1. Nanhi ua tu bhana o muenhu?

JIHOVA muéne “Nzambi ia muenhu.” (Jelemiia 10:10) Muéne o Mubhangi uetu, ua tu bhana o muenhu. O Bibidia i zuela: “Eie muene ua bhange ioso mu vondadi iê.” (Dijingunuinu 4:11, NW) Jihova ua mesenene kuila tu kala ni muenhu. O muenhu ujitu uonene ua tu bhana muéne.—Tanga Jisálamu 36:9.

2. Kiebhi ki tu tena kusanguluka ku muenhu?

2 Jihova ua tu bhana ioso i tua bhindamena phala tu kale ku muenhu, kála o kúdia ni menha. (Ikalakalu 17:28) Maji muéne ka tu bhana ngó o ima íii, ua mesena ué kuila tu sanguluka kiavulu ku muenhu. (Ikalakalu 14:15-17) Phala kusanguluka ku muenhu, tua tokala tu belesela o ijila ia Nzambi.—Izaia 48:17, 18.

NZAMBI U BHANA VALOLO KU MUENHU

3. Ihi ia bhange Jihova kioso Kaini kia jibha phang’ê Abele?

3 O Bibidia i tu longa kuila, Jihova u bhana valolo ia dikota ku muenhu uetu ni mienhu ia akuetu. Mu kifika, kioso Kaini—mon’â Ada ni Eva—kia kexile ni njinda iavulu ia ndeng’ê Abele, Jihova ua dimuna Kaini kuila ua tokalele kutululuka. Maji Kaini kevu Jihova, ua futuluka dingi iu ua “lungulukila Abele, phang’ê, hé u mu jibha.” (Dimatekenu 4:3-8) Jihova ua kaxtikala Kaini mukonda dia kujibha Abele. (Dimatekenu 4:9-11) Kienhiki, kiluezu kia dikota kukala ni njinda mba kuzemba muthu, mukonda i tu suínisa kubhanga ima ia iibha ku akuetu. O muthu u bhanga kiki, ka tena kukala ni muenhu ua kalela-ku. (Tanga 1 Nzuá 3:15.)  Phala kusangulukisa o muxima ua Jihova, tua tokala tu zola athu oso.—1 Nzuá 3:11, 12.

4. O kijila kia bhele Nzambi kua akua Izalaiele kia kuila “kana kujibha mukuenu”, ki tu longa ihi ia lungu ni ujitu ua muenhu?

4 Mu kubhita jimidi ni jimidi ja mivu, Jihova ua bhana kua Mozé Dikuinhi dia Ijila, mu kulondekesa kuila muéne u bhana valolo ia dikota ku muenhu. Kijila kimoxi kiambele kiki: “Kana kujibha mukuenu.” (Matendelelu 5:17) Se muthu ua jibhile mukuâ mu vondadi, muthu iú a tokalele ué ku mu jibha.

5. Kiebhi Nzambi kia divua ia lungu ni kuseluka?

5 Kiebhi Nzambi kia divua ia lungu ni kuseluka? Katé muene ni muenhu ua mona mu mala, uala ni valolo ia dikota kua Jihova. O Ijila ia Bhana Jihova ku akua Izalaiele, iambele kuila, se mu kala muthu u lokola muhatu uemita, mukonda dia kiki o mona mu divumu ufua, o muthu iú a tokalele ku mu jibha. (Tanga Makatukilu 21:22, 23; Jisálamu 127:3.) Kiki ki tu longa kuila, o kuselukisa mba kukatula o mona mu mala, kituxi bhu pholo ia Nzambi.—Tala o Kibandekesu kia 28.

6, 7. Ihi i tua tokala kubhanga phala kulondekesa kua Jihova kuila tua mu bhana valolo ku muenhu?

6 Kiebhi ki tu tena kulondekesa kua Jihova kuila tu bhana valolo ia dikota ku muenhu uetu ni mienhu ia akuetu? Ki tu tokala kubhanga kima ki tesa o muenhu uetu ni ua akuetu mu iluezu. Ki tu tokala kuxibha makanha mukonda o makanha a tena ku tu katesa ni ku tu jibha.

7 Nzambi muéne ua tu bhana o muenhu ni mukutu, kienhiki tua tokala tu bhanga ima i uabhela muéne. Mu kiki, tua tokala tu langa kiambote o mukutu uetu. Se tu kamba kubhanga kiki, tua-nda xila bhu pholo ia Nzambi. (Loma 6:19; 12:1; 2 Kolindo 7:1) Ki tu tena kubheza Jihova, ua tu bhana o muenhu, se tu kamba kubhana valolo ku  muenhu. Sumbala ku bhonza kueha o maukexilu a iibha, Jihova ua-nda ku tu kuatekesa se tu bhanga nguzu, mukonda muéne u bhana valolo ia dikota ku muenhu.

