Ku bokona mu madisá

Ku bokona mu madisá

 KAIELA O KIXIKANU KIÂ | SALA

Nzambi ua Muixana “Mon’â Sobha”

Nzambi ua Muixana “Mon’â Sobha”

SALA uemana bhofele phala kunhoha, anga u kala mu tala o díbhia. Muene ua tale kuila jiselevende jê joso ja mu kalakala ni kusanguluka kuoso. Maji Sala ka kexile ngó mu tala o akalakadi kana, ua kexile ue mu kalakala. Xinganeka Sala kuxuna o maku mê phala kusosolola o jindolo. Muene nange ua kexile mu tunga o makoza a inzo iâ mba a balaka. O balaka a i tungile ni ibha ia jihombo, kuma akexile mu nhunga kiavulu ola kuku ola koko, o jikolo ja balaka ja kexile kiá mu jila. O dikumbi dia bobele kiá mu kalunga. Sala ua muene Mbalahamu * mu kamene ka mbundu kioso kiai mu kalakala, kindala ua kexile mu mu kingila ni hanji ioso. Kioso Sala kia mono muadi uê iu bhixila, muene ua sangulukile kiavulu.

Kua bhitile kiá dikuinhi dia mivu tundé Mbalahamu ni muiji uê kia zaukile o Ngiji ia Ufalate mu kuia mu ixi ia Kanana. Sala ua kuatekesele kiambote muadi uê mu njila ienii ia lebhele, né muene sé ku i ijiia. Muene ua bhangele kiki mukonda muene uejiidile kiambote kuila Mbalahamu ua kexile ni kikalakalu kia dikota mu kukumbidila o vondadi ia Jihova ia kuvuala o mbutu ni kifuxi kia athu kia kexile ni valolo ia dikota. Maji kikalakalu kiahi kia kexile na-kiu Sala? Muene ua kexile mbaku, ua kexile kiá ni 75 a mivu. Muene hinu ua xinganeka kiki, ‘Kiebhi Jihova kia-nda tena kukumbidila o polomesa ia bhange kua Mbalahamu, se eme ngala ngi mbaku?’ Mu kiki, tu tena kuijiia se mukonda diahi muene ua tandanganhele kiavulu.

Sai ithangana, tu kala ue mu dibhuidisa thembu kuxi Jihova kia-nda kumbidila o polomesa ia tu bhange. Sai bhabha o kukinga kubhonza kiavulu benge-benge se tua mesena kiavulu o kima. Mu kiki, ihi i tu tena kudilonga ku musoso ua Sala ua lungu ni kixikanu?

“JIHOVA UA NGI FUDISA”

Mbalahamu ni muiji uê kindala kia tundile mu Ijitu. (Dimatekenu 13:1-4) Ene a tungile ku milundu ia Betele. Akua Kanana a i xanene Mukengeji. Tundé bhobho, Sala ua tenene kumona o Ixi ia Polomesa. Ua tenene ue kumona o madiembu a akua Kanana ni ikoka mua kexile mu bhita o athu. Maji o madiembu enhó k’a difuile ni mbanza mua vualele Sala. Muene a mu vualele mu mbanza ia Ule, mu ixi ia Mezopotamiia, phala kubhixila-mu kua bhingile kuenda 1.900 km. Mu mbanza ia Ule Sala ua kexile ni muenhu uambote, mua kexile itanda ni maloja. O jindandu jê muene ue mua tungile. O jinzo ki j’exile ji balaka kana, a ji tungile muene ni jindobi, o menha akexile mu kuijila mu mihumba! Maji se ua mu fika kuila Sala ua luualele iu ua kexile mu xinganeka kiavulu mu jimbote ja kexile na-ju m’ukulu, kiki kilondekesa kuila eie kuijiie kiambote o muhatu iú ua kixikanu.

