1. Ihi i ua tokala o kubanza, kioso ki ua-nda zubha kudilonga o kadivulu kaka?

TUNDÉ ki ua mateka kudilonga o divulu didi, ua dilongo kia milongi iavulu ia Bibidia, kala o kikanenu kia Nzambi kia lungu ni muenhu ua kalelaku, ihi i bhita ni athu kioso kia fua ni kidielelu kia difukunukinu. (Ndongixi 9:5; Luka 23:43; Nzuá 5:28, 29; Dijingunuinu 21:3, 4) Nange ua mateka kiá kuia mu iônge ia Jimbangi ja Jihova, eie u xikina kuila, ene a bheza muene Nzambi mu kidi. (Nzuá 13:35) Nange ué uala kiá ni ukamba uambote ni Jihova, eie ua solo ku mu sidivila. Kienhiki, eie nange  u dibhuidisa ‘Ihi dingi i nga tokala kubhanga phala kusidivila Nzambi?’

2. Mukonda diahi o diiala mukuâ Etiiopia ua mesenene ku mu batizala?

2 Kiene kia banzele diiala mukuá Etiiopia, mu izuua ia Jezú. Kioso Jezu kia mu fukununa, o dixibulu diê Filipe, ua bhana umbangi ku diiala didi. Filipe ua mu longo kuila, Jezú muéne uexile o Mexiia. O mukuá Etiiopia ua diuana ni maka a dilongo, iú uambe: ‘Talesa, menha iá! Ihi i ngi fudisa ku ngi batizala?’—Ikalakalu 8:26-36.

3. (a) Kitumu kiebhi kia bhanene Jezú ku maxibulu mê? (b) Kiebhi kia tokala kubatizala o muthu?

3 O Bibidia i zuela ni kidi kioso kuila, eie se ua mesena kusidivila Jihova a tokala ku ku batizala. Jezú uambela o maxibulu mê: “Mua ka longe jixibulu ku akua jixi joso, ni ku a batizala.” (Matesu 28:19) Jezú ua bhana phangu, mukonda muéne ué a mu batizala. Muéne ka mu mbombesa ngó tumenha ku mutué kana, maji a mu bonda o mukutu uoso mu menha. (Matesu 3:16) Lelu kiene ué ki kiene mu bhita, phala ku batizala muthu, a tokala ué ku mu bonda o mukutu uoso mu menha.

4. O batizu iê ia-nda londekesa ihi ku athu?

4 Kioso kia-nda ku batizala ua-nda londekesa ku athu oso kuila, ua mesena kukala kamba dia Nzambi eie ua mesena ué ku mu sidivila. (Jisálamu 40:7,8) Kienhiki, nange u dibhuidisa ‘Ihi i nga tokala o kubhanga phala ku ngi batizala?’

IJIIA KIAMBOTE NZAMBI NI KU MU XIKANA

5. (a) Ihi i ua tokala o kubhanga phala ku ku batizala? (b) Mukonda diahi kima kiambote kuia mu iônge ia Jimbangi ja Jihova?

5 Ande dia ku ku batizala, eie ua tokala kuijiia Jihova ni Jezú. Nange eie ua mateka kiá kubhanga kiki mu kudilonga o Bibidia. (Tanga Nzuá 17:3.) Maji kiki, ki kiene  ngó. O Bibidia i zuela kuila ua tokala ‘uizala ni kuijiia kutongolola o vondadi,’ ia Jihova. (Kolose 1:9) O milongi i ua-nda dilonga mu iônge ia Jimbangi ja Jihova ia-nda ku kuatekesa kukala ni ukamba uambote ni Jihova. Mukonda dia kiki, kima kiambote kuia mu iônge ithangana ioso.—Jihebeleu 10:24, 25.

Ande dia ku ku batizala, eie ua tokala kudilonga o Bibidia

6. Ihi i ua tokala o kuijiia ande dia ku ku batizala?

6 Jihova ka kingila kuila, uijiia o ima ioso ande dia ku ku batizala. Muéne ka kingile o diiala mukua Etiiopia kuijiia ioso phala ku mu batizala. (Ikalakalu 8:30, 31) Etu tua-nda suluka ni ku dilonga o mak’â Nzambi katé ku hádia ni hádia. (Ndongixi 3:11) Maji phala ku ku batizala ua tokala kuijiia ni kuxikina o dimatekenu dia ilongesu ia Bibidia.—Jihebeleu 5:12.

