Ku bokona mu madisá

Ku bokona mu madisá

 KIBATULU 16

Tu Diongeka Phala ku Bheza

Tu Diongeka Phala ku Bheza

MILONGI IA KIBATULU

O uendelu ni valolo ia iônge ietu

KI KU bhitile kithangana kiavulu kioso kia fukunuka Jezú, o maxibulu a diongekele phala ku di suínisa mudiâ. Maji ene a di jikile m’onzo, mukonda akexile ni uôma ua jinguma jâ. O uôma uâ uabhu, kioso kia a monekena Jezú bhu kaxi kâ, anga u a tangela: “Tambulenu o Nzumbi Ikôla!” (Tanga Nzuá 20:19-22.) Mu ku bhita kithangana, o maxibulu a diongeka dingi, Jihova anga u a bhana dingi o nzumbi ikôla. Mu kiki, ene a tambula dingi kikuatekesu phala ku bhanga o kikalakalu kia kuboka kieji bhanga ku pholo!—Ika. 2:1-7.

2. (a) Kiebhi Jihova kiene mu tu kuatekesa, ni mukonda diahi tua bhingi o kikuatekesu kiki? (b) Mukonda diahi kima kiambote ku kala ni ubhezelu ku muiji? (Tanga ku luiji ni mu kitutu “ Ubhezelu ku Muiji,” ku difue dia 175.)

2 Etu tuene mu di bhana ni ibhidi iavulu, kala ia di bhanene na-iu o jiphange ku hama ia dianga. (1 Phe. 5:9) Saí ithangana muthu mudietu u tena ku kala ni uôma ua athu. Mu kiki, tu bhinga o kikuatekesu kia Jihova phala ku kolokota mu sidivisu ia kuboka. (Efe. 6:10) Jihova u tu bhana o nguzu íii mu iônge ietu. Lelu tuala ni ujitu ua ku kala ni iônge iiadi ku semana—Diskursu dia Katunda, Milongi ia Mulangidi, ni kiônge Ukexilu Uetu ua Ukidistá ni Ukunji. * Tuala ué ni iônge iuana ku muvu—Kiônge kia dikota, kiônge kia ilunga, lu iiadi ku muvu, ni Lembalasa ia Kufua Kua Jezú. Mukonda diahi kima kiambote kuia mu iônge ioso íii? Kiebhi kia mateka o kuenda o iônge mu izuua ietu? Ni kiebhi ki tua tokala ku mona o iônge?

Mukonda Diahi Tuene mu Diongeka?

3, 4. Ihi i mesena Jihova ku mundu uê? Bhana phangu.

3 Tundé ukulu Jihova uene mu tendelesa o mundu uê ku diongeka phala ku mu bheza. Mu kifika, ku muvu ua 1513 A.K.K., Jihova ua bhana o Kitumu kiê ku kifuxi kia Izalaiele, o Kitumu kieniókio, kia lungile ué ni ku bhaka o kizuua kia Sabhalu. O miji a tokalele ku mu bheza, ni kua longa o Kitumu mu kizuua kieniókio. (Mate. 5:12; 6:4-9) Kioso akua Izalaiele kia kexile mu belesela o Kitumu kieniókio, o miji ia suinine, o kifuxi kioso kia zelele mu nzumbi, o mundu ua suinine.  Maji kioso o kifuxi kia bhukumukine o Kitumu, kála o kitumu kia ku diongeka, ene ka kexile mu ku a besoala kua Nzambi.—Iji. 10:11; 26:31-35; 2 Mal. 36:20, 21.

4 Xinganeka ué o phangu ia xisa Jezú. Muéne ua zolele kiavulu kuia mu dilombe dia jijudé mu Sabhalu joso. (Luka 4:16) Kioso kiafu Jezu, ni kia fukunuka, o maxibulu mê a suluka ni ku diongeka ithangana ioso, sumbala ka kexile dingi mu belesela o kitumu kia Sabhalu. (Ika. 1:6, 12-14; 2:1-4; Loma 14:5; Kol. 2:13, 14) Mu iônge ienióio, o Jikidistá ku hama ia dianga, ka kexile ngó mu tambula milongi mba ku a suínisa, maji ene akexile ué mu bhana ji sata ja ku ximana Nzambi mu ku samba, ku bhana itambuijilu ni kuimba.—Kol. 3:16; Jihe. 13:15.