Tala ia soneka poxolo Phaulu ia lungu ni Mbalahamu ni Sala, 2.000 ja mivu kudima. Mu kuzuela ia lungu ni kixikanu kia Sala ni Mbalahamu, muene ua soneka: ‘Se a xinganekene ku ixi ioio kua tundile kiá, ene hinu a mono kithangana kia kuvutukila-ku.’ (Jihebeleu 11:8, 11, 15) Maji né Mbalahamu né Sala ka kexile mu xinganeka mu ima ia kexile na-iu m’ukulu.  Se a ki bhangele, ene hinu a vutukile ku mbanza ia Ule. Maji se a vutukile, ene keji tena kumona o kikumbidilu kia polomesa kia a bhangele Jihova. O kia mukuá, athu keji kua ejiia, keji bhana phangu iambote iene mu kaiela jimidi ni jimidi ja athu.

Sala ka kexile mu xinganeka ku ima ia kexile na-iu m’ukulu, muene ua kexile mu xinganeka ku ima ieji tambula kupholo. Mu kiki, mu kuia mu ixi ia Kanana, muene ua sulukile mu kukuatekesa muadi uê mu kutunga ni kusokomona o balaka ni kuambata o ibhaku. Muene ua bhiti mu ibhidi iavulu. Jihova ua lembalala o polomesa ia bhangele kua Mbalahamu—maji muene ka tumbula o dijina dia Sala!​—Dimatekenu 13:14-17; 15:5-7.

Sala ua bhiti thembu iavulu mu kuxinganeka ku muenhu uê. Muene ua mono kuila kiexile kiá kithangana phala kutangela Mbalahamu o ima ia kexile mu xinganeka. Xinganeka Sala ua thandanganha mu kutangela Mbalahamu: “Ua mono-ze, Jihova ua ngi fudisa o kuvuala.” Bhenhobho muene ua bhingi kua Mbalahamu phala kuvuala mona ni kahatu kê Hangale. U tena kuxinganeka o ndolo iévu Sala mu kubhinga o kima kiki? Mu izuua ia lelu, kubhonza o muhatu kubhinga kua muadi ue kubhanga kiki. Maji m’ukulu o diiala ua tenene kuvuala ana ni ahatu engi phala kukala ni mona u lundula o ungana uê. * Sala nange ua banzele kuila Jihova ueji kumbidila o polomesa ia bhangele kua Mbalahamu mu kaxi ka mon’â Hangale. Kiki kia bhonzele kiavulu, maji Sala ua mesenene kubhanga kima kioso-kioso phala kukumbidila o polomesa ia Jihova. Kiebhi kia divuile Mbalahamu? O Bibidia iamba kuila Mbalahamu ‘uevu o dízui dia Sala.’​—Dimatekenu 16:1-3.

Maji o kuila Jihova muéne ua te o kibanzelu kiki ku muxima ua Sala? Kana. Mu kidi, Sala ua fikile kuila Jihova ua mu fidisile kuvuala ana. Mu kiki muene ua xinganeka kubhanga kima. Sala ka tenene kuxinganeka dingi phangu iengi phala kubatula o maka enhá. Maji o ima ia xinganeka o kubhanga, ieji mu bhekesa malamba avulu. Maji né kiki, o ima ia bhange Sala ilondekesa kuila muene kexile mukua luímbi. Ku mundu iú ku tuala, o athu a di banza ngó ene, mu kiki Sala ua tu xila phangu iambote. Se tu ta kupholo o vondadi ia Nzambi, tua-nda londekesa kuila tua mu kaiela o phangu ia kixikanu kia Sala.

“EIE UOLELA MUENE”

Mu kubhita thembu Hangale a muimitisa kuala Mbalahamu. Nange mukonda dia kiki, Hangale ua mateka kudizangeleka, ka kexile dingi mu xila ngana iê Sala. Mu kiki, Sala ua luualele kiavulu! Sala ua zuela ni Mbalahamu ioso ia kexile mu bhita. Mbalahamu ni Nzambi a muehelela kutatesa Hangale. Mu kubhita thembu Hangale ua vuala mona, ua mu luku o dijina dia Ijimaiele. (Dimatekenu 16:4-9, 16) Mu kubhita thembu iavulu, kioso Sala kia kexile kiá ni 89 a  mivu, o muadi uê Mbalahamu ua kexile ni 99, Jihova ua a tangela njimbu ia dikota.

