Ku bokona mu madisá

Ku bokona mu madisá

 KIBATULU 17

Ku Longa Akunji a Utuminu

Ku Longa Akunji a Utuminu

MILONGI IA KIBATULU

Kiebhi o ji xikola mu kilunga kia Nzambi kiene mu longa o akunji phala ku bhanga kiambote o ukunji uâ

JEZÚ ua boko mu mbanza ioso ia Ngalileia mu mivu iiadi. (Tanga Matesu 9:35-38.) Muéne ua kexile múia mu ji sanzala javulu ni mu ji mbonge, ku longa mu malombe a ji Judé ni ku boka o njimbu iambote ia Utuminu. Mu ididi ioso mua kexile mu boka muéne, athu avulu akexile múia-ku phala ku muivua. Kienhiki, Jezú uambe: “O mábhia ma nzungule muene,” kienhiki, kua bhingile dingi akalakadi.

1-3. Kiebhi Jezú kia sanzumuna o kikalakalu kia ku boka, ni ibhuidisu iebhi i tu di bhanga?

2 Jezú ua bhangesa kuila o njimbu iambote i tula mu ididi ioso. Kiebhi kia bhange kiki? Mu ku tumikisa 12 dia ji poxolo, “kuboka o Utuminu ua Nzambi.” (Luka 9:1, 2) O ji poxolo nange a mesenene kuijiia kiebhi kia tokalele ku bhanga o kikalakalu kieniókio. Ande dia ku a tumikisa, Jezú ua diangela ku a bhana ia mu bhanene ué Tat’ê ia diulu—o ku a longa.

3 Nange tu dibhuidisa: Jezú a mu longo ihi kua Tat’ê? Ihi ia longo Jezú ku ji poxolo jê? O kuila lelu o Mexiia, o Sobha, uene mu longa o akaiedi’ê ku bhanga kiambote o ukunji uâ? Se kiene, kiebhi muéne kiene mu bhanga kiki?

“[Ngi] Zuela Kala Kia Ngi Longo Tata”

4. Thembu kuxi ni kuebhi Jezú a mu longo kua Tat’ê?

4 Jezú uejidile kiambote kuila a mu longele kua Tat’ê. Kioso kia kexile mu ixi, Jezú uambe: “Nga zuela kala kia ngi longo Tata.” (Nzuá 8:28) Thembu kuxi ni kuebhi Jezú a mu longo? Jezú, o mona ua dianga ua Nzambi, a mateka o ku mu longa kioso kia zubha o ku mu bhanga. (Kol. 1:15) Bhu mbanji ia Tat’ê ku diulu, o mona ua bhiti mivu iavulu mu kuívua ni ku mona, “O Mulongexi ua Dikota.” (Iza. 30:20, NW) Mukonda dia kiki, o Mona ua di longo kiavulu ia lungu ni ídifua, ikalakalu ni ima ia mesena ku bhanga Tat’ê.

5. Ihi ia longo o Tata kua Mona ia lungu ni ukunji ueji bhanga muéne mu ixi?

5 Mu kithangana kia tokala, Jihova ua longo Mon’ê ia lungu ni ukunji ueji bhanga Jezú mu ixi. Tala o kikanenu kilondekesa o ukamba ua Mulongexi ua Dikota ni Mon’ê  ua dianga. (Tanga Izaia 50:4, 5.) O Bibidia i zuela kuila, Jihova ua kexile mu phaphumuna Mon’ê “imene ioso.” O izuelu íii ilondekesa mulongexi u balumuna dixibulu diê mu kamenene-mene ka selu, phala ku mu longa. Saí Bibidia i zuela: “Jihova . . . u mu mona kala dixibulu mu xikola, anga u kuata ku mu longa ihi ni kiebhi kia tokala o ku boka.” Mu “xikola” íii ku diulu, Jihova ua longo Mon’ê ‘kioso kia zuela, ni kioso kia longa.’ (Nzuá 12:49) O Tata ua longo ué Mon’ê kiebhi kia tokalele ku longa. * Kioso kia kexile mu ixi, Jezú ua bhange kala kia mu longele Tat’ê, kana ngó mu ku bhanga o ukunji maji mu ku longa ué o akaiedi’ê ku bhanga kiambote o ukunji .

6, 7. (a) Ihi ia longo Jezú ku ji poxolo jê ni ihi ia bhange ene? (b) Ihi ia mu bhanga Jezú mu izuua ietu phala ku longa o akaiedi’ê oso?

