1. Musambu uebhi ua fuma u tua-nda di longa mu kibatulu kiki?

JIMIDI ni jimidi ja athu ejiia kiambote o musambu ua Tat’etu mba o Musambu ua Ngana. Jezú ua bhange o musambu iú phala kukuatekesa o maxibulu mê kuijiia o kusamba. Ihi ia zuela muéne mu musambu iú? Mukonda diahi o musambu iú uala ni valolo ia dikota phala etu lelu?

2. Ima itatu iebhi ia beta-o-kota ia tu longo Jezú o kubhinga mu musambu?

2 Jezú uambe: “Tata ietu uene mu diulu, dijina dié a dixile. Utuminu ué uize. Vondadi ié a i bhange bhoxi, kala kiala ku i bhanga ku diulu.” (Tanga Matesu 6:9-13.) Mukonda diahi Jezú ua tu longo kubhinga o ima itatu íii mu musambu?—Tala o Kibandekesu 20.

3. Ihi i tua tokala kuijiia ia lungu ni Utuminu ua Nzambi?

3 Tua di longo kiá kuila o dijina dia Nzambi, Jihova. Tua di longo ué iebhi o vondadi ia Nzambi phala o athu ni ixi. Maji ihi ia mesenene kuzuela Jezú kioso kiambe: “Utuminu ué uize?” Mu kibatulu kiki tua-nda kuijiia se o Utuminu ua Nzambi ihi, ni ihi ia-nda bhanga ni kiebhi o Utuminu iú, ua-nda bhangesa kuila o dijina dia Nzambi a dixile.

O UTUMINU UA NZAMBI IHI?

4. O Utuminu ua Nzambi ihi ni nanhi a mu solo kukala Sobha?

4 Jihova ua tumbika unguvulu ku diulu, iu ua solo Jezú phala kukala o Sobha ia unguvulu iú. O Bibidia ixana o unguvulu iú kuila Utuminu ua Nzambi. Jezú “Sobha ia jisobha, Ngana ia jingana.” (1 Timote 6:15) Jezú  u tena kubhanga ima iavulu, jinguvulu joso ja mundu ndenge, muéne ua tundu ué o jinguvulu joso ja mundu mu kutena.

5. Kuebhi kuala o Utuminu ua Nzambi? Uene ua-nda tumina ihi?

5 Kioso Jezú kia mu fukununa, mu kubhita makuinhi a uana a izuua, Jezú ua vutuka ku diulu. Mu kubhita thembu, Jihova ua mu bhana o Utuminu. (Ikalakalu 2:33) O Utuminu ua Nzambi uala ku diulu, maji uene ua-nda tumina o ixi ioso. (Dijingunuinu 11:15) Mukonda dia kiki, o Bibidia ixana o Utuminu ua Nzambi kuila, ‘Utuminu ua diulu.’2 Timote 4:18.

6, 7. Mukonda diahi Jezú Sobha ua tundu o jisobha joso ja ngongo?

6 O Bibidia i tu tangela kuila, Jezú ua tundu o jisobha joso mu ngongo, mukonda “muène ngó ubhekèlele uê, uavu o muenhu ki uene mbambe.” (1 Timote 6:16) Jinguvulu joso ji fua, maji Jezú o muenhu uê ki uene disukilu. Ima ioso iambote ia-nda tu bhangela Jezú, ia-nda kalelaku ku hádia ni hádia.

7 O Bibidia i tu tangela kuila, Jezú ua-nda kala Sobha ia iuka ni ia henda, mukonda “o nzumbi ia Jihova ia kà mu tula ku thandu diê, iene o nzumbi ia unjimu ni kutetuluka, nzumbi ia phangu ni ndongo, ifikidila muthu, iene nzumbi i bhekela muthu o kuijiia ni kukala ni uoma ua Jihova. Mu uoma ua Jihova muene mu mu kala o kusanguluka kuê; ka xikina kufundisa mulonga kala kia u mono ku mesu mê, ka xikina ué kubazela kima kievu ngó ku mátui mê maji ua kà fundisa jingadiama ni kidi kioso.” (Izaia 11:2-4) Ua mesena kukala ni Sobha u kala ni ifua íii?

8. Kiebhi ki tuejiia kuila Jezú ka-nda tumina ubheka ué?

8 Nzambi ua solo athu mu ngongo phala kutumina kumoxi ni Jezú mu unguvulu ua diulu. Mu kifika, poxolo  Phaulu uambela Timote, uixi: “Se tua jiji ni kukolokota mu hadi, tua kà hinga-nê kumoxi o ungana.” (2 Timote 2:12) Athu akuxi a-nda tumina kumoxi ni Jezú?

