‘O ngoji io bhidike mu lutatu, ki i batuka lusolo.’—NDONGIXI 4:12.

1, 2. (a) Ihi i tu dibhudisa ia lungu ni makaza a ubhe, ni mukonda diahi? (b) Ibhuidisu iahi i tua-nda di longa mu kibatulu kiki?

EIE ua uabhela kuia ku fesa ia ukaza? Athu avulu a uabhela, mukonda kithangana kia ku sanguluka. Eie u mona kuila, o dikaza dia te izuatu ia fuama kiambote. Mu kidi, ene a sanguluka kiavulu! Mu kizuua kiki, ene a sanguluka ngó, ejiia ué kuila ku hádia a-nda dibhana kiambote.

2 Kienhiki, tua tokala kuijiia kuila saí makaza avulu, kene mu bhana valolo mu ukaza, mu kiki, o ukaza ki uene mu nangenena. Sumbala tua mesena kuila o dikaza dia ubhe a dibhana kiambote, nange tu dibhudisa: ‘O kuila o dikaza didi a-nda sanguluka muéne mu ukaza uâ? O kuila o ukaza uâ, ua-nda nangenena?’ O itambuijilu ia ibhuidisu íii, a tena ku i tambuijila se o munumi, ni muhatu, a dielela ni ku belesela o itumu ia Nzambi mu ukaza uâ. (Tanga Jisabhu 3:5, 6.) Ene a tokala ku bhanga kiki, phala ku kala mu henda ia Nzambi. Mu kithangana kiki, tua-nda xinganeka mu itambuijilu i uana ia Bibidia: Mukonda diahi o athu a mesena ku kazala? Se ua mesena ku kazala, nanhi ua tokala ku kala munumi, mba muhatu uambote? Kiebhi o muthu kia tena ku di pelepalala phala ku kala ni ukaza uambote? Ihi i tena ku kuatekesa o dikaza ku kala ni kisangusangu mu ukaza uâ?

 MUKONDA DIAHI O ATHU A MESENA KU KAZALA?

3. Mukonda diahi, ki kima kiambote o ku kazala, se a mu ku jijidika ku athu?

3 Saí athu, a banza kuila phala o muthu ku sanguluka, ua tokala u kazala—a zuela kuila eie ki u tena ku sanguluka ku muenhu, se ki bhu moneka muthu phala ku kazala nê. O ibanzelu íii, ki ia kidi kana! Jezú ua kexile dikudi, muéne ua zuela kuila o ukexilu ua dikudi, ujitu ua dikota, iu ua suínisa oso a mesena ku kala akudi. (Matesu 19:11, 12) O poxolo Phaulu, ua zuela o mbote ijila mu ku kala dikudi. (1 Kolindo 7:32-38) Jezú ni Phaulu, ka bhana ijila i fidisa athu ku kazala; mu kidi, ‘ku fidisa o ukaza’ a u tange kuila ‘maulongelu a madimonho.’ (1 Timote 4:1-3) Mu kidi, o athu ala kala akudi, a tena ku sidivila kiambote Jihova sé ku thandanganha ni kima. Ki kima kiambote o ku kazala, se a mu ku jijidika ku athu.

4. Kiebhi o ukaza uambote, u tena ku kuatekesa kiambote ku sasa o tuana?

4 O kuila kuala kima ki bhangesa o muthu ku kazala? Kuala. O ukaza ujitu ua Nzambi ietu ia henda. (Tanga Dimatekenu 2:18.) Kienhiki, tu tena ku katula mbote mu ukaza, ni ku tambula o mabesá ijila mu ukaza. Mu kifika, o ukaza uambote, u bheka kisangusangu ku muiji. O tuana a tokala ku kala bhu kididi kia tululuka, ni jitata a tena ku a langa ni henda ioso, ni ku a longa. (Jisálamu 127:3; Efezo 6:1-4) O ku sasa tuana, ki kiene ngó ki bhangesa o muthu ku kazala.