O maxibulu a Jezú akexile mu bheza kumoxi phala ku di suinisa mudiâ

5 Lelu ué, kioso ki tuia mu iônge mu kilunga semana joso mba mu iônge ia makota, tua mu londekesa kuila tuala ku mbandu ia Utuminu ua Nzambi, mu iônge muenhomo tu tambula o nzumbi ikôla ia Nzambi ni ku di suinisa mudietu. Tuala ué ni ujitu ua ku bheza Jihova bhu kaxi ka misambu, ku tambuijila ibhuidisu, ni kuimba. Nange o iônge ietu ki i difu ni iônge ia akua Izalaiele mba ia Jikidistá ku hama ia dianga, maji iala ué ni valolo ia dikota.Kiebhi kia mateka o kuenda o iônge mu izuua ietu?

O ku Bhanga Iônge Semana Joso, ku tu Suinisa “ku di Zola ni ku Bhanga Mbote”

6, 7. (a) Mukonda diahi tuene mu bhanga o iônge? (b) Kiebhi o ukexilu ua jiphange ku bhanga o iônge ki u difuile?

6 Kioso Phang’etu Charles Taze Russell, kia mateka ku tokuesa o kidi mu Mak’â Nzambi, muéne ua mono kuila ua tokalele ku diongeka ni ió a mesenene ué ku sanga o kidi. Ku muvu ua 1879, o phange Russell ua soneka: “Eme ni akuetu mu mbanza ia Pittsburgh, tuene mu diongeka phala ku tokuesa o Mikanda Ikola mu Malumingu moso.” O atangi a kadivulu, Torre de Vigia de Sião, a a suinisa ku diongeka. Tundé ku muvu ua 1881, o iônge akexile mu i bhanga mu mbanza  ia Pittsburgh, Pennsylvania, mu Malumingu moso ni mu ji Kuarta. O kadivulu, Torre de Vigia ia mbeji ia Kamoxi ua muvu ua 1895, iambele kuila akexile mu bhanga o iônge ienióio phala ku suinisa o “ukamba ua Jikidistá, ni henda iâ” ni ku kuatekesa ió akexile muia mu iônge íii ku suinisa ué akuâ.—Tanga Jihebeleu 10:24, 25.

7 Mu mivu iavulu o ibuka ia Adilongi a Bibidia, ka kexile mu bhanga o iônge mu ukexilu umoxi. Mu kifika, o mukanda ua sonekene o kibuka ku ixi ia Estados Unidos ia América, ua tundu mu A Sentinela ua muvu ua 1911, uambe: “Tuene mu bhanga iônge itanu ku semana.” Ene akexile mu bhanga o iônge kia Sekunda, kia Kuarta, kia Sesa ni veji jiiadi mu Lumingu. O mukanda ua mukua ua soneka o kibuka kia jiphange ku ixi ia Africa, ua tundu mu kadivulu A Torre de Vigia ku muvu 1914, uambe: “Tua kexile mu bhanga o iônge veji jiiadi ku mbeji, tu mateka kia Sesa katé kia Lumingu.” Maji mu ku bhita kithangana tua mateka ku bhanga o iônge kala ki tua mu bhanga lelu. Tu di longe kiebhi kia kexile mu bhanga o iônge ietu m’ukulu.