9. Athu akuxi a-nda tumina kumoxi ni Jezú? Nzambi ua mateka kua sola thembu kuxi?

9 Kála ki tua mono mu Kibatulu kia 7, o poxolo Nzuá ua mono mu kisuma Sobha Jezú, ua mono ué 144.000 ja athu a mu tumina kumoxi ni Jezú. Ananhi o 144.000 ja athu? Nzuá ua lombolola kuila, ene “ala ni dijina [dia Jezú] ni dijina dia Tata iê, òsoneke bhu mabhômo mâ.” Nzuá uambe dingi, uixi: ‘Enhá ene a nhenganana Kambudi [Jezú], ene a nhunga nê kuoso-kuoso ku a di tela. Enhá ene a a sumbu mu’axaxi ka mundu ua athu mu ngongo.’ (Tanga Dijingunuinu 14:1, 4.) Nzambi ua solo 144.000 ja Jikidistá ja fiiele phala ku ‘tumina o ngongo,’ kumoxi ni Jezú. Enhá kioso kia fuá, a a fukununa phala kuia ku diulu. (Dijingunuinu 5:10) Tundé mu izuua ia jipoxolo, Jihova ua mu sola Jikidistá ja fiiele phala kutenesa o kibuka kia 144.000 ja jisobha.

10. Mukonda diahi kima kiambote Jihova kusola Jezú ni 144.000 ja athu phala kutumina o athu?

10 Jihova ua tu zolo kiavulu, mukonda dia kiki muéne ua katula athu mu ngongo phala kutumina kumoxi ni Jezú. Jezú ua-nda tu tumina kiambote mukonda muéne ua tuijiia. Muéne uejiia o ndolo ivua o athu, mukonda muéne uexile ué muthu mu xitu. Phaulu uambe kuila Jezú “u tena kuivua o malamba metu,” muéne ué “a mu thendalele mu ima ioso kala etu-ene.” (Jihebeleu 4:15; 5:8) O 144.000 ja athu, ejiia uá o ima íii mukonda exile athu mu xitu. Ene exile uá akua ituxi, a dibhanene uá ni ibhidi. Mukonda dia kiki, tu tena kudielela kuila Jezú ni 144.000 a athu ka-nda tendela ngó kiebhi ki tu dívua, maji a-nda tendela ué o ibhindamu ietu.

 IHI IA-NDA BHANGA O UTUMINU UA NZAMBI?

11. Mukonda diahi Jezú ua longo o maxibulu mê kusamba phala o vondadi ia Nzambi a i bhange ku diulu?

11 Jezú ua longo o maxibulu mê kusamba phala o vondadi ia Nzambi a i bhange mu diulu. Mukonda diahi? Etu tua di longo mu Kibatulu kia 3 kuila Satanaji ua bhukumukina Jihova. Kioso Satanaji kia bhukumuka, Jihova ua mu ehela kukala hanji ku diulu kumoxi ni ji-anju ja mukuá a bhukumuka, o madimonho. Kienhiki, ko ji-anju joso mu diulu akexile mu bhanga o vondadi ia Nzambi. Mu Kibatulu 10, tua-nda di longa dingi maka alungu ni Satanaji ni madimonho mê.

12. Izulukutu iiadi iebhi ia beta kota i tu tangela mu divulu dia Dijingunuinu 12:10?

12 O Bibidia i tu tangela kuila, kioso Jezú kieji mateka kutumina kála Sobha ia Utuminu ua Nzambi, muéne ueji luá ita ni Satanaji. (Tanga Dijingunuinu 12:7-10.) O velusu ia 10 i tu londekesa izulukutu iiadi ia beta-o-kota. Kia dianga, Jezú Kristu u mateka o kutumina, kaiadi, Satanaji a mu lundumuina bhoxi mu ngongo. Kala ki tua-nda di longa, o izulukutu íii ia bhiti kiá.

13. Ihi ia bhiti ku diulu kioso Satanaji kia mu kaie-mu?

13 O Bibidia i tu tangela o kusanguluka kua kexile na-ku o ji-anju ja fiiele kioso Satanaji ni madimonho mê, kia a kaie mu diulu. O Bibidia i zuela: “Ku madiulu-phe tanenu-ku, ni enu oso mua tunga momo!” (Dijingunuinu 12:12) Kindala, ku diulu kuene kiá kutululuka kua kidi, mukonda ji-anju joso kuenhoko ja mu bhanga o vondadi ia Nzambi.