5, 6. (a) Kála ki tanga o divulu dia Ndongixi 4:9-12, mbote iahi a tena ku kala na-iu o makaza se a kala ni ukamba uambote? (b) Kiebhi o ukaza u tena ku kala kála ngoji io bhidike mu lutatu?

5 Xinganeka mu kibatulu kia Bibidia kiala mu dimatekenu dia kibatulu kiki, ni mu jivelusu ja mukuá: ‘Kota o ku kala kiiadi, muthu umoxi ndenge; kuma o kiiadi a beta ku bhanduluka mu ikalakalu iâ. Mba se bhu kala muthu u dibhala, mukuá u mu balumuna; maji ió uala u bheka  uê, kokôlo diê! Kuma se ua dibhale, ki bhua-nda kala mukuá u mu balumuna. Se kiiadi a zeka kumoxi, a di temesa mudiâ; maji o muthu umoxi-phe u di temesa kiebhi? Se bhu kala muthu u sota ku tolola umoxi, kiiadi kiâ à-lua-nê, kuma ene mu ki’amba muene, exi: O ngoji io bhidike mu lutatu ki i batuka lusolo.’—Ndongixi 4:9-12.

6 O jivelusu jiji, ja londekesa o valolo ia ku kala ni ukamba. Mu kidi, o ukaza u bhinga ukamba uambote. Kála ki tua mono kiá mu jivelusu, o ukamba iú, ubheka kikuatekesu ni ku di langa mudiâ. O ukaza u nangenena dingi, se ene ka dielela ngó mudiâ. O ngoji io bhidike mu luiadi, a tena ku u batula ni lusolo. Maji o ngoji io bhidike mu lutatu, ki i batuka ni lusolo. Kioso o diiala ni muhatu a uabhela ku bhanga o vondadi ia Jihova, o ukaza uâ, ua difu ni ngoji u bhita lutatu. Jihova muéne o mbandu ia beta-kota ku ukaza phala o makaza ku di zukama dingi mudiâ.

7, 8. (a) Milongi iahi ia bhana Phaulu ku Jikidistá akudi, ene mu bhânga ni jihanji ja xitu? (b) Milongi iahi i bhana o Bibidia ia lungu ni ukaza?

7 O jihanji ja xitu, ja tokala ku ji bhanga ngó mu ukaza. Kiki kilombolola kuila, kioso o makaza kia bhanga o jihanji ja xitu mu ukaza uâ, kia a bhekela kisangusangu kia dikota. (Jisabhu 5:18) Kioso o dikudi kia bhita mu ‘kitala kia ki kumbi’ kála ki tanga o Bibidia—kiki kiene o kithangana kia ku bhânga ni jihanji ja xitu—mukonda dia kiki, muéne ua tokala ku bhanga nguzu phala ka bhange o jihanji ja xitu. Se muéne ka lange o jihanji jiji, u tena ku ta kituxi. Phaulu a mu tumina ku soneka o izuelu íii, phala o akudi: ‘Maji se ka tena-phe ku di tumina o jihanji jâ, kota-phe a kazale; kuma o ku kazala ki kua soko ni ku uama mu jihanji.’—1 Kolindo 7:9, 36; Tiiaku 1:15.

8 O muthu ka tokala ku kazala ngó, maji ua tokala kuijiia se mukonda diahi ua mesena ku kazala. Kála kiambe Phaulu, oso a kazala, ‘a-nda kala ni jingongo mu xitu.’  (1 Kolindo 7:28) O makaza a dibhana ni ibhidi iavulu, maji o akudi kana. Se eie ua mesena ku sola muthu phala ku kazala nê, ihi i ua tokala ku bhanga, phala ki u kale ni ibhidi iavulu, maji ku kala ni kisangusangu mu ukaza uê? Sola kiambote o muthu u ua mesena ku kazala nê.

NANHI U TENA KU KALA MUNUMI UAMBOTE, MBA MUHATU UAMBOTE?