8. Ebhi exile o diambu dia madiskursu a dianga?

8 Diskursu Dia Katunda. Ku muvuua 1880, kua bhitile ngó muvu umoxi kioso o Phang’etu Russell kia mateka ku soneka o kadivulu A Torre de Vigia de Sião, muéne ua kaiela o phangu ia xisa Jezú, uai mu jixi jengi kuboka. (Luka 4:43) Mu njila ia bhangele, o Phange Russell ua bhana phangu ia lungu ni kiebhi kia tokalele ku bhanga o diskursu dia katunda ene mu di bhanga lelu mu ilunga. Mu ku jimbulula o njila ia bhangele, o kadivulu A Torre de Vigia, iambe kuila o Phange Russell “ua sangulukile kiavulu mu ku bhanga madiskursu a katunda, ni diambu: ‘Ima ia tokala ku Utuminu ua Nzambi.’” Ku muvu ua 1911, kioso ki kua monekene kiá ilunga mu jixi javulu, o ilunga a i suinisa ku tumikisa alongexi ala ni uhete mu ididi ia zukama phala ku bhanga samanu dia madiskursu a lungu ni kufundisa kua Nzambi ni kukula. Ku disukilu dia diskursu, akexile mu tumbula o dijina dia mulongexi, ni diambu dia diskursu dia semana ieji kaiela.

9. Kiebhi kia lungulula o madiskursu a katunda, ni kiebhi ki tu tena ku kuatekesa o kiônge kiki?

9 Ku muvu ua 1945, o kadivulu, Torre de Vigia ia bhana ngolokela ia lungu ni Madiskursu a Katunda eji bhanga ku mundu uoso, dinake dia madiskursu eji zuela o “maka a bhingi ku a batula mu izuua ietu.” Mu mivu iavulu o alongexi ka kexile ngó mu bhanga o madiskursu a bhanene o kimbadi kia fiiele, maji ene akexile mu soneka ué madiskursu a mukua. Maji ku muvuua 1981, o alongexi oso a a tendelesa ku bhanga ngó o madiskursu a tundile ku kimbadi. * Katé ku muvu ua 1990, saí mikanda ia madiskursu a katunda, ia kexile mu bhinga kuila o jiphange a xikama mu kiônge, a tambuijila ibhuidisu, ni ku bhanga ifika; maji ku muvu uenhó o itendelesu a i lungulula, ka kexile mu bhinga dingi kuila o jingivuidi  a tambuijila. Ku mbeji ia Katatu ku muvu ua 2008 a lungulula dingi o madiskursu, mu veji dia ku a bhanga mu 45 a ithangana, a tokalele ku a bhanga kiá mu 30 a ithangana. Sumbala a lungulula o madiskursu, maji né kiki, o madiskursu a a iudika kiambote, ene mu suinisa o kixikanu kietu mu Mak’â Nzambi ni ku tu longa ima iavulu ia lungu ni Utuminu ua Nzambi. (1 Tim. 4:13, 16) O kuila eie uene mu kuixana ni kisangusangu o athu uene mu ku a longa o Bibidia ni ió kene mu di longa hanji o Bibidia, phala kuivua o madiskursu a katunda mu iônge ietu?

10 Milongi ia Mulangidi. Ku muvu ua 1922, o jiphange a ejidile mu dijina dia peregrinos—akunji akexile mu ku a tumikisa kuala o Sociedade Torre de Vigia phala ku bhanga madiskursu mu ilunga ni kuendesa o kikalakalu kia kuboka—a tumina ku bhanga iônge phala ku di longa o A Sentinela. O jiphange a belesela, ku dimatekenu o milongi ia A Sentinela ia akexile mu i bhanga mu kaxi ka semana mba kia Lumingu.

Kiônge kia Milongi ia Mulangidi,mu ixi ia Gana 1931

10-12. (a) Ihi ia lungulula mu ukexilu ua kuendesa o Milongi ia Mulangidi? (b) Ibhuidisu iebhi i ua tokala ku di bhanga?