Tundé Satanaji ni madimonho mê kia a kaie ku diulu, kuene hadi iavulu mu ngongo. Maji o hadi íii ia-nda bhua

14. Ihi ia mu bhita mu ngongo mukonda dia Satanaji ku mu kaia ku diulu?

14 Maji o ima mu ngongo iala kiéngi. O athu ene mu  bhita mu ibhidi iavulu “mukonda Diabhu a mu takula” mu ngongo, muéne uene ni “njinda iavulu, kuma muène uejiia kuila o thembu iê ia butu kia.” (Dijingunuinu 12:12) Satanaji uala ni njinda iavulu. Muéne a mu kaie ku diulu, uejiia ué kuila kua kambe bhofele a-nda mu buika. Muéne ua mu bhanga ioso i bhekela ibhidi, ndolo ni hadi ku athu oso mu ngongo.

15. Iebhi o vondadi ia Nzambi phala o ixi?

15 Maji o vondadi ia Nzambi ia lungu ni ixi, iié hanji, ki i lunguluka kana. Muéne ua mesena kuila athu a iuka a kala mu palaízu mu ixi. (Jisálamu 37:29) Mu kiki-phe, kiebhi o Utuminu ua Nzambi ua-nda bhangesa kuila o vondadi ia Nzambi i dikumbidila?

16, 17. Ihi i tu tangela o divulu dia Daniiele 2:44, ia lungu ni Utuminu ua Nzambi?

16 O divulu dia Daniiele 2:44, di zuela: “Mu izuua ia jisobha jenhiji, o Nzambi ia diulu ua kà bheka-ku o utuminu ki u xikina ku u jikinisa; o utuminu iú ka u ehela kubhita dingi bhu maku ma miji iengi; uene kiá ua kà sasujula o mautuminu moso’ama anga a-bhua-ku, maji o uene ua kà xalela mu kutumina mu thembu joso katé ku hádia ni hádia.” O izuelu íii i tu longa ihi ia lungu ni Utuminu ua Nzambi?

17 Kia dianga, o izuelu íii i tu londekesa kuila, o Utuminu ua Nzambi ueji mateka kutumina “mu izuua ia jisobha jenhiji.” Kiki kilombolola kuila, o mautuminu a ngongo, eji kala hanji mu tumina kioso o Utuminu ua Nzambi ueji mateka kutumina. Kaiadi, o Utuminu ua Nzambi ki ueji kala ni disukilu, ka-nda u bhingana ku mautuminu a mukuá. Katatu, o Utuminu ua Nzambi ueji luá ita ni mautuminu a ngongo. O Utuminu ua Nzambi uene ueji nganhala o ita, uene ngó ueji tumina  o ixi ioso. Kienhiki, o athu a-nda kala ni unguvulu ua beta-o-kota.

18. Diebhi o dijina dia ita ia sukina ia-nda luá o Utuminu ua Nzambi ni jinguvulu ja ngongo íii?

18 Kiebhi o Utuminu ua Nzambi ua-nda tumina o ixi ioso? Ande dia ita ia sukina a ixana Alumajedone, o madimonho a-nda nganala o ‘jisobha mu ngongo ioso, mu kua kasa ku ita ia kizuua kia Dikota kia Nzambi, Muteni-a-Ioso.’ Kiene, o jinguvulu ja ngongo ja-nda luá ita ni Utuminu ua Nzambi.—Dijingunuinu 16:14, 16; tala o Kibandekesu 10.

19, 20. Mukonda diahi tua bhindamena o Utuminu ua Nzambi phala kutumina o ixi?

19 Mukonda diahi tua bhingi o Utuminu ua Nzambi? Mukonda dia ima itatu. Kia dianga, etu tu akua ituxi, tuene mu kata ni kufua. Maji o Bibidia i tu tangela kuila bhu kaxi ka Utuminu ua Nzambi, etu tua-nda kala ni muenhu ua kalelaku. O divulu dia Nzuá 3:16, di zuela: “Nzambi ua zola o mundu, katé kia suku mu kubhana Mon’ê umoxi-èlele, phala uoso u mu xikana muène, káfue, maji a kale ni muenhu ki uábhua.”

