MILONGI IA KIBATULU

O Sobha u bhongolola kifuxi kia aboki

MU ITHANGANA iavulu, o jinguvulu a kanena ima iavulu, maji a lembua ku i kumbidila. Katé muene ni ió a mesena ku bhanga mbote ku athu, kene mu tena ku kumbidila ia kanena. Maji o Sobha Mexiia, Jezú Kristu, u kumbidila ioso i kanena muéne.

1, 2. Kikalakalu kiahi kia dikota kia tange Jezú kuila eji ki bhanga, ni kibhuidisu kiebhi kia beta-kota ki tua tokala o ku bhanga?

2 Kioso kia kituka sobha ku muvu 1914, Jezú ua kexile polondo phala ku kumbidila o kikanenu kia bhangele mu 1.900 ja mivu ku dima. Ande dia kufuá, Jezú ua kanena: “O Njimbu íii iambote ia Utuminu ua Nzambi, ia bhingi ku i tula mu ngongo ioso.” (Mat. 24:14, NW) O ki kumbidilu kia izuelu íii ieji londekesa o kijimbuete kia ku tukuluka kuê ku Utuminu. Maji kua moneka maka a mukuá: Kiebhi o Sobha kieji tena ku bhongolola kifuxi kionene kia aboki a di bheka mu vondadi iâ mu izuua isukidila-ku—se o athu a di banza ngó ene mudiâ, ka londekesa henda, ka xikina Nzambi? (Mat. 24:12; 2 Tim. 3:1-5) Tua tokala kuijiia, mukonda o kitambuijilu kia kibhuidisu kia tokala ku Jikidistá joso ja Kidi.

3. Kidielelu kiahi kia londekesa Jezú, ni nanhi ua mu longo o ukexilu iú?

3 Xinganeka dingi mu izuelu ia Jezú. O kuila o izuelu: “Ia bhingi ku i tula” ilondekesa kidielelu? Kiene muene! Jezú ua kijidile kuila muéne ueji kala ni athu eji di bheka mu vondadi iâ mu izuua isukidila-ku. Nanhi ua mu longo o ukexilu iú? Muéne ua di longo kua Tat’ê. (Nzuá 12:45; 14:9) Kioso kia kexile ku diulu, Jezú ua mono kuila Jihova u dielela o abhezi Iê a di bheka mu vondadi iâ. Tua-nda mona kiebhi Jihova kia londekesa o kidielelu kiki.

‘Mundu uê ua ka di Bheka Muene mu Vondadi Iâ’

4. Kikalakalu kiebhi kia bhingile Jihova ku akua Izalaiele ku kuatekesa, ni kiebhi kia tambuijila ene?

4 Ijiia ihi ia bhiti kioso Jihova kia tumina Mozé ku mu tungila balaka, kueji bheza o kifuxi kia Izalaiele. Jihova, bhu kaxi ka Mozé ua bhingi athu oso ku kuatekesa o kikalakalu kiki. Mozé ua ambela: “Uoso muxima ua mu zangumuka mu vondadi iê, a bheke ujitu kua Jihova.” Ihi ia bhiti? O  mundu “enda ni ku mu bhekela maujitu ma vondadi izuua ioso mu kimene.” Ene a bheka ima iavulu, kua bhingile ku a ‘fidisa o ku bheka dingi imbamba!’ (Mak. 35:5; 36:3, 6) O akua Izalaiele alondekesa kuila Jihova ua tokalele ku a dielela.

5 O kuila Jihova ua kexile ué mu kinga o ukexilu iú ku abhezi iê mu izuua isukidila-ku? Kiene! Midi ia mivu ande dia ku vuala Jezú mu ixi, Jihova ua tumina Davidi ku soneka o kithangana kieji mateka Mexiia o ku tumina. (Tanga Jisálamu 110:1-3.) Jezú, o Sobha, ueji kala ni jinguma jeji ku mu zemba. Maji muéne ueji kala ué ni athu avulu eji kala ku mbandu iê. Ene keji ku a jijidika ku sidivila o Sobha. Katé muene ni minzangala, eji di bheka mu vondadi iâ, ni ku kituka mundu uavulu, ni kuila eji ku a sokesa ni dimume mu kamene. *

Athu a di bheka mu vondadi iâ phala ku boka o Utuminu, avulu, edi kala dimume (Tanga o kaxi 5)

5, 6. Kala kilondekesa o divulu dia Jisálamu 110:1-3, ukexilu uebhi ua mesenene ku sanga Jihova ni Jezú ku abhezi a kidi mu izuua isukidila-ku?