7. Kiebhi o kudilonga o Bibidia kuene mu kukuatekesa?

7 O Bibidia i zuela: “Muthu-phe ua kambe o kuxikana ka tena kuuabhela Nzambi.” (Jihebeleu 11:6) Kienhiki, ua tokala kukala ni kixikanu ande dia ku ku batizala. O Bibidia iamba kuila, saí athu ku mbanza ia Kolindo, evuile o ima ia longele o maxibulu a Jezú, “a xikana, anga a a batizala.” (Ikalakalu 18:8) Kiene ué kimoxi ni eie, o kudilonga o Bibidia, kua ku kuatekesa kudielela mu ikanenu ia Nzambi ni mu kutena kua sata ia kukúla kua Jezú i tena ku tu bhulula ku ituxi ni kalunga.—Josuué 23:14; Ikalakalu 4:12; 2 Timote 3:16, 17.

BOKA O MAK’Â NZAMBI KU AKUENU

8. Ihi ia-nda ku bhana o nguzu ia kutangela akuenu o ima i ua mu di longa mu Bibidia?

8 Kioso ki ua-ndaia ni kudilonga o Bibidia ni kumona o mbote ijila mu kubhanga kiki, o kixikanu kiê kua Nzambi kia-nda kola dingi. Ua-nda kala ni vondadi ia kutangela akuenu o ima i ua mu di longa mu Bibidia.  (Jelemiia 20:9; 2 Kolindo 4:13) Maji nanhi ua tokala ku mu tangela o ima íii?

O kixikanu kiê kua Nzambi kia tokala ku ku bhangesa kutangela akuenu o ima i ua mu di longa

9, 10. (a) Nanhi ua tokala ku mu tangela o ima i ua mu dilonga mu Bibidia? (b) Ihi i ua tokala o kubhanga se u mesena kuboka kumoxi ni jiphange mu kilunga?

9 Eie u tena kutangela o jindandu jê, makamba, jivizinhu mba jikoleka ja xikola mba ja salu o ima i ua mu dilonga. Kima kiambote kubhanga kiki, maji bhanga-kiu ni henda ni kuxila kuoso. Ku pholo dia kuenda, ua-nda tena kuboka ni kilunga. Kioso ki ua-nda dimona kuila uala kiá polondo phala kukala muboki, zuela ni muthu ua mu ku longa o Bibidia, u mu tangela kuila ua mesena ué kuboka kumoxi ni jiphange mu kilunga. Se muéne u mona ué kuila eie uala kiá polondo, ua mu belesela muene o ilongesu ia Bibidia, kiiadi kienu mua-nda xikama ni tufunga tuiadi mu kilunga phala kudikunda o maka enhá.

10 Ihi ia-nda zuela o tufunga? O tufunga tua-nda zuela n’eie phala kumona se mu kidi eie uejiia ni kuxikina o ilongesu ia Bibidia. A-nda mona ué se ua mu kuenda kiambote kála ki tuma o Bibidia ni kuila ua mesena ni muxima uoso kukala Mbangi ia Jihova. Ijiia kuila o tufunga a zolo o jiphange joso mu kilunga, katé muene eie, mu kiki-phe kana kukala ni uôma ua kuzuela nau. (Ikalakalu 20:28; 1 Phetele 5:2, 3) Kioso kia-nda zubha kuzuela n’eie, o tufunga tua-nda ku tangela se u tena kiá kuboka kumoxi ni kilunga mba kana.

11. Mukonda diahi kima kiambote kueha o ukexilu ua iibha ande dia kumateka kuboka kumoxi ni kilunga?

11 O tufunga nange tua-nda ku tangela kuila saí ima ku muenhu ué, ua tokala kueha ande dia kumateka kuboka kumoxi ni kilunga. Mukonda diahi kima kiambote kubhanga kiki? Mukonda kioso ki tu zuela ni  athu o Mak’â Nzambi, tua di bhange tu akunji a Jihova, mu kiki-phe tua tokala kukala ni ukexilu uambote u bhana fuma kua muéne.—1 Kolindo 6:9, 10; Ngalásia 5:19-21.

DIELA O ITUXI NI U VUTUKE KUA NZAMBI

12. Mukonda diahi athu oso a bhingi kudiela o ituxi iâ?

12 Kuala hanji kima kia mukuá ki ua tokala ku ki bhanga ande dia ku ku batizala. O Poxolo Phetele uambe: ‘Dielenu, muenhu uenu u bhiluke, mu vutuke kua Nzambi, o muène ituxi ienu phala a mi jimune-iu.’ (Ikalakalu 3:19) O kudiela o ituxi kulombolola ihi? Kulombolola kudivua kia iibha mukonda dia kituxi ki tua te. Mu kifika, eie se uexile u mukua undumbu, ua tokala-phe u diela o ufusa iú. Né muene se ku muenhu ué uoso ua bhange ima iambote, né kiki ua tokala kudiela mukonda etu oso tu ta ituxi, tua bhingi o muloloki ua Nzambi.—Loma 3:23; 5:12.

