Ku bokona mu madisá

Ku bokona mu madisá

 DIAMBU DIA KAPA | JIANJU​—O KUILA KUENE MUENE JIANJU? MUKONDA DIAHI KIMA KIAMBOTE KUIJIIA O MAKA ENHÁ?

O Kuila o Jianju ji Tena ku ku Kuatekesa?

O Kuila o Jianju ji Tena ku ku Kuatekesa?

Sai kizuua, kia lumingu mu ngoloxi, Kenneth ni Filomena a tungu mu mbanza ia Curaçao, endele mu menekena dikaza dia kexile mu dilonga ni ene.

Kenneth uambe: “Kioso ki tua bhixila, o inzo io jikile, bhu kanga ki muexile dikalu. Maji bhenhobho nga banze kuxinda o muhatu mukua inzo.”

O muhatu ua tambuijila iu ua tange kuila muadi uê uendele mu kalakala. Maji kioso muene kiévu kuila Kenneth ni Filomena akexile bhu kanga dia inzo iê, muene ueza iu ua a bokuesa.

Ene a mono kuila o muhatu ua didile. Kioso Kenneth kia mateka o kusamba phala kumateka kiá o kudilonga o Bibidia, o muhatu ua mateka dingi o kudila. Bhenhobho, Kenneth ni Filomena ni henda ioso a mu ibhuidisa se bhuexile maka.

O muhatu uambe kuila ua banzele kudijibha mu ola ienioió, ni kuila muene ua kexile mu soneka mukanda kua muadi uê mu kujimbulula se mukonda diahi ueji dijibha. Maji mu kithangana kieniókio Kenneth ua mu xindi. O muhatu ua a tangela kuila muxima ua mu katele. Mu kiki, Kenneth ni Filomena a mu tangela ibatu ia Bibidia phala ku mu kuatekesa. O ia bhange ene ia bhulula o muenhu ua muhatu uenhó.

Kenneth uambe: “Tua sakidila kiavulu Jihova mu ku kuatekesa o muhatu iú ua nhongamene kiavulu. Tua sakidila kiavulu, mukonda dia muene ku tu bhangesa kuxinda ku muhatu iú—nange ua ki bhange bhu kaxi ka anju mba ka nzumbi iê ikôla!” *

O kuila Kenneth ni Filomena a xikinine kuila Nzambi ua tumikisile anju mba o nzumbi iê ikôla phala kua kuatekesa? Inga Kenneth ua xindi ngó muene mu kuxinda?

Etu ki tuijiia o kidi. Maji tu tena kuxikina kuila, Nzambi uene mu tumikisa o jianju jê phala ku kuatekesa o athu. Mu kifika o Bibidia izuela kuila sai kizuua Nzambi ua tumikisa anju ku kidistá Felipe, phala ku kuatekesa o kabhitangu mukua Etiiopia.—Ikalakalu 8:26-31.

Jingeleja javulu a xikina kuila kuene muene jianju, avulu a xikina kuila o jianju jene mu bhanga ima iavulu iambote ia a tuma Nzambi mba kala muthu uala ni anju iê i mu langidila. Maji a mukua ka xikina ngó kuila kuene jianju, maji a xikina ue kuila jene ji tena kua kuatekesa. Maji kuene athu a mukuá a xikina kuila ki kuene jianju.

O kuila kuene muene Jianju? Se kiene kuebhi ku ja tundu? Kiebhi o kidi kia lungu ni Jianju? Kiebhi jene ji tena ku ku kuatekesa? Tuijiie dingi o maka enhá.

^ kax. 8 Jihova o dijina dia Nzambi kala kizuela o Bibidia.—Jisálamu 83:18.