6 Jezú uejidile kuila o kikanenu mu divulu dia Jisálamu 110 kieji di kumbidila kua muéne. (Mat 22:42-45) Mukonda dia kiki, muéne ua lungile mu ku dielela kuila muéne ueji kala ni kifuxi kia athu mu ixi eji di bheka mu vondadi iâ phala ku boka o njimbu iambote mu ixi oso. Ihi ilondekesa o misoso? O kuila o Sobha uene mu bhongolola kifuxi kia aboki a di bheka mu vondadi iâ mu izuua íii isukidila-ku?

“O Ujitu ni Kikalakalu Kiami, o ku Kola o Njimbu Íii”

7. Kioso kia mu tumbika ku Usobha, ihi ia bhange Jezú phala ku pelepalala o akaiedi iê phala ku bhanga o kikalakalu kia ku boka?

7 Kioso kia mu tumbika ku Usobha, Jezú ua bhange kima phala ku pelepalala o akaiedi’ê phala o kikalakalu kia dikota kieji bhanga. Kala ki tua di longo mu Kibatulu 2, muéne ua tonginina iu ua zelesa o tembulu iê tunde ku muvu 1914 ndu ku muvu 1919. (Mal. 3:1-4) Ku muvu 1919,  muéne ua solo o kimbadi kia fiiele phala ku kala ku pholo dia akaiedi iê. (Mat. 24:45) Tundé ku muvu uenhó, o kimbadi kia mateka ku bhana kudia mu nzumbi—bhu kaxi ka madiskursu mu iônge ia makota ni bhu kaxi ka madivulu metu—akexile mu suínisa ithangana ioso o Jikidistá joso ku bhanga o kikalakalu kia kuboka.

8-10. Kiebhi o iônge ia makota kia kuatekesa o kikalakalu kia ku boka? Bhana phangu. (Tanga ué o kitutu: “ Iônge ia Makota ia Suínisa o Kikalakalu Kia Kuboka.”)

8 Madiskursu mu kiônge kia dikota. Kuma o Adilongi a Bibidia a mesenene kiavulu ku tambula itendelesu, ene a diongeka mu mbanza ia Cedar Point, Ohio, E.U.A., mu kizuua kia 1 ndu 8 kia mbeji ia Katutu ua muvu 1919, phala ku bhanga kiônge kia dikota, tunde kia bhitile o Ita ia dianga ia bhiti ku Mundu Uoso. Mu kizuua kia kaiiadi, o Phange Rutherford ua bhange diskursu iu uambela oso a xikamene mu kiônge kia dikota, uixi: “O kikalakalu kia Kidistá mu ixi . . . o ku tula o njimbu ia utuminu ua Ngana.”

9 O ngolokela ia dikota mu kiônge a i bhange mu kizuua kia katatu, kioso o Phange Rutherford kia bhange o diskursu dia kexile ni diambu: “Phala o Akalakadi,” dia moneka ué mu Mulangidi ua kexile ni diambu: “Ku Boka o Utuminu.” Muéne uambe dingi: “Saí ithangana o Kidistá u dibhudisa: Mukonda diahi ngala mu ixi? O kitambuijilu kia tokala ki kala: O Ngana ua ngi solo ngi mukunji uê phala kuambata o njimbu ia Nzambi ku mundu, ni kuila ujitu ni kikalakalu kiami o ku kola o njimbu íii.”

10 Mu diskursu didi, o Phange Rutherford ua bhanene ngolokela ia kadivulu ka ubhe, A Idade de Ouro (lelu a ka i xana Despertai!), eji ka bhanga phala kulondekesa ku athu kuila, a tokala ku dielela ngó ku Utuminu ua Nzambi. Muéne uebhuidisa ué ku jingivuidi se nanhi ua mesenene ku bhana o kadivulu kaka ku athu. Saí milongi ia lungu ni kiônge kia dikota, iambe: “Oso a sangulukile kiavulu ni ngolokela. Midi jisamanu ja athu a balumuka kumoxi.” * Kienhiki, o Sobha ua kexile ni kifuxi kia athu, akexile polondo phala ku tula o njimbu ia Utuminu uê!

11, 12. Ihi iambe O Mulangidi ua 1920 ia lungu ni thembu ieji mateka o kikalakalu kia kanene Jezú?

11 Madivulu metu. O kadivulu, O Mulangidi, ka kuatekesa o athu ku tendela kiambote o kikalakalu kia kanena Jezú—ku boka o njimbu iambote ia Utuminu. Tu di longe phangu ia bhiti tunde ku muvu 1920.