11 O A Sentinela 15 ua Kanake, ua muvu ua 1932, ia bhana dingi itendelesu ia lungu ni kiebhi kia tokalele kuendesa o kiônge kieniókio. A tokalele kuendesa o kiônge kieniókio kála kia kexile mu bhanga o muiji ua Betele, phange imoxi ua tokalele ku kala ku pholo phala kuendesa o kiônge. Phange jitatu a tokalele ku xikama ku pholo mu kiônge, phala ku tanga o ji kaxi, muthu ni muthu ua tokalele u bhingana mukua. Mu kithangana kieniókio o milongi ki i kexile ni ibhuidisu, kienhiki o muendexi ua kexile mu bhinga ku jiphange akexile mu iônge phala ku bhanga ibhuidisu, ia lungu ni milongi ia kexile mu di longa. Muéne anga u sola athu a mukua phala ku tambuijila o ibhuidisu ienióio. Se kua bhingile dingi ku jimbulula o milongi, o muendexi a mu tendelesa ku jimbulula “bhofele” o milongi.

 12 Ku dimatekenu, o ilunga ia kexile mu sola o milongi ia mulangidi ia mesenene o ku di longa. Maji o A Sentinela 15 ua Kasamanu ua muvu ua 1933, ia tendelesa kuila, o ilunga ioso ia tokalele ku di longa o milongi ia ubhe. Ku muvu ua 1937, a tendelesa kuila o kiônge a tokalele ku ki bhanga kia Lumingu. O ima ia lungulula mu iônge kala ki tua mu mona lelu, a i soneka mu A Sentinela ia 1 ua mbeji ia Kamusasadi, ua muvu ua 1942. Kia dianga, o A Sentinela ia bhana ngolokela kuila, o ibhuidisu ieji moneka ku luiji lua difue dia milongi ia ku di longa, ni kuila iene o ibhuidisu ia tokalele ku bhanga o muendexi. A tendelesa ué kuila o milongi a tokalele ku i bhanga mu ola imoxi. Ua suinisa ué o jiphange akexile mu tambuijila o ibhuidisu ku jimbulula o milongi “mu izuelu iâ,” mu veji dia ku tanga dingi o kaxi.O Milongi ia A Sentinela kate lelu, uene o ukexilu ua beta-o-kota ua kimbadi ku bhana o kudia mu nzumbi ku mundu ua Nzambi mu kithangana kia tokala. (Mat. 24:45) Muthu ni muthu mudietu ua tokala ku dibhudisa: ‘Ngene mu di longa o milongi ia Mulangidi semana joso? Ngi di suinisa ku tambuijila o ibhuidisu?’

13, 14. Kiebhi kia kexile mu bhanga o kiônge kia Milongi ia Bibidia mu Kilunga, ni ihi ia ku uabhela mu kiônge kiki?

13 Milongi ia Bibidia mu Kilunga.Ku dimatekenu dia muvu ua 1890, kioso kia soneka o madivulu, Aurora do Milênió, o phange H. N. Rahn ua kexile mu di longa o Bibidia, ua tungile mu mbanza ia Baltimore, Maryland, Estados Unidos ia America, ua bhana ndunge ia ku bhanga kiônge a ki xana, “Círculos da Aurora,” phala ku di longa o Bibidia. Ku dimatekenu o iônge íii akexile mu i bhanga mu jinzo ja jiphange. Maji ku mbeji ia Katutu ku muvu ua 1895, o iônge íii a kexile mu i bhanga mu ji mbanza javulu ku ixi ia Estados Unidos ia America. O A Sentinela ia mbeji ienióio ia tendelesa kuila, o jiphange joso akexile mu di longa o kidi, a tokalele ku bhanga o iônge ienióio. Ua tendelesa ué kuila o muendexi ua tokalele ku kala muthu u tanga kiambote. Muéne ua tokalele ku tanga o kaxi ni ku kingila o jiphange ku tambuijila. Kioso kia zubha ku bhanga kiki, ua tokalele ku tanga o ibatulu mu Bibidia imoneka mu kaxi. Ku di sukilu dia milongi, o jiphange a tokalele ku bhitulula o milongi.

