Ku Ximana o Dibandela. O Jimbangi ja Jihova ejiia kuila ku ximana o dibandela, mba ku di fukamena, kioso kia xika o mukumbi ua ixi, ki tena ku kala ubhezelu, o kijingu kiki ka ki bhana kua Nzambi, maji ku jinguvulu jâ. (Izaia 43:11; 1 Kolindo 10:14; 1 Nzuá 5:21) Nabukodonozolo uexile nguvulu ia Babilonha io ukulu. Phala ku bhangesa o athu ku diuanesa, ni u nguvulu uê, ni ubhezelu uê, o Sobha íii ua tungu kiteka kia dikota, iu ua jijidikile o jiselevende jê, ni athu oso ku fukamena o kiteka kia tungu, kioso kia kexile mu xika o mukumbi, ua difu ni mukumbi ua ixi. Kienhiki, minzangala itatu, Sadalake, Mizake, ni Abede-neko—a ditunine ku fukamena o kiteka, né muene a kijidile kuila eji fuá se ka bhangele kiki.—Daniiele, kibatulu 3.

O mukua musoso Carlton Hayes ua soneka, “o dibandela diene o kima kilondekesa o kixikanu kiâ, ni kima kála ubhezelu uâ. O mala a katula o xapé kioso o dibandela di bhita; mu ku bhana kijingu ku dibandela, o akua misoso, a soneka misoso, o ana-ndenge emba muimbu ua ixi.” O diiala didi uambe ué kuila, kála ixi iala  ni “izuua iá ikôla,” kála o kizuua kia ufôlo, ni “athu a fuma” mukonda dia ku bhanga kima phala ku kuatekesa o ixi, ni “ji tembulu jê.” Mu kiônge kia jinguvulu mu ixi ia Brasil, o mukunji ua ita uambe: “O dibandela ene mu di bheza . . . kála kia bheza o ixi.” O Encyclopedia Americana diambe, “o dibandela ni dikulusu ima ikôla.”

O Encyclopédia íii iambe dingi kuila, o mikumbi ia ixi, “izuelu ilondekesa henda ia ixi, athu avulu a bhinga kikuatekesu kia nzumbi, phala athu oso, ni jinguvulu jâ.” Mu kiki, o jiselevende ja Jihova ka tange makutu mu kuzuela kuila o iônge íii, ia lungu ni ku bheza dibandela, ni mukumbi ua ixi. Mu kuzuela ia lungu ni tuana tua Jimbangi ja Jihova, ene mu dituna ku bheza o dibandela ni ku bhanga kima kilondekesa ufiiele ku dibandela, mu xikola ia Estados Unidos, o divulu American Character, diambe: “ Mu ima iavulu ia bhiti, o kibuka kia ku fundisa, kiambe kuila o ijila íii ia lungu ni ubhezelu.”

Sumbala ka bhange mbandu ia iônge ia fidisa mu Bibidia, maji mu kidi, o mundu ua Jihova, a xila o vondadi ia athu ia ku bhanga kiki. A xila ué o dibandela kála ima ia ixi, ni kuijiia kuila o athu a mu tumina “maungana,” a sidivila kála “akunji a Nzambi.” (Loma 13:1-4) Kienhiki, o Jimbangi ja Jihova a belesela o kitendelesu kia lungu ni ku samba phala o ‘jisobha, ni oso ala ni kijingu kia ku tumina’ maji tu bhanga kiki ‘phala tu kale ni muxima ua batama, sé kavuanza, sé jinvunda, mu ujitu ni uendelu ua iuka.’—1 Timote 2:2.