Lua mukuá dingi, Jihova uambe kuila o mbutu ia kamba diê, Mbalahamu ieji divualula. Nzambi ua mu lungulula ue o dijina. Keji muixana dingi Mbalamu, maji eji muixana kiá Mbalahamu, dilombolola “Tata ia Ndumba dia Ifuxi.” Mu kiki, mu veji ia dianga Jihova ua tange o kikalakalu kia Sala mu kukumbidila o polomesa íii. Jihova ua mu lungulula ue o dijina, keji muixana dingi Salai, nange dilombolola “ka jinvunda,” ua mu luku o dijina di tua beta kuijiia lelu, Sala. Maji o dijina Sala dilombolola ihi? Dilombolola “Mon’â Sobha”! Jihova ua tangela Mbalahamu se mukonda diahi ua lukile o dijina didi kua muhatu’ê, Jihova uambe: “Mukonda eme nga-nda ku mu zediuisa, ngi mu bhana dibhesá; nga-nda ku ku bhela kua muene, mona u tunda momu’é; ngi mu bhana dibesá, u kala kivuadi ki bhanga miji; jisobha muene ji tumina ifuxi hinu ji tunda ku mukutu uê.”—Dimatekenu 17:5, 15, 16.

Jihova ua bhangele o polomesa ia kuila o mbutu ia Mbalahamu ieji besoala o ifuxi ioso mu ngongo. Nzambi ueji kumbidila o polomesa íii mu kaxi ka mon’â Sala! O dijina dia solo Nzambi phala kuluka o mona, diexile Izake, dilombolola “Jingolela.” Kioso Mbalahamu kia mu tangela mu veji ia dianga o vondadi ia Jihova ia kubhana mona kua Sala, Mbalahamu ‘ua bhetamene bhoxi, uolelele.’ (Dimatekenu 17:17) Mbalahamu ua diuanene kiavulu ni kusanguluka kuoso. (Loma 4:19, 20) Maji kiebhi kia divuile Sala?

Ki kubhitile thembu iavulu, kitatu kia mala endele mu kunda Mbalahamu. Kuma kua temene kiavulu. Mbalahamu ni Sala a kukile kiá maji né muene kiki a bhange lusolo phala kuzalela o ajitu enhó. Mbalahamu ua tangela Sala, uixi: “Katula izongelu itatu ia fuba ia fina u i toxe kindala, u bhange jimbolo u jiohe mu uthôkua ua tema.” M’ukulu kua bhingile kukalakala kiavulu phala kuzalela ajitu. Maji Mbalahamu kehela o fisu ioso phala Sala ku i bhanga ubheka kana; muene uai ni lusolo luoso mu kujibha kangombe ni kusokejeka ima ia mukuá. (Dimatekenu 18:1-8) Mu kubhita ithangana, ene eza mu kuijiia kuila o “mala” enhó exile mbé jianju! Nange poxolo Phaulu ua xinganekene o musoso iú kioso kia soneka kuila: ‘Kana kufula kutambulula asonhi mu mabhata menu. Kuma amoxi mu ku ki bhanga, a langeka jianju sé ku k’ijiia.’ (Jihebeleu 13:2) U tena kukaiela o phangu iambote ia tu xila Mbalahamu ni Sala ia lungu ni kuzalela ajitu?

