Ku bokona mu madisá

Ku bokona mu madisá

 KIBATULU KUINHI NI SAMBUADI

Ujitu ua Kusamba

Ujitu ua Kusamba

‘O muthu ua bhange o diulu ni ixi’ ua mesena kuívua o misambu ietu.—Jisálamu 115:15

1, 2. Mudiê, mukonda diahi tu tena kuzuela kuila o kusamba ujitu ua dikota? Mukonda diahi tua tokala kuijiia o ilongesu ia Bibidia ia lungu ni kusamba?

PHALA Jihova, ‘ua bhange o diulu ni ixi’, o athu mu ngongo edi kála dibébe di lauka mu mbinda ia menha. (Jisálamu 115:15; Izaia 40:15) Sumbala tuedi kála tu mabebe bhu pholo ia Jihova, o divulu dia Jisálamu 145:18, 19, di zuela: ‘Jihova ua zukama kua ió a di kola kua muéne, oso a dikola kua muéne mu kidi. Muéne u bhanga o vondadi ia ió oso a mu kala ni uoma; uívua nzongo iâ, ia kudikola, hé u a bhulula.’ Ujitu ua dikota u tuala nau! Jihova, o Mubhangi ua ngongo ioso, ua mesena kuila tu mu zukama ni kuila ua-nda kuívua o misambu ietu. Sé phata, o kusamba ujitu ua dikota ua tu bhana Jihova.

2 Maji Jihova ua-nda kuívua o misambu ietu se tu samba mu ukexilu ua tokala. Kiebhi ki tu tena kubhanga kiki? Tu mone ihi i zuela o Bibidia ia lungu ni kusamba.

MUKONDA DIAHI TUA TOKALA KUSAMBA KUA JIHOVA?

3. Mukonda diahi tua tokala kusamba kua Jihova?

3 Jihova ua mesena kuila, tu zuela-né bhu kaxi ka musambu. Kiebhi ki tuejiia o kidi kiki? Tua ku dióndo tanga Filipe 4:6, 7. Xinganeka. O Mubhangi ua ngongo ioso ua ku suu, iu ua mesena kuila u mu tangela kiebhi ki ua mu divua, ua mesena ué u mu tangela o ibhidi iê.

4. Kiebhi o kusamba izuua ioso, ku kolesa o ukamba uê ni Jihova?

4 O kusamba ku tu kuatekesa kukala ni ukamba uambote  ni Jihova. O makamba se a di zuelesa ithangana ioso kiebhi kia mu divua, ni ihi ia banza, o ukamba uâ u kola dingi. Kiene kimoxi ué ni kusamba kua Jihova. Bhu kaxi ka Bibidia, muéne u ku tangela o ibanzelu iê ni ihi ia-nda bhanga ku hádia. Eie u tena ué ku mu tangela izuua ioso, o ima ia mu bhita n’eie, katé o ibanzelu iê iala ku muxima. Se u bhanga kiki, ua-nda kala ni ukamba uambote ni Jihova.—Tiiaku 4:8.

IHI I TUA TOKALA O KUBHANGA PHALA NZAMBI KUIVUA O MISAMBU IETU?

5. Kiebhi ki tuejiia kuila Jihova kene mu kuívua o misambu ioso?

5 O kuila Jihova uívua o misambu ioso? Kana. Mu izuua ia polofeta Izaia, Jihova uambela akua Izalaiele: “Kioso ki mu vudisa o misambu ienu, eme ki ngi ivu, mukonda o maku’enu ezala manhinga.” (Izaia 1:15) Se ki tu dilange, tu tena kubhanga ima ia iibhila Jihova, ia-nda mu fudisa kuívua o misambu ietu.

6. Mukonda diahi tua tokala kukala ni kixikanu? Kiebhi ki u londekesa kuila ua xikana Nzambi?

 6 Se tua mesena kuila Jihova uívua o misambu ietu, tua tokala tu mu xikana. (Marku 11:24) O poxolo Phaulu, ua soneka: “Muthu-phe ua kambe o kuxikana ka tena kuuabhela Nzambi. Kuma uoso uiza kua Nzambi ki kala u xikana kuila sai-ku Nzambi, kuma muène mukua kubhandulula oso a mu sota ni muanu.” (Jihebeleu 11:6) Maji ki ku bhingi ngó kudikola kuila tua xikana Nzambi. Tua tokala kulondekesa kuila tua xikana Nzambi, mu ku mu belesela izuua ioso.—Tanga Tiiaku 2:26.