6 Ihi ia longo Jezú ku ji poxolo jê kala ki tua tange mu dimatekenu? O divulu dia Matesu kibatulu kia 10, di tu londekesa kuila, muéne ua bhana itendelesu ia tokala, kala íii: Kuebhi kua tokalele o ku boka (velusu 5, 6), njimbu iebhi ia tokalele o ku boka (velusu 7), o ku dielela kua Jihova (velusu 9, 10), kiebhi kia tokalele ku di kunda ni mukua dibhata (velusu 11-13), Ihi ia tokalele ku bhanga se o mukua dibhata u dituna o njimbu (velusu 14, 15), ni ihi ia tokalele o ku bhanga mu izukutisu (velusu 16-23). * O milongi ia bhana Jezú ku jipoxolo jê ia a kuatekesa ku sanzumuna o njimbu iambote ku hama ia dianga K.K.

7 Abha mu izuua ietu? Jezú, o Sobha ia Utuminu ua Nzambi, ua bhana o kikalakalu kia dikota ku akaiedi’ê, kia ku boka “O Njimbu iíi Iambote ia Utuminu ua Nzambi, . . . mu kubhana umbangi ku akua jixi joso.” (Mat. 24:14) O kuila o Sobha ua mu tu longa phala ku bhanga o kikalakalu kiki kia beta-o-kota? Sé phata ua mu tu longa! Tundé ku diulu, o Sobha u bhanga ioso phala o akaiedi’ê a tambule o milongi ia bhindamena phala ku bokela athu ni ku kumbidila kiambote o ikalakalu iâ mu kilunga.

Ku Longa Akunji Phala ku Boka o Njimbu Iambote

8, 9. (a) Mukonda diahi a bhangele o Xikola ia Ukunji ua Nzambi? (b) Kiebhi o kiônge kia kaxi ka semana kiene mu ku kuatekesa ku bhanga kiambote o ukunji uê?

8 O Kilunga kia Jihova tundé ukulu, kiene mu bhanga iônge ia ilunga, iônge ia makota, iônge mu kilunga—ni Kiônge kia Sidivisu—phala ku longa o mundu ua Nzambi ku bhanga kiambote o ukunji uâ. Maji tundé ku dimatekenu dia muvu ua 1940, o jiphange ala ku pholo a mateka ku a longa bhu kaxi ka ji xikola javulu.

9 Xikola ia Ukunji ua Nzambi. Kala ki tua mono mu kibatulu ki tua di longo, o xikola íii ia mateka ku muvu ua 1943. O kuila o xikola iexile phala ku longa o jiphange ku bhanga madiskursu ambote mu kilunga? Kana. O xikola íii, a i bhangele phala ku longa o mundu ua Nzambi ku  ximana Jihova mu ukunji, ni ujitu ua a bhana ua kuzuela. (Jisá. 150:6) O xikola ia longele o jiphange ja mala ni ja ahatu, ku kala akunji ambote a Utuminu. Lelu o ulongelu iú a mu u bhana bhu kaxi ka kiônge kia kaxi ka semana.

10, 11. Lelu nanhi u tena ku di longa mu Xikola ia Ngiliiade ni mukonda diahi?

10 Xikola ia Ngiliiade.O Xikola íii ia mateka kia Sekunda mu kizuua kia 1 ku mbeji ia Kauana ku muvu ua 1943.Ku dimatekenu o xikola iexile ngó phala o aboki a thembu ioso, ni akunji a jixi jengi akexile múia mu boka mu ididi ia mukua. Maji tundé ku mbeji ia Kamusasadi ua muvu ua 2011, o a tokala kuia mu xikola íii, aboki a katunda, tufunga tua ilunga ni ahatu’â, ni jiphange a tokala ku Betele, ni akunji a jixi jengi ka di longo lua o xikola íii.

11 Mukonda diahi o jiphange ene mu di longa mu Xikola ia Ngiliiade? Saí phange uene mu longa mu xikola íii tundé ukulu, uambe: “Phala ku suínisa o kixikanu kia jiphange jiji bhu kaxi ka Mak’â Nzambi, ni ku a kuatekesa ku kala ni ifua iambote mu nzumbi, phala ku a kuatekesa ku di bhana ni ibhidi mu ukunji uâ. O kima kia mukua ué, o ku a kuatekesa ku kala ni vondadi ia ku bhanga o kikalakalu kia ku boka.”—Efe. 4:11.

12, 13. Mabesá-hi a bheka o Xikola ia Ngiliiade mu kikalakalu kia kuboka ku mundu uoso? Bhana phangu.

12 Mbote iahi ia bheka o Xikola ia Ngiliiade mu sidivisu ia kuboka ku mundu uoso?Tundé ku muvu ua 1943, 8.500 a jiphange a di longo kiá mu xikola íii. * O jiphange a di longo mu Xikola ia Ngiliiade, a mu boka mu 170 a jixi ku mundu uoso.O akunji a di longo o Xikola ia Ngiliiade, a kaiela o itendelesu ia tambula mu xikola, a bhana ué phangu iambote ku akuâ, ni ku a longa ku bhanga kála ene. Saí ithangana o akunji enhá, a kala ku pholo mu kuboka mu ididi mua kambe aboki mba mua bhindamena dingi aboki a Utuminu.

