1, 2. Ihi iene mu dibhuidisa o athu?

O KALEMBA ka jibha athu avulu mu diembu. Diiala ua bokona mu ngeleja ni uta, ua lozo athu iu ua a jibha. Muhatu uáfu mukonda dia uhaxi, ua xisa ana kitanu.

2 Kioso ki bhita mavuua kála iá, athu avulu a dibhuidisa, “Mukonda diahi?” Athu avulu ene mu dibhuidisa se mukonda diahi o ngongo iezala ni unguma ni hadi. Eie ua dibhuidisile kiá kiki?

3, 4. (a) Ibhuidisu iebhi ia bhange Habakuke? (b) Kiebhi Jihova kia mu tambuijila?

3 Mu Bibidia, muala misoso ia mala akexile ni kixikanu kia dikota kua Nzambi, a bhange uá o ibhuidisu íii. Mu kifika, o polofeta Habakuke uebhuidisa Jihova: ‘Phala-hi u ngi muesa o ufusa ni lusebu, anga u ngi bhangesa kutala ungulungumba? Phala-hi ku pholo kua ngi xikamena kibuika ni kubhondalala? Phala-hi ué a vulumuna jimvunda ni ku kuata kuzoka?’—Habakuke 1:3.

4 Mu divulu dia Habakuke 2:2, 3, Nzambi ua tambuijila o ibhuidisu ia Habakuke iu ua mu kanena kuila ueji batula o maka. Jihova ua zolo kiavulu o athu. O Bibidia i zuela kiki: “Muène ua mi kuatela muanu.” (1 Phetele 5:7) Mu kidi, Nzambi ua zembe kiavulu kumona o hadi, etu ndenge. (Izaia 55:8, 9) Mu kiki-phe, tua-nda dilonga o kibhuidisu kiki: Mukonda diahi kuene hadi iavulu mu ngongo?

 MUKONDA DIAHI KUENE HADI IAVULU?

5. Ihi iene mu zuela jimesene javulu ja jingeleja ia lungu ni hadi? Maji ihi i longa o Bibidia?

5 O atuameni a ji ngeleja mba jimesene ni ji padele, jene mu zuela kuila Nzambi, muéne ua mesena kuila o athu a tala hadi. Amoxi amba kuila, ioso i bhita ku muenhu ua muthu, kála o mavuua, Nzambi ua i xindi kiá tundé ukulu ni kuila etu ki tu tena ku ki tendela se mukonda diahi. A mukuá amba kuila, o athu katé muene ni ana-ndenge, a fua phala kuia kukala kumoxi ni Nzambi mu diulu. Maji iá makutu. Jihova ka tena kubhanga ima ia iibha ku athu. O Bibidia i zuela: “Nzambi ka tena kubhanga kia iibha! O Muteni-a-Ioso ka tena kubhanga mangonha!”—Jobe 34:10.

6. Mukonda diahi athu avulu ene mu tatela Nzambi kuila muéne ua mu bheka o hadi mu ngongo?

6 Athu avulu ene mu tatela Nzambi kuila, muéne ua mu bheka o hadi, mukonda a banza kuila, Nzambi muéne ua mu tumina o mundu. Maji kála ki tua di longo mu Kibatulu 3, o ua mu tumina o mundu iú, Satanaji o Diabhu.

7, 8. Mukonda diahi kuene hadi iavulu ku mundu?

7 O Bibidia i tu tangela kuila, “o mundu uoso-phe ua zeka mua Kadiaphemba ió mukua ku tondalesa.” (1 Nzuá 5:19) O sobha ia mundu iú, Satanaji, muthu ua iibha kiavulu. Muéne ua mu ‘nganala o mundu uoso.’ (Dijingunuinu 12:9) Athu avulu ene mu kaiela o ukexilu uê ua iibha. Mukonda dia kiki, o mundu uezala ni makutu, unguma ni kuiibha kuavulu.

8 Kuene dingi ima ia mukuá i bhangesa o mundu kukala ni hadi iavulu. Kioso Adá ni Eva kia bhukumuka, ene a bhitisa o kituxi ku tuana tuâ. Mukonda-phe dia kituxi kiki, o athu a di talesa hadi muthu ni mukuá. Ene a  mesena kubeta-o-kota akuâ ndenge. Ene a zoka, aia mu ita, a lokalala akuâ. (Ndongixi 4:1; 8:9) Saí ithangana, o athu a tala hadi mukonda dia ‘ima i bhita sé ku i kingila.’ (Ndongixi 9:11) Saí athu, mukonda dia kukala mu kididi ka tokalele kukala-mu mba mu kithangana ki ki tokala, a tena kubhita mu iluezu mba kubhita mu ima ia iibha.

