile abhezi a Jihova, o Nzambi uávu o Bibidia. O mu kithangana kia bhangele o fesa ia uvualelu uâ, kua bhitile ima iaiibha. (Dimatekenu 40:20; Marku 6:21) O divulu Encyclopædia Britannica, diamba kuila o Jikidistá ja dianga ja kexile mu dituna “o ifua ia jipagá ia kubhanga jifesa ja kulembalala o uvualelu ua muthu.”

Kizuua kiahi kia vuala Jezú?

O Bibidia ki i zuela ni kidi kioso o kizuua kia vuala Jezú. O divulu dia ngana McClintock ni ngana Strong diamba kuila “mu Kikutu Kiobhe mba mu divulu dioso-dioso ki kuala mbandu i tanga o kizuua kia vuala Jezú.” Mu kidi, se Jezú ua mesenene kuila o maxibulu mê a bhanga fesa mu kizuua kia mu vuala, muene ueji bhanga ioso phala o maxibulu mê ejiie o kizuua kia uvualelu uê.

Kia kaiadi, o Bibidia ki i longo kuila Jezú mba dixibulu diê ua bhangele o fesa ia Natale. O divulu New Catholic Encyclopedia, diambe kuila o kubhanga o fesa ia Natale a i tange mu veji ia dianga mu “Crónofrafo ia Filocalus, divulu dia Loma, a di soneka ku muvu ua 336 [K.K.].” Sé phata, kiokio kia bhiti kioso kia zubha kusoneka o Bibidia, kua bhitile ue kiá mivu iavulu tundé Jezú kia kexile mu ixi. Mu kiki, o ngana McClintock ni Strong, a mono kuila o “fesa ia Natale ki i tokala kua Nzambi kana, ki i tundu ue mu Kikutu Kiobhe.” *

Fesa iahi ia tumu Jezú o maxibulu mê kubhanga?

Kuma Jezú Mesene ia Dikota, muene hinu ua lombolola kiambote se ihi ia tokalele kubhanga o akaiedi’ê, o ia zuela muene hinu iala mu Bibidia. Maji muene ki kiene kia bhange. Mu kifika o mesene ia xikola ka mesena kuila o maxibulu mê a bhanga kima kia kambe ku a tangela, kiene kimoxi ue ni Jezú, muene ka mesena kuila o maxibulu mê ‘a somboka ima ioso iòsoneke’ mu Mikanda Ikola.​—1 Kolindo 4:6.

Maji kuala fesa ia beta kota, o Jikidistá ja dianga a ijidile kiambote​—o fesa ia Kulembalala o kufua kua Jezú. Jezú ua tangela o maxibulu mê o kizuua kia tokalele kubhanga o fesa íii, iu ua tangela ue se kiebhi kia tokalele o ku i bhanga. O itendelesu íii ni kizuua kiafu muene, kiosoneke mu Bibidia.​—Luka 22:19; 1 Kolindo 11:25.

Kala ki tua mono, o Natale fesa ia kulembalala o uvualelu ua muthu tua mono ue kuila o Jikidistá ja dianga ka kexile mu kaiela o ifua ia jipagá. O Bibidia ki i longo kuila Jezú mba dixibulu diê ua bhangele o fesa ia Natale, kana. Mukonda dia kiki, jimidi ni jimidi ja Jikidistá ku mundu uoso a suku mu kuzuela kuila o Natale ki i tokala ku Jikidistá.

^ kax. 6 Phala kuijiia dingi kuebhi kua tundu o ifua ia lungu ni fesa ia Natale, tanga o maka “Atangi a Madivulu Metu Ebhula . . . Kiebhi o Kidi Kia Lungu ni Natale?” mu Mulangidi ua 1 ua Kaiadi ka 2014, uala ue mu www.jw.org.