12 Njimbu iebhi eji i tula mu ku kumbidila o divulu dia Matesu 24:14? O kikalakalu kiki eji ki bhanga thembu kuxi? O milongi ia Mulangidi ua 1 ua Kavua ua 1920 ua kexile ni diambu: “Njimbu ia Utuminu,” uambe: “O njimbu iambote bhabha, ia lungu ni dizubhilu dia mundu iú ua iibha ni njimbu ia lungu ni utuminu ua Mexiia uo tumbike kiá.” O milongi ia londekesa ué o thembu ieji mateka o ku boka o  njimbu íii, mu kuzuela: “O njimbu íii eji ku i boka kioso kieji bhita o [Ita ia Dianga ku Bhita ku Mundu uoso] katé ku ‘hadi ia dikota.’” Kienhiki, o milongi, iambe: “Kiki kiene o kithangana . . . kia ku tula ku Kidistándade o njimbu íii iambote.”

13. Kiebhi O Mulangidi ua 1921 kia zuela ia lungu ni ukexilu uambote ua Jikidistá a a undu?

13 O kuila o mundu ua Nzambi eji ku u jijidika ku bhanga o kikalakalu kia kanene Jezú? Kana. O milongi ia kexile ni diambu: “Suína,” mu Mulangidi ua 15 ua Katanu ua muvu 1921, ua zuela maka alungu ni vondadi ia Jikidistá a a undu ku bhanga o kikalakalu. Kala muthu a mu suínisa o ku dibhudisa: “Kiki ki ujitu ua dikota ku bhanga o kikalakalu kiki?” O Mulangidi ua suluka ni kuzuela: “Tuejiia kuila se u mona o kikalakalu kiki [kala ujitu ua dikota] ua-nda kala kála Jelemiia, ua monene o mak’â Ngana kala ‘túbhia tua uamene ku muxima uê’ ni ku mu suínisa phala ka bhuile o kuzuela.” (Jel. 20:9) Kiki kia londekesa o kidielelu kiala na-kiu Jihova ni Jezú Kristu ku athu alondekesa o ufiiele uâ ku Utuminu.

14, 15. Ku muvu 1922, O Mulangidi ua tendelesa o Jikidistá a a undu ku boka o athu mu ukexilu uebhi?

14 Kiebhi o Jikidistá ja kidi kia tokala ku tula ku athu o njimbu ia Utuminu? O milongi ia kexile ni diambu: “Sidivisu ia Tokala,” mu Mulangidi ua 15 Kakuinhi ua 1922, ia tendelesa o Jikidistá a a undu ku boka uá ni “kuambata ni nguzu ioso o madivulu ku athu ni ku a tangela o njimbu ku mabhata mâ mu ku a tangela kuila o Utuminu ua Nzambi ua zukama.”

15 Kienhiki tundé ku muvu 1919, Kristu bhu kaxi ka Kimbadi kia Fiiele, uene mu londekesa mu ithangana iavulu kuila, o ujitu ni kikalakalu kia Kidistá mu ixi, o ku boka o njimbu ia Utuminu. Maji kiebhi-phe o Adilongi a Bibidia kia divu kioso kia a suínisa o ku boka o njimbu ia Utuminu?

“O Jifiiele A-nda di Bheka mu Vondadi Iâ”

16. Kiebhi o tufunga kia tambuijila o kitendelesu kia kuila oso a tokala ku boka o njimbu iambote ku athu?

16 Ku muvu 1920 ni 1930, saí athu akexile mu banza kuila, o Jikidistá joso a a undu ka bhingile ku boka o njimbu iambote. O Mulangidi ua 1 ua Kamoxi ua 1927, ua jimbulula o ima ia kexile mu bhita: “Lelu saí iá mu ngeleja [kilunga] a sidivila kala tufunga . . . ka xikina o ku suínisa o jiphange jâ ku boka, ni kuila ene uá a dituna o ku bhanga o sidivisu ia kuboka. . . . ene ka xikina o kitendelesu kia kuia mu boka inzo ni inzo mu ku tula o njimbu ia Nzambi, ia Sobha iê ni ia utuminu uê ku athu.” O milongi iambe: “O kithangana kia bhixila kia athu oso a fiiele ku batula o ukamba ni athu enhá, ni ku a tangela kuila etu [o jikidistá ja fiiele] ki tua dielela dingi ku maiala enhá ni ku a katula o ujitu ua ku kala tufunga mu kilunga.” *

17, 18. Kiebhi o athu mu ilunga kia tambuijila o kitendelesu kia tundile mu mbonge ni ihi iene mu bhanga ué mundu uavulu lelu?