9, 10. (a) Kifika kiahi kia bhange Phaulu, kilondekesa kuila kiluezu ku kazala ni muthu ua kambe kixikanu? (b) Ibhidi iahi ijila mu ku xibhaka o kitumu kia Nzambi kia lungu ni ku kazala ni muthu ki mubhezi ua Jihova?

9 Phaulu a mu tumina ku soneka o kitumu kiki, kia beta-kota ki tena ku kuatekesa o muthu ua mesena ku sola diiala, mba muhatu phala ku kazala nê: ‘Ki mu sote ku di ta mu kikalakalu kumoxi ni athu a kambe kixikanu.’ (2 Kolindo 6:14) O kifika kiê, kia tundu mu ukexilu ua muenhu ua athu, a bhanga o kikalakalu kia mábhia. Se o iama a bhanga o kikalakalu kiki, ka soko mu nguzu, ene kiiadi a-nda tala hadi. Kiene kimoxi uê, o jikidistá a kazala ni athu ki abhezi a Jihova, a tena ku kala ni ibhidi iavulu. Mukonda se o diiala mba muhatu ua mesena ku kala mu henda ia Jihova, o mukuá kana, kiki ki tena ku a bhekela ibhidi iavulu ku muenhu uâ. Phaulu ua tendelesa o Jikidistá kuila a tokala ku kazala ‘ngó mua Ngana.’—1 Kolindo 7:39.

10 Saí Jikidistá akudi, a banza kuila kima kiambote ku kazala ni athu ki abhezi a Jihova, mu veji dia ku kala ubheka uâ. Saí a mukuá, kene mu belesela o itumu ia Jihova ia lungu ni ku kazala ni athu ki abhezi a Jihova. Mukonda dia kiki, ene mu bhita ni ji hadi javulu. O athu a kazala ni athu ki abhezi, ka tena ku di longa kumoxi o Maka a Nzambi, ku muenhu uâ. Kiki kia a bhangesa ku divua dingi kuila ala ubheka uâ. Mu kidi, kuene akudi avulu ene mu dielela, ni ku belesela o kitumu kia ku kazala mua  Ngana. (Tanga Jisálamu 32:8.) Sumbala a mesena ku kazala, maji a kinga katé kia sanga o mubhezi ua Jihova Nzambi, ua tokala phala ku kazala nê.

11. Ihi i tena ku ku kuatekesa ku sola kiambote, o diiala mba o muhatu phala ku kazala nê? (Tanga ué o  kaxa mu mbandu ia 114.)

11 Mu kidi, o ku kala mubhezi ua Jihova ki kilombolola kuila, ua tokala phala ku kazala nê. Se eie ua mesena ku kazala, sola o muthu uala ni ídifua ia difu ni eie, ua mesena ku suua mbambe mu kikalakalu kia Ngana, ua zolo Nzambi kála eie. O kimbadi kia fiiele, uene mu tu bhana milongi iavulu ia lungu ni maka enhá, kima kiambote ku xinganeka mu milongi íii ni musambu, kuehela kuila o milongi íii, i tu kuatekesa ku sola kiambote i tua mesena. *Tanga Jisálamu 119:105.

12. Ihi iene mu bhanga mu jixi javulu ia lungu ni ukaza, ni phangu iebhi i tu sanga mu Bibidia i tena ku tu kuatekesa?

12 Saí jixi, o jitata ene a sola se nanhi ua tokala ku kazala ni an’ê. Mu jixi jiji, a xikina kuila o jitata ene ala ni unjimu ua beta-kota phala ku sola kiambote nanhi ua tokala ku kazala ni an’ê. Kiki kiene mu bhangesa o makaza ku di bhana kiambote, kála kia kexile m’ukulu. * Mu kifika, Mbalahamu ua tumikisa o selevende iê, phala ku sota muhatu phala mon’ê Izake, kiki kiene mu bhita ué lelu. Mbalahamu ka mesenene muhatu uala ni kitadi, mba uala ni fuma. Mu veji dia kiki, muéne ua mesenene kuila o muhatu ua Izake, ua tokalele ku kala mubhezi ua Jihova.—Dimatekenu 24:3, 67.