9. Mukonda diahi Jihova ka zubha hanji o hadi?

9 Jihova ka tena kubhekela hadi ku athu kana. Ki muéne uene mu bheka o ita, o milonga mba hadi ku athu. Nzambi kene mu bhekela mavuua kála o kalemba, kitembu ni mvula iene mu jibha athu. Maji eie nange u dibhuidisa, ‘Se Jihova muéne Suke-ku mu ngongo ioso, mukonda diahi ka mu fidisa o ima íii ia iibha o kubhita?’ Tuejiia kiambote kuila Nzambi ua tu zolo, kienhiki, saí kima kia mu mu bhangesa kukamba kuzubha hanji o hadi.—1 Nzuá 4:8.

MUKONDA DIAHI NZAMBI UEHELA O HADI?

10. Kiebhi Satanaji kia tatela Jihova?

10 Mu jaludim ia Edene, o Diabhu ua nganala Adá ni Eva. Satanaji uambe kuila, Nzambi kejiia kutumina kiambote. Muéne uambe ué kuila, Nzambi ua kexile mu sueka ima iambote kua Adá ni Eva. Satanaji ua mesenene kuila ene a xikina kuila muéne ueji kua tumina kiambote, Jihova ndenge, ni kuila ene keji bhindamena o kikuatekesu kia Nzambi.—Dimatekenu 3:2-5; tala o Kibandekesu kia 27.

11. Kibhuidisu kiahi ki tua bhingi kuijiia o kitambuijilu kiê?

11 Adá ni Eva a xibhakela Jihova ni kudituna o ungana uê. Ene a banze kuila, akexile ni ufolo ua kusola ene mudiâ o ima ia uabha mu íii ia iibha. Kiebhi Jihova kieji tena kulondekesa kuila ene a tondalele mu ibanzelu iâ ni kuila, muéne ua beta kuijiia o ibhindamu ietu?

12, 13. (a) Mukonda diahi Jihova ka buikisa Adá ni Eva mu kithangana kieniókio? (b) Mukonda diahi Jihova uehela Satanaji kutumina o mundu iú ni kuehela ué o athu kuditumina mudiâ?

 12 Jihova ka buikisa Adá ni Eva mu kithangana kieniókio. Mu veji dia kiki muéne ua a ehela kuvuala ana. Kienhiki, Jihova ua bhana kithangana ku tuana tua Adá ni Eva kia kusola o sobha iâ. Jihova ua mesenene kuila o ixi izala ni athu a iuka. Kiki kia-nda bhita muéne sé phata né muene ni mibhetu ia Diabhu.—Dimatekenu 1:28; Izaia 55:10, 11.

13 Satanaji ua tatela Nzambi kuila nguvulu ia iibha bhu pholo ia mazunda ni mazunda a ji-anju. (Jobe 38:7; Daniiele 7:10) Mukonda dia kiki, Jihova ua bhana kithangana kua Satanaji phala kulondekesa ku athu se mu kidi Nzambi kejiia muene kutumina. Ua bhana ué kithangana ku athu kia kusola jinguvulu jâ, jene mu kuatekesa kuala Satanaji, phala kulondekesa se ene eji beta kuzediua sé o kikuatekesu kia Nzambi.

14. O kithangana kia bhana Nzambi, kiene mu londekesa ihi ia lungu ni Satanaji?

14 Mu jimidi ni jimidi ja mivu, o athu ene mu sota kuditumina ene mudiâ, maji kene mu ditunda kiambote. Kiki kilondekesa kuila Satanaji mukua makutu. Mu kidi o athu a bhingi muene o kikuatekesu kia Nzambi. O polofeta Jelemiia ua zuela kidi kioso kiambe: ‘O njila ienda o muthu ki iene bhu lukuaku lua muthu-muene mba muthu ki muéne uendesa o makanda mê.’—Jelemiia 10:23.

MUKONDA DIAHI JIHOVA UA MU KINGA KIAVULU PHALA KUZUBHA O HADI?

15, 16. (a) Mukonda diahi Jihova ka zubha luua o hadi mu ngongo katé kiki? (b) Mukonda diahi Jihova ka zubha o hadi ia bhekela Satanaji?

