Ku bokona mu madisá

Ku bokona mu madisá

 Mbandu 8

Se o Muiji u Bhita mu Mavuua

Se o Muiji u Bhita mu Mavuua

“Mua fuama mu sanguluka, sumbala kiosu’iki kua bhingi mu di kuata mukondo, mukonda dia malamba ma vudila-ku, ku muala kubhita na-u.”1 Phetele 1:6

Né muene u bhanga ioso phala ku kala ni ukaza ni muiji ua sanguluka, saí ima i tena ku bhita i katula o ku sanguluka kuê. (Ndongixi 9:11) Nzambi ni henda ioso u tu bhana o kikuatekesu kia tokala kioso ki tu bhita mu ibhidi. Se u kaiela o itendelesu ia Mikanda Ikola, eie ni muiji uê ua-nda tena ku dibhana katé muene ni ibhidi ia makota.

 1 DIELELA KUA JIHOVA

IHI I ZUELA O BIBIDIA: “Héle ienu ioso xilenu-u Nzambi, kuma muène ua mi kuatela muanu.” (1 Phetele 5:7) Lembalala jinga kuila, Nzambi ki muéne ua mu ku bhekela o jiphaxi mu ua mu bhita. (Tiiaku 1:13) Kioso ki ua-ndaia ni ku zukama kua Nzambi, muéne ua-nda ku bhana o kikuatekesu kia tokala. (Izaia 41:10) O Bibidia i zuela: “Lundululenu o mixima ienu kua muéne.”Jisálamu 62:8.

O ku tanga ni ku di longa o Bibidia izuua ioso, kua-nda ku suínisa ué. Mu ku bhanga kiki, ua-nda mona kiebhi Jihova kia “tu kuatekesa mu hadi ietu ioso.” (2 Kolindo 1:3, 4; Loma 15:4) Muéne u ku kanena kuila, ua-nda ku bhana “o kutululuka kua Nzambi [ku] somboka o kitongoluelu kioso kia muthu.”Filipe 4:6, 7, 13.

IHI I U TENA O KU BHANGA:

  • Samba mu ku bhinga ku tululuka kua Jihova, n’a ku kuatekese o ku xinganeka kiambote

  • Ijiia o jindunge joso ja ku dibhana ni maka anga u sola-ku o ndunge i u mona kuila ia beta-o-kota

2 DILANGE EIE-MUÉNE NI MUIJI UÊ

IHI I ZUELA O BIBIDIA: “Muxima ua hete, u sota kuijiia; mátui ma jinjimu ma sota kutongolola.” (Jisabhu 18:15) Sota kuijiia kiambote o ima. Sota kuijiia ué ihi ia bhindamena kala muthu ku muiji uê. Zuela nâ. U a evua.Jisabhu 20:5.

Se muthu ku muiji u fua? Kana ku kala ni uôma mba jisonhi ja ku dila. Lembalala kuila katé muene ‘Jezú ua didile.’ (Nzuá 11:35; Ndongixi 3:4) Ua tokala ué ku katula kithangana kia soko phala ku nhoha ni ku zeka. (Ndongixi 4:6) O ku bhanga kiki, kua-nda ku kuatekesa o ku kolokota.

IHI I U TENA O KU BHANGA:

  • Ande dia ku moneka o ibhidi, enda kiá ni ku di zuelesa ni muiji uê. Se u bhanga kiki, kioso kia-nda moneka maka, ene ka-nda kala ni hele ia ku di kunda n’eie

  • Di kunde ni athu a bhiti ué mu maka mu ua mu bhita

 3 BHINGA KIKUATEKESU KUA AKUENU

IHI I ZUELA O BIBIDIA: “Dikamba u zola mu thembu joso; undandu u di monekena ku jiphaxi.” (Jisabhu 17:17) O makamba mê a mesena ku ku kuatekesa, maji ene nange kejiia ihi ia tokala o ku bhanga phala ku ku kuatekesa. Kienhiki, kana ku kala ni jisonhi ja kua tangela ihi i ua mesena. (Jisabhu 12:25) Bhinga ué kikuatekesu mu nzumbi kua ió ejiia kiambote o Bibidia. O kikuatekesu kia-nda ku bhana bhu kaxi ka Bibidia, kia-nda ku suínisa kiavulu.Tiiaku 5:14.

Ua-nda tena ku kolokota se u di lunga izuua ioso ni athu ala ni kixikanu kia kidi kua Nzambi ni ku dielela mu ikanenu iê. Ua-nda divua ué kiambote kioso ki ua-nda kuatekesa akuenu a bhingi ué kikuatekesu. Zuela nâ o ima i ua mu di longa ia lungu ni Jihova ni ikanenu iê. Kuatekesa jinga oso a bhindama, kana ku kala ubheka uê, di lunge ni ió a ku zolo ia a mesena o mbote iê.Jisabhu 18:1; 1 Kolindo 15:58.

IHI I U TENA O KU BHANGA:

  • Zuela ni makamba mê a kazola, xikina o kikuatekesu kiâ

  • Ijiia ihi i ua bhindamena