 KIEBHI O MUTHU KIA TENA KU DI PELEPALALA PHALA KU ZEDIUA MU UKAZA?

13-15. (a) Kiebhi o milongi iala mu divulu dia Jisabhu 24:27, i tena ku kuatekesa o diiala ua mesena ku kazala? (b) Ihi ia tokala ku bhanga o kilumba ua mesena ku kazala?

13 Se eie ua mesena ku kazala, kima kiambote ku dibhudisa: ‘O kuila nga di pelepalala muene kiambote?’ Ki u tokala ku banza ngó mu ima kála, o ku zola o muthu, kuzeka kumoxi, kuenda kumoxi, mba o ku sasa tuana, ni ku bhanga o ji vondadi ja xitu, phala ku tambuijila o kibhuidisu kiki. Mu veji dia kiki, ua tokala uijiia kuila kuala ima iéngi ia tokala ku bhanga o diiala, mba o muhatu ua mesena ku kazala.

14 O munzangala u sota muhatu phala ku kazala nê, ua tokala ku xinganeka mu kitumu kiki: ‘Dianga ku bhanga o ima ioso ku kanga, dianga ué ku bhanga o midimu iê ku mábhia mu mukau, kiene kiua ki u tunga o inzo phala dibhata.’ (Jisabhu 24:27) Kiki kilombolola ihi? M’ukulu, se o muthu ua mesenene ku kala ni muiji mu ku kazala, ua tokalele ku dibhudisa: ‘O kuila nga-nda tena ku dikila o muiji, ni ku langa kiambote o tuana?’ Muéne ua tokalele ku kalakala hanji ku mábhia. O kitumu kiki, kia tokala ku ki belesela ué lelu. O diiala ua mesena ku kazala, ua di pelepalala phala kuijiia ku dibhana kiambote ni ikalakalu iê. Kiki, kilondekesa kuila o diiala ua tokala ku kalakala, se uala hanji ni nguzu. O Maka a Nzambi, alondekesa kuila o diiala ka bhanga kima phala ku dikila o muiji uê mu ukexilu uoso, ua tundu mu kuiibha, athu a kambe o kixikanu ndenge!—Tanga 1 Timote 5:8.

15 O muhatu ua mesena ku kazala, ua tokala kuijiia, kuila muéne uala ué ni ikalakalu iavulu. O Bibidia iximana o uhete, ni ídifua ia tokala kulondekesa o muhatu, ua mesena ku kuatekesa kiambote o munumi, ni muiji uê. (Jisabhu 31:10-31) O diiala ni muhatu a kazala sé ku di  pelepalala kiambote a mu londekesa luímbi, mukonda ene kejiia se ihi ia tokala ku bhanga, phala ku zediuisa o ukaza uâ. Mukonda dia kiki, oso a mesena ku kazala, a tokala ku di pelepalala kiambote mu ukexilu ua nzumbi.

16, 17. Itumu iebhi ia tokala ku xinganeka oso a mesena ku kazala?

16 O ku di pelepalala phala o ukaza, kua bhingi ku xinganeka mu ikalakalu ia mesena Nzambi, ia tokala ku bhanga o diiala, ni muhatu. O diiala Kidistá, ua tokala uijiia se ihi ilombolola ku kala ku pholo ia muiji. Kiki ki kilombolola kuila, muéne ua tokala ku kala kindanda ni muiji uê, kana. Mu veji dia kiki, muéne ua tokala ku kaiela o phangu ia Jezú, ia ku kala ku pholo ia kilunga. (Efezo 5:23) Kiene kimoxi ué, o muhatu Kidistá, ua tokala kuijiia o ikalakalu ia mu tokala. O kuila muéne ua-nda xila ‘o kitumu kia munumi’ê?’ (Loma 7:2) Muéne ua mu belesela kiá o kitumu kia Jihova, ni kia Kristu. (Ngalásia 6:2) Muéne ua tokala ué ku belesela o kitumu kia munumi’ê, uala ku pholo ia muiji. O kuila u tena ku xila, ni ku kuatekesa o munumi’ê, sumbala muéne mukua ituxi? Se muéne ka xikina ku xila o kitumu kiki, ka tokala ku kazala.