Sala ua zolele kulondekesa o ukexilu ua kuzalela

Kioso o anju imoxi kia lembalesa o polomesa ia Nzambi kua Mbalahamu ia kuila Sala ueji vuala mona, Sala ua kexile m’oxi dia balaka, maji ua kexile mu kuívu ioso ia kexile mu zuela. O kibanzelu kia kuila muene ueji vuala mona, mu kitala kia 90 a mivu kia mu bhangesa kuolela, muene ua zuela uixi: “Kifua ki nga kuk’iki kiene kiua ki ngi kala ni kusanguluka kua kukala ni mona, muadi uami ue nga soko’ê-nê kiá mu kukuka?” O anju iebhuidisa Sala: “Kifua Jihova sai kima ki mu bhonza ku ki bhanga?” Sala ua divu kala ki divua muthu uoso-uoso. Ni uôma uoso muene uambe: “Ki ng’olela!” O anju ia muambela uixi: “Kana ki kiene; eie uolela muene.”​—Dimatekenu 18:9-15.

O kuila Sala uolelele mukonda muene ka kexile ni kixikanu? Kana ngana. O Bibidia iamba: “Kiejila mu kuxikana, kuila Mbalahamu u kala tata, sumbala ua kexile kiá kikulakaji, o Sala ue muene, thembu ia kuvuala ia mu bhiti kiá. Muène-phe ua xikanene kuila Nzambi uanda kukumbidila polomesa iê.” (Jihebeleu 11:11) Sala uijidile kiambote Jihova; Muene uejidile kuila Nzambi ueji kumbidila o jipolomesa joso ja bhangele. O kuila ki tua tokala kukala ni kixikanu kala kia Sala? Tua tokala kuijiia kiambote o Nzambi ua bhange o Bibidia. Se tu bhanga kiki tua-nda mona kuila Sala ua lungiliê, mu kukala ni kixikanu kua Nzambi. Jihova muthu ua fiiele, muene u kumbidila o ikanenu ioso ia bhanga—sai bhabha muene u bhanga kiki mu ukexilu ki tu u fikile, kiki ki tu bhangesa koelela se kuijiia kiebhi muene kia bhange o ima!

“IOSO IALA KU KUAMBELA SALA XIKANA-IU”

Jihova ua besoala Sala mukonda dia kixikanu kiê

Mu kitala kia 90 a mivu, Sala ua sangulukile ni kima kia kexile mu kingila mu thembu iavulu. Muene ua vualele mona ni muadi uê ua kexile kia ni hâma ia muvu! Mbalahamu ua luku o mona o dijina dia Izake, dilombolola “Kuolela,” kala kia zuelele Nzambi. U tena kuxinganeka Sala ua bhuila, maji ni kusanguluka kuavulu, kioso kiambe: “Nzambi ua ngi bhekela jingolela;  oso ue a-nda ku k’ivua a-nda kuolela kumoxi n’eme.” (Dimatekenu 21:6) O madiuanu ia a bhangele Jihova a bhakela kua Sala kusanguluka ku muenhu ue uoso. Mu kiki o kusasa o mona kua mu bhekela kikalakalu kia dikota.

Kioso Izake kia mu sumuna mu kitala kia kitanu kia mivu, o muiji ua bhangele fesa. Maji ima ioso ki ia kexile kiambote. O Bibidia iamba kuila Sala “anga u mona” kuila Ijimaiele ua kexile ni ukexilu uaiibha. Ijimaiele ua kexile kiá ni 19 dia mivu, muene ua kexile mu zukutisa o kamona Izake. Muene ka kexile ngó mu tonoka kana. O poxolo Phaulu ua soneka kuila, o Ijimaiele ua kexile mu zukutisa Izake. Sala ua muene kuila o ukexilu ua Ijimaiele kiexile kiluezu kia dikota phala mon’ê. Sala uejidile kuila Izake kexile mona uoso-uoso kana. Maji muene ueji bhanga mbandu ku kikanenu kia bhangele Jihova. Sé uôma ua tangela Mbalahamu o maka oso akexile mu bhita. Muene ua bhingi phala kukaia Hangale ni mon’ê Ijimaiele kubhata diâ.​—Dimatekenu 21:8-10; Ngalásia 4:22, 23, 29.