7. (a) Mukonda diahi tua tokala kulenduka ni kuxila Jihova kioso ki tu samba? (b) Kiebhi ki tu londekesa kuila tua mu samba ni muxima uoso?

7 Tua tokala tu lenduka, ni kuxila Jihova kioso ki tu samba. Mukonda diahi? Se tua mu zuela ni nguvulu ia ixi, sé phata tua-nda zuela-né ni kuxila kuoso. Kuma Jihova, muéne o Nzambi Muteni-a-Ioso, tua tokala kuzuela-né ni kulenduka kuoso ni ku mu xila, nguvulu ioso-ioso ndenge. (Dimatekenu 17:1; Jisálamu 138:6) Tua tokala ué kuzuela ni Jihova ni muxima uoso, ki tu tokala kubuabuala ngó mu kusamba mba kubhitulula o izuelu mu misambu izuua ioso.—Matesu 6:7, 8.

8. Kioso ki tu bhinga kima kua Jihova, ihi i tua tokala kubhanga?

8 Kioso ki tu bhinga kima kua Jihova, tua tokala kubhanga kima phala kulondekesa kuila tua mesena o kima ki tua bhingi. Mu kifika, se tu bhinga kua Jihova phala ku tu bhana o mbolo ia kizuua, ki tu tokala ngó kukingila kua Jihova se tuala hanji ni nguzu, tua tokala tu kalakala. Tua tokala kuxikina salu ioso-ioso, se iene ki i tu bhangesa kubhanga ima ia iibhila Jihova. (Matesu 6:11; 2 Tesalonika 3:10) O se tua bhingi kua Jihova phala ki tu te kituxi, tua tokala kulenga o ima i tena ku tu tesa  kituxi. (Kolose 3:5) Mu kiki, tua-nda mona ibhuidisu iene mu bhanga o athu ia lungu ni kusamba.

IBHUIDISU IENE MU BHANGA O ATHU IA LUNGU NI KUSAMBA

9. Tua tokala kusamba kua Nanhi? O divulu dia Nzuá 14:6, di tu longa ihi ia lungu ni musambu?

9 Tua tokala kusamba kua nanhi? Jezú ua longo o maxibulu mê kusamba kiki: “Tata ietu uene mu diulu.” (Matesu 6:9) Muéne uambe ué kuila: ‘Eme ngi njíla, ngi kidi, ngi muenhu. Kana muthu u bhixila kua Tata, ua kambe kuijila ko kuami.’ (Nzuá 14:6) Kienhiki, tua tokala kusamba ngó kua Jihova bhu kaxi ka Jezú. Ihi ilombolola o kusamba kua Nzambi bhu kaxi ka Jezú? Phala Jihova kuívua o misambu ietu, tua tokala kuxila o kididi kia dikota kia bhana Jihova kua Jezú. Kála ki tua di longo kiá, Jezú uéza mu ngongo phala ku tu bhulula ku ituxi ni kúfua. (Nzuá 3:16; Loma 5:12) Jihova ua bhana ué kua Jezú o kididi kia Mukunji ua Dikota ni Mufundixi.—Nzuá 5:22; Jihebeleu 6:20.

U tena kusamba ithangana ioso

10. O kuila tua tokala kufukama mba kuimana kioso ki tu samba? Jimbulula.

10 O kuila tua tokala kufukama mba kuimana kioso ki tu samba? Kana, Jihova ka tu bhinga kufukama mba kuimana kioso ki tua mu samba. O Bibidia i tu tangela kuila tu tena kuzuela ni Jihova mu ukexilu uoso ua ujitu. (1 Malunda 17:16; Nehemiia 8:6; Daniiele 6:10; Marku 11:25) O kia beta-o-kota phala Jihova, o kusamba ni muxima ua kidi ko kuila tu xikama mba tuimana mu kithangana kia kusamba kana. Tu tena kusamba ku muxima mba ni dízui dia suína, mu kididi kioso-kioso ni mu kithangana kioso-kioso, mu muanha mba m’usuku. Kioso ki tu samba, tua tokala kudielela kuila  muéne ua-nda tuívua né muene se tua mu samba ku muxima.—Nehemiia 2:1-6.

