Ku bokona mu madisá

Jimbangi ja Jihova

Select language Kimbundu

Ua Mesena Kuijiia o Kidi?

Ua Mesena Kuijiia o Kidi?

O kidi kia lungu ni ihi? Kia lungu ni ibhuidisu ia beta-kota iene mu di bhanga athu. Nange eie ua di bhangele kiá o ibhuidisu kala íii:

  • Mu kidi o kuila Nzambi ua tu zolo?

  • O kuila o ita ni jiphaxi, saí kizuua ia-nda bhua?

  • Ihi i bhita ni etu kioso ki tu fuá?

  • O afú a kinga dingi ihi?

  • Kiebhi ki ngi tena ku samba, phala a ngi’vue kua Nzambi?

  • Kiebhi ki ngi tena ku sanga o ku zediua ku muenhu?

Kuebhi ku u tena ku sanga o itambuijilu ia ibhuidisu íii? Nange se uia mu inzo ia madivulu, (Biblioteca) ueji sanga jimidi ja madivulu ji zuela kuma, ala ni itambuijilu. Maji o madivulu ka zuela ngó kima kimoxi, ene a di tatesa. A kamúkua nange a kala ni valolo lelu, maji mungu ka kala dingi ni valolo, a mukuá a a bhitulula dingi mu ku a soneka, mba a a texi.

Maji-phe muala o divulu mu tu sanga o itambujilu ia kidi. Diene o divulu dia kidi. Jezú Kristu uambe kiki mu musambu kua Nzambi: “O maka mê iene o kidi.” (Nzuá 17:17) Lelu tuejiia kuma o Maka iâ, o Bibidia Ikôla. Mu jimbandu ja kaiela, eie ua-nda dilonga o itambuijilu ia ibhuidisu ia Bibidia i tua bhange mu dimatekenu.

 Mu Kidi o Kuila Nzambi Ua Tu Zolo?

MUKONDA DIAHI TU BHANGA O KIBHUIDISU KIKI: Etu tuala ku mundu uezala ni ima iaiibha. Jingeleja javulu jilonga kuma o jiphaxi ji tu bhita na-ju, o vondadi ia Nzambi.

IHI ILONGA O BIBIDIA: Nzambi nuka ua bhangele ima iaiibha. O divulu dia Jobe 34:10, di zuela kuma, “Nzambi ka tena ku bhanga kiaiibha, o Muteni-a-Ioso ka tena ku bhanga mangonha!” Nzambi uala ni kikanenu kia uabha phala athu. Mukonda dia kiki, Jezú ua tu longo ku samba: “Tata’etu uene mu diulu, . . . o Utuminu uê uize. O vondadi iê ai bhange bhoxi, kála kiala ku i bhanga ku diulu.” (Matesu 6:9, 10) Nzambi ua tu zolo kiavulu, muéne uene mu bhanga ioso  phala ku kumbidila o kikanenu kiê.​—Nzuá 3:16.

Tanga ué Dimatekenu 1:26-28; Tiiaku 1:13; ni 1 Phetele 5:6, 7.

O Kuila o Ita ni Jiphaxi, Saí Kizuua Ia-nda Bhua?

MUKONDA DIAHI TU BHANGA O KIBHUIDISU KIKI: O ita iene mu jibha athu avulu. Etu’oso tuene mu bhita ni jiphaxi.

IHI I LONGA O BIBIDIA: Nzambi ua kanena o thembu ia-nda bheka o paze mu ixi. Mu Utuminu uê, mu nguvulu ia diulu, athu ka-nda “dilonga dingi kulúa ita.” Mu kienhiki, o “jixibhata jâ, a ka ji kitula matemu.” (Izaia 2:4) Nzambi ua-nda zubha o kuiibha kuoso, ni jiphaxi joso. O Bibidia i kanena: “[Nzambi] u a kondona o masoxi moso ku mesu mâ! ki ku kala dingi kufuá, né ngó mukondo, mba ku dila, mba ku kata. Mukonda o ima ia diangele-ku, ia bhiti.”​—Dijingunuinu 21:3, 4.

Tanga ué Jisálamu 37:10, 11; 46:9; ni Mikeia 4:1-4.

Ihi i Bhita ni Etu Kioso ki tu Fuá?

MUKONDA DIAHI TU BHANGA O KIBHUIDISU KIKI: O jingeleja javulu ku mundu ji longa kuma o muthu uala ni nzumbi, o nzumbi i kala ku muenhu kioso ki fuá o muthu. A kamúkua a xikina kuma, ió afú a tena ku bhanga kiaiibha kua ió ala ku muenhu, mba Nzambi ua a kaxtikala mu ku a talesa o hadi mu túbhia, katé ku hádia.

IHI I LONGA O BIBIDIA: Ku alunga, athu ka kala dingi ni muenhu. O divulu dia Ndongixi 9:5 di zuela, “O ió afú kiá . . . k’ejiia dingi kima kioso kioso”. Mukonda athu afú, ka tena kuijiia kima, né kuívua, mba ku bhanga kima, ene ka tena ku bhanga kiaiibha—mba ku kuatekesa—athu ala ku muenhu.​—Jisálamu 146:3, 4.

Tanga ué Dijingunuinu 3:19 ni Ndongixi 9:6, 10.

 O Afú a Kinga Dingi Ihi?

MUKONDA DIAHI TU BHANGA O KIBHUIDISU KIKI: Etu tua mesena ku kala ku muenhu, tua mesena ué ku kala ni kisangusangu ni ió u tua zolo. Mukonda dia kiki, tua mesena ku mona dingi ió afú, u tua zolo.