17 O makaza a tokala kuijiia kuila, kala muthu ua tokala ku dikila o ibhindamu ia mukuá. (Tanga Filipe 2:4.) Phaulu ua soneka: ‘Kala diiala mudienu a zole muhatu’ê kala kia di zolo muéne; o muhatu ué a xile munumi’ê.’ Phaulu uambe kuila o diiala ua tokala ku divua kuila o muhatu uene mu mu xila. O muhatu ué ua tokala ku divua kuila, o diiala ua mu zolo.—Efezo 5:21-33.

O diiala ni muhatu a di solo phala ku kazala, kima kiambote ku kala ni muthu uéngi kioso kia kala kumoxi

18. Kiebhi o diiala, ni muhatu ua mesena ku kazala, kia tena kulondekesa o kídifua kia ku tululuka?

18 O kithangana kia ku dijiia, ki kithangana kia ku tonoka ngó. Kithangana phala o diiala, ni muhatu ku dibhana kiambote mudiâ, phala kuijiia kiambote se a tokala ku kazala muéne. Kithangana ué kia kulondekesa o kídifua kia ku tululuka! O vondadi ia ku bhanga o jihanji ja  xitu javulu—mu kidi, Nzambi ua tu bhange kiá ni jihanji jiji. Kienhiki, ió a di zolo ka-nda kuehela kuila bhu kala kima ki bhangesa mukuá ku dibhala mu nzumbi. (1 Tesalonika 4:6) Se mua di solo phala ku kazala, mua tokala kulondekesa o kídifua kia ku tululuka; se ulondekesa o kídifua kiki, ua-nda katula mbote ki kale lelu, ni ku hádia.

KIEBHI KI U TENA KU BHANGESA O UKAZA KU NANGENENA?

19, 20. Kiebhi o ibanzelu ia Kidistá ia lungu ni ukaza ki ia tokala ku difua ni ibanzelu ia athu ku mundu? Bhanga kifika.

19 Se o dikaza a mesena kuila o ukaza uâ unangenena, a tokala a belesela o kikutu kia bhange, kia lungu ni ukaza. O ukaza mu jifilme, ni mu jinovela, uene mu londekesa kuila o ukaza uala ni disukilu diambote. Maji o ukaza ko disukilu kana maji o dimatekenu; mukonda Jihova ua bhange o ukaza phala ku nangenena. (Dimatekenu 2:24) Maji, o athu ku mundu kene mu banza kiki. Saí jixi o athu a zuela kuila o ukaza ua difu ni ‘ku kuta ngoji.’ Ene kejiia kuila o ibanzelu íii ia difu ni ia athu oso ku mundu, ia lungu ni ukaza. Kiebhi-phe? O ngoji io kute kiambote i bhonza ku i jituna, maji a tena ku i jituna.

20 Saí athu a banza kuila o ukaza ki kima kia ku nangenena. Ene a mesena ku kazala, mukonda a banza kuila a-nda tena ku bhanga ioso ia mesena, maji kioso ki bhu moneka maka, ene a tena ku zubha o ukaza. Xinganeka mu kifika ki tanga o Bibidia, kia lungu ni ngoji mu ukaza. O ngoji ia kasa ku navio a i bhange phala ku nangenena, né muene se bhu moneka kitembu kia unéne. Kiene kimoxi ué, o ukaza a u bhange phala ku nangenena. Xinganeka mu izuelu ia Jezú: ‘Ioso-phe ia bandeka Nzambi, ki bhu kale muthu u i uanuna.’ (Matesu 19:6) Se ua mesena ku kazala, ua tokala ku kala ni ibanzelu kála íii. O kuila o kikutu kia lungu ni ukaza kia neme? Kana.