11. Ima iahi i tua tokala kubhinga kua Jihova?

11 Ihi i tua tokala kubhinga mu musambu? Tu tena kubhinga kima kioso-kioso kia uabhela Jihova. O Bibidia iamba: “Kima kioso ki tu mu bhinga, se kia xikina mu vondadi iê, muène u tu ivua.” (1 Nzuá 5:14) O kuila tu tena kuzuela ia lungu ni ibhindamu ietu? Xê, tu tena. O kuzuela ni Jihova, kua tokala kukala kála tua mu zuela ni Kamba dietu dia kazola. Tu tena kuzuela ni Jihova kima kioso-kioso ki kala mu kilunji kietu mba mu muxima. (Jisálamu 62:8) Tu tena ku mu bhinga o nzumbi iê ikôla phala ku tu bhana nguzu ia kubhanga o ima ia iuka. (Luka 11:13) Tu tena ué kubhinga kua Jihova, unjimu phala tu tene kusola kiambote o ima ni ku mu bhinga nguzu phala tu kukolokote. (Tiiaku 1:5) Tua tokala ué kubhinga kua Jihova phala ku tu loloka o ituxi ietu. (Efezo 1:3, 7) Tua tokala ué kusambela akuetu, o jindandu jetu ni jiphange mu kilunga.—Ikalakalu 12:5; Kolose 4:12.

12. Ku misambu ietu, ihi ia tokala ku kala ku pholo?

12 Ihi ia tokala kukala ku pholo kioso ki tu samba? Jihova ni vondadi iê. Tua tokala ku mu sakidila ni muxima uoso, mu ioso iene mu bhanga phal’etu. (1 Malunda 29:10-13) Tuejiia o maka iá, mukonda kioso Jezú kia kexile mu ixi, muéne ua longo o maxibulu mê o kusamba. (Tanga Matesu 6:9-13.) Muéne uambe kuila, kia dianga ene a tokalele kusamba phala o dijina dia Nzambi a di xile. Jezú ua londekesa ué kuila, a tokalele kusamba phala o Utuminu ua Nzambi kuíza, ni kubhinga phala o vondadi ia Nzambi a i bhange mu ixi. Kiene kiua kiambe kuila tua tokala kusamba kua Jihova phala kudikila o ibhindamu ietu. Kioso ki tu ta Jihova ni vondadi iê ku  pholo tu londekesa kuila, Jihova ni vondadi iê iene ia beta-o-kota ku muenhu uetu.

13. O misambu ietu ia tokala kubhanga ithangana i kuxi?

13 O misambu ietu ia tokala kubhanga ithangana i kuxi? O Bibidia ki i zuela. O misambu ietu i tena kulebha mba kubuta. Mu kifika, tu tena kubhanga musambu ua butu ande dia kudia, maji kioso ki tu zuela ni Jihova ia lungu ni maka u tua mu dibhana-nau, mba ku mu ximana, o misambu ietu i lebha. (Matesu 6:9-13)  Ki tu mesena kubhanga misambu ia lebha phala ku dizangeleka, kála kia kexile mu bhanga amoxi mu izuua ia Jezú. (Luka 20:46, 47) Jihova ka xikina o misambu íii. O kia beta-o-kota phala Jihova, o kusamba ni muxima uoso.

14. Tua tokala ku samba lukuxi? Kiki ki tu longa ihi ia lungu ni Jihova?

14 Tua tokala kusamba lukuxi? Jihova ua mesena kuila tu zuela-né ithangana ioso. O Bibidia i zuela kuila, tua tokala ‘ku samba,’ “kolokotenu mu kusamba ki mu bhuile,” ni “sambenu sé kufula.” (Matesu 26:41; Loma 12:12; 1 Tesalonika 5:17) Jihova ua mesena ku tuívua ithangana ioso. Tu tena ku mu ximana izuua ioso, mukonda dia henda iê ni mbote iene mu tu bhanga. Tu tena ué ku mu  bhinga phala ku tuendesa, ku tu bhana nguzu, ni ku tu konda o malamba. Se tu bhana valolo ku ujitu ua kusamba kua Jihova, tua-nda zuela-né ithangana ioso.

