1. Nanhi u tena ku tu tangela o ima ia-nda bhita ku hádia?

O KUILA uevuile kiá minangu ia iibha mu mitelembe, eie ua dibhuidisa se, ‘Kuebhi kua-nda sukila o ngongo íii?’ Ku mundu kuene mu bhita ima iavulu ia iibha, mukonda dia kiki, saí athu amba kuila, kiki kilondekesa kuila o dizubhilu dia mundu dia zukama. O kuila kiki kidi? O kuila tu tena kuijiia ihi ia-nda bhita ku hádia? Kiene, tu tena. Sumbala o athu ka tena kutanga o ima ia-nda bhita ku hádia, maji Jihova Nzambi, u tena. Bhu kaxi ka Bibidia, muéne u tu tangela o ima ia-nda bhita n’etu ku hádia ni ima ia-nda bhita ni ixi.—Izaia 46:10; Tiiaku 4:14.

2, 3. Ihi ia mesenene kuijiia o maxibulu a Jezú ni kiebhi Jezú kia a tambuijila?

2 Kioso ki tu tanga mu Bibidia kuila o dizubhilu dia zukama, ki kilombolola o dizubhilu dia Ixi kana, maji o dizubhilu dia ima ia iibha. Jezú ua longo ku athu kuila, o Utuminu ua Nzambi ua-nda tumina o ixi. (Luka 4:43) O maxibulu mê a mesenene kuijiia o kithangana kieji kuíza o Utuminu, kienhiki ene ebhuidisa Jezú: ‘Ima iíi ia kà bhita thembu kuxi? Kijimbuete kiê kiahi, kia kutukuluka kué, ni kia dizubhilu dia mundu?’ (Matesu 24:3) Jezú ka a tangela o kizuua mba o kithangana maji ua a tangela o ima ieji bhita ande dia kuíza o dizubhilu dia mundu. Ioso ia zuela Jezú kuila ieji bhita, ia mu bhita kiá lelu.

3 Mu kibatulu kiki, tua-nda mona o ima ilondekesa kuila tuala kiá mu izuua isukidila-ku. Kia dianga, tua tokala kuijiia o ita ia bhiti ku diulu phala tu tene kutendela  se mukonda diahi kuene mu bhita ima ia iibha mu ngongo.

ITA KU DIULU

4, 5. (a) Ihi ia bhiti ku diulu kioso Jezú kia kituka Sobha? (b) Kala kiosoneke mu divulu dia Dijingunuinu 12:12, ihi ieji bhita mu ixi kioso Satanaji kieji mu takula mu ixi?

4 Mu Kibatulu 8, tua dilongo kuila Jezú ua kituka Sobha ku diulu, ku muvu ua 1914. (Daniiele 7:13, 14) O divulu dia Dijingunuinu, di tu tangela ioso ia bhiti ku diulu: ‘Mu diulu anga mu kala ita. Mingedi [Jezú] ni ji-anju jê a luá ita ni mudikixi [Satanaji], o mudikixi anga u luá ué kumoxi ni ji-anju jê.’ * Satanaji ni madimonho mê a a lundumuina mu ixi. Xinganeka o kisangusangu kiévu o ji-anju ku diulu! Maji kiebhi kia divu o athu mu ixi? O Bibidia izuela kuila kieji kala kithangana kia malamba phala o athu. Mukonda diahi? Mukonda o Diabhu ueji kala ni njinda iavulu, “kuma muène uejiia kuila o thembu iê ia butu kiá.’—Dijingunuinu 12:7, 9, 12.

5 O Diabhu ua mu bhekela malamba avulu ku athu mu ixi. Muéne uala ni njinda iavulu mukonda uejiia kuila o thembu iê ia butu kiá, Nzambi ua-nda mu buikisa. Tu mone ihi ia zuela Jezú kuila ieji bhita mu izuua isukidila-ku.—Tala o Kibandekesu kia 24.

IZUUA ISUKIDILA-KU

6, 7. Ihi iene mu bheka o ita ni nzala ku athu?

