• MUVU UA MU VUALA: 1974

  • MUKUÂ: REPÚBLICA DEMOCRÁTICA DA ALEMANHA

  • MUSOSO: KA XIKININE KUILA KUENE NZAMBI

MUSOSO UAMI

A ngi vualela mu mbanza ia Saxônia, m’ukulu muene mua kexile o ixi ia República Democrática da Alemanha (RDA). Kubhata kua tululukile, tua di zolele kiavulu, jitata jami tundé undenge ja ngi longele kukala ni ifua iambote. Mu thembu’omo mu ixi ia RDA, mundu uoso a sokele mu kukala ni valolo. Mu kiki athu avulu mu mbanza ia Saxônia ka kexile mu bhana valolo mu jingeleja. Eme ki ngi xikinine kuila kuene Nzambi. Kuexile ibanzelu iiadi ia funhisine o muenhu uami katé mu kitala kia 18 dia mivu. Kia dianga, o kibanzelu kia kuila ki kuene Nzambi, (Ateísmo) kia kaiadi, ó kibanzelu kia kuila mundu uoso a sokela mu kukala ni valolo (Comunismo).

Mukonda diahi nga zolele kiavulu o ukexilu ua kutumina kua ixi ietu? Mukonda nga uabhelele kiavulu o kibanzelu kia kuila athu oso a sokela, se-ku muthu uala kota o mukuâ ndenge. Mudiami jimbote joso a tokalele ku jiuanena mu ukexilu ua tokala, mukonda dia kutumina kuku, ki kueji kala jinvuama javulu mba jingadiama. Mu kiki, nga dibhakula mu kisangela kia Jicomunista. Mu ku tenesa 14 kia mivu, nga bhiti thembu iavulu mu kukalakala ni jipapela ja tandujukile kiá ni ji kituke dingi ja ubhe. O athu mu mbanza ia Aue a ngi sakidila kiavulu katé muene o jingana ja mbanza ja ngi bhana maujitu mu kusakidila ioso i nga bhangele. Sumbala ngexile hanji ngi mona-ndenge, ngeza mu kuijiia jingana javulu ni adimixi avulu. Nga divu kuila nga kexile muene mu kaiela njila iambote ku muenhu ni kuila ngeji kala ni muenhu ua iuka ku hádia.

Maji ima ia lunguluka ni lusolo luoso. Ku muvu ua 1989 o kilumbu ua Berlin ni kisangela kia Jicomunista kia Europa kia bu. Maka a mateka kudibandekesa. Nga mono kuila o kuiibha mbé kuavudile mu ixi ioso ia RDA. Mu kifika, o athu a ditunine kukala ku mbandu ia Comunismo akexile mu a talatala ni katungu. Mukonda diahi? O Jicomunista ki ji kexile mu longa kuila athu oso a sokela mu kukala ni valolo? Mbé o Comunismo makutu ngó? Nga thandanganhele kiavulu.

Mu kiki, nga soto njila iengi, nga mateka kudilonga o ufunu ua kuimba ni ku kala hete ia ku bhanga jifikula. * Kuma nga tenene kudilonga mu xikola ia kuimba ni kuila nange ngejiia katé mu xikola ia katunda—nga kexile kiá mu xinganeka kuila ngeji kala ngi ngimbi ia katunda. Ng’eha o ifua ioso iambote ia ngi longele mu undenge uami. O ia ngi betele dingi kota mu kithangana kieniókio, o kutonoka, nga kexile ni ahatu avulu. Maji o kuimba, ni kubhanga jifikula ni ukexilu uami ki ngi kexile mu sanguluka. Katé muene ni jifikula ji nga kexile mu bhanga ja kexile mu londekesa ngó uôma. Kiebhi kieji kala o ima ku pholo? Valolo iebhi ia kexile na-iu o muenhu?

 Kioso ki nga sange o itambuijilu ia ibhuidisu iami, nga diuanene kiavulu. Sai kizuua mu xikola, nga xikama kumoxi ni jikoleka jami, ene akexile mu ta maka alungu ni hádia. Mu kaxi kâ mua kexile Manda. Muene uexile Mbangi ia Jihova. Mu usuku uenhó muene ua ngi bhana itendelesu iambote. Muene uambe: “Andreas, se ua mesena kuijiia o itambuijilu ia ibhuidisu iê ia lungu ni ima ia-nda bhita ku hádia, dilonge o Bibidia.”