14 O dijina dia kiônge kiki a di lungulula veji javulu. Akexile kia mu ki xana Círculos Bereanos phala ku di longa o Bibidia, mu ku kaiela o phangu ia akua Beleia ku hama ia dianga akexile mu tekula o Mikanda Ikola. (Ika. 17:11) Mu ku bhita kithangana o kiônge kiki a kixana Kiônge kia Divulu kia Kilunga. Lelu a kixana Milongi ia Bibidia mu Kilunga, o kilunga kioso ki diongeka mu Kididi kia Ubhezelu, kana dingi ku mabhata a jiphange. Mu mivu iavulu, tua di longo kiá madivulu avulu, ni tu madivulu, ni milongi ia Mulangidi. Tundé ku dimatekenu o jiphange joso mu kiônge ene mu a suinisa ku tambuijila o ibhuidisu. O kiônge kiki kiene mu tu kuatekesa  kiavulu ku bandekesa o kuijiia kuetu kua lungu ni Bibidia. O kuila uene mu di longa o milongi iii, ni ku tambuijila o ibhuidisu?

15. Mukonda diahi a bhange o Xikola ia Ukunji ua Nzambi?

15 Xikola ia Ukunji ua Nzambi. Phang’etu Carey Barber, mu kithangana kieniókio ua kexile mu sidivila mu mbonge ia Brooklyn, mu mbanza ia Nova Yorque, uambe: “Mu kizuua kia 16 kia mbeji ia Kauana ku muvu ua 1942, kia Sekunda mu usuku, o jiphange joso ja mala ku muiji ua Betele ku mbonge ia Brooklyn, a exana phala ku di longa mu Xikola ia Ukunji ua Nzambi.” O Phange Barber, ua tokalele ué ku Kibuka Kia Utuminu, uambe kuila, o xikola “ilondekesa kiebhi Jihova kiene mu di bhana ni mundu uê mu izuua ietu.” O xikola ia kuatekesa o jiphange ku bandekesa o uhete uâ ua ku longa ni ku boka, ni kuila tundé ku muvu ua 1943 o ilunga ku mundu uoso a mateka o ku tambula o divulu, Curso Adiantado do Ministérió Teocrático. O A Sentinela 1 ia mbeji ia Kanake, ua muvu ua 1943, iambe kuila o Xikola ia Ukunji ua Nzambi, a  i bhange phala ku kuatekesa o mundu ua Nzambi “ku di longa mudiâ, phala ku kala aboki ambote a Utuminu ua Nzambi.”—2 Tim. 2:15.

16, 17. O kuila o Xikola ia Ukunji ua Nzambi ia tu longele ngó kuzuela kiambote? Jimbulula.

16 Ku dimatekenu, jiphange javulu ka tenene ku zuela bhu pholo ia athu avulu. O phange Clayton Woodworth, Jr., uavu o tata a mu tele ué mu kaleia kumoxi ni Phange Rutherford ni jiphange ja mukuá ku muvu ua 1918, u di lembalala kiebhi kia divu kioso kia di sonekesa mu xikola íii ku muvu ua 1943, muéne uambe: “Kua bhonzele kiavulu ku bhanga madiskursu. Dimi diami dia kexile kala dia mu tunda, o mizumbu iami ia kexile mu ngi kukuta, ki ngi tenene kuzuela.” Maji kioso phange Clayton kiai ni ku bandekesa o uhete uê, muéne ua kexile mu tambula ujitu uavulu ua ku longa athu. O xikola ki i mu longo ngó kiebhi kia tokalele ku zuela. O xikola ia mu longo ué o valolo ia ku lenduka, ni kudielela kua Jihova. Muéne uambe: “Nga mono kuila, o ku kala ni uhete ua ku longa ki ku soko, o kia beta-o-kota o ku di sokejeka ni ku dielela  kua Jihova. Se u bhanga kiki, o jiphange anda kuivua kiambote ni ku katula mbote ku milongi iê.”