13 Xinganeka ia bhiti ku ixi ia Japão, a bhitile mu kithangana sé ku boka kioso kia bhiti o Ita ia Kaiadi ia bhiti ku Mundu Uoso. Ku mbeji ia Kakuinhi ku muvu ua 1949, ku ixi ia Japão nange ki kuexile né muene dikuinhi dia aboki. Maji ku disukilu dia muvu uenhó, 13 dia akunji a jixi jengi a di longele mu Xikola ia Ngiliiade, akexile mu kalakala mu ixi ia Japão. Akunji a mukuá a a kaiela uâ. Mu dimatekenu, o akunji a di bhakuile mu kuboka mu jimbanza jonene; mu kusuka-ku ai mu jimbanza ja mukuá. Ene akexile mu suínisa o maxibulu mâ ni jiphange mu kilunga ku kala aboki a thembu ioso. O kikalakalu kiambote kia bhange o akunji, kia a bhekela mabesá avulu. Lelu ku ixi ia Japão kuala 216.000 a aboki a Utuminu, 40 a ji pursentu ala mu sidivisu ia thembu ioso! *

14. O ji Xikola ja Utuminu ji londekesa ihi? (Tanga ué o kitutu “ Ji Xikola ji Longa o Akunji a Utuminu,” ku difue dia 188.)

14 Ji Xikola ja mukua ja Utuminu.O Xikola ia Aboki a Thembu ioso, ni Xikola phala o Makaza a Kidistá,  ni Xikola Phala o Akudi, i kuatekesa o jiphange a di longa mu xikola íii, ku kula mu nzumbi, ni ku suína mu ku kala ku pholo mu kikalakalu kia kuboka. *O ji Xikola jiji, ji londekesa ué kuila o Sobha ietu, ua mu longa o akaiedi’ê ku kumbidila kiambote o kikalakalu kia kuboka.—2 Tim. 4:5.

Ku Longa o Jiphange ja Mala Phala ku Kumbidila Kiambote o Ikalakalu ia Tambula

15. Kiebhi o jiphange ala ku pholo mu kilunga ene mu kaiela o phangu ia Jezú?

15 O kikanenu kia Izaia kilondekesa kuila Jezú a mu longo kua Nzambi. Mu “xikola” ku diulu,” o Mon’a ua di longo ‘phala uoso ua bhuila uijiia ku mu tela tumaka tua mbote tu mu nhohesa.’ (Iza. 50:4) Jezú ua belesela o itendelesu ia tambula; kioso kia kexile mu ixi, muéne ua nhohesa o athu oso ‘a bhuila ni ió akexile mu tata.’ (Mat. 11:28-30)O mala oso a tambula o ujitu ua ku kala ku pholo mu kilunga, a tokala ku kaiela o phangu ia Jezú, ia ku kala athu a tululukisa o jiphange. Phala ku a kuatekesa ku bhanga  kiki, tuala ni ji xikola, ji longa kiebhi kia tena ku sidivila kiambote o jiphange jâ.

16 Xikola Phala o Tufunga Tua Kilunga. O kibuka kia dianga o ku di longa o xikola íii, kia mateka ku mbeji ia Katanu mu kizuua 9, ku muvu ua 1959, mu diembu dia South Lansing, mu mbanza ia Nova Yorque. O tufunga tua ilunga ni tufunga mu kilunga, a exanene uâ mu xikola íii. O milongi ia xikola ia kexile ngó mu dimi dia Kingileji,maji mu ku bhita kithangana a i lungulula ué mu madimi engi, phala ku longa ué o jiphange a tokala mu jixi jengi. *

Phange Lloyd Barry ua mu longa mu Xikola Phala o Tufunga Tua Kilunga mu ixi ia Japão, muvu ua 1970

16, 17. Mukonda diahi a bhange o Xikola Phala o Tufunga Tua Kilunga? (Tanga ué ku luiji.)

17 O divulu, Anuário das Testemunhas de Jeová ia muvu ua 1962 diambe ia lungu ni Xikola Phala o Tufunga Tua Kilunga: “Ku mundu lelu muala ima iavulu, i tena ku landukisa o muthu, mu kiki o kafunga ka ilunga ua tokala u kala muthu u tena ku di sokejeka kiambote, phala ku langa kiambote o kilunga, ni ku ki kuatekesa. Maji ka tokala ku landuka o muiji uê, mukonda dia ku langa o kilunga. Ua tokala u kala muthu ua kilunji. Ujitu ua dikota uala nau o jiphange ku mundu uoso ua ku di longa mu Xikola Phala o Tufunga Tua Kilunga, phala ku kala ni uhete, ua ku belesela o itendelesu ia Bibidia ia tokala ku kumbidila o kafunga!”—1 Tim. 3:1-7; Tito 1:5-9.