6 Ita. Jezú uambe: “Akua’xi imoxi a kà di kuata ni akua’xi iamukuá; kilômbo kia kà balukila kilômbo kiamukuá.” (Matesu 24:7) Ndumba ni ndumba dia athu ene mu fua mu izuua ietu mu ita m’ukulu ndenge. O kisangela kia  Worldwatch Institute, kia londekesa kuila, tundé ku muvu ua 1914, o ita ia jibha kiá 100 ia mazunda a athu ndenge. O athu afuile ande dia muvu ua 1914 a tolele, o áfu tundé ku muvu uenhó katé lelu, kota. Xinganeka o malamba ni ndolo iene mu kuívua mazunda ni mazunda a athu mukonda dia ita!

7 Nzala. Jezú uambe: “Kua kà kala nzala.” (Matesu 24:7) Sumbala lelu ene mu dima kiavulu m’ukulu ndenge, maji né kiki athu avulu kene mu kala ni kudia kua soko kubhata. Mukonda diahi? Mukonda o athu kene ni kitadi kia soko phala kusumba kudia mba kukala ni mábhia. Mazunda ni mazunda a athu kene ni kitadi né ngó kia kusumba o mbolo ia kizuua. O Organização Mundial da Saúde, iambe kuila, jimidi ni jimidi ja ana-ndenge ene mu fua mivu ioso, mukonda dia kukamba kudia.

8, 9. Kiebhi kiene mu di kumbidila ia zuela Jezú ia lungu ni ixi kutunguta ni mauhaxi?

8 Kitungutu. Jezú uambe kuila: “Oxi ia-ndu tunguta kiavulu.” (Luka 21:11) Mivu ioso ku bhita itungutu ia makota. Tundé ku muvu ua 1900, mazunda aiadi a athu ndenge ene mu fua mu itungutu.  Sumbala o jingijiie ni kikuatekesu kia ji makina ene mu tena kuijiia o itungutu ia-nda kuíza ku pholo, maji né kiki athu avulu hanji ene mu fua.

9 Mauhaxi. Jezú uambele kuila kueji kala “mabhebhu.” Mauhaxi a iibha eji di muanga ni lusolo ni kujibha athu avulu. (Luka 21:11) Sumbala o ji dotolo ene mu dilonga kiambote kusaka mauhaxi avulu, maji kuene hanji mauhaxi avulu, katé kiki o ji dotolo ka sange luua milongo iâ. Mu kidi, o jingijiie amba kuila mivu ioso, jimidi ni jimidi ja athu a fua mukonda dia uhaxi ua kukohona mba uhaxi ua thulu, ua dibuabua, ni ua kabualala. Ko mauhaxi iá ngó ene mu jibha athu avulu kana, o ji dotolo a tokuesa dingi 30 a mauhaxi a ubhe, amoxi kene hanji ni milongo katé kiki.

UKEXILU UA ATHU MU IZUUA ISUKIDILA-KU

10. Kiebhi kiene mu dikumbidila o izuelu i tu sanga mu divulu dia 2 Timote 3:1-5?

10 Mu divulu dia 2 Timote 3:1-5, o Bibidia i zuela: “Mu izuua isukidila-ku kuanda kuiza jithembu jabhonzo.” O poxolo  Phaulu ua londekesa kiebhi kieji kala o athu mu izuua isukidila-ku. Muéne uambe kuila o athu

  • eji kala azodi a ene ngó

  • eji kala azodi a kitadi

  • eji xibhaka tata ni mama

  • eji kamba ufiiele

  • eji kamba henda ku miji iâ

  • keji kufikisa jihânji

  • eji kala ijibhangânga ni akua jinvunda

  • eji kala azodi a jivondadi jâ, ki azodi a Nzambi, kana!