Kiebhi Mbalahamu kia tambuijila? O Bibidia iamba: “Mbalahamu anga ki mu ibhila kiavulu kienhiki.” Muene ua zolele kiavulu Ijimaiele, mu kiki kieji mu bhonza kukaia mon’ê. Maji Jihova uejiidile kiambote o maka oso, mu kiki muene uambe ihi ia tokalele kubhanga. O Bibidia iamba: “Nzambi anga uambela Mbalahamu, uixi: Ki ki ku iibhile, mukonda dia kaiala ni mukam’é, ioso iala ku ku ambela Sala, xikana-iu; mukonda o mbutu ijila kua Izake iene iexana kuma mbutu iê.” Jihova ua tangela Mbalahamu kuila muene ueji langa Hangale ni Ijimaiele. Ni kixikanu kioso Mbalahamu ua belesela.​—Dimatekenu 21:11-14.

Sala uexile muhatu uambote phala Mbalahamu, uexile mu kuatekexi ua dikota phala muene. Muene ka kexile mu zuela ngó o ima ia zolele Mbalahamu. Kioso muene kia kexile mu mona kuila sai kima ki tena kubheka maka ku muiji, muene ua kexile mu zuela o kidi kioso kua Mbalahamu. Ki tua tokala kumona o ukexilu ua londekesa Sala kala, ka kexile mu xila muadi uê. O poxolo Phetele uexile dikaza, uambe kuila Sala uexile muhatu ua kilunji, ua kexile mu xila muadi uê. (1 Kolindo 9:5; 1 Phetele 3:5, 6) Mu kidi, sé Sala ua dixibhile ka kuatekesele muadi uê, kiki kieji londekesa kuila muene kexile muhatu ua kilunji. Muiji uoso ueji bhita mu ibhidi iavulu sé Sala ka bhangele kima. Sala muhatu uejidile kuzuela ni unjimu, o ima ia tokalele o kuzuela.

Ahatu avulu lelu ene mu kaiela ue o phangu ia Sala. Ene mu londekesa o kuxila ku anumi’â. Ene nange a banza kuila, Jihova ua tokala kua tangela o ima ia tokala o kubhanga, kala kia bhangele ni muiji ua Sala. Né muene jihova kene mu bhanga kiki lelu, tu tena kudilonga ia lungu ni kixikanu, henda ni muanhu ua Sala.

Sala uexile muhatu a mu zolele kiavulu, o dijina dia mu bhanene kua Jihova dilombolola “Mon’â Sobha”. Maji muene ka kexile mu kingila kuila a mu talatala mu ukexilu ua katunda. Maji Mbalahamu ua zolele kiavulu Sala. Kioso muene kiafu mu kitala kia 127 a mivu, “Mbalahamu anga uiza kudila thambi ia Sala.” * (Dimatekenu 23:1, 2) Muene ua tale hadi iavulu kioso “Kazola” kê kiafu. Sé phata Jihova Nzambi ua zolele kiavulu o muhatu iú ua kixikanu. Muene ua-nda mu fukununa phala ku tunga mu Palaízu mu ixi. Sala ua-nda tambula mabesá avulu ni muenhu ua kalelaku ku hádia. Sé tu kaiela o phangu iê, etu ue tua-nda tambula mabesá avulu ku hádia.​— Nzuá 5:28, 29.

^ kax. 3 Ene a exanene Mbalamu ni Salai katé kioso Nzambi kia a lungulula o majina mâ. Maji phala ku tu kuatekesa, mu milongi íii tua-nda kua exana mu majina u tuejiia kiambote lelu, Mbalahamu ni Sala.

^ kax. 10 Kuexile kithangana Jihova uehelele kuila diiala u kala ni ahatu avulu. Maji mu kubhita thembu, Jihova ua bhana ungana kua Jezú phala kuxa o ima kala kia kexile ku dimatekenu—diiala u kala ngó ni muhatu umoxi.​—Dimatekenu 2:24; Matesu 19:3-9.

^ kax. 25 Sala muene ngó o muhatu o umoxi’élele a mu tange mu Bibidia o mivu ia fu na-iu.

Jihova uexana Sala “Mon’â Sobha,” maji muene ka kexile mu di zangeleka