IHI I LONGA O BIBIDIA: Athu avulu afú, a-nda fukunuka. Jezú ua kanena kuma, ‘oso ala mu jimbila . . . a-nda tunda-mu.’ (Nzuá 5:28, 29) Kala kiexile o kikanenu kia dianga kia Nzambi, athu ió a-nda fukunuka, a-nda kala mu palaízu mu ixi. (Luka 23:43) O kikanenu kiki kilombolola kuma athu a-nda kala ni sauidi ia iuka, ni muenhu ua kalelaku phala athu oso a belesela. O Bibidia i zuela: “O ixi-phe i xalela ku athu iâ a iuka, ene ai lundula muene mu a tunga, o thembu iâ ki i bhu.”​—Jisálamu 37:29.

Tanga ué Jobe 14:14, 15; Luka 7:11-17; ni Ikalakalu 24:15.

Kiebhi ki Ngi Tena ku Samba, Phala a Ngi’vue Kua Nzambi?

MUKONDA DIAHI TU BHANGA O KIBHUIDISU KIKI: Athu a jingeleja javulu a samba. Né kiki, ene a zuela kuma o misambu iâ, kene mu i tambuijila.

IHI I LONGA O BIBIDIA: Jezú ua tu longo kuma, kana ku bhitulula kiavulu o musambu umoxi. “Mu ku samba,” muéne uambe, “kana ku buabuala ngó.” (Matesu 6:7) Se tua mesena kuila Nzambi uivua o misambu ietu, tua tokala ku samba mu ukexilu ua mesena muéne. Phala ku bhanga kiki, tua tokala ku dilonga o vondadi ia Nzambi, ni ku samba kála kia mesena muéne. O divulu dia dianga dia Nzuá 5:14 dijimbulula: “Kima kioso ki tu mu bhinga, se kia kixikinu mu vondadi ia [Nzambi] muéne u tu ivua.”

Tanga ué Jisálamu 65:2; Nzuá 14:6, 14; ni 1 Nzuá 3:22.

Kiebhi ki Ngi Tena ku Sanga o ku Zediua ku Muenhu?

MUKONDA DIAHI TU BHANGA O KIBHUIDISU KIKI: Athu avulu a xikina kuma o kitadi, o fuma o kuuabha, ku tena ku a zediuisa. Mukonda dia kiki, ene ene mu sota o ima ienii​—né kiki ene ka tena ku sanga o ku zediua.

IHI I LONGA O BIBIDIA: Jezú uedikisa o njila phala o ku zediua, kioso kiambe: “A zediua jingadiama ja muxima.” (Matesu 5:3) O ku zediua kua kidi, tu tena ku ku sanga ngó, se tu bhanga kima phala ku bhua o ibhindamu ietu ia muxima​—ia lungu ni Nzambi ni kikanenu kiê, ko kuetu. O kidi kiki tu ki sanga mu Bibidia. O kuijiia o kidi kiki, ki tena ku tu kuatekesa ku tonginina kiambote, se ihi ia beta-kota​—ni ihi ki ia beta-kota. Kuehela kuma o kidi kia Bibidia kiendesa o ima i tu sola, ni i tu bhanga, ki bhangesa kuma o muenhu uetu u beta ku zediua.​—Luka 11:28.

Tanga ué Jisabhu 3:5, 6, 13-18 ni 1 Timote 6:9, 10.

 Tua mono ngó o itambujilu ia ibhuidisu isamanu. Eie ua mesena dingi ilombuelelu? Se uala ni ‘uadiama ua muxima,’ sé phata, eie ua-nda mesena. Nange eie u dibhula ia lungu ni ibhuidisu ia mukuá kála íii: ‘Se Nzambi ua tu zolo, mukonda diahi muéne uehela o kuiibha kuoso ni jiphaxi joso ku mundu? Kiebhi ki ngi tena ku iudika kiambote o muenhu ua muiji uami?’ O Bibidia itambuijila kiambote o ibhuidisu íii, ni maka a mukuá.

Athu avulu lelu ka-ndala ku dilonga o Bibidia. Ene ai mona kuma divulu dionene, dia bhonzo ku di tendela. Ua mesena kikuatekesu phala ku sanga o itambuijilu ia Bibidia? O Jimbangi ja Jihova a bhana ndunge jiiadi ji tena ku ku kuatekesa.

Kia dianga, o divulu O Que a Bíbilia Realmente Ensina? a di bhange phala ku kuatekesa athu ku dilonga o itambujilu ia Bibidia ia lungu ni ibhuidisu ienii. O ndunge ia kaiiadi, o ilongesu ia Bibidia ku dibhata diê. Sé ku futa, muthu u longa o Bibidia, u tena ku ku sanga ku dibhata diê mba bhu kididi kia mukuá kia tokala, kizuua kimoxi mu semana, muéne u tena ku ku longa o Bibidia. Jimidi ja athu ku mundu uoso, a tambula o mbote mu ku dilonga o Bibidia. Athu avulu a zuela kiki ni kisangusangu: “Eme nga sange o kidi.”

Ki bhuala jimbongo ja beta-kota ku ji sanga kála jiji. O kidi kia Bibidia ki tu bhulula ku ima ia madiabhu, ni kavuanza, ni uôma uonene. I tu bhana ué o ku kinga, ni kisangusangu. Jezú uambe: “O kidi mua-nda ku k’ijiia, o kidi anga ki mi bhana ufôlo.”​—Nzuá 8:32.