17 Ku muvu ua 1959, o jiphange ja ahatu a exana ué phala ku di longa o xikola íii. O Phang’etu Edna Bauer u lembalala kioso kievu o njimbu mu kiônge. Muéne uambe: “Ngi lembalala o kisangusangu kia jiphange ja ahatu, mu kithangana kieniókio ene eji tambula ué o milongi ia xikola ienióio.” Ku mivu ia bhiti jiphange javulu a katula mbote mu kudisonekesa mu xikola ia ukunji ua Nzambi, ia a tambula o ulongelu ua Jihova.Lelu tua mu suluka mu kutambula o ulongelu iú mu kiônge kietu kia dianga kia semana.—Tanga Izaia 54:13.

18, 19. (a) Lelu kiebhi ki tuene mu tambula itendelesu phala kukumbidila o ukunji uetu? (b) Mukonda diahi tuene mu kuimba mu iônge ietu? (Tanga o kitutu “ Mimbu ia Kidi.”)

18 Kiônge kia Sidivisu. Ku dimatekenu dia muvu ua 1919, akexile mu bhanga iônge phala o sidivisu ia kuboka. Mu kithangana kieniókio, ko jiphange joso mu kilunga akexile muia mu kiônge kieniókio—maji ió ngó akexile mu bhana o madivulu ku athu. Ku muvu ua 1923, o Kiônge kia Sidivisu akexile mu ki bhanga ngó veji imoxi ku mbeji, o jiphange joso akexile muia mu kiônge kieniókio. Ku muvu ua 1928, o ilunga a i tendelesa ku bhanga o Kiônge kia Sidivisu semana joso, ku muvu ua 1935, o A Sentinela ia suinisa o ilunga ioso ku bhanga o Kiônge kia Sidivisu mu ku kaiela o milongi mu kamukanda Director (mu ku bhita kithangana o kamukanda kaka a kexana Informante, mu kubhita thembu a kexana Kikalakalu Kietu Kia Utuminu).Mu ku bhita kithangana o kiônge kiki a mateka ku ki bhanga mu ilunga ioso sé ku fonga.

19 Lelu tuene mu tambula itendelesu phala kukumbidila o ukunji uetu mu kiônge kietu kia dianga kia semana. (Mat. 10:5-13) Se uala kiá ni ujitu ua ku tambula o kamukanda Milongi Phala o Iônge, o kuila uene mu di longa, ni ku kaiela o itendelesu iê kioso ki uia mu boka?

O Kiônge Kia Beta-Kota ku Muvu

O Jikidistá ene mu diongeka mivu ioso phala ku bhanga o Fesa ia Lembalasa ia Kufua Kua Jezú kala kia kexile mu bhanga o jiphange ku hama ia dianga K.K. (Tanga o kaxi 20)

20 O akaiedi a Jezú a a tendelesa ku bhanga o Lembalasa ia Kufua Kuê katé kia-nda vutuka. Kala kia kexile mu bhanga o Fesa ia Phasu, o Lembalasa ia Kufua Kua Jezú ene mu i bhanga ué veji imoxi ku muvu. (1 Kol. 11:23-26) Mu kiônge kiki muene mu kala athu avulu mivu joso. O kiônge kiki ki lembalesa o Jikidistá a a undu kuila, ala ni ujitu ua ku tumina kumoxi ni Jezú ku Utuminu ua Nzambi. (Loma 8:17) Ki kuatekesa o jimbudi ja mukua, ku xila ni ku kala fiiele ku Sobha ia Utuminu ua Nzambi.—Nzuá 10:16.

20-22. (a) Mukonda diahi tuene mu bhanga o Fesa ia Lembalasa ia Kufua Kua Jezú? (b) Mbote iahi i uene mu katula mu ku kala mu Fesa ia Lembalasa ia Kufua Kua Jezú mivu ioso?