15 Mukonda diahi Jihova ua mu kinga kiavulu phala  kuzubha o hadi? Mukonda diahi muéne ka mu fidisa o ima ia iibha o kubhita? Phala kulondekesa kuila Satanaji ka tena kutumina kiambote o athu. O athu a fikisa kiá maukexilu avulu a mautuminu, maji né kiki hadi ngó. Né muene o jingijiie ja mu dilonga kiavulu ni kubhanga ji makina ja katunda, maji o kuiibha, uadiama, milonga ni ita ia mu dimendala dingi m’ukulu ndenge. Etu ki tu tena kuzediua ku muenhu sé o kikuatekesu kia Nzambi.

16 Maji Jihova ka mu zubha o hadi ia bhekela Satanaji. Se muéne ua zubhile o hadi, kieji londekesa kuila, Nzambi ua mu kuatekesa o utuminu ua Satanaji. Maji Muéne ka tena kubhanga kiki. Se Jihova ua zubhile o hadi, o athu eji xikina kuila ene a tena kuditumina kiambote sé Nzambi. Maji iá makutu. Jihova uambe kuila o athu ka tena kuditumina mudiâ. Muéne ka tena kutanga makutu.—Jihebeleu 6:18.

17, 18. Ihi ia-nda bhanga Jihova ni hadi iene mu bheka Satanaji?

17 O kuila Jihova u tena kuzubha o hadi ioso iene mu bhekela Satanaji ni athu? U tena. Nzambi u tena kubhanga o ima ioso. Jihova uejiia o kithangana kia-nda zubha o hadi iene mu bhekela Satanaji. Mu kusuluka, muéne ua-nda bhanga o ixi kukala palaízu kála kia mesenene kudimatekenu. Athu oso ala “mu jimbila,” a-nda fukunuka. (Nzuá 5:28, 29) O athu ka-nda kata dingi né kúfua. Jezú ua-nda zubha o hadi ioso iene mu bheka Satanaji. Jihova ua-nda tumina Jezú phala “ku buika o ibhangelu ia Diabhu.” (1 Nzuá 3:8, NW) Mu kiki, tua sakidila o muanhu ua tu kuatela Jihova ua ku muijiia ni ku mu sola phala ku kala Nguvulu ietu. (Tanga 2 Phetele 3:9, 10.) Né muene kioso ki tu bhita mu jiphaxi, muéne u  tu kuatekesa kukolokota.—Nzuá 4:23; tanga 1 Kolindo 10:13.

18 Jihova ka tu jijidika ku mu sola kukala Nguvulu ietu kana. Muéne ua bhana ku athu o ufolo ua kusola. Tu di longe ihi ilombolola o ujitu iú phala etu.

IHI I UA-NDA BHANGA NI UFOLO UÊ UA KUSOLA

19. Ujitu uahi ua tu bhana Jihova? Mukonda diahi tua tokala kusakidila o ujitu iú?

19 O ujitu ua kusola ua tu bhana Jihova, u tu tungula ku iama. O iama ki iene mu banza, maji etu tu tena kubanza ni kusola o ukexilu uetu, kubheza Nzambi mba kana. Ki tu difu ni ji makina ji bhanga ngó o ima ia a tumina. Etu tuala ni ufolo ua kusola o ukexilu uetu, mba kusola o makamba metu ni ihi i tua mesena ku bhanga ni muenhu uetu. Jihova ua mesena tu sanguluka ku muenhu.

20, 21. Kima kiahi kia beta-o-kota ki ua tokala kusola lelu?

20 Jihova ua mesena tu mu zola. (Matesu 22:37, 38) Muéne ua difu ni tata ua zediua mu kuívua mon’ê kuzuela sé ku mu jijidika kuila, “nga ku zolo.” Jihova ua tu bhana o ufolo phala tu tene kusola ku mu sidivila mba kana. Satanaji, Adá, ni Eva a solo kudituna Jihova. Kiebhi ki u tena kusola kiambote ni ufolo ua ku bhana Jihova?

21 Sola kiambote ni ufolo ua kubhana Jihova phala ku mu sidivila. Kuene mazunda ni mazunda a athu a solo kusidivila Jihova ni kudituna Satanaji. (Jisabhu 27:11) Ihi i ua tokala o kubhanga phala kukala ku mundu uobhe ua Nzambi, kioso kia-nda zubha o hadi ioso? O kibatulu kia kaiela kia-nda tambuijila o kibhuidisu kiki.