Ki ngi xikinine kiavulu maji nga banze kudilonga o Bibidia phala kuijiia o itambuijilu. Manda ua tange n’eme o divulu dia Daniiele kibatulu 2. Nga diuana mu ioso i nga tange-mu. O divulu didi dilombolola o mautuminu avulu a ngongo ni jinguvulu jeji funhisa kiavulu o ima mu izuua ietu. Manda ua ngi londekesa divulu dia mukua mu Bibidia di zuela ue maka alungu ni hádia. Ibhuidisu iami ioso akexile mu i tambuijila! Maji nanhi ua sonekene o ikanenu ioso ienioió ni kutanga ni kidi kioso ioso ia-nda bhita ku hádia? Nga mono kuila mbé mu kidi kuene Nzambi.

KIEBHI O BIBIDIA IA LUNGULULA O UKEXILU UA MUENHU UAMI

Manda ua ngi londekesa kua Horst ni Angelika, makaza, Jimbangi ja Jihova eji ngi kuatekesa kuijiia kiambote o Mak’â Nzambi. Ni lusolo luoso ngeza mu kuijiia kuila o Jimbangi ja Jihova ene ngó a tumbula ni kulonga kiambote o dijina dia Nzambi, Jihova. (Jisálamu 83:18; Matesu 6:9) Nga di longo kuila Jihova Nzambi u bhana ku athu o kidielelu kia kukala ni muenhu ua kalela-ku mu palaízu mu ixi. O divulu dia Jisálamu 37:9 di zuela: “Oso-phe a kinga Jihova, ene a lundula ixi.” Nga sanguluka kiavulu mu kuijiia kuila o kidielelu kiki a ki bhana athu oso a bhanga nguzu mu kubelesela o itendelesu ia Nzambi i tu sanga mu Bibidia.

Maji nga bhange ioso phala kulungulula o ukexilu uami phala ngi tene kuenda kala ki tuma o Bibidia. O kukala ngimbidi kua ngi bhangesele kudinanza kiavulu mukonda dia kiki nga dilongo o ukexilu ua kuditulula. Kima kia mukuá kia ngi bhonzele kiavulu, ó kutula o ukexilu uami ua ufusa. Ngi sakidila kiavulu Jihova mu ku kuatela muanhu, henda ni kutendela ió a mu bhanga nguzu phala kubelesela o ilongesu ia Bibidia!

O ibanzelu ia Comunismo ni kuila ki kuene Nzambi, ia lungulula o muenhu uami katé mu kitala kia 18; maji o Bibidia ia lungulula o muenhu uami. O ima i nga dilongo mu Bibidia ia sosolola o uôma uami ua lungu ni hádia, ia bhana ue valolo ku muenhu uami. Ku muvu ua 1993, a ngi batizala kala ngi Mbangi ia Jihova. Ku muvu ua 2000 nga kazala ni Tabita, Mbangi ue ia Jihova. Tua bhiti thembu iavulu mu kukuatekesa athu kuijiia o Bibidia. Athu avulu u tuene mu zuela nau, ala kala ki nga kexile eme m’ukulu. A kaiela o ibanzelu ia Comunismo ni kuila ki kuene Nzambi. Ngi sanguluka kiavulu mu kua londekesa kiebhi kia tena kuijiia Jihova.

MABESÁ U NGA TAMBULA

Ku dimatekenu kioso ki nga mateka kudilunga ni Jimbangi ja Jihova, jitata jami ja dizangalele. Maji ene éne mu mona o ukexilu uambote u ngala nau lelu mukonda dia kudilunga ni Jimbangi ja Jihova. Mu lelu’idi u a sanga a mu tanga o Bibidia ni kuia mu iônge ia Jimbangi ja Jihova. Ngi sanguluka kiavulu.

Tabita n’eme tua zediua kiavulu mu ukaza uetu mukonda tu sota kubelesela o itendelesu i bhana o Bibidia ku makaza. Mu kifika, o kubelesela o mulongi ua kukala fiiele mu ukaza, kua kuatekesa kiavulu o ukaza uetu.— Jihebeleu 13:4.

Ki ngala’mi dingi ni uôma ua muenhu mba ua ima ia-nda bhita ku hádia. Nga tokala mu muiji ua jiphange mu ngongo ioso, ala ni ukamba ua kidi ni kutululuka. Athu oso ku muiji iú tua sokela. Íii iene o ibanzelu i nga kexile na-iu kudimatekenu, kiene ue ki nga mesenene ku muenhu uami uoso.

^ kax. 11 O majina ó lungulule.