17 Kienhiki, o athu mu ilunga a belesela o kitendelesu kia tundile mu mbonge. Ene a mono kuma,  ujitu ua dikota ku boka o njimbu ia Utuminu. O Mulangidi ua 15 ua Katanu ua 1926, ua jimbulula kiki: “O athu a fiiele a ka di bheka mu vondadi iâ, . . . phala kuambata o njimbu íii ku athu.” O athu enhá a kumbidila o kikanenu mu divulu dia Jisalamu 110:3, mu ku kala polondo phala ku zokela o Sobha Mexiia.

18 Mu 100 ja mivu ja bhiti, athu avulu a di bheka mu vondadi iâ phala ku boka o njimbu ia Utuminu. Mu ibatulu ku pholo, tua-nda di longa, kiebhi ene kiene mu boka—o maukexilu ni jifalamenda ja ku boka—ni ihi iene mu bhita mu ku boka. Maji kia dianga, tua-nda mona se mukonda diahi athu avulu a di bheka mu kikalakalu kiki kia ku boka o njimbu ia Utuminu mu vondadi iâ, sumbala a tungu ku mundu kuala athu a di banza ngó ene. Kioso ki tuia ni ku di longa se mukonda diahi, kima kiambote ku dibhudisa: ‘Mukonda diahi eme ngene mu boka o njimbu iambote ku athu?’

“Diangenu-phe [ku Sota] o Utuminu ua Nzambi”

19. Mukonda diahi tu belesela o kitendelesu kia Jezú kia ku ‘dianga ku sota o Utuminu ua Nzambi?’

19 Jezú ua tendelesa o akaiedi iê: “Diangenu-phe [ku sota] o Utuminu ua Nzambi.” (Mat. 6:33) Mukonda diahi tua tokala ku belesela o kitendelesu kiki? Mukonda tuejiia o valolo ia Utuminu, o kima kia beta o kota mu vondadi ia Nzambi. Kala ki tua di longo kiá mu kibatulu kia bhiti, o nzumbi ikôla bhofele-bhofele ia jingununa o kidi kia lungu ni vondadi ia Utuminu. Kioso o kidi kia lungu ni Utuminu ki tula ku muxima uetu, tu suína dingi mu ku dianga ku sota o Utuminu ua Nzambi.

Kala muthu u sanguluka kiavulu mu ku sanga jimbongo jo sueke, o Jikidistá a sanguluka mukonda dia ku sanga o kidi kia lungu ni Utuminu (Tanga o kaxi 20)

20 Jezú ua kijidile ihi ieji bhanga o akaiedi’ê ni kitendelesu kia ku dianga ku sota o Utuminu. Tala o kifika kiê kia lungu ni jimbongo jo sueke. (Tanga Matesu 13:44.) Mu kikalakalu kiê kia kizuua ni kizuua, o mukalakadi mu kifika, u sanga jimbongo jo sueke, anga u mona o valolo ia jimbongo jiji. Ihi i bhanga muéne? ‘Mu ku sanguluka kuê anga uia, u sumbisa ioso iala na-iu, anga u sumba o mukáu uenhó.’ Ihi i tua di longo bhabha? Tua di longo kuma, kioso ki tu sanga o kidi kia Utuminu ni ku mona o valolo iê, ni ku sanguluka kuoso, tu bhanga ioso phala ku ta o Utuminu ua Nzambi—ku pholo. *

21, 22. Kiebhi o athu a zokela o Utuminu kiene mu londekesa kuila a mu dianga ku sota o Utuminu? Bhana phangu.

21 O athu a zokela o Utuminu, alondekesa mu ima ia bhanga, kana mu izuelu kuila, a mu dianga ku sota o Utuminu ua Nzambi. Ene a bhakula o mienhu iâ, o mauhete mâ, ni jimbongo jâ phala ku kuatekesa o kikalakalu kia ku boka o Utuminu. Saí athu a bhanga ioso phala ku bokona mu sidivisu ia thembu ioso. Aboki oso a di bheka mu  vondadi iâ, ene mu mona kuila Jihova u besoala ió a dianga ku sota o Utuminu ua Nzambi. Tu di longe phangu imoxi.