15. Mukonda diahi tua tokala kuzuela “amén” mu disukilu dia misambu?

15 Mukonda diahi tua tokala kuzuela kiene mba “amén” mu disukilu dia misambu? O kizuelu “amén” kilombolola “kidi muene.” O kizuelu kiki kilondekesa kuila tua xikina i tua bhingi, ni kuila tua mu samba ni muxima uoso. (Jisálamu 41:13) O Bibidia i tu longa kuila, kima kiambote kuzuela “amén” ku muxima mba ni dízui dia suína, mu disukilu dia musambu mu kiônge.—1 Malunda 16:36; 1 Kolindo 14:16.

KIEBHI JIHOVA KIENE MU TAMBUIJILA O MISAMBU IETU?

16. O kuila Jihova u tambuijila muene o misambu ietu? Jimbulula.

16 O kuila Jihova u tambuijila muene o misambu ietu? U tambuijila. O Bibidia iamba kuila muéne “mukua kuívua o kusamba.” (Jisálamu 65:2) Jihova uívua, anga u tambuijila o misambu ia mazunda athu ku mundu, muéne u tambuijila mu maukexilu avulu.

17. Kiebhi Jihova kia tambuijila o misambu ietu bhu kaxi ka ji-anju ni jiselevende jê?

17 Jihova u tambuijila o misambu ietu, bhu kaxi ka ji-anju ni jiselevende jê mu ixi. (Jihebeleu 1:13, 14) Kuene athu avulu, a sambe phala ku tendela kiambote o Bibidia, mu kubhita kithangana a a kundu ku Jimbangi ja Jihova. O Bibidia i londekesa kuila, o ji-anju ja mu kalakala suku ni muanha mu kuboka o “Njimbu iambote” mu ngongo ioso. (Tanga Dijingunuinu 14:6.) Amoxi bhu kaxi k’etu a sambe ué kiá, mu kubhinga kikuatekesu phala kubatula maka akexile mu dibhana-nau, mu  kusuluka a tambula kikuatekesu kia jiphange jetu mu kilunga.—Jisabhu 12:25; Tiiaku 2:16.

Jihova u tena kutambuijila o misambu ietu, bhu kaxi ka jiphange jetu mu kilunga

18. Kiebhi Jihova kia tambuijila o misambu ietu bhu kaxi ka nzumbi ikôla ni bhu kaxi ka Bibidia?

18 Jihova u tambuijila ué o misambu ietu bhu kaxi ka nzumbi iê ikôla. Kioso ki tu bhinga kikuatekesu bhu kaxi ka musambu, phala ku dibhana ni kibhidi, muéne u tena ku tu kolokotesa bhu kaxi ka nzumbi iê. (2 Kolindo 4:7) Jihova u tambuijila ué o misambu ietu bhu kaxi ka Bibidia, i tu bhana unjimu phala kusola kiambote. Kioso ki tu tanga o Bibidia tu sanga-mu ibatulu i tu kuatekesa. Jihova u tena ué kusuínisa phange mu kilunga, u bhana kitambuijilu ki tu suínisa mba kafunga mu kilunga u tu londekesa velusu mu Bibidia i tu kolokotesa.—Ngalásia 6:1.

19. Mukonda diahi saí ithangana tu divua kala Jihova ka mu tambuijila o misambu ietu?

19 Maji saí ithangana tu tena ku dibhuidisa, ‘Mukonda diahi Jihova ka tambuijila luua o misambu iami?’ Lembalala kuila, muéne uejiia o kithangana ni kiebhi kia-nda tambuijila o misambu ietu. Muéne uejiia o ibhindamu ietu. Nange kubhinga kukolokota ni kusamba phala kulondekesa kuila, tua bhindamena muene o kima ki tua mu bhingi ni kuila, tua mu dielela. (Luka 11:5-10) Saí ithangana Jihova u tambuijila o misambu ietu mu ukexilu uéngi. Mu kifika, nange tua bhingi kikuatekesu phala kudibhana ni maka a bhonzo, maji mu veji dia ku tu katula-nau, muéne u tu bhana nguzu phala kukolokota.—Tanga Filipe 4:13.

20. Mukonda diahi tua tokala kukolokota mu kusamba?

20 O kusamba kua Jihova, ujitu ua dikota! Tu tena kudielela kuila muéne ua-nda tuívua. (Jisálamu 145:18) Kioso ki tu kolokota ni kusamba ni muxima uoso kua Jihova, o ukamba uetu ni muéne u kola dingi.