20 Kaiadi, etu tua bhingi o Utuminu ua Nzambi mukonda a tu kondoloka ku athu a iibha. Athu avulu a tanga makutu, a nganala akuâ, a mukuá ala ifusa. Etu ki tuene ni kutena kua ku a buika, maji Nzambi ua-nda kua buika ene oso. Oso a jiza mu kubhanga ima ia iibha, a-nda ku a buika mu ita ia Alumajedone. (Tanga Jisálamu 37:10.) Katatu, o jinguvulu ja ngongo kene ni unjimu ua kutumina, ene athu a iibha. Ene ka mesena kukuatekesa o athu kubelesela Nzambi. O Bibidia i zuela kuma “muthu u kala mu kutumina mukuá phala ngó ku mu sengulula.”—Ndongixi 8:9.

21. Ihi ia-nda bhanga o Utuminu ua Nzambi phala o vondadi ia Nzambi a i bhange mu ixi?

 21 Kioso kia-nda bhita o ita ia Alumajedone, o Utuminu ua Nzambi ua-nda bhangesa kuila o vondadi ia Nzambi a i bhanga mu ixi, kála kiala ku i bhanga mu diulu. Mu kifika, o Utuminu ua Nzambi, ua-nda buika Satanaji ni madimonho mê. (Dijingunuinu 20:1-3) Ki bhua-nda kala dingi muthu ua-nda kata mba kúfua. Mukonda dia sata ia kukúla kua Jezú, athu oso a fiiele a-nda tambula o muenhu ua kalela-ku mu Palaízu. (Dijingunuinu 22:1-3) O Utuminu ua Nzambi ua-nda zelesa o dijina dia Nzambi. Kiki kilombolola ihi? Kiki kilombolola kuma, kioso o unguvulu ua Nzambi ua-nda mateka kutumina o ixi, athu oso mu ngongo a-nda ximana o dijina dia Jihova.—Tala o Kibandekesu 21.

MUVU KUXI UA TUMBIKA JEZÚ KU USOBHA?

22. Kiebhi ki tuejiia kuila Jezú ka kituka Sobha kioso kia kexile mu ixi mba kioso kia mu fukununa?

22 Jezú ua longo o maxibulu mê kusamba kuila: “Utuminu ué uíze.” O izuelu íii i tu londekesa kuila, o Utuminu ua Nzambi ua-nda tumina ku hádia. Kia dianga, Jihova ueji tumbika o unguvulu uê ni kubhangesa Jezú kukala Sobha. O kuila Jezú ua mateka kutumina kioso  kia vutuka ku diulu? Kana, muéne ua kingila hanji. Mu kubhita thembu kioso Jezú kia mu fukununa, Phetele ni Phaulu alondekesa o kidi kiki, kioso kia tange kuila o izuelu i tu sanga mu divulu dia Jisálamu 110:1 ia dikumbidila kua Jezú. Mu divulu didi, Jihova uambe, uixi: “Xikama ku mbandu iami ia madilu, katé ki ngi ku bhanga o jinguma jê, ji kala kibaka kié kia kutula inama.” (Ikalakalu 2:32-35; Jihebeleu 10:12, 13) Mivu ikuxi ia kingila Jezú phala Jihova ku mu bhanga Sobha?

O Utuminu ua Nzambi ua-nda bhangesa kuila o vondadi ia Nzambi a i bhanga mu ixi

23. (a) Muvu uebhi ua mateka Jezú kutumina kala Sobha ia unguvulu ua Nzambi? (b) Ihi i tua-nda di longa mu kibatulu kia kaiela?

23 Mu mivu iavulu ande dia muvu ua 1914, kibuka kia Jikidistá a mono kuila o muvu ua 1914 ueji kala muvu ua dikota mu kikanenu kia Bibidia. O izulukutu iene mu bhita tundé ku muvu ua 1914, ilondekesa kuila ene a lungile. Jezú ua mateka kutumina kala Sobha ku muvu uenhó. (Jisálamu 110:2) Mu kubhita ithangana, Satanaji a mu lundumuina mu ngongo, maji “o thembu iê ia butu kia.” (Dijingunuinu 12:12) Mu kibatulu kia-nda kaiela, tua-nda mona dingi ima ia mukuá ia-nda tu londekesa kuila tuala kiá mu izuua isukidila-ku. Tua-nda mona ué kuila kua kambe ngó bhofele, o Utuminu ua Nzambi ua-nda bhangesa kuila o vondadi ia Nzambi i dikumbidila.—Tala o Kibandekesu 22.