  • eji kala kála a zolo Nzambi maji a dituna ku mu belesela

11. Kála kiosoneke mu divulu dia Jisálamu 92:7, ihi ia-nda bhita ni athu a bhukumuka?

11 Mu diembu mu ua tungu, kuene athu avulu ala ni ifua íii? Ku mundu uoso, kuene athu ala ni maukexilu iá. Maji kua kambe ngó, Nzambi ua-nda bhanga kima. Muéne ua kanena: “Sumbala abhukumuka afuafua muene kála iangu, abhanga o ima ia mangonha u sanga a bhenha; maji saí bhuoso bhua buidila kumoxi, aia muene nzaká! [mba kua jibha.]”—Jisálamu 92:7.

 NJIMBU IAMBOTE MU IZUUA ISUKIDILA-KU

12, 13. Ihi iene mu tu longa Jihova mu izuua isukidila-ku?

12 O Bibidia ia tange kuila mu izuua isukidila-ku, ku mundu kueji kala ndolo iavulu ni malamba. Maji iene i zuela ué kuila, kua-nda bhita ima iambote.

“O Njimbu iíi Iambote ia Utuminu ua Nzambi, ia bhingi ku i tula mu ngongo ioso.”Matesu 24:14

13 Kuijiia kiambote o Bibidia. O polofeta Daniiele ua soneka ia lungu ni izuua isukidila-ku. Muéne uambe: ‘O kuijiia-phe kua k’àia ni ku dibandekesa.’ (Daniiele 12:4) Nzambi ueji kuatekesa o mundu uê kutendela kiambote o Bibidia. Jihova ua mateka kubhanga kiki benge-benge tundé ku muvu ua 1914. Mu kifika, muéne ua tu longo o valolo ia dijina diê ni vondadi iê ia lungu ni ixi. Ua tu longo ué o kidi kia lungu ni sata ia kukúla kua Jezú, ihi i bhita ni athu kioso kia fua ni difukunukinu dia athu. Tua di longo ué kuma, o Utuminu ua Nzambi uene ngó u tena kuzubha o maka oso mu ngongo ni ihi i tua tokala o kubhanga phala kuzediua ku muenhu ni kubhanga o ima ia uabhela Nzambi. Maji ihi iene mu bhanga o jiselevende ja Nzambi ni ima iene mu di longa mu Bibidia? O kitambuijilu tu ki sanga mu kikanenu kia mukuá kia Bibidia.—Tala o Kibandekesu kia 21 ni 25.

14. O njimbu iambote a mu i tula ku jixi jikuxi ni a nanhi ene mu i tula?

14 Kuboka o njimbu mu ngongo ioso. Jezú uambe ia lungu ni izuua isukidila-ku, uixi: “O Njimbu iíi Iambote ia Utuminu ua Nzambi, ia bhingi ku i tula mu ngongo ioso.” (Matesu 24:3, 14) O njimbu iambote ia Utuminu a mu i tula mu 230 a jixi ndenge, mu 700 ja madimi ndenge. Mu ngongo ioso, Jimbangi ja Jihova a tundu “mu ifuxi ioso, ni mu miji ioso,” a mu kuatekesa o athu kuijiia kiambote o Utuminu ua Nzambi ni mbote ioso ia-nda bhanga ku athu. (Dijingunuinu 7:9) Ene a bhanga kiki sé  kubhinga kitadi. Sumbala ni kua zemba ni ku a zukutisa ku athu avulu, ene a suluka ni kuboka. Jezú ua tangele kuila sé-ku kima ki tena ku a fidisa kuboka o njimbu iambote.—Luka 21:17.

IHI I UA TOKALA O KUBHANGA?

15. (a) Eie u xikina kuila tuala mu izuua isukidila-ku? Mukonda diahi? (b) Ihi ia-nda bhita ni ió a belesela Jihova ni ió a dituna ku mu belesela?