13. Ihi ilombolola o kizuelu ‘bhiluka, u vutuke kua Nzambi?’

13 O kuila tua tokala ngó kudivua kia iibha mukonda dia kituxi ki tua te, kuabhu? Kana. Phetele uambe ué kuila ua tokala ‘u bhiluka, u vutuke kua Nzambi.’ Kiki kilombolola kuila ua tokala kueha o ima ia iibha i ua kexile mu bhanga, ni kubhanga o ima ia tokala. Mu kifika, xinganeka kuila ua mu kuenda njíla, eie nuka uendele o njila ienii. Mu kuenda, eie u mona kuila kua mu kaiela o njíla ia tokala. Ihi i ua-nda bhanga? Sé phata, ua-nda kuimana, ni kuvutuka phala u kaiele o njíla ia tokala. Kiene kimoxi ué, mu kudilonga o Bibidia, ua-nda mona kuila saí ima ku muenhu uê i ua tokala kueha. Mu kiki ‘bhiluka, vutuka kua Nzambi,’ mba eha o ima ia iibha, kaiela o ima iambote.

 BHAKULA O MUENHU UÊ KUA NZAMBI

O kuila ua kanena kiá Jihova kuila ua-nda mu sidivila ngó muéne?

14. O kubhakula o muenhu uê kua Nzambi kulombolola ihi?

14 O kima kia mukuá kia beta-o-kota ki ua tokala kubhanga ande dia ku ku batizala, o kubhakula o muenhu uê kua Jihova. Kioso ki u bhakula o muenhu uê kua Jihova, eie u mu tangela bhu kaxi ka musambu kuila ua-nda mu bheza ngó muéne, o kubhanga o vondadi ia Nzambi iene ia-nda kala ku pholo ku muenhu uê.—Matendelelu 6:15.

15, 16. Ihi i bhangesa o muthu kudibhakula kua Nzambi?

15 O kukanena kubheza ngó Jihova kua di fuangana ni kukanena kukala ni muthu u ua mu zolo katé ku ufuilu uê. Mu kifika, xinganeka diiala ni muhatu a mu di tangesa. O diiala kioso kia-ndaia ni kuijiia kiambote o muhatu, muéne ua-nda mu zola kiavulu, u mu bhinga mu ukaza. Sumbala o kukazala ki maka a kutonoka, maji o diiala u sola muene kukazala mukonda ua mu zolo kiavulu.

16 Kioso ki ua-ndaia ni kuijiia kiambote Jihova, ua-nda mu zola dingi, mu kiki ua-nda mesena ku mu sidivila ni muxima uê uoso. Kiki kia-nda ku bhangesa kusamba ni ku mu tangela kuila ua-nda mu sidivila ngó muéne. O Bibidia iamba kuila uoso ua mesena kukaiela Jezú, ua tokala “u jimba ku di xinganeka muéne.” (Marku 8:34) Kiki kilombolola ihi? Kiki kilombolola kuila o kubelesela Jihova kiene o kima kia-nda kala ku pholo ku muenhu uê. O vondadi ia Jihova ia beta dingi kota ku muenhu uê, o jivondadi jê-eie ndenge.—Tanga 1 Phetele 4:2.

KANA KUKALA NI UÔMA UA KULUEZA

17. Mukonda diahi amoxi a lémbua kudibhakula kua Jihova?

17 Amoxi mukonda dia uôma ua ku ta kituxi, a lémbua kubhakula o mienhu iâ kua Jihova. Ene a kala ni uôma  ua kuluualesa Jihova, a mukuá a banza kuila se a kamba kudibhakula kua Jihova, Nzambi ka-nda ku a bhinga jikonda né muene se a ta ituxi.

18. Ihi ia-nda ku kuatekesa kubhua o uôma ua kudibhakula kua Jihova?

18 O kuzola Jihova kua-nda ku kuatekesa kubhua o uôma ua kudibhakula kua muéne. Mukonda dia ku mu zola, ua-nda bhanga ioso mu ioso phala kukumbidila o kizuelu kiê, kia kubhanga o vondadi ia Nzambi. (Ndongixi 5:4; Kolose 1:10) Ua-nda mona kuila mbé ki ku bhonzo kubhanga o vondadi ia Jihova. O poxolo Nzuá ua soneka: “Kuma o henda ia kuzola Nzambi inhi’íi, o kualuka o ijila iê. O ijila iê-phe ki ia bhonzo ku i aluka.”—1 Nzuá 5:3.