18. Kiebhi o mundu ua Nzambi kiene mu katula mbote ku Xikola Phala o Tufunga Tua Kilunga?

 18 O mundu uoso ua Nzambi uene mu katula mbote mu Xikola Phala o Tufunga Tua Kilunga. Kiebhi kia katula mbote? Kioso o tufunga mu kilunga ni akuatekexi a tufunga, kia kumbidila o milongi ioso ia di longa mu xikola, ene a kaiela o phangu ia Jezú, a kala kála kilembeketa phala o jiphange mu nzumbi. Eie ku uabhela kafunga mba múkuatekexi ua tufunga u ku zuelela ni henda ioso, u ku kunda ni ku kuívua kiambote? (1 Tes. 5:11) O jiphange jiji a kuatekesa kiavulu o kilunga!

19 Ji Xikola ja Mukua ja Utuminu. O Kibuka kia ku Longa kia Kibuka kia Utuminu, kiene mu kuendesa ji xikola ja mukuá phala ku longa o jiphange ala ku pholo mu kilunga kia Nzambi mu ixi ioso. O milongi ia tambula phala ku kuatekesa o jiphange ala ku pholo mu ilunga—tufunga tua kilunga, tufunga tua ilunga, Kibuka kia tufunga tua filiiale phala a tene ku kumbidila kiambote o kikalakalu kia tambula. O milongi i tunda mu Bibidia i suínisa o jiphange ku kolokota ku kula mu nzumbi ni ku belesela o itumu ia Bibidia kioso kia langa o jimbudi ja a dielela Jihova ku ji tambula konda.—1 Phe. 5:1-3.

O kibuka kia dianga ku di longa mu Xikola Phala o Tufunga Tua Kilunga ni Akuatekexi a tufunga akudi (ETM) ku ixi ia Malaui, muvu ua 2007

20. Mukonda diahi Jezú uambe kuila etu en’oso tu “maxibulu a Jihova,” ni ihi i ua tokala o ku bhanga?

20 Sé phata o Sobha ia Utuminu ua mu bhanga ioso phala ku longa o akaiedi’ê. O milongi ioso i tunda ku diulu: Jihova ua longo mon’ê, o mon’a ua mu longa o akaiedi’ê. Kienhiki-phe, Jezú u tena kuzuela kuila etu en’oso tu “maxibulu a Jihova.” (Nzuá 6:45; Iza. 54:13) Tua tokala ku katula mbote ku milongi ioso ia mu tu bhana Sobha ietu. Ki tu tokala ku jimba kuila, o milongi i tu tambula mu ji xikola jiji, phala ku tu kuatekesa ku kula mu nzumbi, ni ku kumbidila kiambote o ukunji uetu.

^ kax. 5 Kiebhi ki tuejiia kuila, o Tata ua longo o mona kiebhi kia tokalele o ku longa? Xinganeka: O ifika iavulu ia tele Jezú mu ku longa kuê, a i tangele kiá mivu iavulu ande dia ku mu vuala. (Jisá. 78:2; Mat. 13:34, 35) Sé phata, Jihova, o Muthu ua tangele kiki, uejidile kiambote kuila Mon’e ueji longa ni ifika iavulu.—2 Tim. 3:16, 17.

^ kax. 6 Mu ku bhita jimbeji, Jezú ua solo dingi iu ua tumikisa “makuinhi sambuadi a xibulu, anga u a katula kiiadi-kiiadi,” n’ai mu boka. Muéne ué ua a longo.—Luka 10:1-16.

^ kax. 12 Saí jiphange a bhiti veji javulu mu xikola ia Ngiliiade.

^ kax. 13 Phala kuijiia dingi o mbote ia bheka o xikola ia Ngiliiade mu kikalakalu kia mu bhanga ku mundu uoso, tanga o kibatulu kia 23 kia divulu Testemunhas de Jeová—Proclamadores do Reino de Deus.

^ kax. 14 O xikola jiiadi jiji ja sukina a ji bhange xikola imoxi ngó, a i xana Xikola ia Akunji a Utuminu.

^ kax. 16 Lelu o tufunga tuoso a katula mbote ku Xikola Phala o Tufunga Tua Kilunga i bhanga kizuua kimoxi, o xikola íii ka i bhange mivu ioso. Tundé ku muvu ua 1984, o akuatekexi a tufunga ene mu di longa ué mu xikola íii.