15 O kuila eie u xikina kuila tuala mu izuua isukidila-ku? Ikanenu iavulu ia Bibidia ia lungu ni izuua isukidila-ku ia mu di kumbidila. Ku hádia, kioso Jihova kia-nda tangela o mundu uê kuila ka boke dingi, “o dizubhilu-phe” dia-nda kuíza. (Matesu 24:14) O dizubhilu ihi? O dizubhilu, o kithangana kioso Nzambi kia-nda zubha o kuiibha kuoso mu ngongo mu ita ia Alumajedone. Jihova ua-nda tumina Jezú ni ji-anju jê phala kubuikisa muthu uoso-uoso u dituna ku belesela Muéne ni Mon’ê. (2 Tesalonika 1:6-9) Mu kubhita o Alumajedone, Satanaji ni madimonho mê ka-nda tena dingi kunganala o athu. Maji oso a mesena kubelesela Nzambi ni kuxikina o Utuminu uê, a-nda mona o ikanenu ioso ia Nzambi ku dikumbidila.—Dijingunuinu 20:1-3; 21:3-5.

16. Kuma o dizubhilu dia zukama, ihi i ua tokala o kubhanga?

16 Kua kambe ngó bhofele, o mundu iú ua Satanaji ua-nda bhua. Kienhiki, kima kiambote kudibhuidisa, ‘Ihi i nga tokala kubhanga?’ Jihova ua mesena kuila eie uijiia kiambote o Bibidia. Ua tokala u suína mu ku dilonga o Bibidia. (Nzuá 17:3) O Jimbangi ja Jihova ene mu diongeka semana joso phala kukuatekesa o athu kuijiia kiambote o Bibidia. Ndé mu iônge íii semana joso. (Tanga Jihebeleu 10:24, 25.) Se u di longa mu Bibidia kuila ua tokala kulungulula o ukexilu uê, ua tokala u ki bhanga ni lusolo luoso,  kana kukala ni uôma. Kioso ki uia ni kulungulula o ukexilu uê, o ukamba uê ni Jihova ua-nda kola dingi.—Tiiaku 4:8.

17. Mukonda diahi athu avulu a-nda sasumuka kioso kia-nda kuíza o dizubhilu?

17 O poxolo Phaulu ua jimbulula kuila o kibuikilu kia athu a iibha kia-nda kuíza mu kithangana o athu ka-nda ki fika, kia-nda kuíza kala, “kiza o muiii mu usuku.” (1 Tesalonika 5:2) Jezú uambe kuila athu avulu keji bhana mátui ku ima ilondekesa kuila tuala mu izuua isukidila-ku. Muéne uambe: ‘Uila kia kexile mu izuua ia Noué, ni kia kà tukuluka Mon’a Muthu ué kiene. Mbata kia kexile mu izuu’omo, kioso dilúviu kiluua diza, a kala mu kúdia, a kala mu kúnua, ahatu ni mala a kala mu kazala, a a bhana mu ukaza, katé kizuua kia bokona Noué mu álaka. Kejidile kima katé dilúviu dia menha ki dia tula dí dia a kungulula ene oso. Ni kia kà tukuluka Mon’a Muthu ué kiene.’—Matesu 24:37-39.

18. Milongi iebhi ia tu bhana Jezú?

18 Jezú ua tu dimuna mu kuamba kuma ki tu tokala ku landuka ‘ni kúdia jifesa, ni kúnua uhôlua, ni makubhindama ma muenhu iú.’ Muéne uambe kuila o dizubhilu dia-nda tukumuka, “kala mubhetu.” Muéne uambe ué kuila o dizubhilu, dia-nda kuíza “ku thandu dia oso a tungu mu ngongo.” Kienhiki, uambe: “Di langienu-phe ithangana ioso, ni kudionda mu kusamba, phala mu tene ku bhuluka ku ima ioso iíi, ni kuimana bhu pholo ia Mon’a Muthu.” (Luka 21:34-36) Mukonda diahi tua tokala kuívua o milongi íii ia Jezú? Mukonda kua kambe bhofele, o mundu ua Satanaji a-nda u buika. Oso a a xikina kua Jihova ni kua Jezú, ene ngó a-nda bhuluka ku dizubhilu, ene ngó a-nda tambula ué o muenhu ua kalela-ku ku mundu ua ubhe.—Nzuá 3:16; 2 Phetele 3:13.

^ kax. 4 Mingedi, o dijina dia mukua dia Jezú Kristu. Phala kuijiia dingi o maka enhá, tua ku dióndo tala o Kibandekesu kia 23.