Ku Sola Nguvulu. O Jikidistá a xila o athu a mesena ku sola nguvulu. Ene ka di te mu maka a jinguvulu, a belesela o maungana a solo. Maji ene ka bhange mbandu mu maka alungu ni jinguvulu ja mundu. (Matesu 22:21; 1 Phetele 3:16) Ihi ia tokala o ku bhanga o Kidistá, mu ixi mua jijidika o athu ku sola nguvulu, mba athu a bhanga jinvunda ni athu a kamba ku moneka phala ku sola nguvulu? Mu kuijiia kuila Sadalake, Mizake, ni Abede-neko, endele katé ku Dula, o Kidistá, mu ukexilu iú nange ua tokala uia bhu kididi kieniókio bhuene mu sola o muthu ua-nda tumina se o kitongoluelu kiê ki mu ehela ku bhanga kiki. Maji ua tokala ku dilanga phala ka bhange kima kia iibha kia lungu ni  ufiiele uê, mu ima ia ixi. Muéne ua tokala ku xinganeka mu itumu i 6 iala ku pholo:

  1. O akaiedi a Jezú ‘ka bhange mbandu ia mundu.’—Nzuá 15:19.

  2. O Jikidistá ala bhu kididi kia Kristu, ni Utuminu uê.—Nzuá 18:36; 2 Kolindo 5:20.

  3. O kilunga kia Kidistá kumoxi, a belesela o itumu ia Nzambi, o jiselevende jê a di zolo mudiâ, mu ukexilu kála ua Kristu.—1 Kolindo 1:10; Kolose 3:14.

  4. O athu a sola nguvulu phala ku tumina, ala ni kikuma kia ima i bhanga o nguvulu íii.—Tanga o itumu i tu sanga mu divulu dia 1 Samuuele 8:5, 10-18; ni 1 Timote 5:22.

  5. Kioso o akua Izalaiele kia bhingile nguvulu, Jihova ua mono kuila ene a mu ditunu muene kala nguvulu iâ.—1 Samuuele 8:7.

  6. O Jikidistá a tokala kuzuela ni kidi kioso, mu ku boka ia lungu ni Utuminu ua Nzambi, ku athu oso ku mundu.—Matesu 24:14; 28:19, 20; Jihebeleu 10:35.

Sidivisu ia Bhana Kua ió a Dituna Kuia mu Ita. Saí jixi, o jinguvulu a jijila kuila oso a dituna ku bhanga sidivisu ia ita, a tokala ku bhanga sidivisu ia bhana iala bhu kididi kia kuia mu ita, mu ithangana ia soko. Kioso ki tu dibhana ni maka enhá, tua tokala ku samba, nange tu zuela ni Kidistá ua kulu kiá mu nzumbi, ni kuijiia ihi i tua tokala ku bhanga bhu kaxi ka kitongoluelu kietu, kio longe mu Mikanda Ikola.—Jisabhu 2:1-5; Filipe 4:5.

O Maka a Nzambi a zuela kuila tua tokala ‘ku belesela o maungana, mu ku kala polondo phala ku bhanga Ikalakalu ioso iambote . . . ni ku lenduka.’ (Tito 3:1, 2) Mu kuijiia o kidi kiki, tu tena ku di ibhuidisa: ‘O kuila o ku xikina o sidivisu íii, ia-nda ngi bhangesa ku kamba kulondekesa o ufiiele uami, mba ia-nda ngi bhangesa ku dilunga ni ngeleja ia makutu?’ (Mikeia 4:3, 5; 2 Kolindo 6:16, 17) ‘O kuila o ku bhanga o sidivisu íii, ia-nda ngi fidisa ku bhanga kiambote o ikalakalu iami mu nzumbi?’ (Matesu 28:19, 20; Efezo 6:4; Jihebeleu 10:24, 25) ‘Mu kithangana kiéngi, o kuila o ku bhanga o sidivisu íii, ia-nda ngi bhana kithangana phala ku bandekesa dingi o kikalakalu kiami mu kilunga, nange mba ku kalakala mu sidivisu ia thembu ioso?’—Jihebeleu 6:11, 12.

 Se o kitongoluelu kia Kidistá, ki mu ehela ku bhanga o sidivisu ia bhana kua ió a dituna kuia mu ita, mu veji dia kuia mu kaleia, o Jikidistá ja mukua a tokala ku xila o ima ia solo ku bhanga. (Loma 14:10) Se muene n’a mono kuila ka tokala ku bhanga o sidivisu íii, tua tokala tu xila o kima kia solo o ku bhanga.—1 Kolindo 10:29; 2 Kolindo 1:24.