21 Phang’etu Russell ni jiphange ja mukua a monene o valolo ia ku bhanga o fesa ia Lembalasa ia Kufua Kua Jezú, ejidile kuila a tokalele ku i bhanga veji imoxi ku muvu. O ku mbeji ia Kasamanu ku muvu ua 1880, O Mulangidi uambe: “Mu mbanza ia Pittsburgh tuene mu bhanga kiki mu mivu ioso . . . ku lembalala o Phasu [o Lembalasa ia Kufua Kua Jezú],  ni kudia o mbolo, ilombolola o mukutu ua Ngana ni kunua o vinhu, ilombolola o manhinga.” Mu ku bhita kithangana tua mateka ku bhanga iônge ia makota mu kithangana kia Fesa ia Lembalasa ia Kufua Kua Jezú. O kiônge kia dikota kia bhangele ku muvu ua 1889, mu kiônge kiki mua betele ku moneka athu, a tenesa 225 ia athu, ia a batizala-mu 22 kia athu.

22 Lelu ki tu bhanga dingi o Fesa ia Lembalasa ia Kufua Kua Jezú kumoxi ni kiônge kia dikota, maji tuene mu kuixana athu oso mu diembu dietu, phala kuia mu Kididi kietu kia Ubhezelu mba kididi kiengi. Ku muvu ua 2013, 19 a mazunda athu ndenge, akexile mu Fesa ia Lembalasa ia kufua kua Jezú. Mu kiki ki tuala ngó ni ujitu ua kuia mu Fesa ia Lembalasa ia Kufua Kua Jezú, maji tuala ué ni ujitu ua ku suinisa akuetu mu usuku uenhú ua beta-kota! O kuila uene mu kuixana o athu, phala kuia mu fesa ia Lembalasa ia Kufua Kua Jezú mivu ioso?

Kiebhi ki tu Mona o Iônge Ietu

23 O jiselevende ja Jihova kene mu mona o kitumu kia ku diongeka kuila kitumu kia bhonzo. (Jihe. 10:24, 25; 1 Nzu. 5:3) Mu kifika, o Sobha Davidi ua uabhele kiavulu o kuia mu inzo ia ubhezelu ku bheza Jihova. (Jisá. 27:4) Muéne ua sangulukile mu ku bhanga kiki kumoxi ni akua a zolele ué Nzambi. (Jisá. 35:18) Xinganeka ué ku phangu ia Jezú. Sumbala uexile hanji mona-ndenge maji ua zolele ku kala mu inzu ia Tat’ê phala ku mu bheza.—Luka 2:41-49.

O vondadi ietu ia ku diongeka kumoxi ni jiphange, kulondekesa kuila o Utuminu ua Nzambi kidi phala etu

24. O iônge ietu i tu kuatekesa ku bhanga ihi?

24 Kioso ki tuia mu iônge, tu kala ni ujitu ua kulondekesa o henda ietu kua Jihova, ni vondadi ietu ia ku kuatekesa o jiphange jetu. Tu londekesa ué o vondadi ietu ia ku di longa o ukexilu ua tokala kulondekesa o athu a xikina o Utuminu ua Nzambi, mukonda mu iônge ietu muene muene mu tu longa o milongi íii. O iônge ietu ué i tu suinisa phala tu tene ku kolokota mu ku bhanga o kikalakalu kia beta-o-kota, kia Utuminu ua Nzambi lelu—ku bhanga maxibulu a Sobha Jezú Kristu. (Tanga Matesu 28:19, 20.) Sé phata, o vondadi ietu ia ku bheza kumoxi ni jiphange, kulondekesa kuila muthu ni muthu mudietu, ua xikina kuila o Utuminu ua Nzambi, kidi. Tua tokala ku kolokota ku bhana valolo mu iônge ietu!

^ kax. 2 Sumbala tuala ni iônge ia semana, maji o miji mba muthu ni muthu mu kilunga ene mu a suinisa ku kala ué ni kizuua kia ku di longa ubheka mba ni muiji.

^ kax. 9 Ku muvu ua 2013, 180 a madiskursu a a tumikisa mu ilunga.