8. Ihi i tua-nda bhanga phala ki tu te o muenhu uetu ni ua akuetu mu iluezu?

8 Tua mono kiá kuila o muenhu uala ni valolo ia dikota. Jihova ua tu dielela kuila tua-nda langa kiambote o muenhu uetu ni mienhu ia akuetu. Tu bhanga kiki, mu kuendesa kiambote o dikalu dietu mba bixi. Tu lenga ué o itonokenu ia iibha i tena kuta o muenhu uetu mu iluezu. (Jisálamu 11:5) Tua tokala kubhanga ué ioso phala ku tungisa kiambote o nzo ietu. Jihova ua tumine akua Izalaiele: “Kioso ki u tunga onzo iobhe, o bhu hòngo kondoluesa-bhu kifikidilu bhu ditala dioso di u iudika-bhu, phala ki mu langumuke muthu bhu hòngo ié, anga eie uiza mu mulonga ua manhinga, exi, uajibha.”—Matendelelu 22:8.

9. Kiebhi ki tua tokala kutalatala o iama?

9 Jihova ua mesena kuila, tu langa kiambote o iama. Muéne u tuehela kujibha iama phala kudia ni kubhanga izuatu. Muéne u tuehela ué kujibha iama se iene ia mesena ku tu bhanga kia iibha. (Dimatekenu 3:21; 9:3; Makatukilu 21:28) Maji ki tu tokala kubhanga kima kia iibha ku iama mba ku i jibha ngó mukonda tua mu tonoka.—Jisabhu 12:10.

XILA O MUENHU

10. Kiebhi ki tuejiia kuila o manhinga a lombolola muenhu?

10 O manhinga ala ni valolo ia dikota bhu pholo ia Jihova, mukonda ene a lombolola muenhu. Kioso Kaini kia jibha Abele, Jihova ua mu tangela: “Dízui dia manhinga dia phang’é dia dikola kokuami tundé mu mavu.” (Dimatekenu 4:10) O manhinga a Abele akexile mu lombolola muenhu. Jihova ua kaxtikala Kaini mukonda dia kujibha Abele. Kioso kia bhiti o Diluviu mu izuua ia Noué, Jihova ua londekesa  dingi kuila, o manhinga muenhu. Jihova uehela Noué ni muiji uê kudia xitu. Muéne uambe: “Ima ioso ia muenhu, iene mu kuenda, i kale kúdia kuenu; mukuá ki nga mi bhana idima ia uisu, iene ioso kindala nga mi bhana na-iu.” Maji kuexile kima kimoxi kia fudisa Jihova o ku ki dia: “O xitu-phe ki mu i die ni muenhu uê, o manhinga.”—Dimatekenu 1:29; 9:3, 4.

11. Kitumu kiahi kia lungu ni manhinga, kia bhanene Nzambi kua akua Izalaiele?

11 Mu kubhita 800 a mivu kioso Jihova kia tangele Noué kuila ka tokalele kudia manhinga, muéne ua tangela dingi o mundu uê: “Luamukua ué, o uoso-uoso mu an’a Izalaiele, mba mu jinzuangiza joso jala ku nhunganena momu’â, anga u ta unhanga ua xitu mba njila ioso i tokala ku i dia, manhinga mê a ma bhubhisile bhoxi, nda a a vumbike ni mavu.” Jihova uambe dingi: “Kana kúdia manhinga.” (Ijila 17:13, 14) Jihova ua mesenene hanji kuila, o mundu uê u bhana valolo ku manhinga. Ene a tokalele kudia o xitu, maji o manhinga kana. Mu kujibha kiama phala ku kidia, ene a tokalele kubhubhisila o manhinga mê bhoxi.

12. Ihi i banza o Jikidistá ia lungu ni manhinga?

12 Mu kubhita mivu, kioso kiafu Jezú, o jipoxolo ni tufunga mu kilunga mu mbanza ia Jeluzaleme, a bhangele kiônge phala kutonginina o jimbandu ja Kitumu kia bhele Nzambi kua akua Izalaiele, ja tokalele hanji ku ji kaiela kuala o Jikidistá. (Tanga Ikalakalu 15:28, 29; 21:25.) Jihova ua a kuatekesa o kuijiia kuila o manhinga akexile hanji ni valolo phala muéne, ni kuila o Jikidistá a tokalele ué kubhana valolo ku manhinga. O Jikidistá ku hama ia dianga, ka tokalele kudia manhinga mba xitu ni manhinga mê. Se a ki bhangele, kieji kala kituxi kia dikota kála o kubheza iteka ni kubhanga undumbu. Tundé ku hama ia dianga, o Jikidistá ja kidi jene mu dituna kudia mba kuxibha manhinga. Abha  lelu? Katé lelu, Jihova ua mesena kuila tu bhana valolo ia dikota ku manhinga, mukonda kima kikôla.

13. Mukonda diahi o Jikidistá ka te manhinga mu mukutu?

13 O kuila kiki kilombolola kuila o Jikidistá ka tokala kuta manhinga mu mukutu? Kiene, ka tokala. Jihova ua tu tangela kuila ki tu tokala kudia ni kuxibha manhinga. O dotolo se u ku tangela kuila kana kunua uhôlua, o kuila ueji u zuila mu mixibha? Mu kidi kana! Kiene kimoxi ué, o kitumu kia kuila ki tu tokala kuxibha né kudia manhinga, kilombolola kuila ki tu tokala kuta manhinga mu mukutu.—Tala o Kibandekesu kia 29.