21. Ukexilu uahi ua tokala kulondekesa o diiala ni muhatu, ni ihi ia-nda ku a kuatekesa ku bhanga kiki?

 21 O diiala ni muhatu, a tokala ku kala ni ibanzelu iambote ia lungu ni mukuá. Se o makaza a di suínisa phala ku mona ngó o ídifua iambote ia mukuá, ene a-nda kala ni kisangusangu kiavulu mu ukaza uâ. O kuila ki bhonza ku mona o ídifua iambote ia mukuá, sumbala mukua ituxi? Tuejiia kuila Jihova u mona o ukexilu uambote u tuala nau. O mukuá jisalamu uebhula: ‘Eie, Jihova, se kuila u kuata konda ia ituxi ietu ioso, nanhi muene u tena  kuimana bhu pholo iê?’ (Jisálamu 130:3) O diiala ni muhatu, a tokala a kala ni ukexilu ua ku di loloka mudiâ.—Tanga Kolose 3:13.

22, 23. Kiebhi Mbalahamu, ni Sala, a bhana phangu phala o makaza oso lelu?

22 Mu ku bhita o mivu o ukaza u tena ku bheka mabesá avulu. O Bibidia i tanga o ukaza ua Mbalahamu, ni Sala, kioso ene kia kexile adiakimi. Ene a bhiti ué mu ibhidi, ni hadi mu ukaza uâ. Xinganeka Sala, nange mu 60, a mivu ku xisa o dibhata diê diambote mu mbanza ia Ule, phala kuia mu tunga mu balaka. Maji né kiki, Sala ua xila o munumi’ê uala ku pholo dia muiji. Sala uexile kikuatekesu kiambote phala Mbalahamu, ni ku xila kuoso, ua mu kuatekesa mu ibanzelu iê. Sala ua londekesa o ku xila kuê, ni muxima uê uoso. Sala ‘mu muxima uê’, uejidile kuila Mbalahamu uexile muadi uê. (Dimatekenu 18:12; 1 Phetele 3:6) Sala ua xila Mbalahamu ni muxima uoso.

23 Maji, kiki ki kilombolola kuila Mbalahamu ni Sala, a kexile ni ibanzelu imoxi mu ima ioso. Saí kithangana, Sala ua zuela kima, ‘kia iibhila kiavulu Mbalahamu.’ Maji né kiki, Jihova uambela Mbalahamu ku ivuidila kiambote o izuelu ia Sala, mukonda kieji kuatekesa o muiji uoso ku katula mbote. (Dimatekenu 21:9-13) O anumi ni ahatu lelu, a tena ku katula mbote ku phangu íii.

24. Ukaza uebhi u bhana kijingu kua Jihova Nzambi, ni mukonda diahi?

24 Mu kilunga kia Jikidistá, kuene makaza avulu a sanguluka—o muhatu u xila o diiala diê, o diiala u zola, u xila o muhatu uê, ene a bhanga ioso phala ku ta ku pholo o vondadi ia Jihova. Se ua mesena ku kazala, sola kiambote o muthu u ua mesena ku kazala nê, di pelepalale kiambote phala o ukaza, di suínise kulondekesa o ukexilu ua ku tululuka, mukonda, o ukaza uambote u bhana kijingu kua Jihova Nzambi. Mu ku bhanga kiki, o ukaza uê ua-nda ku kuatekesa ku kala mu henda ia Nzambi.

^ kax. 11 Tanga o divulu Segredo de Uma Família Feliz, mu kibatulu 2, a di bhange ku Jimbangi ja Jihova.

^ kax. 12 Saí jiselevende ja Nzambi m’ukulu, ka kexile ngó ni muhatu umoxi. Kioso Jihova kia dibhana ni jiselevende jê m’ukulu, ni akua Izalaiele, muéne uehela o ukexilu ua ku kala ni ahatu avulu. Ki Nzambi ua a tumina ku bhanga kiki, maji muéne ua zubha o ukexilu iú. Kienhiki, o jikidistá ejiia kuila Jihova ka xikina kuma o abhezi iê, a kala ni ahatu avulu.​—Matesu 19:9; 1 Timote 3:2.