19. Mukonda diahi eie ku bhingi kukala ni uôma ua kudibhakula kua Jihova?

19 Eie ku bhingi kukala muthu ua iuka, phala u tene kudibhakula kua Jihova kana. Muéne ka tu jijidika kubhanga ima ki tu tena ku i bhanga. (Jisálamu 103:14) Muéne ua-nda tu kuatekesa kubhanga o kima kia tokala. (Izaia 41:10) Kienhiki dielela kua Jihova ni muxima uê uoso, ‘muéne ua-nda iukisa o njila jê joso.’—Jisabhu 3:5, 6.

LONDEKESA O VONDADI IÊ KU ATHU OSO

20. Kioso ki ua-nda dibhakula kua Nzambi, ihi i ua tokala o kubhanga?

20 Mudiê, o kuila uala kiá polondo phala kudibhakula kua Jihova? Kioso ki ua-nda dibhakula kua Jihova, ua-nda kala polondo phala ku ku batizala.

21, 22. Kiebhi ki u “fisala ni dikanu” diê kuila uala ni kixikanu?

21 Tangela o kafunga kala ku pholo mu kilunga kuila eie ua dibhakula kiá kua Jihova, eie ua mesena ku  ku batizala. Muéne ua-nda bhinga tufunga tua mukuá phala kubhitulula n’eie o milongi ia Bibidia. Se o tufunga a mona kuila uala kiá polondo, mu kiki-phe a-nda ku tangela kuila a-nda ku batizala mu kiônge kia ilunga mba mu kiônge kia dikota kia Jimbangi ja Jihova. Mu kiônge kiki, a-nda bhanga-mu diskursu dia batizu. O mulongexi ua-nda bhanga o diskursu dienhidi, ua-nda bhanga ibhuidisu iiadi kua ió  a-nda ku a batizala. Mu kutambuijila o ibhuidisu íii, eie ua-nda “fisala ni dikanu” diê ku pholo dia athu oso kuila ua xikina.—Loma 10:10.

22 Kienhiki a-nda ku batizala. A-nda ku bonda o mukutu uoso mu menha. O batizu ia-nda londekesa ku athu oso kuila, eie ua bhakula o muenhu uê kua Jihova, ni kuila u Mbangi ia Jihova.

 MUKONDA DIAHI A TOKALA KU KU BATIZALA?

23. O ku ku batizala “mu dijina dia Tata ni dia Mona, ni dia Nzumbi Ikôla,” kulombolola ihi?

23 Jezú uambe kuila o maxibulu mê eji ku a batizala “mu dijina dia Tata ni dia Mona, ni dia Nzumbi Ikôla.” (Tanga Matesu 28:19.) Kiki kilombolola ihi? Kiki kilombolola kuila eie uejiia o kididi ni ungana ua Jihova ni kuila Jezú muéne o sabhi mu ikanenu ia Nzambi. Kilombolola ué kuila eie u xikina kuma Nzambi u kumbidila o vondadi iê bhu kaxi ka nzumbi ikôla.—Jisálamu 83:18; Matesu 28:18; Ngalásia 5:22, 23; 2 Phetele 1:21.

Mu ku ku batizala, eie ua mu londekesa ku athu kuila ua mesena kubhanga o vondadi ia Nzambi

24, 25. (a) O batizu ilombolola ihi? (b) Ihi i tua-nda dilonga mu kibatulu kia kaiela-ku?

24 O batizu ilombolola kima kia dikota. Eie kioso kia ku bonda mu menha, kia difuangana ua fu, o ifua ié io kulu ia iibha ua i ieha kiá. Kioso kia kuzaula mu menha, kilombolola kuila eie ua-nda bhanga ngó o vondadi ia Nzambi. Tundé o kizuua kieniókio ua-nda bhanga ngó o vondadi ia Jihova. Lembalala kuila eie ku dibhakula phala kubhanga o vondadi ia muthu mu xitu mba kisangela, kana. Eie ua dibhakula phala kubhanga o vondadi ia Jihova.

25 O kudibhakula kuê kua Nzambi, kua-nda ku kuatekesa kukala ni ukamba uambote ni Nzambi. (Jisálamu 25:14) Maji kiki ki kilombolola kuila o muthu ua-nda bhuluka, mukonda a mu batizala, kana. O poxolo Phaulu ua soneka: “Mu kieniiki, tutumbenu ni ujitu uoso ni uôma, phala mu mone o kubhuluka.” (Filipe 2:12) O batizu dimatekenu ngó. Maji kiebhi ki u tena kukala mu ukamba uambote ni Jihova? O kibatulu kia sukina kia divulu didi, kia-nda tambuijila o kibhuidisu kiki.