Ku bokona mu madisá

Ku bokona mu madisá

 DISÁ 18

Kiebhi ki tu Kuatekesa o Jiphange Jetu Kia Bhita ni Mavuua?

Kiebhi ki tu Kuatekesa o Jiphange Jetu Kia Bhita ni Mavuua?

República Dominicana

Japão

Haiti

Kioso ki ku bhita divuua, o Jimbangi ja Jihova ni lusolo luoso, a bhanga nguzu phala ku kuatekesa o jiphange jâ a bhiti ni divuua. O nguzu íii, ilondekesa o henda ietu ia kidi ku akuetu. (Nzuá 13:34, 35; 1 Nzuá 3:17, 18) kiebhi ki tu kuatekesa?

Tu sangela kitadi mba kima kiéngi. Kioso ku Judeia kua bhiti nzala ia dikota, o Jikidistá ja dianga ku Andiioka a tumikisa kitadi phala kukuatekesa o jiphange jâ. (Ikalakalu 11:27-30) Kiene kimoxi ué lelu, kioso ki tuívua kuila o jiphange jetu a mu dibhana ni ibhidi, etu tu sangela kitadi mba ku tumikisa ima iéngi, phala kusuua o ibhindamu iâ.2 Kolindo 8:13-15.

Tua bhana o ima ia bhindamena. O tufunga tuala bhu kididi bhua bhiti o divuua, a sota o jiphange joso ja kilunga, phala kuijiia kuila oso ala kiambote. Kibuka kimoxi kia jiphange, ki tena ku uanena o kudia ku jiphange, menha, izuatu, inzo ni milongo. Jimbangi javulu ja Jihova ala ni uhete, a di bheka mu vondadi iâ phala kuia ni kitadi kiâ mu kukuatekesa, ku iudika o jinzo jo buike ni Ididi ia Kubheza. O kukalakala kumoxi ni jiphange ni uhete u tuala nau, ku tu kuatekesa kubhanga ioso phala kusuua o ibhindamu ia jiphange jetu. Sumbala etu tu kuatekesa ‘oso a bheza kumoxi n’etu,’ tuene mu kuatekesa ué a mukua né muene se ki jiphange jetu mu nzumbi.Ngalásia 6:10.

Tua bhana kikuatekesu mu kaxi ka mikanda ikola. O athu a dibhana ni mavuua, a bhingi ku a konda malamba. Mu ithangana íii, etu tu tambula nguzu kua Nzambi, ‘o Nzambi ia kikuatekesu kioso.’ (2 Kolindo 1:3, 4) Ni kusanguluka kuoso, tu tula o njimbu iambote ia lungu ni ikanenu ia Nzambi kua ió a kambe kidielelu, mu kua kuatekesa kuila kua kambe ngó, o Utuminu ua Nzambi ua-nda zubha o mavuua oso a bhekela ndolo ni hadi ku athu.Dijingunuinu 21:4.

  • Mukonda diahi o Jimbangi ja Jihova a tena ni lusolo luoso, kukuatekesa o athu mu ithangana ia mavuua?

  • Ku kondama kuebhi ku tu tena kubhana ku athu, a bhuluka ku mavuua?