22 Avery ni Lovenia Bristow a sidivila kumoxi kala akunji (aboki a thembu ioso) ku Sulu ia Estados Unidos ku muvu 1920. Mivu ku pholo, Lovenia u di lembalala: “Avery n’eme tua sanguluka kiavulu mu ku kala kumoxi mu sidivisu ia thembu ioso tunde ku muvu uenhó. Kua kexile ithangana, ki tu kexile ni kitadi kia ku sumba kazolina phala o dikalu dietu mba phala ku sumba kudia. Maji, Jihova ua tu kuatekesa mu ithangana ioso. Nuka tua banze kueha o sidivisu ia thembu ioso.” Lovenia ua di lembalala o kithangana kioso kia kexile mu sidivila mu companhia Pensacola, mbanza ia Florida, ka kexile ni kitadi ni kudia kua soko. Ene a vutuka kubhata, ia a sange mabunda a iiadi a kudia, ni mukanda uambele: “Phange jenu ja kazola, companhia Pensacola.” * Mu ku xinganeka mu mivu ioso ia bhange mu sidivisu ia thembu ioso, Lovenia uambe: “Jihova ka tu bhana dikunda. Muéne ka kambe ku tu kuatekesa.”

23. Kiebhi ki u divua kia lungu ni kidi kia Utuminu ki ua sange, ni ihi i ua mesena o ku bhanga?

23 Etu oso ki tu tena ku kala mu sidivisu ia thembu ioso. O ukexilu ua muenhu uetu u lunguluka. Maji, etu oso tu tena ku kala ni ujitu ua ku tula o njimbu iambote ni muxima uoso. (Kol. 3:23) Mukonda tua zolo o kidi kia Utuminu, tua mesena—kiavulu—ku bhanga ioso phala ku sidivila kiambote Jihova. Ki kiene ué ki ua mesena?

24. Kima kiahi kia beta o kota kia mu bhanga o Utuminu ua Nzambi mu izuua isukidila-ku?

24 Mu mivu iavulu o Sobha uene mu kumbidila o izuelu iê iala mu divulu dia Matesu 24:14. Iu uene mu bhanga kiki sé ku jijidika muthu. Kioso o athu enhá kia xisa o mundu, a di bheka mu vondadi iâ phala ku boka o njimbu. O kikalakalu kia bhanga ku ixi ioso kia ku boka o njimbu iambote, kijimbuete kilondekesa kuila Jezú ua mu tumina kiá ku Utuminu—o kikalakalu kia beta o kota kia mu bhanga o Utuminu ua Nzambi mu izuua isukidila-ku.

^ kax. 5 Mu Bibidia, o kizuelu dimume, kilombolola ndumba.—Dim. 27:28; Mik. 5:7.

^ kax. 10 O kamukanda: O Kikalakalu a ki Bhana Kua Nanhi, kambe: “O kadivulu, A Idade de Ouro a ka bhange phala ku boka inzo ni inzo mu ku tula o njimbu ia utuminu. . . . ka ka bhange ngó phala ku zuela ni athu. O kadivulu, A Idade de Ouro, a tokala ku ka bhana ué ku athu ku mabhata mâ, ki kale se o muthu a bhana kitadi mba kana.” Mu ku bhita mivu, o jiphange a a tendelesa ku bhinga kitadi ku athu a mesenene o kadivulu, A Idade de Ouro ni kadivulu, O Mulangidi. Tundé mu kizuua 1 kia mbeji ia Kauana ua 1940, o mundu ua Jihova, a u tendelesa ku bhana o madivulu ni ku soneka se madivulu akuxi a bhana ku athu.

^ kax. 16 Mu thembu iná, o athu mu ilunga ene akexile mu sola o tufunga. Kienhiki, o athu mu ilunga a tenene ku dituna ku sola muthu ka mu belesela o kitendelesu kia ku boka. O maka alungu ni ku sola o tufunga, tua-nda di longa nau mu Kibatulu 12.

^ kax. 20 Jezú ua zuela dingi o maka enhá mu kifika kiê kia lungu ni ngenji uia mu sota phélula iala ni valolo iavulu. Kioso o ngenji kia sanga o phélula íii, muéne u sumbisa o ima iê ioso phala ku i sumba. (Mat. 13:45, 46) O ifika iiadi, i tu londekesa ué kuila tu tena ku di longa ia lungu ni Utuminu mu maukexilu avulu. Saí iá a a sanga ku mabhata mâ phala ku di longa o Bibidia; a mukuá ene a sota. Maji né muene se a tu sange mba etu tua soto o kidi, tu bhanga ioso phala ku ta o Utuminu ua Nzambi ku pholo.

^ kax. 22 O ilunga a ijidile mu dijina, companhia.