14, 15. Mukonda diahi o Jikidistá a tokala kuxila o muenhu ni kubelesela Jihova?

14 Maji se a tu tangela kuala o dotolo kuila, tua-nda fuá se ki tu te manhinga mu mukutu? Kala muthu ua tokala kusola se u belesela o kitumu kia Nzambi kia lungu ni manhinga mba kana. O Jikidistá a bhana valolo ia dikota ku ujitu ua muenhu, kienhiki tua-nda sota milongo ia mukuá phala kudisanza; maji ki tua-nda xikina ku tu ta manhinga mu mukutu.

15 Tu bhanga ioso phala tu kale ni sauídi iambote, maji kuma o manhinga kima kikôla phala Nzambi ki tua-nda xikina kuta manhinga mu mukutu. O kubelesela Jihova kia beta-dingi-kota, o kulebhesa o muenhu uetu mu ku mu bhukumukina ndenge. Jezú uambe: “Uoso ua mesena kubhulula muenhu uê, ua-nda ku u texi; o uoso u texi muenhu uê mukonda diami, ua-nda ku u bonga.” (Matesu 16:25) Tua mesena kubelesela Jihova, mukonda tua mu zolo. Muéne uejiia o ima i tu bhanga kiambote, tu bhanga ué kiki mukonda o muenhu uala ni valolo ia dikota bhu pholo ia Jihova.—Jihebeleu 11:6.

16. Mukonda diahi o jiselevende ja Nzambi a mu belesela?

16 O jiselevende ja Nzambi a mesena kiavulu kubelesela  o kitumu kiê kia lungu ni manhinga. Ene ka-nda dia né kuxibha manhinga, ka-nda xikina ué kuta manhinga mu mukutu phala kudisanza. * Maji a-nda sota milongo ia mukuá phala kudisanza. A xikina ni kidi kioso kuila o mubhangi ua muenhu ni ua manhinga, ua beta kuijiia o ima i bhanga kiambote kua ene. O kuila eie u xikina kuila Jihova ua beta kuijiia o ima i ku bhanga kiambote?

NZAMBI UEHELE NGÓ O ATHU KUBHANGA KIMA KIMOXI NI MANHINGA

17. Ihi ngó ia tokalele kubhanga akua Izalaiele ni manhinga?

17 Mu kitumu kia bhana Nzambi kua Mozé, muéne uambe: “Muenhu ua xitu uala mu manhinga; kiene ki nga mi bhela-u ku thandu’a kalatódio mu ku mi jimuina kikuma, mienhu ienu phala ibhanduluke; mukonda o manhinga ene ngó a tena kubhanga kiamenga kizelesa o mienhu ia athu.” (Ijila 17:11) Kioso akua Izalaiele kia kexile mu ta kituxi, ene eji bhinga muloloki kua Nzambi mu kusatela kiama ni kubhinga ku mukunji ua dikota phala kubhubhisa manhinga ku thandu’a kalatódio mu tembulu. Iú uene ngó o ukexilu uehele Jihova akua Izalaiele kubhanga ni manhinga.

18. Mbote iahi i tu katula ku sata ia Jezú?

18 Kioso Jezú kieza mu ngongo, muéne ua bhingana o kitumu kia kusatela iama mu kubhana o muenhu uê mba manhinga phala o muloloki ua ituxi ietu. (Matesu 20:28; Jihebeleu 10:1) O muenhu ua Jezú ua kexile ni valolo ia dikota, kioso Jihova kia mu fukununa iu ua vutuka ku diulu, Jihova ua jikula o njíla phala o athu kukala ni muenhu ua kalela-ku.—Nzuá 3:16; Jihebeleu 9:11, 12; 1 Phetele 1:18, 19.

Kiebhi ki u tena kulondekesa kuila ua mu xila o muenhu ni manhinga?

19. Ihi i tua tokala kubhanga phala ‘ki tu kale ni kikuma kia manhinga ma muthu?’

 19 Tu sakidila kiavulu Jihova mu ku tu bhana o ujitu iú ua dikota ua muenhu! Mukonda dia kiki, tuene mu tangela o athu kuila se ene a xikina Jezú, a-nda kala ni muenhu ua kalela-ku. Etu tua zolo kiavulu o athu, mukonda dia kiki, tu bhanga ioso phala kua longa phala a tambule o muenhu. (Izekiiele 3:17-21) Se tu bhanga kiki, tua-nda zuela kála kia zuela Phaulu: “Nga zele, kana muthu mudienu u texika, o manhinga mê ni ma ngi kala ko-kuami. Kuma ki nga fulu ku mi jimbuila o mutendelu uoso ua Nzambi.” (Ikalakalu 20:26, 27) Tu londekesa kuila tu xila o muenhu mu ku tangela o athu ia lungu ni Jihova ni valolo i bhana muéne ku muenhu.

^ kax. 16 Phala kuijiia dingi ia lungu kuta manhinga mu mukutu, tanga o jimbandu 77-79 mu divulu ‘Kala mu Henda ia Nzambi,’ a di bhange ku Jimbangi ja Jihova.